بسم الله الرحمن الرحيم
.
السلام عليكم ورحمة الله وبركاته
.
.
هاردلك يا زعماء وزعيمات الخروج المعتاد بكل أمانه من بطولة آسيا المنحوسه على فريقنا خلال كل تلك السنوات واللي ماقدر يجيبها ست مرات إلا القدامى أما الجيل الحالي بكل صراحة حدث ولا حرج وبكل هالنجوم اللي فيها ماقدرنا نجيبها .
.
العام ثلاث بطولات ثنتين محليه وبطوله وديه دولية , وهالسنه بطولتين محلية ونقول الحمد لله يارب على كل حال ولكن ما ينقصنا هو بطولة خارجية قوية مثل أبطال آسيا اللي كل مشجع من الأجيال الجديدة نفسها وحالها مثل حال أي نادي ثاني يتمنى يشوف هالبطولة على شكلها الجديد .
.
نجي للكلام الصحيح أحنا ندري أن كل أجانبا ما قصرو وكان لهم دور كبير في بطولات الهلال في عهد رئيسنا عبدالرحمن بن مساعد الله يحفظه , ولما نقول عنصر أجنبي مميز معناه لما تحتاجه ببطولات خارجيه مهمه تلقاه لازم يعطيك كل ماعنده ويفيدك , ولما العنصر الأجنبي بالفريق يتحرك ويصنع ويبدع فأن العنصر الأجنبي هذا أكيد نحتاجه .
.
لكن بكل أمانه مصلحة الكيان عندي أهم من أي لاعب مهما كانت قيمته ومحبته عند الجماهير ومافيه لاعب فوق النقد , نأتي للاجانب /
( لي يونغ , وليهامسون , رادوي , أحمد علي ) أنا هالاعبين أدري خدموني بالبطولات السعودية المحلية ولكن وش الأضافة اللي عطوها للفريق بالبطولات الخارجيه اللي هي بطولة دوري أبطال آسيا
جميع هالاعبين شاركو بهالبطولة وبكل أمانه من كثر حب الجماهير لهم صارو لاعبين مزاجيين يعطونك بالبطولات المحلية والخارجية ولا كأن واحد له نفس يلعب .
.
.
وبكل صراحة حبنا لهم على العين والراس ولكن الهلال فعلآ يحتاج لتجديد دماء العنصر الأجنبي بالفريق وعلى ما أظن فيه عروض جايه لهم وإذا ماكان الفريق عنده أربع أجانب يحرثون لك الملعب حرث وخاصه في بطولات قارية مثل آسيا والأ وش أبي فيهم ؟؟
.
أحنا ندري أن أجانبنا مساهمين بالبطولات المحلية وكان لهم دور وندري أن الفريق ما شاء الله عنده من كل بطولة كؤووس ولكن مو حرام بالله لنا كم وأحنا نبي آسيا بشكلها الجديد والتأهل لكأس العالم للأندية ومقارعة الفرق الأوروبية الكبيرة رغم تأهلنا لهالبطولة وألغيت بس للاسف كل سنه نشارك بهالبطولة ونطلع ؟؟
المفروض وبكل صراحة أي لاعب أجنبي ما يجلس أكثر من سنتين بالفريق لأن لابد يجيه حالة ملل ويحتاج يرجع لأوروبا والدليل لاحظو لاعبنا المعار نيفيز جلس بالفريق تقريبا سنة ونص وبأخر الموسم أنخفض مستواه شوي وجته إعاره لفلامنقو وشوفو كيف أبداعه ,
.
أتمنى من إدارة الهلال من نهاية الموسم التخطيط وتبيع عقود الاعبين الأجانب وراح يجي للنادي مبلغ كبير مره تقدر تجيب فيه أربع أجانب على مستوى عالي ومثل ما راحو مننا لاعبين أجانب مميزين جى البديل اللي نسى الجماهير الاعب السابق وهالشي بيتكرر لو الإدارة فكرت وشدت حيلها بالتعاقدات واللي يحتاجه الفريق .
.
أنا أشوف الفريق يحتاج مدافع آسيوي قوي جنب هوساوي لأن المرشدي خلاص أنتهى وماعاد هو المرشدي اللي أفضل لاعب بالبطولة الخليجية !!
.
نحتاج لصانع لعب أجنبي ويملك ميزتين صناعة اللعب والمحور , ونحتاج لمهاجمين أثنين أجانب على مستوى عالي ويسجلون من أنصاف الفرص لأجل الاعبين المحليين وأخص هنا المهاجمين عندنا هالمره يحسون أن فيه لاعبين أخذو خاناتهم ونبيهم يرجعون الاعبين اللي كنا نعرفهم يقاتلون لأجل كسب رضى الجمهور !!!, أيضآ تدعيم الفريق بلاعبين محليين أو صعود الاعبين للفريق الأول والأبرز منهم من شباب الهلال .
.
ياناس وربي لما أطالب بتغيير كل الأجانب مو كره فيهم لأني أنا مثلكم أحبهم كثير ولكن وربي الفريق يحتاج أجانب جدد لو تلعبهم بأي بطولة كانت محلية أو خارجية يعطونك الفايدة الكبيرة لأن الكل يعرف إذا عندك أجانب صح ومستواهم عالي جميع الاعبين يرتفع مستواياتهم .
.
.
.
ملاحظة على مدرب الهلال والله ياكالديرون رغم أنك جالس تحاول تسوي كل شي إلا لما أقارن بين هلال جريتس وهلال كالديرون ألاحظ فرق كبير غاب عنه بغالبية المباريات اللعب الجماعي للفريق والأهداف الجماعية التي كانت بعهد جريتس ولو في العام الماضي نصفنا التحكيم بعد عدم أحتساب ثلاث ضربات جزاء بجميع المباراتين أمام ذوب آهان ذهاب وإياب وعدم طرد لاعب ذوب آهان لكنا نحن من كان طرف في نهائي آسيا وهلال جريتس كان هجومي وممتع ووصلنا معه لنصف نهائي آسيا وهلال كالديرون مرات الفريق غريب مرات طالع ومرات نازل رغم تحقيق قريتس ثلاث بطولات اثنتين محلية وبطولة وديه دولية وطرف ثابث في جميع النهائيات وبعهد كالديرون بطولتين محلية وخروج من دور 16 بدوري أبطال آسيا وهلال جريتس جماهير الهلال كانت تملئ جميع الملاعب بحضورها المميز وهلال كالديرون جمهور الهلال مره بالطالع ومره بالنازل !!! ورغم رحيل جريتس بإختياره هو ولو أستمر معنا لكان الحال أفضل وما أقول إلا الله يعين بس
.
.
أدري طولت عليكم وأدري بيجوني ناس مطفين النور وماراح يعجبهم موضوعي لأجل حبهم لهالاعبين ولكن الهلال عندي أهم من أي لاعب مهما كانت قيمته بقلب الجمهور , وأتمنى من جماهير الهلال ما تاخذهم العاطفة تجاه أي شي وما أظن في مشجع ما يطمح يشوف الاعبين الأفضل واللي يفيد فريقه وبالنسبة للاعبين المحليين ماراح أقول فيهم شي لأن جماهير الهلال أنتقدتهم وكلنا نعرف منهم اللي يحتاجون فيهم الرحيل .
.
.
فمان الله وهاردلك يا زعيم وأتمنى من المشرفين طرح موضوعي بمنتدى جمهور الهلال لأن من حقي أقول اللي بداخل قلبي حالي حال أي مشجع هلالي يحب فريقه ويقول اللي يشوفه ويطرحه من وجهه نظره ولكم جزيل الشكر
.
.

مشكورين مشرفينا الأفاضل :rose:

الرسالة الأصلية كتبت بواسطة هلالي موسيقار (مشاركة 18165972) رادوي ضروري وجوده كل الاندية عندها مشاكل بالمحور

الرسالة الأصلية كتبت بواسطة هلالي موسيقار (مشاركة 18165972) وانت عندك عزيز ماهو ثقه يسحب علينا في الاوقات المهمة اما بخصوص الاجانب البقية انا معك يجب تغيرهم نجيب صانع اللعاب ومهاجم ودفاع

اسمح لي رادوي هالسنه هذه مو رادوي اللي نعرفه حتى امس احسه صار يستقصد انه ياخذ كرت احمر يعني اول مره ضرب الصقري على فمه ولو انتبه له حكم الرايه كان اخذ كرت اصفر ويجيك بالدقيقه سبعين ويجلس يشوت برجل نور لين اخذ كرت اصفر احنا ناقصين طرد يا رادوي لاجل تزيد الطين بله غير الايقافات اللي تعرض لها طول هالموسم لسبب عصبيته الزائدة اللي مالها مبرر ضد مصلحة الفريق ؟؟

اتفق معك بجميع ماذكرت
هلال الموسم الماضي اكثر بكثير من هلالنا الموسم الحالي
اما بالنسبه لنقطة الاجانب اتفق معك ببيع عقودهم والاستفاده من مبالغهم بجلب غيرهم
تغيير الدماء يعطي الفريق اضافه
صحيح انهم ماقصرو لكن طموحنا أكبر من كذا

الحين جاء وقت رادوي وويلهامسون.تبغى نغييرهم.



كل واحد طالع لي يقول بعيد عن العواطف والثاني نتكلم بعقل وين العقل تكفى اللي نطلع لاعبين شايلين الفريق مثل رادوي وويلهامسون.
وبعدين تعال لو ان احد اللاعبين اللي ذكرتهم تسبب بالهزيمة اقولك اوكي,لكن الفريق كله سيء نفسيا وبدنيا وذهنيا.

والعقل يقول اننا خرجنا من دور الـ16 في اسيا هالسنة خلاص مافيه اسيا..؟؟

الموسم الجاي اربع مباريات وانت متأهل لنفس الدور.

عشان مباراة وحدة خرجنا منها من دور الـ16 نغير الاجانب ونغير المدرب ونجيب مهاجمين ونجيب مدافع وحارس..وظهيرين.

انا السؤال اللي محيرني ليش يوم اخذ الهلال الدوري ماقلت الاجانب يحتاجون تغيير؟؟
ارجوك جاوبني على سؤالي..!