قُلت في الإجتماع : يَ أهلي وعائلتي الموقرة : أنتم عائلة بايخه جداً جداً ... - نادي الهلال السعودي - شبكة الزعيم

المعاتب · #1 05/04/2011, 02:23 PM

قُلت في الإجتماع : يَ أهلي وعائلتي الموقرة : أنتم عائلة بايخه جداً جداً ...

في جو كله مغبر ومع نسمات هواء بارده كُنت مستانس لِ درجة لو جاء وآحد وقال عطني دراهم
قلت له : سم خذ مكأفأة الجامعة وفوقها مكرمة الملك كلها بس أبي منهآ 250 ريال أمشي حالي وأكل بها لقمة عيش تعيشني كم يوم ( فدائي

)
أشتريها بها خبز صامولي وتونه لـ الفطور والغداء مرة وحده والعشا بيكون مطبق و حمضيات

نرجع لِ الجو المغبر والعليل : أخذت زمزمية شاهي ( مر ) بدون سكر

وطلعت وقعدت على دَرَج باب البيت : أشوف اللي رايح واللي جاي ,
لفت إنتبآهي الآرض الفاضية اللي قدام بيتنا ( قسم بالله سبورة ) الظآهر كل من جاء كتب عليها
وفيه انواع الكتابات مثل :

( الحب عذاب .. قطع قلوب الشباب )

( ما أضيق لو قلتوا لي : يَ حمار )

( برحـة الملتقى " مركز الدشير الرئيسي " )
( آه لو تدري حبيبي كيف أيامي بدونك )
( لا غشاك الليل وأسرف بك الحزن العميق جنب وجيه البشر .. وإسجد لخالقها )

( البنات ما فيهم خير صدقوني .. )
( يمه سامحيني ! )

> أحسن وآحد

( شارع الثلاثين يَ مجمع الحلوين )

ولفت إنتباهي عبارة مكتوبة : ( خلصت العطلة وأنا ما تعديت هالمكان )

التفت على بيتنا ورجعت أشوف نفسي ثم رجعت التفت على بيتنا ثم رجعت وصورت نفسي بالجوال
وقلت في نفسي : تصدق ياللي كتبت هالكلام أنا مثلك.
كل يوم أجي وأطلع نفس المكان وأقعد مره معي شآهي حالي يوجع البطن ومره شآهي مر ومره غجر

ومره نعناع " حبق"
وأنا اللي أقوم على حيلي وأكب باقي االشاهي اللي معي > بارد

وأشيل عفشي وأدخل للبيت

-

" في البيت "

دخلت على الأهل في " ليفينج روم "

وأنا أصفق بيدي وأقول : إجتمااااع .. إجتماااااع عاجل ..
الكل ترك اللي في يديه من بيالة شاهي وفصفص واللي ترك الريموت قالوآ : يَ صديق نفسه وش عندك ؟
قلت : صح إني صديق نفسي وأقعد وحداني

لكن أهووجس وأجيب لكم أشياء توسع الصدر ..
المُهم أولاً وقبل كل شيء وبدون تجرد صرخت بأعلى صوت وقلت : أنتم عائلة بايخه جداً ..

وَ فجأة يجني كرتون منديل بسرعة 120 كيلو متر في الساعة في رأسي

من أخوي وهو يقول : مزعجنا واجتماع وعلم وخبر وأخر شيء هذا اللي عندك ,
يله آطلع برآ فآرق .. الكل صآر ينتقدني ويقول مآ عنك سالفة .. واللي يسوي صآفرآت إستهجآن

واللي يأشر بيده وهو يقول آووووووه

ما جاء في بالي إلا عبدالحليم حافظ يوم إنه على المسرح والجمهور يرمي عليه الجزمة وإنتم بكرآمه واللي يسبه
قلت في نفسي " هكذا هم الكوسين دائماً ينطقون أو يسبونهم الناس "
أنظر إلى حالي وحال عبدالحليم وحال ياسر القحطاني وحال عمر المختار
عندها أتذكر أن الدُنيا لازالت بخير : ما دآم أبو متعب على رأس الهرم السعودي "

بعد موجة انتقادات لاذعة من الأهل سقطت دمعة من عيني وهي تتهدى على خدي
وصلت عند برطمي وطلعت لساني ولحستها لِ أرتوي من عطش أهلي

مسحت دموعي بطرف ثوبي وصرخت بصوت فيه حزن عميق ونبرات باكيه
كأنني الدكتور طارق في مسلسل الأرض الطيبة

يوم إن ديآلآ قالت : أنت مآ بتحبني

وقررت تترك الضيعة و تروح المدينة قُلت ( أطول وصف ) : الناس تروح وطلع وتسافر
وتستانس وتعيش يومها وأنت قاعدين في البيت لا أنتم الي رحتوا لمكه ولا المدينة ولا الشرقية وشذا الحياة !

حتى منتزهات وملاهي والالعاب ما ترحون : اطلعوآ على الأقل لحديقة حيوان

أهم شيء خلونا نغير جو

وشذآ النظام الدكتاتوري ! اللي معيشيني فيه ..

على ألأقل إطلعوآ إستراحة لو يومين : قاعدين في البيت تقول ماسكينه لا يطير
اللي يشوفكم يقول فيه دراهم عندنا باقيه في التجوري

ولا تطلعون خايفين تنسرق

أنتم بس قولوآ لي : رشود دور لنآ إستراحة عطوني إشارة بس وأدور لكم .

أجل العطلة جآءت وإنا قاعدين في البيت ..

إسمعوني ترى إذا ما طلعتوا في العطلة ترى بدور عائلة تتبناني غيركم

لأنكم ما تعطوني حقوقي كاملة كإبن يعيش في أرجاء هذا المنزل الطيب

أو بنتحر وأريحكم مني ومن غثاي

وأخذت كرتون المنديل وطلعت أمسح باقي دموعي برا

وقلت : أنا طالع برا البيت .. إذآ فكرتوا تطلعون آتصلوآ علي ..

وقبل ما أطلع كتبت وصية ووضعتها على سريري مكتوب فيها

:

" يَ عائلتنا الجميلة اطلعوا في إستراحة يومين وَ وسعوا صدوركم وفلوها
وإستانسوا بس لا تنسوا تحطون تورته فيها صورتي ومكتوب تحتها

( رحمك الله يَ رشود كُنت تبحث لنا السعادة ) "

إنتهى

- الموضوع للنقاش وليس لِ سْب عائلتي الموقرة

يعني لا أحد يغلط !

- هل عند بعضكم نظام مثل نظام العائلة عندنا : ( وشو له الروحة والجية نقعد في بيتنا أحسن لنا )

- العطلة جتنآ وين رايح وين جاي ؟ ولا في البيت جيزك جيزنا يعني : ( مثلك مثلنآ )

- هل أنتم من النوع الي يحب يروح ويجي ويطلع ويوسع صدر أهله مثلي ؟

> بس مآ يقدرون التعب

- مساحة حرة للجميع للحديث ...

العب يالازرق · #2 05/04/2011, 02:29 PM

ههههههههههههههههههههههه ههههههههههههههههههههههههههه ههههههههههههههههههه
الله يوسع صدرك بالعافيه ويرحمنا وياك

(اسير& المحبة ) · #3 05/04/2011, 02:57 PM

ابغى اعطيك مثال لسالفه الطلعه في عائله هنا في الرياض اذا بغوا يغيرون جو يروحون يستاجرون شقه يجلسون فيها يوم او يومين ويرجعون بيتهم عشان يحسون انفسهم سافروا يعني يضحكون على انفسهم فانت سوا المثال هذا مع اهلك يمكن يمشي وضعه

عاشق المسجد · #4 05/04/2011, 03:47 PM

يخاي لاحظت شيء باشبكه
قل وشو هو
انا اقولك وشو هو
الواحد تلقاه فاااااضي و وده يفضفض يقول مالي الا المجلس , ويسدح لنا موضوع جميل , بعدين اذا حط استعراض المشاركه وقرا موضوعه من جديد حصل ان الموضوع ما فيه شيء يعني الي بيرد علي بيقوله
طيب
وحنا وش علينا منك
وش الفايده منزل موضوع ...
بعدين انت يجيك تحطم ويروح وجهك الوان من الفشيله
لكن تقول عشان اتفادى كل هذا خل احط كم سؤال لهن علاقه بالموضوع ولا شاطفات الموضوع شطف ويكوهن هادف وبناء ولا يجرح الآخرين

^^^^^^^^^^
احس اني انا الي بديت افضفض ولا ؟؟؟؟؟؟؟
$$$$$$$$$$$$$$$$$$$$$$$
برد على اسالتك برايي انا
النقطه الاولى : ياخي سبحان الله انا دايم احس ان عائلتكم مصروعين نفسيا وانهم ابيخ عائله ولا ؟؟ << امزح امزح لا تقعد تصدق
النقطه الثانيه : ياخي بالنسبه لي احسن نقدعد بالبيت ونفله بالبيت وهدوء << هذا بالنسبه للطلعه مع الاهل فانا اكهه كره موب طبيعي
اما مع الشباب فهي فله ووناسه وبالعكس احبه مره
النقطه الثالثه : ما فهمت
الرابعه : لا لا لا لالا لا لا لا لا لا لا < ما احب ابدا
الخامسه : سفه فوق او الرد

المعاتب · #5 05/04/2011, 04:23 PM

السلآم عليكم .. حيآكم الله أخوي العب يآلآزرق شكراً لك يَ غالي لحضورك وربي يوفقك
دنيا وآخره ويسعدك .. آسير المحبة تعرف المشكلة وين إن الديره صغيره يعني في ساعه تلفهآ كلهآ بس
اللي أبي أوصله أنا هو الآجتماع وتغير المكان وأفضل شيء يكون
إمآ سفره أو تطلعون لمنتزه او تأخذون إستراحه يمعنى فيهآ السعة والوناسة وتغيير المحل
لكن مسألة الشقة .. تحس إنه مثل " الغلقه " يعني محجوز في مكان مُعين بعكس الآمثلة اللي وضعتهآ أنا
ممكن عآئلتكم نظآمهم كيذآ .. وحتى والله إني أعرف نناس نفس نظامكم ومرتاحين ..
بس بيني وبينك أنا مآ ىرتاح إلآ آذآ صآر فيه شي كبير منت محجوز في مكان واحد
خياليه .. بإنتظآر عودتك تالي الليل .,
mr.al3rana .. هلا بك أخوي أولاً .. بصراحة أنا ما فهمت وش تقصد من كلامك
لكن برد على اللي فهمته من كلامك : اولاً الموضوع ما يحتاج لوضع أسئلة يعني بإمكان الواحد يرد
حسب وجهه نظره لكن أنا وضعت النقاش عشان بعض الأعضاء يفهم ..
بس تأكد إني مسوي إستعراض للموضوع بالنقاش وحسيت إنه جيد
الآمر لآخر الموضوع نعم للفضفضة ومالي الا المجلس لآنه قسم عام ..
يعني تخيل موضوع مثل هذا بروح أنزله في الجمهور ولا في العالمية
بكل تأكيد مالنا ألآ المجلس .. فأنا مدري إن كان مثل هالمواضيع ما تستهويك
هذا آمر آخر ..
بالنسبة ل إجابتك في النقاش .. أنا مع الثنتين مع الآهل والشباب ,,
أصلاً كل وقتي مع الشباب وفله معهم بس لازم نوسع صدر الآهل
عموماً شآكر لك حضورك سيدي ..

موفقين جميعاً

حروف الغلا · #6 05/04/2011, 04:55 PM

احلى طلعاتي مع صديقاتي أو خواتي بس

لكــن مع أهلي و بوجود اليهال ، مليون مرة لالالالالالالالا

لازم تخطط للطلعة قبل بشهر و تحجز موعد و موثق بالديوان الأميري

عشان نضمن الروحة ، و أغلب الطلعات للحديقة أو البحر

و ان شا الله موعودين بسفرة نهاية الشهر ، و يااارب ما يغيرون رايهم

محبة الرحمن · #7 05/04/2011, 05:13 PM

أإهلآ وسهلآ أإخي المعآتب

أإستغرب حقيقتآ منكم

انتم الاولاد وتطلبون أإهلكم بالذهآب الى مكآن ما

أإحنا عكس .. نبي نطلع نروح نجي الرفض يأتي من قبل الاولاد

ومآإفيهـ أإممآإكن تحتوي العآإئلة جميعهآإ بدون أإزعآج ونآإخذ رآإحتنآ فيهآ

تبي تسسلي نفسسك وتذهب والاهل كلهم معآإك خذ بالاسبآب التآلية

1-سو حممملة في البيت بقيآدة اثنآن من العآئلة
2-حاول تكسسب خوآإتك بصفك وحمسسسهم بأإسلوبك
3-أإذهب بحضن أإممك وأإشكي لهآ وقلت طفشآن متضآيق..
أإحس اني تعبآن وودي أإطلع أإغير جو تعآلي معآي

4-امسك وآإحد وآإحد من أإفرآد عآإئلتك على جنب وأإقنعه

وأإذا مانفعت كل تجآإربك ..

سلي نفسسك بالبيت .. يعني سو دوري بالبلاستيشن مع اخوآإنك
خذلك دلة قهوة وأإجلس بالحوش وترا بيجيك وآإحد وراء الثآني ويجلسون معآك

وأإذا خلآص مآنفع شئ .. سأإفر مع أإصحآإبك كم يوم وتستآإنس
حتى لمآ ترجع كل أإفراد اسرتك متشوقين لك ..

يعطيك العآإفية .. ششكرآإ لك

دمت في حفظ الرحممممن

**الـــــــــواوا** · #8 05/04/2011, 06:06 PM

موووضوعك فللله , وأحسك تتكلم بوآقع صعب تغييره

أقولك حاجه , محاكيك كنت مدمن طلعات ومفلووت ع حليً على قوولتهم
يعني , إذا جآني أتصال فجأه يالله مشينا مشينا مطفووق ع الآخر

الله لووو ترجع بس , أحلى أستراحات وأحلى طلعات ومغامرات
كنا نطلع ديرة يقالها ؛؛ الفقره جووها عجيب فالصيف ,منطقه مرتفعه
ويكثر فيها الحميـر " كرمتوا
وأحلى مطاردات مـع الحمير..

حتى لا جيت أسافر للخارج ,نفس الحكايه الريوس مفصول
أذكر مره كنا نلعب بلايستيشن وبنفس القيم
يسألني خويًي
وش رآيك نطلع لبنان يامحمد ؟
مامرت يومين الا وأحنا مخلصين التذاكر ومسافرين

أمـا اللحين روقت ع الآخر وفالنادر ما أطلع من البيت الا للدوام والقهوه فقط.

عذرا ع الإطاله : كنت مع برنامج فض فض

سلطان الصولي · #9 05/04/2011, 06:17 PM

أهلا أخي // رشود

.
أنت طالب جامعي ماشاء الله عليك ، وأكيد السياره متوفره عندك تقدر تروح وتشوف وتنظم وتكلم الأهل بشويش كذا

.
موب تطب عليهم أبي أروح وأنتم أغبى عائله ، كـ مثال " يبه والله من زمان ما رحنا مكان ودنا نطلع ودنا نروح ودنا نشوف أي شيء " !
وإذا رفضو الأهل ، شف لك رحله مع أحد الأصدقاء أو أحد من الأقرباء على الأقل .
أعانك والله وسدد خطاك

.
كنت أتمنى ألا تكتب عن عائلتك هذا الكلام ، قد تكون لحظة غضب بس يبقون أهلك

.
بارك الله فيك

.

Dr.mjno0on · #10 05/04/2011, 07:50 PM

والله يابعدي أني كنت اعاني نفس مشكلتك ولا بعد لي سنه اطالب بسيارة

بس يجيب الله مطر

والله أني عانيت منهم بس لقيت حل للمشكله وهو كـ التالي اطلع من البيت مع احد اخوياي او اقاربي
وقفل الجوال لين اطفش واعود للبيت وانااام لييين تتنفخ جفوني

واسحب على مندوب ابو ابوهم

وبث
الله يعطيك العافيه عـ الموضوع

عاشق المسجد · #11 05/04/2011, 08:11 PM

إقتباس


	mr.al3rana .. هلا بك أخوي أولاً .. بصراحة أنا ما فهمت وش تقصد من كلامك لكن برد على اللي فهمته من كلامك : اولاً الموضوع ما يحتاج لوضع أسئلة يعني بإمكان الواحد يرد حسب وجهه نظره لكن أنا وضعت النقاش عشان بعض الأعضاء يفهم .. بس تأكد إني مسوي إستعراض للموضوع بالنقاش وحسيت إنه جيد الآمر لآخر الموضوع نعم للفضفضة ومالي الا المجلس لآنه قسم عام .. يعني تخيل موضوع مثل هذا بروح أنزله في الجمهور ولا في العالمية بكل تأكيد مالنا ألآ المجلس .. فأنا مدري إن كان مثل هالمواضيع ما تستهويك هذا آمر آخر .. بالنسبة ل إجابتك في النقاش .. أنا مع الثنتين مع الآهل والشباب ,, أصلاً كل وقتي مع الشباب وفله معهم بس لازم نوسع صدر الآهل عموماً شآكر لك حضورك سيدي ..

ياخي انا اكتشفت ان كثيرين من اعضاء الشبكه الاعزاء ما يمزح معهم صح ولا ؟
اكثرهم مسوي ثقل ويقعد ساعه يفكر وش يحط مكان هالكلمه صح ولا ؟
^^^^^
ما يمشن معكم ذولي ,,, احس اني امون بزياده
.
.
.
.
تشوف الكلام الي فوق ذا , ترا كله هواجيس يعني لا تاخذ شيء

إقتباس


	واسحب على مندوب ابو ابوهم

احسن

S.SAM · #12 05/04/2011, 11:20 PM

وعليكم السلآآم ورحمة الله وبركاته.. ق1

اهلا بـ صديق الكل.. ق1 ض1

موضوع الكتابات احلى ما فيها الخطوط انواع واشكال.. ذذ

الموضوع الثاني بالعكس..

هم ينتظرون احد يخرجهم ماهم لاقين.. ض1

بقول لك وضعي وشلون.. من فتره تقريبا سنه وعليها الجمعة يوم استثنائي.. لدرجة اني ما انام بشكل نهائي يوم الجمعه ويكون يوم خاص للاهل..

الغدا بكون برى وين ما ابي واهلي معي.. ومع الوقت تشوف السياره ما تكفي كلن يبي يروح معك.. ض1

لدرجة ان يوم الجمعه الي فات رايح ثلاث ردود وراد.. ذذ

تروح مع اهلك الي بالبيت وتظطر ترد لاخواتك المتزوجين وعيال اخوانك.. ذذ

واحسن شي تسويه بذا الوقت بلغهم وين انت فيه وسكر الجوال لحد يقول لك مرني.. الي يبيك يعرف مكانك.. ض1

على العموم ممكن تبدأ انت بروحك بأي يوم من الايام تختاره وتشوف انك فاضي والاهل فاضين وتقترح عليهم الفكره الي يبي يمشي حياه والي ما يبي بكيفه.. ض1

ومع الوقت بتشوف وش يصير.. بس لا تسحب عليهم.. ض1

مرات اقول لهم بتخرجون ولا.. يقولون لا .. ما اوصل باب البيت الا هم يصيحون انتظر لا تروح لين تاخذنا.. ض1

ابدأ من هذا الاسبوع وراح تشوف النتايج بروحك بعد فتره.. ق1

منور كثير رشود.. ق1

عافاك الرحمن يالغالي.. شكرا جزيلا لك.. بالتوفيق لك يا رب.. ق1

LM-10 · #13 06/04/2011, 02:37 AM

إقتباس


	- الموضوع للنقاش وليس لِ سْب عائلتي الموقرة يعني لا أحد يغلط !

انا بسبهم

.. الله يخليهم لك

إقتباس


	- هل عند بعضكم نظام مثل نظام العائلة عندنا : ( وشو له الروحة والجية نقعد في بيتنا أحسن لنا )

اي والله اخيس نظام بالعالم

إقتباس


	- العطلة جتنآ وين رايح وين جاي ؟ ولا في البيت جيزك جيزنا يعني : ( مثلك مثلنآ )

ابد البيت الشارع البيت الملعب زيك

إقتباس


	- هل أنتم من النوع الي يحب يروح ويجي ويطلع ويوسع صدر أهله مثلي ؟ > بس مآ يقدرون التعب

انا ماصديقنا في الطلعات الا انا .. لاحصلت طلعه اقولهم بروح مع فلان وفلان ولد فلانه

وبكيفهم

إقتباس


	- مساحة حرة للجميع للحديث ...

شكرا على موضوعك اللي بالصميم اللي جاب لي ذكريات حزينة اخر سفرة في حياتي كانت عام 1424هـ مابين مصر والاردن وسوريا ولبنان

ومن بعدها الجواز انتهى ولا جددناه

وان كثرنا رحنا الدمام ولا الخبر

غضب الرومان · #14 06/04/2011, 09:34 AM

اول شي اهنيك على انتقائك للالوان والخطوط

موضوع روووعة

ضحكتني يوم تقول صافرات استهجاان

>>> ساكنين في اي استاد؟

بالنسبة لسؤالك>> حنا نطلع بالاجازات الطويلة لكن القصيرة مانطلع>> زيكم

موضوع روعة روعة روعة

ياهيك مواضيع والا فلا

>>> صح علي الجملة؟؟!

تقبل تحياتي" غضب الرومان"

خـيـالـيـه · #15 06/04/2011, 09:48 AM

بــــــــــــآآآآآآآك

وخـــــــــــــــــــــرووووووووا

آنا جيـــــــــــــــــــــــــــــــت

المهم:
مبروك فوز الزعيم امس
ولو آن المباراة بعد هدف الجزيرة صارت تجيب النوم

نجي لموضوعك يا رشود

إقتباس


	- الموضوع للنقاش وليس لِ سْب عائلتي الموقرة يعني لا أحد يغلط !

ايه ده يا رشود؟

افا بس ماهقيتها منك

وشوله نسب اهلك ..
اهلك هم اهلنا .. ده احنا اخوان يا راقل

إقتباس


	- هل عند بعضكم نظام مثل نظام العائلة عندنا : ( وشو له الروحة والجية نقعد في بيتنا أحسن لنا )

والله شف..
هالنظام هذا عند شايبنا الله يطول بعمره -على عمل صالح ان شاء الله-
كل ما قلنا له شئ قال: وشوله
وللعلم بس .. هالنظام عند اهل ابوي كلهم
من القهر لو تقولهم: كيف الحال؟!
قالك: وشوله ؟؟!!

والـ (وشوله) هذي حتى بالطلعات والتمشي
ودي بيوم من الآيام آجي بكل شجاعة واسآله: لــيـــــــــــــــــــــــه

إقتباس


	- العطلة جتنآ وين رايح وين جاي ؟ ولا في البيت جيزك جيزنا يعني : ( مثلك مثلنآ )

والله ألى الآن الآنباء تؤشر الى انه جيزنا جيزكم << عجبتني

بس فيه آنباء ثانية تقول: آنه ممكن .. ممكن نسافر لبريده عند آهل آبوي
بس الله يسهّل -آن شاء الله-

إقتباس


	- هل أنتم من النوع الي يحب يروح ويجي ويطلع ويوسع صدر أهله مثلي ؟

والله تستهويني هالشغلات كثير
وودي آنظم طلعات لآهلي
بس الشيبه -ربي يحفظه ويخليه- ما يشجّع

كثير آحيان آقول:
لو الحريم يسوقون .. كان آوري آهلي كيف التمشي والطلعات

بما آنه آخوي بثاني ثانوي ولسى ماعطيناه سيارة << مافي آلين يخلص ثانوي

بس يا الله .. لعل في الآمر خيره

ووالله بيني وبينك ..
الفرحة اللي آشوفه بعيون آمي بجمعة خواتي يوم الأربعاء؛ وربك آنها تسوى الدنيا وما فيها

بس الحمد لله يعني نطلع احيانآ ..
نجتمع مع خوالي -بما آنهم موجودين بالرياض مب زي آهل آبوي ببريدة-
نطلع مجمعات مع خواتي وبنات خالتي آحيانآ ..
ناخذ استراحات وكذا
يسيرون علينا خوالي

يعني مهما كان آهون من غيرنا بكثيييير
فيه ناس وربك آنهم مايشمون ريحة الشارع ولا يعرفون شكله

الحمد لله على كل حال

آشكرك على موضوعك .. مره حلو ومرتب .. بكل شئ مرتب
آفكاره .. محاور النقاش .. ترتيبك للآلوان شئ ثاني -ماشاء الله عليك

ووبـــس ..
آسفة آني طولت ..
تحياتي لك ..