السلام عليكم ..
ندخل بالموضوع على طول ، لأني لا أجيد كتابة مقدمة للمواضيع ..

أول شي أبارك لكم البطولة 52 .. ولا زال للمجد بقية !
الحمدلله على نعمة الإسلام والوطن وتشجيع الهلال !

أعرف بتقولون الحملة بدري وو بس نبي نستعد من بدري نبي تفاعل نبي حماس !

كان أحد أسباب تفوقنا وفوزنا على نادي الغرافة الموسم الماضي في مباراة الذهاب بعد توفيق الله هو ( الحضور الجماهيري )

المباراة شهدت حضور جماهيري كبير جدا .. حيث أن الواجهة امتلت قبل المغرب !

الحمدلله حضرنا المباراة وحققنا المطلوب فوز ومستوى وحضور ولا أروع !

ترتيب الحضورالجماهيري للهلال في الدوري الآسيوي ( التاسع ) > وللأسف والله أخجل وأنا أكتب هالرقم !!

إقتباس 9. الهلال السعودي 28,421

بالله يازعماء هل ترضونها على نفسكم ؟
هل ترضون زعيم آسيا زعيم نصف الأرض يكون ترتيبه من حيث الحضور التاسع !
والطامة الكبرى أن ( النصر ) وللأسف أعلى من بـ 2000 شخص ..

جمهور الزعيم في جميع المناطق .. أنا أعرف أنكم بالعاميه ( غاسلين يدكم من الآسويه هالسنه )
بس الله على كل شي قدير ، حنا نتعامل مع الآسيويه هالموسم كأنها بطولة ( ودية )
مانشوف أي تفاعل من الجمهور !
أنا عارف أن خساراتنا الموسم الماضي كانت مؤثرة وبشكل قوي ، لكن ننسى الماضي .. صفحة وأنطوت !

الهلال راجع بكل قوة وبكل طموح أنه يحققها .. أن ماحققناها هالموسم ( الله لايقوله ) بنحققها الموسم الي بعده أو الي بعده .. مافي شي صعب على هلالنا ..

حنا بس نبي وقفتكم مع اللاعبين ، نبيكم مع اللاعبين على الحلوة والمرة ..
خاصة بعد تحقيق كأس ولي العهد + الدوري .. بطولتين بأسبوعين .. ( لله درك من زعيم )

دعوه لجماهير المنطقة الوسطى + الغربية + الشرقية + الشمال + الجنوب ..
معليش المباراة يوم الإربعاء لازم تشهد حضور جماهيري كبير ..
جمهور المجمعة والقصيم والخرج نبي وقفتكم ومساندتكم ترى لو تمشون من الساعة 4 الساعه 7 بالكثير بتكونون واصلين الملعب ..

جماهير الشرقية والغربية ، الموسم الماضي كنتوا كل مباراة بآسيا تتحمسون وتحجزون وتحضرون المباراة بكل ما أوتيتم من قوه .. سووها هالموسم نبي وقفتكم مع اللاعبين ..

ألحين اللاعبين أرتاحوا من ضغط الدوري وكأس ولي العهد وبيتفرغون للآسيوية ..

| بروفات الجماهير + تمارين الإحماء + لقطات من المباراة | من داخل الملعب بجودة 720 HD

- هل يتكرر حضورنا في المباراة القادمة مثل هذا وأكثر ؟
يازعماء مافي شي صعب علينا ..
ملينا 90 ألف كرسي وش الي يمنعنا نمليها مره ثانيه ؟

أتمنى الجميع يتفاعل مع حملة ( خلوها فل لمباراة الهلال والغرافة ) ، كثرة المواضيع تزيد من الحماس

أتمنى من مجلس الجمهور الهلالي يعد العده لهذي المباراة لكي تظهر الجماهير في أحسن صوره ..


أتمنى يازعماء التفاعل مع الحملة ، أتمنى أن الحملة تحقق المطلوب ..
تكفون يازعماء هذا العشم وأنتوا قدها وقدود ومافي شي صعب عليكم ..

ناس والله ( ما أتمصخر عليهم ) ، تقريبا دايم يطلعون بذل وخسارة لكن تعالوا شوفوهم من ناحية الحضور أنا ما أقول أن حضورهم توب واااو لكن تفوقوا علينا هالموسم ..

جماهير الهلال هذا الموسم جدا ضعيفه للأسف نبي نعدل من وضع الجماهير خاصة بعد تحقيق البطولتين ..


جمهور الهلال كونوا على الموعد ، وأتمنى التفاعل مع الحملة + كتابة مواضيع عن هذه الحملة ..