تعالو نخدم المجتمع ونخدم الوطن بـ شكوانا ضد المطابخ - نادي الهلال السعودي - شبكة الزعيم

قاسم البُر · #1 29/08/2011, 12:28 AM

وش تسوي المطابخ في ايام العيد ؟؟ ودنا خروفنا العزيز إلى المطبخ اللي نطبخ عنده دائم بـ 200 ريال .. وقال طبخ العيد بـ 600 ريال .. طيب ليش ؟؟ قال والله هذه اسعار العيد .. طلعنا زعلانين من عنده قلنا المطبخ الثاني كويس ورحنا له قال بـ 500 ريال ( ياللهول ) ورحنا مطبخ ثالث ورابع ارخص ما وجدنا هو سعر 400 ريال للذبيحه الواحده ..

وكل شخص حط عيده في المطبخ بيعرف ان كلامي صحيح وان الاسعار دبل وثري وفور ويمكن توصل قهوه بعد ( لعشاق البلوت خخخ ) طيب وش المفروض نسوي ؟؟ وليش اصلا نتحرك ونسوي شيء ؟؟

انا مواطن وكل من طبخ في هالمطابخ من المواطنين أيضاً .. ورفع السعر بهذه الطريقة ( الاستغلاليه ) مخالفة نظاميه وعليها عقوبه من الدوله وهناك جمعية اسمها ( جمعية حماية المستهلك ) تحميني في مثل هذه الأوقات ..

طيب ليش نشوف هالحركه كل سنه وليش نشوف الاستغلال في كل مكان ؟؟ لاني انا وانت وغيرنا كثير نتذمر ونزعل وننتقد جشع هالناس في المجالس وننتقد الأنظمة الحكومية وانها موجوده ولا تحميني .. ولو سألتك سؤال واحد / هل فكرت ورحت تقدم شكوى ؟؟ أكيد الجواب لا

انا موظف في جمعية حماية المستهلك - مع العلم اني هنا امثل شخصيتي كـ مواطن وسأتقدم بالشكوى لأخذ حقي وردع المخالف - ولكن اذكر مكان عملي لكي يكون حديثي اصدق وحتى تثقو فيه وتحاولو ولو لمره واحده فقط بأن نتحرك ونعمل شيء نغير به عاده سنويه وعاده جشعه في كل مكان وهي الاستغلال برفع الاسعار في المواسم ..

جمعية حماية المستهلك دورها أن تأخذ لك حقك ولكن لا تستطيع ان تأتي وتفتح قضية على هؤلاء المطابخ وتغرمهم وهي ليس لديه مشتكي .. دورها ان تؤكل لك محام يأخذ لك حقك سواء من منشأة حكومية أو تجارية ..

الآن ماذا سنفعل ؟؟ أريد من كل شخص أن يحتفظ بفاتورة المطبخ معه سواء كان قيمتها 300 أو 800 ريال كلها احتفظ فيها .. لان الفاتورة هي الاساس وبدونها لا تستطيع جمعية حماية المستهلك ان تعمل لك اي شيء .. وبعد أن تحتفظ بالفاتورة تقدم الشكوى سواء تذهب إلى مقرهم في ( الرياض - جده ) او تقدمها عن طريق الانترنت وهم يتصلون بك ويرفعون القضية ويتابعونها حتى تنتهي .. وبحول الله وقوته يعود لك حقك وأيضا يتعاقب هذا المطبخ ويكون عبره لكل من يستغل المواطنين بأن الوضع قد تغير وأن الناس عرفت تطالب بحقوقها وبيجيك مثل ما جاء المطابخ .. بكذا نكون أفدنا أنفسنا ورحمنا جيوبنا وأفدنا البلد كلها .. لاني متأكد ان القضية بيكون فيها عدد كبير وبتنشر اعلاميا وقتها سيعرف الجميع ماذا سيحل بهذه المطابخ وسيعرف الجميع ان الدور عليهم لو فكروا يستغلونا مثل استغلال المطابخ ..

عن نفسي سيكون عيدي في سؤال الناس عن سعر طبخ عيديتهم وسأحاول أن أجمع اكبر عدد من المشتكين وخصوصا أن الطريقه سهله ولا يحتاج لها اي تعب فقط تفتح موقع جمعية حماية المستهلك وتكتب الشكوى ثم يتصلون بك ويأخذون مستنداتك ( الفاتورة ) ويقومون برفع شكوى رسميه وتوكيل محامي خاص لك ..

موقع الجمعية http://www.cpa.org.sa/

صفحة تقديم الشكوى http://www.cpa.org.sa/Unco.aspx

كروكي لموقع الجميعة بالرياض وجده ( واظنكم لا تحتاجونه )
http://www.cpa.org.sa/PageDetailes.aspx?Page_ID=94

بالنسبه لإرفاق صورة من هويتك ومن المستندات ( الفاتوره ) تقدر تصور بطاقتك بجوالك وايضا تصور الفاتورة بجوالك وعادي ترسلها .. او تصورها بسكنر او غيرهـ .. وتقدر تكتب في نفس الشكوى اني ما عرفت ارفق الصورة وانها موجوده لدي وارجو الاتصال بي ..

أتمنى ان الجميع يشارك ولا يكتفي بفلان أو فلان بيشتكي خلاص انا مهوب مهم .. لان الفائده لنا وللمجتمع بأكمله .. لان جميع التجار سيتحاشى القضايا ضده اولا لانها تضر باسمه وخصوصا انها تنشر اعلاميا وأيضا لما عليه من الغرامات والعقوبات الاخرى .. والمستفيد هو انا وانت والمجتمع كله ..

وأتمنى من إدارة شبكة الزعيم بأن تتبنى الموضوع ( لإصلاح المجتمع ) وأن تقوم بإرسال رابط الموضوع على جميع وسائل الاتصال الايميل وغيرها لجميع الاعضاء حتى يقرأ الجميع ويشارك الجميع .. أو على الأقل يعرف الجميع كيف يأخذ حقه بدال ما يقاطع ويسوي حملات - وهي إيجابيه هذه الحملات لكن يجب معرفة النظام وكيف تأخذ حقك - اسأل الله أن يوفقني وإياكم لخدمة الوطن والمجتمع ..

واي مساعده في اي شيء أنا حاضر سواء في هالموضوع هنا أو في صفحتي على تويتر ( في توقيعي ) انا مستعد لقديم المساعده في أي امر أو استفسار والله يقدرني وإياكم على فعل الخير ..

* ملاحظه : تستطيع ان تقدم اي شكوى ايضا رفع اسعار او انتهاء صلاحيه او تلاعب في الضمان ( كم واحدن الوكاله سحبت على سيارته ) كلها أمور تخص المستهلك والجمعية تجيب لك حقك إن كان لك حقك إن شاء الله ..