مرحبا بكم جميعا بعد انقطاع للاستجمام في ربوع بلادي .. حبيت اني افضفض شوي عن السفرة واكتب تقرير عنه ..
عنوان الرحلة : رحلة الكسافة
مشينا على بركة الله الاثنين بالليل في الساعة 12 بالضبط ووجهتنا كانت الى ينبع .. طبعا اعضاء الرحلة 3 ونا الرابع .. واميرنا عمره 17 لكن تشوف خشته تعوذ من ابليس
المهم وجهنا لينبع .. صراحة ديرة ماخذه سمعة على غير فايدة .. مافيها شيء غير البحر بس .. لا والشقق كل ابوها فللل .. وقفنا عند عمارة شقق على بالنا عزاب ...
دخلت عليه ودار الحوار التالي :
انا : سلام عليكم
هو : وعليكم السلام
انا : فيه ولا لا ؟ <<
الاخلاق قافلة
هو : ايه
انا :
حلو ابي غرفة وحدة عددنا 4
هو : عزاب ؟؟
انا : ايه !
هو : اااسف عوايل
انا :
مابالغ لو قلت لكم بغيت اصيح دااااايخ مانمت لا ومواصل بدرب
طبعا شاف لبسي ثوب ومفتوح الزرار من الرطوبة والحر
هو : قصمان ؟
انا : ايه !
هو : خلاص نسكنكم عندنا
انا : !!!!!!! خير يابو عوايل ؟!
هو : القصمان كويسين
في تلك اللحظة شعرت بالفخر اني انتمي لهذا المنطقة
انا : لبى القصمان اللي ضبطوا سمعتنا خلاص احجززز.
انتهى
طبعا شارعنا كان خايس ومافيه اي خدمة خير محطة حولنا والمطعم الوحيد اللي حولنا بيتزا هت , غداء بيتزا هت .. تخيل مقدار الحموضة على الظهرية
.. عينا من الله خير بعد نومة وعقبها غداء .. وانطلقنا العصر للبحر ... ندور شاطئ نقعد به مالقينا الا واحد ... لا وكله عوايل بعد !! لولا الله ثم الصدفة بوجود ولد عمي وعايلته كان ماقعدنا على هالشاطئ ..
المهم الامير واعضاء الرحلة ومحدثكم طابت نفسهم من ينبع خصوصا بعد ماخطموا على البيك
.. بخصوص هالنقطة اسأل اي قصيمي رايح للمدينة .. قله ليش رحت ؟ .. ان قال ابزور مسجد الرسول فاعلم انه نصاب
.. ارسلت مرة لخويي قلت له وينك ؟؟ قال بالبيك عند مسجد الرسول
لا ياشيخ يقالك بتضبطه الحين !! ... المهم نرجع للسفرة .. بعد مشاورات ولأنه ماكان فيه تخطيط اصلا قلنا نبي رحلة صيد .. دقينا على واحد على اساس انه بينبع واتفقنا على سعر 150 للساعة ( اخذنا ساعتين ) وينك يالحبيب ؟؟ بالرايس !!
اول مرة اسمع هالديرة .. اخذنا الوصف وكان سهل الا وهي ديرة بين ينبع وجدة
تبعد عن ينبع 80 كيلو فقط ... وشواطئها افضل من ينبع بكل صراحة .. تحرينا ابو الشباب ( ابو ياسر صاحب القارب ) جاء ومعه قشه ... توكلنا على الله في عرض البحر وبدينا نصيد ... طبعا قبل ذا كله كنت متخيل نفسي رامي الصياد الصغير
وابمسك حافة القارب باصبعين .. العن شكله على اصابع بنت كلب
المهم صدنا اللي كاتبه الله لنا تقريبا حول 10 او 11 سمكة .. حنا صدنا4 والباقي ماقصر به ابو ياسر اللي بالمناسبة من مشجعين الاتحاد .. دار بيني وبينه حوار
لكن مشفر ومايصلح .. لبى قلبه والله انه فلاوي مع ان لسانه وصخ
اخذنا السمك وحطيناه بترمس وغطيناه بثلج ... وتوكلنا على الله يم جده .. هذا بخصوص ينبع والرايس
بخصوص جدة .. وصلنا يم جدة ظهرا حوالي الساعة 12 بعد مامشينا من الرايس حول الساعة 10 .. دورنا شقق مالقينا ..
والله وننحر شارع فلسطين حي الحمراء .. وندخل قصر الحمراء للشقق .. طبعا عوايل لكن جدة ماعندهم مشكلة
الى درجة انه ماسألنا حنا قصمان ولا لا
..
يومية الشقة كانت بـ 450
قلنا الشكوى لله واخذناه لمدة يومين وكان جنبنا الفالح للرياضة
... طبعا هاليومين كان اخيس شيء بالرحلة ... طلعنا بالليل وطبعا كلنا ماندل بجدة واول مرة نجي لحالنا .. قال الامير وش بيصير لاضيعنا شوي .. والله ونشغل الموتر ونمشي على وجيهنا .. وحنا اللي نضيع .. ونا اللي انجم ومادري وين الله حاطن .. طبعا الرحلة ككل كان ممشاها حوالي 1600 كيلو .. اللي مشيناه بجدة حوالي 1000 لحالهن
.... كانت الدروب اغلبه حفريات وهذا اللي ضيعنا مرة ندخل حواري مرة يم الميناء مرة حول كورنيش ماندري وشو .. على الله وبعد ساعتين ونلقى دربنا .. قلنا خلاص دامنا دلينا شوي بنروح نفله اللحين ..جينا بندخل منتزهات عوايل .. شاليهات عوايل .. ملاهي عوايل .. الفالح عوايل
مير وتطق تسبودهم العيال تقل ودهم يرجعون .. بينما حنا بجدة طرحت فكرة الطائف ومنتزه الكر المائي وكلنا وافقنا على الفكرة .. لكن الموتر فحماته لك عليه لذلك كنسلناه .. بينما حنا اخذ وعطاء الطايف ولا لا .. دق الوالد
قائلا
: لاتجي البيت الا ومعك برشومي وجب لي ورق برشومي ابزرعه عندنا ولا والله ان نرجع ان وياك ونجيب .. انا :
والله البلشة .. ونا اللي امرق الامير بنظره تحدٍ واقرأ عليه الايه ( قل لن يصيبنا الا ماكتب الله لنا ) .. الطائف الطائف .. حتى لو ماهنا فرامل كلش
طبعا ماعلمتهم بالتهديد اللي جان الا عقب ماتوسطنا بالدرب
.. لأن شغل الجيزنه ذا عندهم زي الحلاوة .. عادي يقلبون ويقولون مانبي الطائف .. وهنا ننتهي بخصوص جدة .
مشينا للطائف الصبح تقريبا الساعة 7 افطرنا بالدرب بمقطعه مابه الا محلين وشلة يمنيه .. ويضبطون لنا الفطور صحنين كبير مقلقل وصحن شكوكة صغير مع البارد والشاهي بـ 40 ريال !!!! .. طبعا ماجازت لي السالفة لكن يوم قدرت الاضرار قلت تروح 40 ولا نروح حنا 4
..
وصلنا الطائف
الساعة 10 سألنا عن المنتزه قالوا مايفتح الا الساعة 2 ونص ..
هنا تبان لك قيمة الطائف وجوها الرايق .. رحنا لأقرب منتزه ونفرش فرشنا تحت ظلال الشجر .. واحلى نومه
.. بعد ساعة من الغفوه .. ضبطنا قهوتنا .. ومادرينا الا والجوامع تخطب وقت صلاة الجمعة .... صلينا جمعا وقصرا للعصر بس .. وعلى طول نحرنا المنتزه ... والله ونلقى عنده برشومي
.. نزلنا للقرية عن طريق التلفريك .. قيمة التذكرة للشخص الواحد 90 ريال ... بس لك من الساعة 2 الى الساعة 12 بالليل .. يابلاش .. نزلنا وسبحنا واستانسنا ..جاء وقت العصر وازدحمت الناس وصارت المسابح بالدور ... طلعنا حنا اخذنا جوالاتنا من صندوق الامانات ... اشوف الجوال القى مكالمات فائته من مين؟ من الكنج طبعا
..
بالخير يبا , سم امر .
الوالد : برشومي طوط طوط
.. لا استهبل
وصان على البرشومي وسلم على الربع .. طبعا حنا طلعنا من القرية العصر قبل الظلماء .. عشان يمدي نجيب ورق البرشومي .. والله ونلقى مزرعة نصوت ياهو ياعالم شفنا مابه احد واخذنا لنا كم ورقة والقصيم ياصديقي ..
مسكنا الدرب .. الطائف الرياض .. انا السواق وكنت مصحصح وموجس نشاط .. اقترحت للامير اننا نمسك الخط الليلة ونمشي للرياض ومن الرياض للقصيم .. هالكلام ذا قبل ماندري كم المسافة من الطائف للرياض .. شفنا اللوحة طلعت 700 وشوي .. حسبناه بتطلع للقصيم 1200 كيلو .. لعل الامير سفل بي بعض الشيء وقال ناموا بس ...
للتوضيح الدرب من الطائف للقصيم تقريبا 700 مع طريق ظلم ... لكن هالطريق بالليل خطير وخطير جدا خاصة انه مقطعه حوالي 150 كيلو وانواع البعارين ... وصلنا لمحطة ساسكو على اساس بناخذ غرف وننام .. لعلنا نمنا جنب المحطه ههههههه ... ونتم بكرامة جعر على اليسار ويمينك تريلات .. من وين تجي النومه ؟
قمنا صلينا الفجر وسرينا وعلى الساعة 11 ونص وصلنا لديرتنا العزيزه الخبراء
طبعا اول مانزلت البرشومي ونحرت الوالد ... الحمدلله شال الوالد الفكرة من راسه وقضبنا ارضنا .. وشكرا لكم
خخخخخ
فهيا قريه بين جده وينبع وليس المدينه وينبع المدينه شمالها وهيا من مناطق المدينه
الوضع العادي
