ياشباب يابنات لاتسوون مثلي حبل الكذب قصير واحيانا يوديكم لسوالف انتم غنى عنها ... موقفي مع امي وراعي الباص والغياب + مايستفاد من موقفي للجميع , - نادي الهلال السعودي - شبكة الزعيم

hadeel alyahya · #1 03/05/2011, 03:57 PM

السلام عليكم والرحمه

نعم يابنات وياشباب حبل الكذب قصير . واحيانا يوديك بسالفه انت غنى عنها .. خصوصا السالفه اللي صارت لي اليوم

اول شي بقولكم نبذه عن امي .. عشان تعرفون ليش انا سويت كذا

امي انسانه تقدس شي اسمه دراسه . تقدس المدرسين تقدس الدوام وتكره شي اسمه غياب

ومافيه امل تخليني اغيب من المدرسه الا اذا شافتني منصرعه على الاخير

يعني لدرجه اذكر يوم كنت صغيره بالابتدائي كانت رجلي مجبسه
(( تخيلو جبس ياجماعة الخير )) وبعد تقريبا اسبوع من التجبيس خلتني اداوم للمدرسه وانا اعرج والجبس يطقطق بالارض

وقسم بالله اني ماابالغ .مشكلتها تكره الغياب وكل ماقلت لها بغيب سوت لي محاضره وانتي اخر سنه ومستقبلك ومدري ايش ووو كلام ومحاضره تخليني ادوخ

عاد اليوم الثلاثاء البنات كللللللللهم متفقين يغيبون واتفقوا امس اللي هو يوم الاثنين

والمشكله مقدر اجي واقول لامي بغيب عشان البنات متفقات (( عندها هالحركه جريمه وبتجلس تسوييلي سالفه ومحاضره انا غنى عنها ))

عاد اختكم بالله سوت حركه وياليتها ماصارت ولا سويتها

قوومتني للمدرسه وقمت لبست المريول وجلست البس واسوي عندها اني على اساس بتجهز للمدرسه

وامي من النوع اللي تجلس فوق ماتنزل تحت .. وانا اصلا مواصله ومالي خلق اداوم وغير كذا البنات متفقين يعني بروح ماراح القى احد

قلت اسوي عندها بروح .. واكمل نومتي تحت

وقبل كل هذا رحت ارسلت للسواق حق الباص .. لاتجي بيتي اليوم لاني بغيب

نزلت تحت .. رحت لغرفة الحريم وانسدحت على الكنب .. وطقيييييييتها نوووومه

وجت تقريبا الساعه 9 ونص الا واختي الكبيره تشوفني (( وسترت علي ولا علمت امي وقلت لها لاتعلمينها )) وقالت خلاص بس لاعاد تعودينها

يوم جت الساعه 1 وربع ... امي كانت فوق تشوف التلفزيون .. قمت اخذت شنطتي واغراضي على اساس اني توي راجعه من المدرسه

رقيت وغيرت ملابسي ونزلت تحت تغديت وعينت من الله خير ومبسوطه بالغياب لان حسيت فيها لذه >> مغامره

مادريت الا اسمع امي تتكلم بصوووت عالي مع شخص وتنادييني

يوم جيت قلت وشو فيه .. قالت راعي الباص دق يقول انك ماركبتي معه الباص

وامي قالت له لالا وشلووووون بنتي مداومه ودارسه

<< عاد راعي الباص وراح تفكيره ××××××

جا قال وشو بنتكم ماتستحي وانا ابي اعلم ولي امرها وهي شلون راحت ومرسله رساله تقول لاتجي وماجيتها

وجلس راعي الباص يربط باشياء تخريفيه قهرني .. وعلى طول راح تفكيره وسسسخ

جلس يقول لآمي وانا مره شفتها تسلم على واحد لابس غتره عند باب بيتكم >> يبي امي تشك فيني!!

المشكله ذا الكلام كان قبل كم اسبوع . نزلت من الباص الا اشوف اخوي واقف عند الباب وكان توه جاي من السفر وجيت سلمت عليه

<< يعني بالله عليك ياغبي لو افترضنا اني انا بنت مش كويسه وراعية حركات . بجي اخلي واحد يجيني وعند باب بيتنا وبسلم عليه ؟؟!!!

يعني معقوله بسلم على شخص ماعرفه عند باب بيتنا !!!

وامي تتكلم منهبله .. واجي ارررررركض طايره واقولها لالا يمه انا مااااارحت كنت نايمه بالغرفه

المهم اني تناظر فيني وشلوووووووووووون .. وانا بالعه لساني من الخوف

المهم تفاهمنا مع ذالرجال اللي فهمني غلط وبغى يخلي امي تشك باخلاقياتي

وقلت له اني نايمه تحت ووو الخ

وتناقشت مع امي . وقلت لها ليش انا ماعلمتها لانها مستحيل راح تخليني اغيب

وامي فهمتني .. ووعدتني اني اذا بغيت اغيب اقولها وراح تخليني

<< امي بلعت العافيه الظاهر ههههههههههههههههههههههههههههههه

والحمدلله ان اختي شافتني نايمه عشان تثبت برائتي

.. وبعد شغالتنا وهي تنظف شافتني منخمده من الساعه سبع ونص

..

مايستفاد

1- حبل الكذب قصير

2- شي زي كذا يابنات لاتسوونه لانه وقسم بالله مثل هالموقف ذا لو اهلي مو متفهمين وناس واعين .. ومتحجرين كان صارت سوالف وعلوم ورياضيات

3- راعي الباص ***** على طول راح تفكيره ×× . وانا اقول ياناس ياعالم لو سمعتوا سوالف مشابهه لاتصدقون لان وقسم بالله فيه كثير بنات سمعتهم توصل الارض وهم اساسا بريئات والناس ماتخلي الحكي والقيل والقال

4- احسنوا الظن بأي احد .. ومو اي شي يكون ببالكم يروح لجانب سلبي . هذا يدل على انك انسان سلبي ومتشائم وغير واعي