أنا محمد الراجح طالب جامعي وأعقب في قسم مرور الروضة
فبالصدفة قابلت اللاعب الراقي والرائع خالد التيماوي وحسب لقافتي وبثارتي
سألته عدة أسألة وكان متحدثاً لبقاً وصبور على البثارة واليكم اللقاء الذي جرى:
سألتة : كابتن خالد سمعنا أنك راح تنتقل من الهلال وكلام من هذا؟
قال : لا انا في الهلال وكل هذا كلام جرايد وانا أفكر في هجر الكرة .
قلتلة : لية .
قال : خلاص صرت أحس بملل وأنا كبرت ولاعاد أبي أكمل.
قلت : أفا لية أنتتوك شباب في زهرة العمر شف الثنيان وشلون ماشاء الله
رغم كبر سنة إلا انه مازال يعطي كنة أبو 18 سنة .
قال : لا الثنيان هو اللي يبي كذا والشيء يرجع لإقتناع شخصي .
قلت : طيب من الأجنبي اللي راح يجيبة النادي .
قال : ها ها ها وسكت شوي .
وقال مافية أحد الى الان .
قلت والمفاوضات مع باكيوكو ويا وغيرة .
قال : لا فية مفاوضات ولاشيء الأمر كلة كلام جرايد عندك ناس هنا تكتب ولا فية أحد يقول لهم لية .
قلت : طيب ومن راح في نظرك يجيبون .
قال : هذا أمر اداري لكن هم جابوا لنا محور برازيلي كويس .
قلت : وش تقول فية : لا والله ماعلية يعني لو تأقلم راح يعطي النادي ويفيدة .
وبعدين قال : أنت وش إسمك .
قلت : محمد الراجح .
قال : الراجح وش يصير لك لاعب الهلال سابقاً سمارة ( سلطان الراجح) .
قلت هذا يصير عمي شقيق أخو الوالد لزم .
قال : مشاء الله أجل أنت من عيالنا .
قلت : الله .. الله .
قلت : يالله ياكابتن تامرني شيء .
قال : أنت وش جايبك هنا .
قلت أنا معقب فيذا .
قال : أجل تكفى عندي استمارة سيارة دينا نقل صغير ومكتوب بالإستمارة نقل كبير تكفى ساعدني فيها .
قلت بس : انت اجلس في الكراسي وماعليك .
والله وخلصت شغلة وفرح .
وعطيته كرت المعرض حق الوالد وقال : أنا لازم أجيك .
قلت : حياك الله في أي وقت المعرض معرضك .
قال : مافية شك ..
وراح هو ركب سيارته مع خوية اللي كنة سلطان بن نصيب .
انا رجعت اكمل شغلي


ةأشكركم على حسن المتابعة ..... وشكراً
أخوكم / محمد الراجح .

حلوة منك على أد ( قد )سنك
 

تدري وش أكثر كلمة أعجبتني في الموضوع....
(لقافتي و بثارتي)
لأنك فعلا كثير ..ما شاء الله..
ودامك دخلت فأنت أقل شيء بتكتب 3 مواضيع
وش السر ؟؟ ماأدري!!!

لأني بصراحة
 

أحب انكم تكونون في تحسون بحرقة الدم اللي فيني
وانا تحسبني اذا دخلت افكر وش ابكتب لا انا ماأدخل الا وبجعبتي 3 مواضيع على الاقل
وأشكرك ,

الله يعطيك العافيه

أخوي (محمد الراجح).. أسلوبك جذاب.. ورائع

السلام عليكم ورحمة الله وبركاته
الاخ محمد :
تدري وش اكثر شيس اعجبني في موضوعك هو وخويه اللي كانه سلطان بن نصيب :):):) .

عموما ماادري ودي بس منك تطلع لي مايستفاد من القصه في الاخير ياملقوف :) .
تراني حبيت امزح معك .

والسلام ختام

كفوا والله خلصت اوراق ابو خلود..
والله يعطيك العافيه..صاير صحفي...
شكلك طبيت في حلقه يالملقوف اركد وانا اخوك....
هههه امزح يامحمد...
ومشكورين يالغالي

اخوي محمد دام انك راعي معرض ابنشدك عن هونداي ديانا موديل 94 مصندقه وش تسوى ؟؟
او اجيبها لك ؟ او ترسلني لأحد تعرفه تكفى 000

افا يالربع صار حراج سيارات ماهو منتدى!!!!!!!!!!!!!!!!!!!!!!!!!!!!!!!!!!!!!!!!!!!

محمد الراجح هلا بك اخوي تسلم وماقصرت علي مقابلتك وخدمتك اللي قدمتها لخالد وطمنتنا علي مستوي البرزيلي بس لو كملتها وجبت خبر الللاعب الثالث

مشكور اخوي الراجح على الموضوع الجميل ومافيه شئ احلى من الكلام بالعاميه وتدري انا وش اعجبني في موضوعك هي كلمة ( فيذا) هههههههه
وياليت توافينا بآخر أخبار خالد التيماوي ....الله لايهينك....؟

ياحظنا كسبنا واحد يجيب لنا أخبار لاعب هلالي مهم....؟