ياجمهور اتركوا الدلع والتشرط بالمطالبه بكل البطولات وستأتي آسيا ،، تنازلوا شوي ولاتعجزون الفريق وتطلبون كل شي فهذا مُحال - نادي الهلال السعودي - شبكة الزعيم

هلاليه مدريديه · #1 26/05/2011, 01:24 PM

مساء الخير
هاردلك يازعماء ....

بندخل بالموضوع على طووول

قلت وجهة نظري قبل يومين بالفصحى قلت يبدو ان مو الكل بيفهمها

واللحين بقولها بالعامي

( آسيا المستعصيه )
ههالجمله كنت لما اشوفها بالتواقيع ولا بالملعب بلافتات يحملها الجمهور احس بغباء شديد صراحه

يعني انتم مررتوا هالجمله للإعلام السعودي وصاروا يقولون ان الهلال استعصت عليه اسيا

اول شي بالعقل يعني
في فريق يحقق 52 بطوله وتستعصي عليه بطوله وحده ...

لو اجيب مجنون من الشارع بقوله فريق يفوز بكل البطولات بس بطوله وخده عجز عنها
واستعصت عليه بيقول في شي غلط وفي سبب

ومافي بطوله تستعصي على فريق الا اذا كان مبتعد اصلن عن المنصاات مثل فريق النصر او الاهلي او الشباب حتى اللي يختفي سنوات ويرجع
هنا ممكن تنصدق

بس تقولون مستعصيه وفريقنا زعيم

يحمل بسجله ست بطولات اسيويه وتقولون اسيا مستعصيه ههههههههههههههههههه
هذا قمه الغباء سوري

نجي لأسباب عزوفنا عن الآسيويه
(اسميه عزوف وليس عصيان )

فريق يملك كل مقومات الفوز
من اداره للاعبين لإعلام لتجهيز ومايفوز بالبطوله

السبب بسيط جداًهو عدم التفرغ التام لها والتركيز عليها هي فقط دوناً عن البطولات المحليه

لو نلاحظ بشكل سريع جدا واعتمادا مني على ذاكرتي

بالعصر الذهبي للهلال اسيويا يعني على زمن سامي الجابر ويوسف
ماتلاحظون ان الفريق يركز على الاسيويه وتذهب المحليه للشباب او الاتحاد
وحتى لو ركزنا بالدوري كان لدوري وقتها مربع ذهبي
يعني اجمع كم نقطه تدخلك للمربع وبعدها العب مباراتين تخليك تاخذ كاس الدوري

يعني جهد اقل
فالبتالي ينصب التركيز والجهد باآسيا

لكن اليوم ومنذ ان اصبح الدوري نقاط اصبح هناك جهد كبير يبذل
فتصير كل مباراه نهائي ويحط الفريق كل جهده وحمله فيها
تخيلوا دوري تسع شهووور نركز فيه
وكاس ولي العهد
ويتزامن هالشي مع بدايه اسيا نبداها صح دايم لو تلاحظون
ولكن مع تتويج الزعيم بالدوري يبدا البرود عند اللاعبين التلقائي ويبدا الارهاق
ويخف الحماس عندهم

ارجعوا بالذاكره لورا
وشوفوا من بدينا نسيطر محلياً ونركز بالبطولات المحليه ونتسيدها صارت اسيا صعبه وتذهب بسرعه من بين ايدينا
وبالتسيعينات كانت اسهل وكنا محلياً غير مركزين فنترك المجال للغير من المنافسين لنيل المحليه

لذا كنا ننتصر باسيا

ياجمهورالهلال العزيز
اسيا ليست صعبه لاحظوا ان الدور الاول سهل لان فرص التعويض فيه باليد
المبارايات تلعب ذهاب واياب عشان كذا سهل تعوض

والادوار النهائيه اكثر من يجيد هذه اللعبه الهلال
يعني الدوري اصعب بكثير وححقناه 13 مره
لكن تركيزنا على الدوري والكأس هو من يخذلنا بالادوار النهائيه باسيا

اي فريق يركز بشي يجيبه
الهلال ركز محلياً فتسيد وقدر يجيب البطولات
ماذا لو ركز اسيويا ؟؟

بيجيبها لان التركيز اساس كورة القدم
شفتوا نادي الجزيره الاماراتي قالوا مانبي اسييا بنركز فقط بالدوري
وفعلا فازوا بالدوري

هذا معناه ان التركيز على بطوله يجيبها بكل سهوله
مع ان الجزيره لاول مره تفوز بالدوري

وترك الجزيره اسيا
فتركته اسيا

الاتحاد هالموسم والموسم الماضي مستواه محلياً بنزول مستمر
ولكنه ركز على اسيا حتى لو لاحظنا انه لعب الدور الاول باسيا ويرجع يلعب بالدوري وكأنه مو هذا النادي اللي لعب قبل ايام
تصدر مجموعته
وهو يحقق تعادل تلو الاخر بالدوري
ونجحت هالنظريه ( نظريه التركيز اللي اقولها

) نجحت مع الاتحاد فعلا ودخل بكل قوته بمباراته معنا
تخيلوا الفريق خاسر الدوري لذا دخلوا بمعنويات عاليه يبون يعوضون جماهيرهم

بينما الهلال دخل وهو لسى فرحان بالتتويج قبل ثلاث ايام ومتخدر ع الآخربعد الكأس

وتلقائيا اللاعبين يقولون لوانهزمنا ماراح يزعل الجمهور لاننا حققنا بطولتين هالموسم

ومالومهم صراحه لان جمهور الهلال مدلل

يبون كل البطولات وهذا مستيحل ياناس

تبون فريقكم يجيب الدوري وكاس ولي العهد واسيا
حشى ماكينه دخلوا لها خمسين ريال واطلبوا بطوله تجيكم

افهموا ترا اللاعبين بشر وعندهم طاقه لازم مانخلي طاقتهم تروح بالبطولات المحليه لااننا شبعنا منها
نبي طاقتهم تتوفر بالاسيويه فقط

ولاتطالبونهم بالدوري السنه الجايه بس سنه اصبروا

وشوفوا لوماجتنا اسيا تزحف تقول تكفون خذوني

اداره الهلال صراحه مدلعه الجماهير
كل مايطلبون شي قالوا سمّوا ولبيه

نبي الدوري

ابشروا نجيبه لكم

لالا هالمره نبي الدوري بس بدون هزيمه لو تكرمتوا

سمّو طال عمركم هذا الدوري وبدون هزيمه
وياليت نفع معكم لا وماحضرتوا للتويج بالشكل المطلوب بعد ( شاحذ ويتشرط )

لو سمحتوا ياداره نبي ارقام قياسيه ونبي نفوز لاخر مباراه عشان ناخذ نقاط قياسيه محد وصلها

وهذي النقاط اللي تبونها
في اي اوامر ثانيه ياجمهور

ابد بس اسيا بعد ثلاث ايام من التتويج اللي ماحضرنا له وتشيعنا من الدوري < تذب

عاد الاداره قالت ابشروا

بس اللاعبين هالمره ماقالوا سمّوا خخخخخخخخخخخخخ

اذا انتم ياجمهور مليتوا من البطولات وماحضرتوا للتويج
اللحين جايين وتقولون نبي اسيا

ليش انتم قدرتوا جهودهم اول ....؟

حفزتوهم بمباراه نجران وحضرتوا عشان تشجونهم لاسيا بعدها بثلاث ايام ؟؟؟

ابد والله حسستوهم بالبرود وبس هذا اللي قدرتوا عليه

ع العموم ( لو ) تفتح عمل الشيطان

وهرجن بالماضي نقصان بالعقل

المطلوب اللحين من الاداره :

_ لاتدلع الجماهير صايرين الطفل المدلل والله ياجمهور الهلال شوفوا الانديه الثانيه يتشفقون بطوله

_ التركيز ثم التركيز على اسيا الموسم الجاي فالفريق مرتاح محلياً لايضر ان ابتعدنا موسم واحد وركزنا على اسيا وبحثنا عن المركز الثاني بالدوري ووفرنا جهد
_ الاحتفاظ بويلهامسون ورادوي فلاتسمعوا لاحاديث الجمهور( الغير ناضجه ) يعني ويلي مباراه وحده مافوزنا نسينا كل مهارته كل الانديه بالمملكه تتمنى ويلي وكلهم يخافونه
واللحين نجي نفرط فيه ونحقق لهم اللي يبونه
نفسهم يشوفون الهلال بدونه لانه باختصار يخيفهم كثيرا فهو افضل محترف اتى للمملكه
فلا نجعل غضب مباراه تخسرنا امكانياته
ماقابل مشجع غير هلالي الا ويقول ( ياويلنا من ويلي )

ورادوي نزل مستواه شوي صحيح ولكن لاننسى ان لهذا سبب وهو البحث القوي وراه من قبل الانديه والحفرله ليقع
العقوبات التي طبقت عليه اثرت عليه كثير ولاننسى ان هذا الهدف المرجو من العقوبات عليه فيجب علينا ان لانحقق لهم اهدافهم ونلغي عقد رادوي لان اللاعب نحتاجه بالمرحله القادمه لان التسديد بقوه من بعيد مو كل اللاعبين يتقنونه
نحتاج كثيراً لقدمه القويه فلايجب التفريط به ابد كي لانندم ويفرح الاخرون
_ ياسر القحطاني يجب ان يجلس على دكة الاحتياط لحين رجوعه لمستواه واعطاء الفرصه لعيسى
والله عيسى فنان وهادى جدا داخل الـ18 وحتى مايطيح اذا لمس الكوره

< ماتذب على ياسر
وعنده مهارات عاليه اذا ماستفدنا منه اللحين اجل متى بنستفيد

_ مهاجم اجنبي مهاري وفذ هذا هو اللي بجيب لنا اسيا لان الادوار النهائيه تبي لها مهاجم يطلع بالوقت الصعب
وبالدقايق الحرجه

محتاااجين مهاجم اجنبي بسرعه وعااااجل ارجوكم واسيا بتجي معه صدقوني

المهاجم المحلي ماينفع والله بالوقت الصعب يختفي
لان اللاعبيين المحليين يرتبكون وقت المباريات الصعبه وتلقاه يطيح وحالته حاله

وسطنا اقوى الخطوط ويمكن افضل خط وسط بالانديه يعني مع مهاجم اجنبي بنولع اسيا السنه الجايه وتقولون انا قلت

حتى لو تذكرون خمسة الاتحاد

مين جابها

خلاص اكيد جاوبتوا

كلهم اجانب

تياقو وويلي

_ اممممممممم وش بقى بعد ذكروني

_ اي صح اهم شي مدرب غير كالديرون

صحيح انه موب شين بس الهلال ماينفع معه زي طريقة كالدي
جيرتيس هو النموذج الممتاز للهلال العام جبنا اسيا معه الا شوي

بس تفكيره بالمغرب شتتنا قبل النهايه مع ذوب آهن ولكن لاحظوا العرض اللي قدمناه باسيا العام

افضل من هالسنه بكثير
اممممممممممم وش بقى

خلااااص كذا اسيا بخزائننا

وبإذن الله السنه الجايه ابارك لكل الهلاللين بالكأس الغاليه فهي حبيبة الهلال

ولكن كونوا بالموعد دائما مع الزعيم اينما ذهب وازروه بالملعب ولاتكرروا قلة حضروكم زي هالموسم

لاتطلبوا من اللاعبين شيء اذا لم تحضروا بالشكل المطلوب

فحينها لايحق لك عزيزي المشجع

السبت مباراه للهلال نبي الملعب فلّ
ونبي تحفيز وتشجيع وليس سكوت وحزن وكأننا بعزاء بالملعب

تعلموا من جمهور الاتحاد التشجيع وفنونه
احضروا وازروا ولن تندموا فالهلال يستحق

وآخيرا احب ان اختم بأمنيه صغيره ياليت كل الجمهور يحققونها لي

ماعاد ابي اشوف ( المستعصيه )

لا بالموقع هنا
ولا بالملعب بلافتات

ارجووووكم

وإلى اللقاء
مع تحياتي لكم

هلاليه مدريديه · #2 26/05/2011, 01:36 PM

ترا في اخطاء املائيه بسيطه يعني ماتغير من المعنى

< والمطلوب

المطلوب سلّكوا ومشوا

لإني متكاسله اروح اعدل ولاعدلت تلخبط الكلام والخطوط

المهم انكم فهمتوا حرف حرفين مايضر

واتمنى الرفع من المشرفين الكرام

زعيم تورنتو · #3 26/05/2011, 02:43 PM

لقد اصبتي ورب العباد وكلامك مئة بالمئة
نعم الفريق محتاااج لقلب دفاع متمكن لايهاب الخصوم
امام مرماه وكذلك لصانع العاب يضع المهاجمين امام المرمى
والى رأس حربة مهاري يعرف طريق المرمى جيدااا
والى مدرب كبير واتمنى ان يكون الايرلندي مارتن اونيل
واعتقد ان التعاقد معه من بدري سيجعله يعد زعيمنا جيداااا
للموسم القادم محليا وخارجيا .
اشكرك ياعزيزتي على موضوعك الراائع .

أبومفرح · #4 26/05/2011, 02:54 PM

اقول لا يكثر بلا دلع بلا زفت
بطولاتكم ما نبيها بس نبي اسيا

البدائع بلاد الروائع · #5 26/05/2011, 02:56 PM

هلاوغلا

طيب ممكن وجهة نظر

توزيع البطولات

الفريق الاول
الدوري وبطولة اسياء

الفريق الاولمبي
كاس فيصل وكاس ولي العهد

كاس الملك
دمج بين الفريقين لان الاسيوية والدوري انتهى

موسم تجربه قد تكون ناجحه بكل لمقاييس

دمتي بود

زعيم تورنتو · #6 26/05/2011, 03:00 PM

إقتباس

الرسالة الأصلية كتبت بواسطة أبومفرح


	اقول لا يكثر بلا دلع بلا زفت بطولاتكم ما نبيها بس نبي اسيا

زفت ,, يااخي ضاقت بك التعابير ولم تجد كلمة افضل من تلك

نأمل الارتقاء بأدب الحوار وفن التخاطب لكي نخرج بشئ مفيد تجاه

زعيمنا

هاوي فن الزعيم · #7 26/05/2011, 03:04 PM

ماقصرتي اختي طرحتي فـ ابدعتي

!! استغرب من اخوي ابو مفرح طريقه كلامه ياليت نرتقي اشوي بطرحنا ولا تصير عقولنا صغيره !

تحياتي

مواصل من يومين · #8 26/05/2011, 03:08 PM

ذنــب الهــلال إنه عـودنـا على الذهب وإننـا نطــالبه بكــل البطــولات التي يشاركـ فيها حتى لو كــانت وديــه .!
فلا نعاتب الجمهور على مطالبه

شكراً
....

لبيه وش ذا الحكي · #9 26/05/2011, 03:12 PM

انا انسان صراحه ماصارت اسياء اكبر اهمي

هلاليروماني · #10 26/05/2011, 03:36 PM

كلاااااااام سليم بصراحة نعم صحيح بطولة مهمة بس ترى الهلال موب ماخذ كل شي

14الأزوري الآسيوي20 · #11 26/05/2011, 03:46 PM

1- التعاقد مع يحيى الشهري بأي مبلغ 15 مليون او مقايضة البرقان او الجيزاني

يجي واحد يقول مايستاهل ياخي انت في عصر الاحتراف

2- التعاقد مع مهاجم محلي مثل سعد الحارثي و مهند عسيري او السعران اهم شي يجي سعد

بتجي تقول سعد انتهى ياعمي لو عنده جمهور واعلام مثل ياسر لاصار افضل لاعب سعودي

يكفي سعد يسجل ويصنع ويرجع يستلم كورة ياسر له 7 سنوات معانا ولم يحدث فارق اسيويا وعشان ياسر يحس بالخانه ان في احد ينافسه

3 - التعاقد مع ظهير ايمن مثل لاعب الاهلي محمد مسعد او مقايضة بعزيز

4 - التعاقد مع صانع العاب له قيمته الفنيه

5 - حضور فورا والتعاقد مع المدرب مارتن اونيل

6 - التعاقد مع مدافع محلي مثل ماجد بلال او احمد البحري عمره 29 ويلعب بقلب الدفاع والظهير الايمن

7 - يجب تسريح الجيزاني والكعبي وفيصل الجمعان

ركن ياسر القحطاني بدكة الاحتياط وعدم اللعب فيه في المباريات الحاسمه وخاصه بالاسيويه واعطاء الفرصه لـ رضوان الموسى

الشارة القياده تكون بين رادوي او الشلهوب لانهم هم روح الهلال

سامحوني فـ الكيان اهم من كل شي

اذا رحل لاعب يأتي اللي افضل منه

ياسمو الامير منظر ام صلال تكرر ووعدت الجمهور لن يتكرر مره ثانيه

وتكرر مع ذوب اهان والآن مع الاتحاد

لا يوجد فريق في العالم لا يخسر

لكن أن

تكون الخسارة

بلا روح ولا مستوى

فهو الغبن والقهر

تكفى ابو فيصل درغبا بيرحل عن تشلسي اتمنى استقطاابه

غلطه سراي عارض عليه 4 مليون يورو والصفقه ع وشك الانتهاء

وش المانع يابو فيصل

هلاليه مدريديه · #12 26/05/2011, 03:58 PM

إقتباس

الرسالة الأصلية كتبت بواسطة زعيم تورنتو


	لقد اصبتي ورب العباد وكلامك مئة بالمئة نعم الفريق محتاااج لقلب دفاع متمكن لايهاب الخصوم امام مرماه وكذلك لصانع العاب يضع المهاجمين امام المرمى والى رأس حربة مهاري يعرف طريق المرمى جيدااا والى مدرب كبير واتمنى ان يكون الايرلندي مارتن اونيل واعتقد ان التعاقد معه من بدري سيجعله يعد زعيمنا جيداااا للموسم القادم محليا وخارجيا . اشكرك ياعزيزتي على موضوعك الراائع .

يعطيك العافيه على المرور
وان شاء الله يتم التعاقد مع مارتن اونيل

شكرا لك

هلاليه مدريديه · #13 26/05/2011, 04:02 PM

إقتباس

الرسالة الأصلية كتبت بواسطة أبومفرح


	اقول لا يكثر بلا دلع بلا زفت بطولاتكم ما نبيها بس نبي اسيا

اخوي شكلك مافهمت كلامي او انك قريته مستعجل
ماقلت الجمهور يبي كل البطولات يعني تنازلوا عن اسيا
انا قلت لاتطلبون كل البطولات المحليه والاسيويه صعب جدا ومستيحل يتحقق
تبون اسيا تنازلوا عن المحلي شوي انتم لو ماياخذ الفريق الدوري والكأس بتنجنون وبالمقابل تبون بعد اسيا
يعني كذا مايصير تنازلوا عن الدوري وركزوا باسيا فالفريق بشر مثلنا لديه طاقه حددوا بطوله واحده وخفوا ضغط على الفريق ومطالبته بكل بطوله يدخلها

مثل ماقال جيرتس ( الهلال مطالب بكل بطوله يلعبها ان يفوز بها ) < كلامه

صدق والله كل الفرق العالميه تركز ببطوله وخلاص
احنا نبي كل شي

شكرا لك على المرور

@14هلالي20@ · #14 26/05/2011, 04:11 PM

الحمدلله على كل حال ...
ولاحول ولا قوة الا بالله...
وبالوفيق للهلال بالبطولة الجاية ...
تحياتي،،،

هلاليه مدريديه · #15 26/05/2011, 04:11 PM

إقتباس

الرسالة الأصلية كتبت بواسطة البدائع بلاد الروائع


	هلاوغلا طيب ممكن وجهة نظر توزيع البطولات الفريق الاول الدوري وبطولة اسياء الفريق الاولمبي كاس فيصل وكاس ولي العهد كاس الملك دمج بين الفريقين لان الاسيوية والدوري انتهى موسم تجربه قد تكون ناجحه بكل لمقاييس دمتي بود

هاه شفت اننا كجمهور نتشرط

الدوري زي ماذكرت انا يبيله جهد خاص وياخذ كل طاقة الفريق

عموما منور اخوي
ميرسي لتواجدك