{العشق في دنياي هي .. وفي شمسها بسمة وضي } :: مع القنادرية مش حتئدر تغمض عينيك :: - نادي الهلال السعودي - شبكة الزعيم

باسكن روبنز · #1 29/04/2011, 10:03 PM

السلام عليكم ورحمة الله وبركاته

كيف الحال جميعا

يا بنات عسى ماعورتكم رجولكم من الكعب وانتو تترقصون في عرس ويليام

ليش حنا مشغلين انفسنا بزواج ويليام مع كيت

العالم والقنوات والبي بي والبرود كاست كلها يوم الجمعة عنهم ، من جد مساخة

والي ضيق صدري من جد الي حاطينها البنات في البي بي صورة تقبيل وليام لزوجته

ماعتقد وصلنا إلى هذه الدرجة من التفكير والتقليد الغبي ،، ارسلت لهم امسحوها وعيب عليكم << يا قوية

من زمان عن موضوع جديد

ما اتذكر آخر موضوع كتبته هنا بالمجلس

لذلك انوهـ انو مايدخل موضوعي الا الفاضي لانه طويل

العشق في دنياي هي .. وفي شمسها بسمة وضي ،،
في قلبك الشوق الكبير ... حاكني عنه شوي ،
قلبي تولع بالرياض

..حب ورثته من الجدود
يا صفحة ناصعة البياض .. زرعتي الصحراء ورود
يا نجد

يا أرضي وسماي .. يعجز عن الوصف اللسان
الحب مالي فيه راي .... وما اظن لي غيرك مكان

قررنا الاسبوع الماضي الذهاب إلى العاصمة من اجل حفل الجنادرية

<< انا رحت وربي عشان الشوبينغ في الفيصلية

حجزنا تذاكر ذهاب واياب بنفس اليوم

صحينا الخميس الساعة 5 فجراً ،، ركبنا السيارة وعددنا سبعة أشخاص كلنا صبايا

مع ولد اختي صغير في اول ثانوي ،،
مرينا على مخابز المنصور

<< الي ساكن بالهفوف بيعرفه

وشرينا فطائر نوديها معنا في القطار وصلنا المحطة وجلسنا في صالة إنتظار العائلات ،،

ركبنا القطار .. معنا بنات فالينها مزعجااااات

ماخلوا أي احد بالقطار ينام
تقولون انهم بنات مالك مؤسسة سكك الحديد

جايبين معهم بسطة شيبسات وحركات وافلام لالا

موفي على قولتهم

ويصورون بعض بالاخير جلسوا بالارض صوروا

مرت علينا عربة الأطعمة واشتريت شاهي وكابتشينو ومارس

الكابتشينو رميته ماعجبني طعمه يشبه الحليب

<< وربي سكة الحديد نصاابييين اجل كآس ورق بستة ريال حراام

وصلنا إلى محطة الرياض

واخذنا لنا تاكسي فان وإلى الفيصلية

كنت ابغى محل Harvey Nichols ابي اشتري شنطة لكن ماعجبتني بضاعته
ماشريت من المتجر الا شوكولا

<< هدايا لصديقاتي

وهذه صورة بعض مشترياتي من الفيصلية

تغدينا في مطعم بالفيصلية اسمه ( Ganache ) إيتاليان فود

من جد لذيذ

صورة Menu

صورة البيبسي

فرينش فرايز وكاتشاب

أصابع جبن موزيريلا

فوتوشيني

لزانيا ( الصحن فخار ) وسآآآخنة

ميني ارابياتا

سباغيتي بولونيز

وهنا انتهت رحلتنا في الفيصلية

لا أحد يرد

باسكن روبنز · #2 29/04/2011, 10:08 PM

صلينا العصر وركبنا تاكسين وإلى الجنادرية كانت بعيده كثيير عن الفيصلية ..

][ مع القنادرية مش حتئدر تغمض عينيك ][

وصلنا الجنادرية وكانت معي كيسة كبييييرة من محل ( مايكل كورس )
ولانها كبيرة وثقيلة وراح تتعبنا في شيلها اضطرينا نشتري من كشك اي شي عشان نخلي أغراضنا عنده
سالفتي مع جزمتي الله يكرمكم

( انا جزمتي الله يكرمكم كعب لزوم البريستيج في الفيصلية وعشان اصير طويلة

لكن لما وصلت الجنادرية عرفت ان الجزمة ماتنفع فاشتريت لي جزمة فلات من كشك ، رخيصة بـ 40 ريال
اول مالبستها يا حلوها كانت مرررة مريحة وبعدها حسيت بأشياء غريبة في باطن رجلي
شي يقززني في رجولي اثنينهم في البداية توقعت انو أعواد خشب داخلة في الجزمة من الرمل لما مشينا عليه ،،
وكل شوي يزيد الالم لدرجة حسيت انو جسمي يقشعر ،،
لما وصلت الشقة شفت المآساة انو في مسمار في الجزمة هو الي كان يقززني
وعمل مثل الثقب في باطن كل رجليني
<< من جد مآساة حتى في الدوام صعب علي اشرح وانا واقفة

)
نكمل

مادري كيف دخلنا من بوابة الجنادرية الظاهر الي ورانا هم الي يدفونا ،، اتعب وانا أقول زحمة كأنه حج

الرياض والشرقية

والقصيم كلهم في الجنادرية والناس جايبيين معهم زوالي ( سجادات ) يفرشونها على الارض
ويجلسون ومعهم الشاهي والقهوة والحب الفصفص

من جد مظهر ما اعجبني لان الجنادرية حلاتها تتمشين تشوفين الاركان مو تجلسين وتبلعين

<< من جد ناقمة علييييييهم لانهم زاحمونا كثيييييير

صورت لعبة قديمة ( البطاريق ) ندمانة اني ماشريتها

صورة استعراض للطائرات

ركن اليابان

من كثر ما نسمع الناس يتكلمون عنه قررنا نزوره لكن انصدمنا من جد ،،
من كثر الناس وازدحامهم في الطابور لو فكرنا نصف معهم يمكن تجي الساعة تسعة باالليل وحنا مادخلنا
وبنفوت علينا الأركان الثانية وراح يفوتنا القطار .. هونا نزور ركن اليابان

ركن عسير

معشوقتي .. معشوقتي

تكتب على متن السحب
أبها عروس في الجنوب
وصبيا تداعبها طروب
معشوقتك .. معشوقتي
تعانقت غيمة وجبل
ومن المعانق أمطرت
وسودة عسير تورّدت

قررنا نزور ركن عسير لكن شفت الناس يصعدون مرتفع حتى يوصلون له

( وش دعوة قمة افرست )

وهونا ،،

وكملنا مشي حتى وصلنا ...

معشوقتي معشوقتي
قمرا مع ليل وبحر
دمام وظهران خبر
متزينة صبح ومسا
معشوقتي .. معشوقتي
نسمة عبير في القطيف
في بردها والاّ في صيف
ومشتاق أبى شوف الحساء

شربت من عيون الحسا وأكلت من تمر النخيل

ركن الشرقية

لبى لبى قلبها فديتها << ابد مو منحازة

القيصرية

الحوي ( ساحة في البيت )

بيت البيعة ( بيعة الملك عبد العزيز لما دخل الأحساء سنة 1331هـ )

القهوة الشعبية ( من جد جميلة وكنا نبي نجلس لكن كل الكراسي مليانة )

الفرقة الشعبية من جد فللللللللة والناس تجمعوا عليها توسع الصدر

عاملين شريط كبير وكل شخص يكتب فيه شعوره نحو الملك عبد الله انا ماكان عندي قلم وماكتبت

ركن الرئاسة العامة لرعاية الشباب
ضيع وقتنا وحنا ندوره وكل مارحنا للاستعلامات يعطونا مكان غير ، واثناء ذلك شريت لي قبعة وشي ماعرف اسمه
يحطونة على الجبهه مثل حق المسلسلات البدوية
والمضحك في الامر انو الحريم لابسين القبعة وهذا الشي فوق روسهم وهم لابسين العباية

صورته لكم

كؤوس الهلال

صور تذكارية

لمحبي الفروسية

درع النصر

<< صورته عشان بنت اختي النصراوية

ومشينا خلاص نبي نطلع من الجنادرية ومن الزحمة الشرطة جت وصارت هوشات
وحرمة تضاربت لها مع رجال وراها

والظاهر انه تحرش فيه وانا انتفضت من الخووووف

طلعنا من الجنادرية الساعه سبعة ونصف
دورنا تاكسي يودينا محطة القطار مالقينا وربي جلسنا تقريبا نص ساعة واكثر ،،
ماحصلنا تاكسي الا الساعة 8 وقال لنا انو محطة القطار تبعد عن الجنادرية مئة كيلو ومايمديكم قلنا له نحاول ،،
ركبنا التاكسي وحنا في سباق مع الزمان عشان ماتفوتنا محطة القطار وتخيلت نفسي مثل الافلام الهندية

اني اوصل والقطار توه ماشي واركض واركض واركض لما يمسكني أي راكب وادخل القطار

<< صرت من ربع يحلموووون

للاسف وصلنا المحطة والقطار ماشي له ربع ساعة تقريبا ودخلنا عشان نجدد الحجز لليوم الثاني
وكنت عطشااااااانة ( حسبي الله عليهم في الجنادرية كل الموية الي يبعونها حاااارة )

هذا شاني بااااارد

طلعنا من محطة القطار والشاااارع فااااااضي نبي تاكسي يودينا إلى أي فندق مالقيناااااااا الا بعد معاناة

خذنا لنا شقة من فندق اسمه نوفا في حي الملز قريب من محطة القطار
يعني مستواه مش ولا بد لكن يمشي الحال
وهذه صورة احدى غرف الشقة

وفي اليوم الثاني مشينا مبكر من الساعة خمسة ونص الفجر عشان نلحق على القطار ومايفوتنا
ركبنا القطار ومشى تقريبا الساعة سبعة و11 دقيقة
صورة وجبتي الصباحية

الساعة 10 وثلث وصلنا إلى أحساءنا الحبيبة

وحمد لله على سلامتنا

من جد هذه الرحلة ما اقدر انساها رجولي الي انثقبت ، ورحلة القطار الي فاتتنا ، والتكاسي ومعاناتنا معهم

:: مايستفاد ::
* ما انصح الحامل او من فيه سكر او ضغط او الطفل تحت ثلاث سنوات بالذهاب إلى الجنادرية

* من تسول له نفسه الذهاب إلى الجنادرية

يلبس جزمة سبورت ويبتعد عن البريستيج والكلام الفاضي .
* اذا انت حاجز بقطار اطلع من المكان إلي انت فيه قبل ماينطلق القطار بساعتين .
* لو فكرتوا تركبون قطار جيبو معكم شوكولاتات وشيبسات وفطائر لانها أرخص بكثييييير وأحلى
* كانت الجنادرية تجربة ومغامرة لكن بإذن الله هذه التجربة لن أكررها طوال حياتي

ووهـ تعبت وربي من الكتابة

الله الله بالردود الزينة ولا بزعل

خـيـالـيـه · #3 29/04/2011, 10:11 PM

جايينك عقب المباراة بررب عن خشتك ضض1

بآآآتس

اول حاجه مبروك البطولة للهلآل ..
يالبى بعد ..

وجهك خير علينا يا آخت آيسكريم ..

حتى الآتفآق فقعوآ وجيه النصر ..

استغفر الله بس ..

ثآني حآجه:
ليه ما قلتي لنا نسوي لك استقبال وهيصه بمحطة القطار

مفروض امس سادحين المفاطيح بمناسبة قدومك ..

يا الله هالمره راحت ..
ان شاء الله المره الجاية ..

نجي لموضوعك ..

الصراحة تغطية ما شاء الله عليك متكاملة ..
وروعه بعد ..
تسلمين كبر راسك عليه ..

بس اطلق شئ الأكل الآيطآلي ..

آعشق آكلهم بشكل ..
شهيتني بشب على آهلي آتعشى عندهم أليوم ..

ووبس ..
موضوعك مره متكامل وممتاز ..
ربي يعطيك العافية عليه ..
وعرس ويليآم ما حضرته ..
قلت اخآف آروح آغطي على كل الحضور وكذا ..

يا الله نورينآ بمواضيع آخرى ..
شدي حيلك وآتركي عنك الكعب والهبآل الزآيد ..
وورينآ شطارتك بالموآضيع والتغطيآت الكوشخه ..

تحيآتي لك ..

وعسى ما ننحرم هالطلة ..

حروف الغلا · #4 29/04/2011, 10:30 PM

هذا أول موضوع اشوف لج من دخلت المنتدى

انتي مثل خواتي ، اذا رحنا السوق كعب و برستيج و خرابيط

و نص اليوم و ريلهم متورمة

خليك كووووووووول و سبورتية

سلامت ريلك و اصابيعك

بالتوفيق

حاتم · #5 29/04/2011, 10:52 PM

اخير شفناا موضوع لك

بس زيااة او مغاامرة ممتعة ومثيرة واهم شي استمتعي بالجنااردية << والله ما اتوقع
والف مبروك الفوز والدوري وبطولتين في عشرة اياام هل حضورك للريااض قد يكون سبب
من هذه الأسباااب

<< والله ما اتوقع زين ما صرتي وجه نحس عليهم ولا تحرميناا طلتك صح تذكرت وقبل ما اطلع
ترى تصوريك تصوير محترفة

the king yasser · #6 29/04/2011, 11:18 PM

فك الحجز

وش هالغبار

وأخيييرا شفنا لك موضوع

انشهد ان امك داعيه عليك يوم انك رحتي للجنادريه

جميع فئات المجتمع فيها

لا وفيه ناس كلل يوم محضرين فيها

ومالهم شغل ابد

وراعين مشاكل بعد

دخلتها مرتين مره مع اهلي

ومره رايح اشوف واحد من العيال يسوي عرض مدري يقدم عرض الزبده اني ماشفته من الزحمه وطلعت

تقرير كويس وحلو استمعت وانا اقراه

ان شاء الله مايكون آخر موضوع

بلو كادي · #7 29/04/2011, 11:31 PM

وعليكم السلام ورحمة الله

إقتباس


	يا بنات عسى ماعورتكم رجولكم من الكعب وانتو تترقصون في عرس ويليام

لوتشوفيني مغطسه رجلي بمويه دافيه وملح

كله من ويليام قاعدن فوق راسي ياتحظرين حفلي ولامايتم
وانا يارجال وش جابني لكم وهو ملزم ابد مافيه ياجيتس ولا نلغيه
قلت خلاص تبينت نجي نجي وش نسوي عاااد

نجي لموضوعك

اهليين باسكن رحلة ممتعه مآشاء الله حبيتها صراحة

احب الرحلات اللي تجي خطافيه

والحمد لله على سلامتكم
وانا اقول اثاري الرياض منورة هاليومين اثاريه نورتس

يوووه مررره انقهرت اني مارحت للجنادريه هالسنه
افففف مااروح لها الا ايام الشيانه حقتها

يالله معلييش الله يلحقنا السنة الجايه نروح لها

~>من جدك تلبسين كعب في السسوق
الحين مابزيناه بالعزايم والزواجات نلبسه بالسوق

يالله وكاد هالمره اخذتي درس انتي والكعب

مبروك الدوري

مـوت ومـيـلآد ! · #8 29/04/2011, 11:41 PM

مممممرحبآ بآسك

! أخبآرس ووش علومس

!
أجل رآيحه لزوآج وليآم

, انا عطوني بطآقة دعووه بس قلت حفله من دون الطليان منب حاضره

!

,

كم أعشششقك أيتهآ البطآطآ المقليه

!

,

يآحبي للمكروونه يآآنآإس

, بسسس باقي لك بيتزآ ويكتمل العشق

!
مره بالمملكه مدري صحآرى المهم لقيت مطعم إيطآلي وانا اللي تربعت عنده

, وطلبت لي فوتشيني

, قسم طعمهآ وأصل للنخآع

!
... لبى آكل الطليآن يآنآس

, خآصة المكرونه والبيتزآ والبطاطس

! <<--- وش بقى

!

,

نجي لسآلفه الجنآدريه هذي اللي من الاأسبوع الأول لحد الحين وانا واقفه ببلعوم ابوي

, ابيه يودينآ ولآ يحصل لنا فرصه

!
عآد ترآني مااحب الترآث وطقته

, بس ودي اروح لهآ لأني من زمآآآآن عنهآ

, وعشششآن بعد أصور أشيآء وأرسمهآ للتذكار

!
,
يالله نجي نعلق قبل لآ ننآم

!

/

يووووووووه

, اكره هذآ الشي

!

,

الله ونآآآآآسسسه والله

, ياليتني هنآك كآن ماخليت لهم ولا فرآغ يكتبونه فيه

!

,

مآلقيتي إلآ شششششآني

, وين رآح الببسي

!

,

كآن صفيتي جنبهم سنكرس

, فطورتس مآله دآعي

!

/

بآسكن روبنز بالتوفي ولآ بالتوت

! <<--- عديهآ وخليهآ

!
يآختي الله يعآفي اللي ودآكم للفيصليه وخلآك تنزلين مووووضووع

! ترآ هذآ ثآني موضوع اشوفه لك

!
أذكر موضوعك الاول كآن يتكلم عن الدرآسه , إن مآخآب ظني

!
المهم

, الحمدلله عالسسلآمه أسسفرت وانوررت الريآآآض بوجودكم

, وإن كآن رجعتوآ للشرقيه برضو نقول تستاهلون السلامه

!
كل يوم أطلعي مكآن واسدحي موضووع

!
يالله دوتس بروح انام شميها ورجعيها لي

!

● • ѦẐỔẐ »~ · #9 29/04/2011, 11:41 PM

حجز + حجز = فتح بعد يوم

**الـــــــــواوا** · #10 29/04/2011, 11:59 PM

تقرير ولا آحلى أختي بآسكن

ألا بالله هذا وييين حصلتيه والله ياهووو قدييييم

بس طعمه لايقارن بآي مشروب غازي ,
طرى فبالي امس وأقوول هذا ليييش أنقرض من البقالات .

زياره موفقه للجنادريه .. وشهويتيييني بالمطعم اللي بالفيصليه
بس المكروونا شي ثاني أقسم بالله , وعساه بالعافيه

الموضوع مليآآن بالنقاط , لـكن آختصرت الموضوع بسبب الشآني .

شكرا باسكن روبنز

ŚăЯăβ · #11 30/04/2011, 12:09 AM

اهم شي الحمدالله على السلامه

ودوووووم الوناسه ان شاء الله

ولاتنسين الفكس وخلي اقرب واحد لتس او اصغر واحد بعائلتكم ويفرك رجيلاتس ^_^

اهنتي اختي

عقـل الهلال · #12 30/04/2011, 12:53 AM

نوكمنت بصراحة انا زعلان مررررررررررة

وش لك بهالاركان الخرابيط !!!؟

المفروض منك مشاورة أحد قبل تروحين عشان يختصر عليك المشوار

أول شيء لو مشاورتنا كان قلنا لك لا تروحين بتاتاً البته .

لكن دامك رحتي ووصلتي للجنادرية المفروووض انه أول ماتفكرين فيه هو ركن حايـــ

ــل
صدقيني مش حتندمي

عموماً رحلتكم للجنادرية شكلها كسيفة والحمدلله اني ماكنت معاكم

لحظه نسيت نقطة اللي تحرش بالحرمه هالعالم متى بينقرضون !!!؟ يعني قسم بالله مافيه أي ذرة من الانسانية ولا الاخلاق ,, بعيداً عن الاسلام هالشيء بكل الاديان والاعراف شيء ممنوع واللي يسوي هالاشياء مجرد شخص متخلف , واللي مفروض يصير هو تندق خشته وتتكسر اصابعه بنفس المكان وقدام العالم للعضه والعبرة
________________________________________

نرجع للفيصلية

مالقيتوا الا هارفي نيكيلز؟؟

اششششك ان الشنطه ما أعجبتك

اعتقد انه سعرها ما أعجبك

تبين نصيحتي اذا بغيتي اشياء ماركه وكذا وبنفس الوقت سعرها منااااسب جداً وتجيك وانتي ببيتك وبدون عناء
ماعليك الا انك تطلبين عن طريق النت وبلاش منها خساير وقطار وكابتشينو خايس

________________________________________

سالفة انه فاتتكم الرحلة فا أنا بقولها لكم بكل شسمه أحسن تستاهلوون

وش موديكم لآخر الدنيا وتبون ترجعون لوسط الدنيا

________________________________________

بصراحة رحلتكم رهيبة مرة والحلو فيها انه ميانه بالاكشنات وهذا الشيء المميز بكل رحلة .
لو انا منكم اسويها كل ويك إند

<< ناوي يجيب فيكم العيد

فوتكم بعافية

الهنوووف · #13 30/04/2011, 03:44 AM

وعليكم السلام ورحمه الله وبركاته

اهلين بك باسكن

زين صار عندنا مهرجان الجنادريه خلانا نشوفكم
ماشاء الله عليكم قاطعين هالمشوار علشان تحضرون
انا وانا بالرياض نحسها بعيده
ماقد رحت للجنادريه الا مره وانا صغيره ماذكرها وهالسنه بس

زواج وليام ماشفته ولافكرت به لاني نايمه

ولكن مازلت مستغربه هالضجه الي مالها سنع

الحين حلو القطار..؟ ودي اجرب بس احسه شي مزعج

تراني جوعانه

بس مشكله الاكل لاصار كله يتمحور على صنف واحد --> اهم شي يتمحور
كله مكرونات

تمنيت ادخل هالمكان بس للاسف مالقيته

كل هالمناطق الي رحتي لها ماشفتها \ مشكله المكان لما يكون كبير وزحمه
ماتقدرين تلحقين على شي
انا زرت بس الباحه والمدينه المنوره والقصيم وجيزان واعتقد حائل
عندي صور ودي انزلها بس للحين حبيسه الكاميرا

إقتباس


	* من تسول له نفسه الذهاب إلى الجنادرية يلبس جزمة سبورت ويبتعد عن البريستيج والكلام الفاضي .

والله من خبرت نفسي بالاسواق والسفر ووالاماكن العامه لازم جزمه سبورت
ا كل جزمي السبور تخرب من الكرف

وكل كم شهر لازم جديده
مدري وش له يلبسون كعب وعالي رايحه اتكشخ او اتمشى

انا الشي الي تمنيته انه نسائي كله واكشف واشيل العبايه واتمشى على راحتي لان الجو حر وزحمه
انا كل شوي رافعه عبايتي نفس حالتي لاجيت اعتمر

\

/
نورتي الرياض وان شاء الله تكررين الزياره في مهرجانات اخرى
وعاد لو ندري عزمناك وضيفناك

الهنوووف
كانت
هنا
ورحلت

الزعيم سام6 · #14 30/04/2011, 08:46 AM

وآإآإآإآإآإآإآإآإآإآإآإآإآإآو

يعجبني هذا وشهويتني
جعله فيه العافيه عليكم يارب

تغطية مميز اختي باسكن ،، بس غريبة ماشريتي من باسكن وصورتي منه
لانه عشقك الاول والاخير

لاهنتي اختي باسكن

طلق المحياااء · #15 30/04/2011, 09:22 AM

هههههههههههههههههههههههههههههههههههههه

والله استمتعت بقراءة مغامرتك

والله يسعدك مثل ما اسعدتيني

والله المستعان