--- خــدمـــة افــلــقــنــي --- - نادي الهلال السعودي - شبكة الزعيم

هوجاس · #1 16/06/2011, 08:33 AM

صباح الورد ..

هارد لك الهزيمة النكراء ..

الكثير لم يحسب حساب هذه النكسة للهلال ..

لاننا كنا نعتقد اننا افضل الفرق في الدوري لكن :

افلقني ان كان هذا صحيح ..

اود ان اوجز الموضوع بعدة نقاط وافلقني ان كان كلامي خاطيء ..

# افلقني ان كان كالديرون يعرف التدريب ..

# افلقني يجيب الهلال هدف امس لو لعبنا 3 اشواط وخليناها مباراة طائرة ..

# افلقني نتعلم من اخطائنا اللي تتكرر كل سنة ونفس الزمان ونفس المكان مع نفس الفريق ؟؟

# افلقني ياللي تقول ان الاتحاد مو عقدة الهلال .. او انه غير منافس .. والله وكلمة حق انه فريق يستاهل الاحترام .. يقولون عواجيز .. والعجز فينا .. لو كانو شباب وش راح يسون فينا اجل ؟؟

# من بداية الموسم كنت ارى ان الهلال هو الفريق الوحيد الذي سيحصد جميع البطولات وكنت اعتبر الاسيوية جزء من الغنيمة في هذا الموسم .. لكن افلقني لو جبناها معك ياكالديرون لو كان معنا ميسي وانيستا وديفيد فيا ..

..........................

نقاط على حروف :

@ عزيزي الامير عبدالرحمن بن مساعد / والله اني اغليك واعزك واحترمك .. لكن ياسيدي الفاضل مجاملاتك زادت .. استغربت كيف وافقت على كالديرون ؟؟ وانت معطيه خمسة العام ؟؟ كيف وافقت على احمد علي ؟؟
وش وجهة نظركم واين كان تفكيركم وعقلكم يوم جبتو وليد الجيزاني ؟؟؟ لانه يشبه هنري مثلأ؟؟؟

@ سامي الجابر : حبيب القلوب الله يرحم والديك خلك في ادارة الفريق بس .. ابو عبدالله انت اداري ناجح لكن خل شغل السمسرة وجلب اللاعبين لعبدالله بن مساعد .. كالديرون مشيناها لك واحمد علي مشيناها .. ويوم ستامب يمسك مكان جريتس كلنا ندري انك انت اللي تحركه واي احد شاف مباراتنا مع الاهلي 3/3 يدري ان الدعوه محيوسة .. ولكن اخذت فرصتك يابوعبدالله ومانجحت فيها تكفى ركز بشي واحد .. وخلك زي ماكنت مع جريتس ..

@ كالديرون : انت حالة شاذة .. انا كنت شاك من اول انك مدرب بس يوم شفتك طلبت سلمان الخالدي بالاسم وحسستني انه كانافارو العرب غسلت يدي من وقتها وكنت انتظر الطامة تجي ... ولعل هذا الشهر بين كل شي ..

@ المرشدي : اول مرة امس تعجبني ياليتك تستمر وتخلي سوالف الرالي عنك تكفى وانا اوعدك نسوي هدية لك جيب مرهم ووقت الاجازة نخليك تاخذ راحتك فيه وتهجول ونسحبه منك اذا بدا الموسم .. ركز ياخي تراك جننتنا .. يدنا على قلوبنا من اول مانشوف مرتدة ..

@ هوساوي : ريح شوي ترى مو لازم تلعب كل المبارايات يابو كلبشه لاحسيت انك مرهق ريح انت قدوة لكل لاعب سعودي ...

@ الزوري : يارب يارب مع الصيف هذا انك تسخن شوي وترتفع حرارتك .. انت ظهير يعني لعبك بشكل طولي في الملعب من الدفاع للهجوم .. مدري وش العلة معك ؟؟ برودك عجيب وقاتل ..

@ الغنام : محد يلومك ياحلو انت كويس بس محد عطاك فرصة والاصابة لعبت فيك ..

@ الفريدي : يارب انك بعد ماتتزوج يتحرك دمك شوي وتخلي العنجهية اللي فيك والثقة الزايده .. ياحبيبي توك في

طالع على الدنيا يعني قدامك شغل كثير .. لاتحسب انك تلعب قدام نجران والفيصلي زي ماتلعب قدام الشباب والاتحاد .. ولامرة خدمت الفريق بمباراه حاسمه .. تتفرغ للمخاشنات والاحتفاظ بالكورة كانك سيد الملعب ..
واذا معجبك لعب نور وتبي تقلده تري عمره فوق الثلاثين واخذ حقه في الملاعب لين شبع .. اما تحمل هم الفريق والا الفريق مايتحملك ..

@ الشلهوب : لبى قلبك .. وبس ..

@ ويلهامسون : good bay ..

@ احمد علي : شكرا اوي اوي ياباشا دنتا ماعملتش حاقه والله .. بس باين انك ولد طيب وابن حلال ..

هذي اهم النقاط اللي حبيت اوضحها في بعض اللاعبين ..

..........

ختاما : مشكلة معضلة مع الهلال اللعب بمهاجم واحد .. هذي مدري متى نتخلص منها ؟؟

نكون صادقين مع بعض ..

هجومنا ضعيف ماعندنا لاعب هداف ..

ومقتعنين بفكرة مهاجم واحد ؟؟

مشكلة !!

اللهم وفق الزعيم في كل مكان وزمان ..