الهلال …. الهلال …. الهلال …
تكاد لا تفتح جريده أو مجلة الا تلقى اسم الهلال مكتوب وبعض العناوين اسم الهلال مكتوب فيها ويوم تقرأ المقال ولاهو مايتكلم عن الهلال ولا جاء حوله لكن هذا مايسمي بالذكاء التجاري ورئيس التحرير يعرف كيف يمشي امور جريدته اللي عليه يكتب اسم الهلال بالخط العريض أعلى الجريدة والربح مضمون ميه في الميه لأن الهلاليين راح يشترون يشوفون الخبر والعنوان هذا كيف رغم أن أكثرها تجي مقالات أو مواضيع(ماعندك أحد) حتى اللي مو هلالي اكيد برضه بيخسر نفسه ريالين ويشتري وهو كله أمل يحصل ياخبر عن ضربة جزاء ظالمه قالها أحدهم انها انحسبت للهلال علشان يروح (يتشدق بها الكلمات عند المحسوبين على الرياضة) أو يحصل أي شي بس علشان يفتح موضوع ويتكلم .
الهلال هو سبب ربح الجرائد عندنا وأنا أطالب الأمير عبدالله بن مساعد أنه يطالب بنسبه من مردودات الجرائد نظير الدعاية والخدمه اللي يقدمها الهلال لهم .

آخر صيحه في قضايا الهلال كما قال أحدهم الهلال قضيه في فوزه وخسارته وأن كان موجود وأن لم يكن
المهم إن آخر ماسمعناه إن الهلال هو السبب في طرد سيرجيو أمام الأفريقي التونسي عاد لاحد يقولي كيف خذوها ولا خلوها مامعكم الا كذا .ويقول الرواة من أحد الأسباب أن الهلال يريد سيرجيو!!!! وأيضا أنها ليست المرة الأولى التي يفعلها الهلالييون فقد فعلوها العام قبل النهائي !!!!
أقول والله من كثر الدلع والدلال لسيرجيو يالاتحاديه يعني لاعب بأخلاق سيرجيو لاعب ياخذ اجازه ويوم يقولهم انا جاي (يجرد بهم) اسبوعين ثلاثه ويماطلهم ومسبب مشاكل لاعب مثل هذا ويش ترجي من وراه وكل هذا ومتمسكين فيه ولسبب واحد علشان الأهلي بس حتى يجي في مباراتهم معاه ويسحب تيسير النتيف !!!! والحين وبعد اللي سواه ماالغوا عقده لا ويقولك موقوف إلى اجل غير مسمى وبينظرون في وضعه . هيا انظروا وتمقلوا زين وقولوا له عيب ياسيرجيو لاعاد تعيدها ولا ترى مانوديك البحر معانا نفس القضية حصلت قبل كذا بين أحمد بهجا والاتحاد وايش كان مسويلهم وباقي ماانتصحوا .

آخر الأخبار اللي وردتنا إن محمد نور وأسامه المولد طلعوا للجمهور علشان يواسونهم لا مضاربه ولا فيه مشكله لالا ابدا مافيه إلا على طاري المواساه ويش أخبار النعيمه يوم كان اداري ونزل الملعب !!!! ماهي كلها مواساة ؟؟؟وبالعكس حتى مواساة محمد نور والمولد كانت أحر ويشوبها الشوق والدموع .

ياهذا الهلال الناس وراك وراك حتى وهم هناك بعييييييييييييييد في قطر ماسلموا وأنا أجزم لو كل من جاب سيرة الهلال على لسانه ولا في مقابله أو لقاء لو كل مره تنحسب بريال واحد يدخل خزينة النادي بيصير الهلال أغني نادي في العالم.
مدري ويش قالوا عن المركبه الفضائيه كولمبيا أكيد الهلال له علاقه بس الله يستر لا يدرون وكالة ناسا ولا تصير مشكله بعدين .

ياهلالي....ياهلالنا....
دعهم يتكلمون فلن يزيدوك إلا هيبة وعظمة ولن يزيدهم ذلك إلا قهرا ونقمة .
دعهم يحصدون بألسنتهم لاشيء ونجني بمجهودنا كل شيء .
دعهم يسجلون في تاريخهم الويلات ونسجل بماء الذهب البطولات .