[ يوميات رمضانية "25" ] المتميزة ms. star : يوميات حارة بين الدقوس والفلفل + مواقف حلوة فيها نذالة .. - نادي الهلال السعودي - شبكة الزعيم

المنتدى الاستشاري · #1 26/08/2011, 06:22 AM

فكرة : سندريلا الهلال
إعداد : فَيْلَـسُــ زَمَانَهُ ـــوفْ
تصميم : plastic

السلام عليكم ورحمة الله وبركاته ,,
مبارك عليكم الشهر
واعاده الله علينا سنين عديدة واعواما مديدة
وكل عام وانتم بخير ,,

▌ ▌|[ـΞـ يوميات رمضانية 1432 ـΞ]|▐ ▐

في سلسلة تعودنا على اللقاء بكم
حملتنا اشواقنا إليكم ودفعتنا رغباتنا لكم
عادت سلسلة يوميات رمضانية في كل
عام اعتدنا على لقائكم وهانحن نجدد
التواصل بكم مع وقفات مع اعضاء
برزوا واستحقوا الوقوف معنا
هم هنا ليسردوا لنا تفاصيل
يومهم مع الشهر الفضيل

۞ ❤

أهلا وسهلا بكم اعزائنا الكرام
دعونا نرحب وإياكم سوية
بضيفنا لليوم ,, الخامس والعشرين
العضوة المتألقة :.
..❤{ Ms. Star }❤..
لكي تقوم بسرد تفاصيل يومها مع الشهر الفضيل

ماهو رمضان بالنسبه لك ..؟

رمضآن بالنسبة لي الفرصة الوحيدة للذهاب للمسجد ^^
شهر عبادة وخير وحلم لولا العصبية اللي تجينا من إزعاج الأطفال ..

برنامجك اليومي في رمضان ؟

برنامجي اليومي مختلف عن السابق لذا مثلا اليوم
أنام بعد صلاة الفجر بشويّات أجلس الظهر أصلي
وأقرأ قرآن ع الساعة 1 أشغل التلفزيون على نور دبي أشوف أم حسن
وش طابخه ؟ ,, بعدها أطفيه , أكمل قراءة أو ادخل المطبخ أتفرج
علماً بأنهم رافضين خدماتي مع إني ماهرةفي الطبخ وكذا
لكن يقولون وجود الشغالة يسد بسلامتهم خخخ/ بس طلبوني فترة رسميا على سبيل الإعارة
صلحت لهم حلا وللأسف كلوا لقيمات وحقي لم يمّس أبداً وآخر كان منظره بشع
وبرضوا رفضوا ياكلونه ..

العصر أذن صليت حطيت على بداية اشوف برنامج فطور الجمهور بس الحين
ماعاد يجيبونه أحط ع العربية أشوف وش آخر آخبار القذافي ..
أقرأ قرآن ... تقريبا باقي ع الآذان عندنا بالشرقية ساعه كذا
أخش ع تويتر من جوالي أشيك وش آخر الآخبار ..
وادردش شوي مع اللي عندي ... طبعا دردشة اسلامية او رياضية هههه

باقي على الآذان نصف ساعه أفرش السفرة ( ع الارض ) مو فوق طاولة ض1
عاد الوهقة مثل كل مرة اللي يجي مع عياله ويطب فجأه واللي يعزم رجال
واللي جاي خوية من الامارات ..
على قولة أختي الجود من الموجود ..> ماعطيتونا خبر ...!!

بعد الفطور أصلي وأجهز أغراضي للمسجدنصلي التراويح ( عباتي ونقابي) وهالشيلة والنقاب
مايضيعون الا هالوقت وأنادي على الشغالة دوري معي ,,,,ووو.....
أختي تهاوش تبي تروح اول وحده كل يوم وحده تسبقها ههههههه

فالمسجد زي كل سنة تصير لي قصة مع هالعجيّز ..
لا جيت صليت عند الجدار بالصف الاول وهي تكون موجوده بس ورا
ومن نكبر ونصلي الا غصب تلصقني باللي يمي وهي تصلي مكاني
والله تجيني حالات ودي ..××× استغفر الله بس كبيرة في السن والا كان امر ثاني
ههههههههه

بعدها ارجع البيت طبعا والا شمجلسني هناك ههههه / نحط ع الحرم
والا اروح غرفتي أقرأ قرآن لا جات 12 اختي تتصل فيني نروح القيام
مع زوجها عند مسجد احسن من مسجدنا وقرآته من روعتها ماودك يوقف ..

أرجع البيت ع 2 / أشوف امي منبطحة تطالع حروف وألوف
وتقولي ارسلي لهم ودقي ,, خسرت مايفوق الـ 100 ض1 وش استفدت
قالت امي انتي غبيه / لاتجاوبين بس ارسلي اسمك ..
قلت لها يمه / بلاك ماتدرين طالعي ابرك هههههه
قالت / شوفي ولد خالتك فاز بسيارة هو احسن منك

رحت غرفتي وانا محترة على فلوسي اللي طاروا ليتني
شاريه بطاقه لجوالي ابرك بدل ماهو مصفر ع الاخير ....
جلست أقرأ قرآن إلى الساعة 3 .. بعدها دخلت عتويتر اشيك
واشوف أخبار الهلال ... أذن الفجر صليت ونمت ...
وووبس ....

ماهي اكلتك ومشروبك المفضل في رمضان ؟

سمبوسة جبن + كبسة بالدقوس والفلفل الاخضروالاحمروالاسود والشطة ( على قولة ابوي حتى
الهندي ماياكلها ض1 ( + مشروبي / سن كويك + بيرة هولستن رمان أو كاديه أزرق فقط
أو عصير كابري سن فراولة فقط ض1

متى اول مره صمت فيها . واذا عندك مواقف مع الصيام اذكرها ؟

وأنا في سادس يمكن / أمي تقول انتي صغيرة فطري ض1
وفوق كانت في غرفة اغراض قديمة وفيها جلسة مسوية فيهم قطار
وحاطه فيها مالذ وطاب كل ماجعت دخلت وكلت من العصيرات والكاكاوات
والبطاطس الحار >> هندية / وشي زي البسكويت فوقه شي منتفش ابيض وفوقه شي ملون
بس كنت اعشقه ماادري شسمه ض1

موقف لاينسى حصل لك بـ رمضان..؟

مرة كان رمضان بالشتاء وانا جنوني سمبوسة جبن بس مو اي جبن
سلايس بس ومو اي سلايس شيزدل بس ض1
عقد صح !!

المهم كنت انا بصف سادس وعندي جاكيت حق البرد وفيه جيوب
عميقه واخوي يحب هالسمبوسة عشان مايكلهم دعست 2 فالجيوب
ونسيتهم ...
جات السنة اللي بعدها لبست نفس الجاكيت وانا ادخل يدي حسيت
شي غريب طلعت السمبوسة اللي خبيتها معفنه بس الحمدلله مابه حشرات ض1
وجلست اضحك هذا من نيتي الشينه ض1..

موقف ثاني /

رمضان اللي حنا فيه يوم 10 رحنا للرياض مع اختي
عشان نقضي للعيد ..
في الظهر قبل مانرجع اختي تذكرت ان امي موصيتها
تشتري لها بخور ومعمول ومن هاللي يحبون الحريم
رحنا سوق المعيقليه ( اول ماقريت الاسم قلت يمكن حق ماهر المعيقلي ض1 )
كانت الساعه 2 الظهر حر موت يقتل وه بس وين الشرقية اللي نقول حر ابرد منها

وبنت اختي كل شوي ماما ابي ماي ماما ابي عصير وانا بغيت افطر
واشوفها تشرب من قلب ...><

بعدها قالوا الا نفطر في المملكة ..
وأنا خلااااااااااااااص ابي ارجع بيتنا كرهت الرياض
سوقها وحرها وكل شي ض1

رحنا المملكة ماغير هالقطريين والاجانب / انا اخذت لي رز وشيش طاووق
مااصبر عن الرز ض1 / واختي تبولة وحمص ومن هالخرابيط ض1
المهم البيبسي حقي حار رحت لمطعم ثاني قلت له / ( اكسكيوز مي يو كانت قف مي سم آيس أور نت) ض1
على بالي اجنبي طلع لبناني ض1
قال ولو تكرمي ض1
اختي العلة قومتني من مكاني وللامانة كان مكان استراتيجي ماجنبنا احد
الا قالت قومي مكان احسن وبما انها الكبيرة لزوم اسمع الكلام
شدينا الرحال / وياحزركم من جلس قبالي هاللبناني هي تاكل وتدخل
طبعا معطته ظهرها وهو يخز فيني طول الوقت وانا مو عارفه ادخل شي تحت النقاب
تذكرت حلقة قديمة لطاش ض1
وهو ياكل بطاطا ع قولتهم مع ربعه ويطالع وانا مااكلت غير بضع لقيمات ( جمع لقمه من 3 إلى 9 )
على مايبدو اكلت 4 ض1
وبس قلت لاختي انتي السبب الحين عافت نفسي خلاص ماابي ..

وذاك يضحك الظاهر حس بالمعاناه قليل الحيا ولا قام ..قمت ولا اكلت ورحنا صلينا بالمسجد / قالوا يبون يشوفون البرج من فوق
سويت سالفة لهم اني زهقانه وكذا مع اني ماقد شفته
لكن من الجوع ابي ارجع بيتنا ورجعنا وحبيت كل جدار فيه ض1

كيف نظامكم واجوائكم في رمضان ونظامكم بالفطور والعشاء والسحور.؟

عادية جدا لولا ازعاج 12 طفل لااجتمعوا يقضون على كل شي يقال جراد ماشاء الله عليهم ض1
الفطور / كبسه - مكرونه - شوربة - سمبوسة - لقيمات > يومي
اطباق ثانوية مثل المعجنات والحلا وكذا ياكلونها بعدين ض1

السحور / مانسوي ان بقى من الفطور زين والا كلن يدبر عمره ض1
أحسن شي الواحد مو فاضي يطبخ ض1

هل ترى اختلاف بـ رمضان في السنين الماضيه عن السنوات الاخيره واذا نعم وش الاشياء الي افتقدتها.؟

اي والله به فرق / قديما افضل بمراحل جارك يجيب لك وانت تودي له
واللي يروح واللي يجي لكن الحين حتى جيراننا مانعرفهم خير شر + النفوس ماهي
بمثل أول .. كلن بحاله ~

فقدت وجود أبوي يتعالج برا وهذي السنة الثانية بدونه ،، الله يعافيه ويرده سالم وإن شاء الله السنة الجاية
يكون معنا ..

رسالة في هذا الشهر المبارك .. لمن تبعثها وماذا تقول فيها ؟

لنفسي بما اني صديقتي ض1
أقولها : يابنيّه عسى الله يهديك وتفكينا من الزعل والعصبية ض1 ~

أجمل رمضان عشته حتى الآن , متى ولماذا ؟

رمضان السنة هذي افضل رمضان لأني ماطالعت فيه شي ابد
يالحرم يابرنامج طبخ / مسلسلات ومسابقات وخرابيط مقاطعتها ~

هل تحب تصلي في المسجد القريب من بيتكم او تحب التغيير
ومن القاريء الذي تحرص على الصلاه خلفه في رمضان؟
التراويح مضطرة اصلي بمسجد حارتنا / لكن القيام ان تيسرت صلينا بمسجد الحي الثاني لأن الخشوع
معه أكبر ~
لا أحد محدد لكن اللي يخليك تتلذذ بالآيات أكيد أروح له ..

نبي صوره تلتقطها لنا من يومك الرمضاني المجال مفتوح لك..؟

صورة مكرره للحلا اللي سويته ومحدش اكله بحجة الشبع ض1
...

...

وصورة مكرره ايضا لاكل السواق الغير مسلم عسى الله يهديه
...

...

اليوميات الرمضانية :~

في ذاك اليوم نمت متأخر حوالي 6 الفجر بعد ما قريت كتاب للدكتور فهد المغلوث..
صحيت قريّب العصر .. صليت الظهر .. وجلست ع النت شويتين ودخلت المنتدى قبل مايخرب ..

أخذت لي شاور وماذكرت صلاة العصر إلا بعد حين الله يتوب علي ..
قريت قرآن ’’ وقبل الآذان بربع ساعه فرشنا السفرة والاكل كله برد ض1

وبعد الفطور توليت مهمة تبخير البيت ,, ومن ثم خشيت ع تويتر وعرفت بالخلل اللي اصاب المنتدى
وحالة الاستنفار اللي صارت عند البعض وفرغوا شحناتهم بتويتر ...
رحت صليت التروايح بالمسجد ومن ثم جلست اشوف حملة التبرعات ..

خشيت النت .( شفت المشكلة مابعد انحلت خشيت على بعض مواقع الاخبار /
وشيكت ع الايميل شفت رسالت فيلسوف ويوم خشيت المنتدى لقيتها انحذفت مع البقية ض1
ض1 ) وكتبت الرد على عجالة حتى الحق ع القيام ,, وفالاخير سيارة مافيه ><
فصليت بالبيت وارسلتها لفيلسوف واتمنى كنت خفيفة عليكم ض1...

كل شكر موصول

للعضوة المتميزة --|" Ms. Star "|--

وإنتظرونا غدا مع العضوة المتألقة :-
۞~~| حروف الغلا |~~ ۞