مساكم الله بالخير

يقولون إني جديد بالفيسبوك < توه مسجل قبل أمس

المهم

دخلت ومن خلال تصفحي في صفحتي الشخصيه طبعا تطلع لي روابط دعايات على يسار الصفحه

من ضمن هالإعلانات في إعلان مكتوب بهالشكل

طريقك إلى المليون يبدأ من هنا


^

دخلت الرابط ودخلني على رابط شركه إسمها UFX Bank

سجلت وانا ماادري وش السالفه
كتبت إسمي وإسم العائله

وفي الأخير طلبوا رقم الهاتف النقال

حطيت جوالي وأرسلوا لي إيميل على طول بالترحيب وزي كذا


اليوم الثاني اللي هو أمس
جاتني مكالمه إتصال بدون رقم

رديت ألو ألو محد تكلم وبعدين قفل الخط

فتحت إيميلي بالصدفه وربي ولقيت إيميل من نفس الشركه

كاتبين نعتذر تم الإتصال بك عدة مرات ولم يتم الرد !! مع إنه ماجاني إلا إتصال واحد بسسسسسسس ورديت ومحد تكلم


المهم رديت على الإيميل

وقلت ماوصلني منكم إلا إتصال واحد !
الشيء الثاني قاعد أقول ألو ألو محد رد


بعدها بخمس دقايق وربي أو أقل
رجع الجوال يدق ونفس الطريقه بدون رقم !!


أنا : هلا

هو : ألو مرحبا ممكن أحكي مع السيد ........ الـ ........

أنا : تفضل معاك

هو : أهلين فيك , معاك ........ من شركة UFX Bank للإستثمار

فيني إحكي معك وإشرح لك كل شيء والا الوئت مش منيح هلئ ؟

أنا : لا تفضل


وبعدها جلس يتكلم ويشرح لي بأني لازم أحول لهم مبلغ زي المضاربه يعني
وأصير أشتري وأبيع في سوق العملات والذهب والفضه

صحيح 3 أرباع كلامه مافهمته لكن وربي كلامه مقنع بعض الشيء
وإحس إنهم صادقين بس خفت يكونون من هالحراميه حسبي الله عليهم

ويعني من زبدة كلامه
إني لازم أحول لرصيدي عندهم مبلغ أي مبلغ أحب أدخل فيه السوق
ومن خلال مافهمت من كلامه إني أقل شي أتوقع 1000 أو 2000 دولار

وهم عندهم شيء إسمه الرافعه الماليه
يعني كل 1000 دولار ادخل في مضاربه هم يعطوني فيها 100,000 دولار أتوقع زي كذا لأني مافهمت شي وللحين مو فاهم بس يمكن مع الأيام راح أفهم إن شاء الله

لوووووووووو

كانوا فعلا شركه معروفه ومعتمده


وفوق على كذا فعل لي يوزر نيم وباسوورد وقال لي بمجرد ماأخلص شرح غير باسووردك على طول

وقعد يشرح لي كل شي على الرابط تبعهم وكيفية دخول السوق وكيفية إغلاق صفقه وزي كذا

وربي قعدنا على الخط يمكن 30 دقيقه مع إنه يكلمني من لندن

في الأخير

قلت له وش مطلوب مني الحين ؟

قال تروح للبنك وتحول المبلغ اللي تبيه على عنواننا اللي أرسلته لك الآن على البريد
وبمجرد مايتم التحويل خلال مده أقصاها 48 ساعه تكلمني على الإيميل أو على الشات الموجود بالموقع وانا أودعها لك بالحساب وتبدأ بالصفقات


إلى الآن والفكره مشوشه بالنسبه لي

واللي شوشها أكثر هو إني كتبت عنهم في قوقل وماشفت أحد أنكر وجود مثل هالشركه

بينما في الجهه المقابله

سألت واحد من أخوياي قال خلني بأسأل لك
ورجع دق علي قال إنحشششششششششش عنهم واحد يقول لي نصبوا على أبوي بمايقارب الـ 40 ألف ريال !!


فلذلك

ياليت يازعماء توضحون لي ولغيري عن وضع هذي الشركه
وهي هي حقيقه والا نصابه ؟

وإذا حقيقه فكيف التعامل معهم ووش طريقة التعامل معهم
يعني اللي يعرف ياليت يفيدنا الله يرحم والديكم


أعتذر على الإطاله

وألف مبروك الفوز مقدما بإذن الله

هلا بك اخوي وما اقولك الا كما قال لك خويك
انحششششششششششششش ض1

بصراحة انا ما اعرف ها الشركة بس اي واحد يقولك حولي وشسمه في عالم النت
99,9% انه نصاب

بالتوفيق لك دائماً اخوي شبابي كلي هلالي

لا لا الشركه حقيقيه وانا حولت لهم مبلغ ١٥ ألف وسبحان الله تضاعفت وكسبت لين وصلت ٥٠٠ مليون
والحين انا اكلمك من الفله حقتي اللي في باريس وبعد شوي بطلع بطياره خاصه لـ لندن

...

ياخوي من جدك انت ؟؟؟؟؟ ..
قسم بالله هالناس اللي انلعب عليهم ما راح اتعاطف معهم بالعكس يستاهلون ولو شفت واحد منهم بتوطاه

خذ نصيحه
لا يطلع ريال من جيبك الا وانت عارف انه في حال مارجع لك تقدر ترجعه بالنظام

سؤال : لو مثلا حولت لهم مبلغ وجحدوك في هالحاله النظام راح يرجع لك حقك والا لا ؟؟
طبعااااا لاا لانها حواله بدون مقابل وبدون سندات و لـ جهه مجهوله

اركد وانا اخوك واذا عندك مبلغ ماتدري وين توديه عطنيه انا استثمره لك هههه

إقتباس هلا بك اخوي وما اقولك الا كما قال لك خويك انحششششششششششششش ض1 بصراحة انا ما اعرف ها الشركة بس اي واحد يقولك حولي وشسمه في عالم النت 99,9% انه نصاب بالتوفيق لك دائماً اخوي شبابي كلي هلالي

ههههههههههههههههه

اخاف أنحاش وهم صادقين هنا المشكله ياخوك

تسلم يالغالي على المشاركه كلامك مقنع صراحه

إقتباس لا إله الا الله محمد رسول الله ... حياك اخوي وانا شخصيا ما اتوقع انه فيه شركة بتسوي كذا بعدين مسالة 1000 ريال وارباحها اسئل المشايخ عنها يمكن يكون فيه ربا او شي هذا ان كان هي شركة رسمية وبس ماحبيت اتفلسف لاني دجه فالأقتصاد الا صدق اذا شريت لبن ابو اربعه بعشرة كم يرجع لي

محمد رسول الله

صدقت ياخوك
هذي نقطه لازم أسأل عنها بعد ولكن هو على حسب كلامه إنها مجرد متاجره فقط لاغير

تشتري برخيص وتبيع بغالي تجاره يعني
لذلك انا حبيت أسأل الناس اللي جربوا هالشيء أو عندهم خبره في هالمجال

ألف شكر لمرورك حبيبي واللبن المفروض يرجع لك خمسه

إقتباس لا لا الشركه حقيقيه وانا حولت لهم مبلغ ١٥ ألف وسبحان الله تضاعفت وكسبت لين وصلت ٥٠٠ مليون والحين انا اكلمك من الفله حقتي اللي في باريس وبعد شوي بطلع بطياره خاصه لـ لندن ... ياخوي من جدك انت ؟؟؟؟؟ .. قسم بالله هالناس اللي انلعب عليهم ما راح اتعاطف معهم بالعكس يستاهلون ولو شفت واحد منهم بتوطاه خذ نصيحه لا يطلع ريال من جيبك الا وانت عارف انه في حال مارجع لك تقدر ترجعه بالنظام سؤال : لو مثلا حولت لهم مبلغ وجحدوك في هالحاله النظام راح يرجع لك حقك والا لا ؟؟ طبعااااا لاا لانها حواله بدون مقابل وبدون سندات و لـ جهه مجهوله اركد وانا اخوك واذا عندك مبلغ ماتدري وين توديه عطنيه انا استثمره لك هههه

ههههههههههههه خذنا معك بالطياره طيب

كلامك مقنع أخوي سكاي وحتى السؤال ماحصلت له إجابه

وإن شاء الله اللي جرب يجي يفيدنا عشان نقتنع كلنا صح

يعطيكم العافيه حبايبي ماقصرتوا والله

حتى لو كانت صحيحة ( لو )

فهي إما أن تكون ربا أو قمار أو وسيلة غير شرعية لكسب الأموال و مضاعفتها بسرعة

اسئل مجرب ولا تسئل دكتووور
انحشششششششش
ــ
بـس صحيحة وليش ما تجرب لعل وعسى يكون رزقك مكتوب بالشركة هذه
جرب وشوف وعلمنا اذا ربحت كم مليون خلنا ندخل معااااك صح وقتها ما نشوفك
نقول الله يذكره بالخير

إقتباس الرسالة الأصلية كتبت بواسطة حاتم اسئل مجرب ولا تسئل دكتووور انحشششششششش ــ بـس صحيحة وليش ما تجرب لعل وعسى يكون رزقك مكتوب بالشركة هذه جرب وشوف وعلمنا اذا ربحت كم مليون خلنا ندخل معااااك صح وقتها ما نشوفك نقول الله يذكره بالخير

لااريد اطيل بالكلام نفس تعليق حاتم ردي ,,,,

^

ههههههههههههههههههههههههههه


على قولتك ياحاتم

إسأل مجرب ولا تسأل دكتور

انا أتمنى إن أحد يكتب لنا تجربته معاهم


يعطيك العافيه حتوم , ويسلموو على النصيحه برهوم , عاد كل شي ولا الحرام والله

الله يعطيك الف عافيه

اذا عندك فلوس مو محتاجها غامر وش وش النهاية

لكن اغلب الشركات الي تستخدم هالطرق تكون شركات احتيالية

تحياتي لك

شف اخوي انت جرب وماراح تخسر يعني اتوقع 1000 دولار ماهي شي يعني تقريبا 3800 ريال سعودي

انا كنت في موقع اسمه Bux.to هذا الموقع يحتوي على اعلانات كل يوم ادخل الاعلانات اكسب 1 دولار او اقل والله نسيت من زمان عن الموقع من كل اعلان

وكل يوم عدد الاعلانات مختلف لازم تحصل 100 دولار عشان تقدر تسحب تعطيهم رقم حسابك وهم يحولن لك

بس يوم وصلت 50 دولار قالي خويي اللي دلني ع الموقع انهم نصابين وتركته

يعني لاتثق بالمواقع ابدا بس مدام انه كلمك جرب وشف

بس اذا كسبت لا تنسانى

دمتـ بود

إقتباس صحيح 3 أرباع كلامه مافهمته لكن وربي كلامه مقنع بعض الشيء وإحس إنهم صادقين بس خفت يكونون من هالحراميه حسبي الله عليهم

ترآآآ يكلموومك نآآس أوووم الثقه ويخلوونك مدير البنك بعد


أقوول أبعد بس وكبر رآسك من هالأموور ... أستغفر الله وإن شاء الله تفرج معك
بدون هالبنووك والكلام الفاضي

مع احترآمي لك تراك خبل

الرجآل نصاب

لا وعندهم خدمات سريعه ما شاء الله يدقون عليك و ايميل بنفس الوقت

وترد على الايميل يدقون بعدها مباشرة

صدقني هذولا مجموعة اجانب كذابين

الشريحة اللي معهم رح لأقرب محل جوالات قله ابي شريحة [ رقم خاص ]

هذي ترسل بس ماتستقبل

قال ايش من لندن

انحش وانا اخوك ولاتفكر مجرد تفكير انك تدخل فيها