بسم الله الرحمن الرحيم

السلام عليكم ورحمة الله وبركاته


هارد لكم على الخسارة ، إلي متعودينها من منتخب هذا الجيل .

طبعا لازم نعرف أن المنتخب السعودي هو نفسه يعني ما تغير من أيام ماجد والثنيان إلي هذه الأيام .

يمكن تخالفوني لكن بأوضح لكم

مثلا طريقة لعب المنتخب السعودي وإلي هي تعتمد على التمريرات العرضية والبطء في الهجمة فمثلا بداية حجمة المنتخب تكون كالتالي : الكورة عند الزوري ،، الزوري يعطيها لأسامة هوساوي ،، هوساوي يعطيها للمنتشري ،، المنتشري يعطيها للرهيب والرهيب يوصلها لأحمد عطيف ,,,أحمد عطيف يعطيها لكريري ,, كريري يعطي الزوري ( طبعا لأنه تقدم عشان يساند الهجمة ) ,,, والزوري يعطي تيسير الجاسم ,, تيسير الجاسم يعطي العابد .. والعابد يعطي عطيف وعطيف يلاقي الزوري فاتح خانة ويلعبها له .. والزوري طبعا يسوي عرضية توصل على طول ليد الحارس أو تكون برى أو يضيعها المهاجم .. وعشان هجمة وحدة يضيع من الوقت 3 دقايق.

حتى جيل عبد الجواد وماجد وجيل الثنيان والهريفي كلهم يلعبون بنفس الطريقة يعني طريقة لعب مأخوذة بالوراثة أبا عن جد ،،

منتخب الأجيال السابقة كانت الفرق إلي حوله كلها أقل من مستواه،، عشان كذا هو إلي حقق الأمجاد ولكن في الوقت الحالي من أسباب تراجع المنتخب السعودي هو أننا نبكي على الأطلال ونتذكر التاريخ وصرنا نلعب على تاريخنا .. وما نلعب على الواقع الحالي ... وبهذا السبب إنخفظت سمعة وهيبة المنتخب السعودي .. فأستراليا لم تكن ضعيفة أمام تايلند .. ولكن تايلند تطورت بكل تأكيد ..

العالم يشتغلون ويتطورون وحنا نلعب بالتاريخ ولا نفكر في واقعنا ونطوره .. وين كانت اليابان زمان ؟؟ كان الكل يبغى يلعب معها .. والحين صارت متزعمة القارة على مستوى المنتخبات ... (من جد وجد ومن زرع حصد )

الأمر الثاني ريكارد واضح أن معتمد على الشباب أو على اللاعبين إلي يبي يلعب بهم في كأس العالم 2014 - هذا إذا وصل طبعا - مثل العابد والشهري ومخلي لاعبي الخبرة في الدكة أو أستبعدهم من المنتخب مثل نور والشلهوب .. هل يوجد مقارنة بين وسط يقوده محمد نور والشلهوب وبين وسط يقوده العابد والشهري .. لذلك عندنا مشكلة في الهجوم السعودي إلي ناتجة عن ضعف الوسط .. نور والشلهوب وظيفتهم تقشير كور لمهاجمين وأنت ضميرك مع الحارس .. وهذا النوع من الكور إلي أفتقدها نايف هزازي والشمراني ..


ورسالتي لريكارد : لاتتفلسف وصلنا كأس العالم بلاعبي الخبرة ( نور والشلهوب ) وإذا وصلنا لكأس العالم لكل حادث حديث .. حتى لو تعتمد على منتخب الناشئين..



أخوكم :
قلبي للزعيم عاشق

للرفع
............................................

اخالفك بالرأي اصلن ما دمرنا الا لعيبة الخبره
لا الشلهوب ولا نور المفروض يجلبون للمنتخب خل نعطي فرصه للشباب
منتخب الاولمبي زاخر بالمواهب وكذلك منتخب الشباب
ونغير في المنتخب اللعيبه اللي مع انديتهم ما يستحقوون حتى اساسي امثال الزوري وحمد المنتشري او سعود كريري وحتى احمد عطيف اللي كل باصاته خاطئه ونجلب احتياط قوي لهم من الشباب

أتقبل رأيك بكل صدر رحب .. كل له وجه نظر

حياك الله

يعني الباقين صغار

وصراحه قلبي بدا ينغزني من لاعبين الخبره

شفنا عزوز والعابد كيف بدعو

لكن بما انه على اختار الشلهوب يلعبه او الفريدي ممتاز وصغير

لكن مانبي نقسو على المدرب وبنصبر ونشوف لانه عنده شهر وش بيقدم

وصراحه اشك ان الخلل في الاعبين والا وش السالفه غيرنا كل شي الا هم

ومازلنا مكانك سر