بسم الله أبدأ وعليه أتوكل ,,

صبحاكم / مسائكم خيرٌ ويمنٌ ومسرّات ..
أتمنى من الله العزيز الحكيم أن يوفقنا لمايحبه ويرضاه . ويمنحنا الدرجات العلى والدرجة الرفيعة يوم لاينفع مالٌ ولا بنون ، إلا من أتى الله بقلبٍ سليم .!
صراحة ..ماأدري من وين أبدأ وإلى أين أنتهي ! صراحة حنا نتعذب عذاااب ، وغيرنا ما فكر فينا أصلاً ! من نحن المتعذبين ! نحن معشر الشباب الشباب الشباب .. < ما أدري عن الشابات > بـهالصيفية الله يعين فعلا .. إذا الواحد راح لـ مكان استوقفه ذلك السيكوريتي ( عفواً المجمع عوائل فقط ) ! طيب .. نبي مكان نروح نوسع صدورنا فيه . مافيه إلا بلايستيشن أو بلياردو بـ أحد تلك المقاهي . نبي منتزة مكتوب فيه ( للشباب فقط ) وياقف السيكوريتي ويمنع العوائل .. ! ليش مالنا أمكنة نروح لها .. ؟ حنا شباب .. حنا المستقبل .. حنا المُعّتمد علينا لاحقاً .. نحن الجيل القادم .. < ياما سمعناها مراراً وتكراراً من المعلين الأفاضل أو غيرهم من مربي الأجيال > طيب إذا حنا المٌُعتمد علينا..أعطونا مانريد .. أو أقل القليلة أعطوننا حقوقنا !
الشاب ( خاصة مرحلة المراهقة ) راح يحس ان في جسمة فورة ، طاقة . قوة . يريد أن يقضيها . يريد من يستمع إليه .. ليش حنا الطبقة ( المنبوذة ) عند بعض الناس !؟ ليش يروننا أنّا نحن المفسدون ؟ نحن الظائعون الصائعون < منا من هو كذلك > لكن هم يعممون علينا معشر الشباب .
في الأسواق العامة .. إذا مريت بمحل أو شيء وقابلتتك إمرأة . صدقني ماراح تبعد عنك بل يجب عليك أنه أنت من يبتعد .! سبحان الله , عجباً .! واذا درعمت بطريقك راح تشوفك الهيئة وتعال .. ليش تغازل !! قسم نيتي صافية ..و أنا جاي مع الأهل وبالأخير أصير أنا المغازل ..! ؟
الواحد إذا جلس بالبيت قالوا له اطلع مانت مرأة تجلس .. وإذا طلع قالوا سربوت ( ضايع ) وش نسوي . ؟ نخترع صاروخ مثلاً .. ؟
والله شيء يقهر حقيقة ،، قسم إني بديت أفضل الدراسة على الإجازة .. بسبب مانعيشه < ليس الجميع > من طفش كلل ملل بالبيت .!
البلايستيشن احترق من كثر ما ألعب فيه .. الجسم متعب من كثر لعب الكورة . يديني متعورات من كثر الطقطقة على الكيبورد .! نبي شيء ثاني .. لا تخلونا الحين نطلع مظاهرات ، ترى ما نبي نوصلها للحد هذا < مهايطي > لالا عاد صدق . إلى متى ..

س / هل الفتاة تعيش ما نعيشة لكن بعوامل أخرى .. ؟

س / مالحلول في وجهة نظرك .. ؟

ـــ أتمنى الجواب عالأسئلة .. // الموضوع مجرد رأي وفضفضة ,,
أعتذر إن كانت هنالك أخطاء إملائية < الكيبورد خربان >

شكرا للجميع