حيـــــــــاكم




أنا جيت

مبطين عنكم

مبطين عن محارشكم ومطاردكم دار دار وزنقه زنقه حوش حوش وملحق ملحق

يالله.. عسى في الامر خيره لي ولكم

على فطنه وقبل انسى.. الحمدلله على سلامتي الله يخلين لي

بغيت اروح ملح لكن أشوى الحمدلله ربي ستر وقطيرة الدم اللي بقت بجسمي تجمّلت معي الله يجمل حالها

مالكم بالطويله



الشيخ عباس بن فرناس بن فرداس << اسمه كذا عاد وش اسوي به

من شيوخ بلاد الاندلس ( سابقاً ) اسبانيا ( حالياً )

هالحبيب هو اشهر واحد جرب نظام ( الجرأة ) في العالم العربي من وجهة نظري

وطبعاً انتم عارفين سالفته وجناحين الريش اللي لبسهن وحاول يطير وجاء مجاوب على ظهره

الضعيّف راح بخابور مع انه نفع العالم بأكثر من اختراع لتحديد الاوقات والآلات الهندسية والزجاج

لكن لأنه ( جريء ) بزع وطاح طيحه قشراء ودفع الثمن غالي.. مات الله يرحمه وجميع المسلمين

المهم

الجَريه اللي قام بها المذكور اعلاه ابوفرناس مثل ماقلت تدخل تحت غطاء ( الجرأة )

الموقف اللي قام فيه كان له اهداف ساميه وكان يطمح بجرأته الى التوصل لفائدة العالم

هالكلام صار قبل اكثر من ألف سنة

ياترى كم واحد عندنا يمتلك جرأة ابو فرناس ؟؟ او يقدر يحاول يكون جريء مثله ؟؟

خوذوها مني : بعيدة عن شواربنا كلنا

كل اللي حاولوا يقلدون جرأة ابو فرناس سياحيين بالضبط مثل كل واحد لبس 15 بعد يوسف الثنيان

ابو فرناس ( الاصلي ) مايتعوض وماله مثيل

تعتقدون كم ابو فرناس ( تايواني ) عندنا هنا في شبكة الزعيم ؟؟

كم واحد يسمع بالجرأة ويطب طبات هو يشوفها من منظوره الشخصي ( جرأة )

لكنها بالنهاية ترميه لقدره المحتوم ( انترنتيّاً ) والمشابه تماماً لمصير ابو فرناس ( الاصلي )

( الرأي ) مصطلح خطير.. يلخص باختصار كرامة الانسان

كرامتك كعضو من كرامة حريتك في طرح رأيك

لكن رأيك اذا كان يحمل بين طيّاته ( حماقة ) وانت تحسبها ( جرأة )

هذيك الساعة تأكد ان مصيرك بيكون بالمطبخ ( تقشر بصل ) او فوق النخل ( تخرف تمر )

فرق شاسع بين ( الجرأة ) و ( الحماقة )

تخيّل لو يوم من الايام تروح للأمارة يوم الاثنين بعد صلاة الظهر.. وقت استقبال الامير سلمان للمواطنين

وتخيّل لمّا جاء دورك رحت ووقفت قدام ابوفهد واخذت بنفسك مقلب وسوّيت جريء وقلت له :

الحين مصدق عمرك انت وبشتك.. ياشيخ والله مابراسك دبره.. وكل شغلك غلط بغلط

بهالموقف انت تعتبر نفسك جريء وماعندك بأحد ؟؟ او احمق بكل معنى الكلمة ؟؟

مسوّي تزبّد ومايهمك شي ؟؟

وش مصيرك بعد هالمعلّقة الرائعة ؟؟ صدقني منت بعيد عن مصير ابو فرناس

طيب تخيّل معي موقف ثاني.. بنفس المكان وقدام نفس الشخص سلمان الله يحفظه

لو جاء دورك ووقفت قدامه وسألك بصوته الرخيم : وش عندك ؟؟ ورديت عليه :

ياطويل العمر عندي ملاحظة لك واتمنى انك تتقبلها برحابة صدر

انت الله يحفظك تقابل المواطنين يوم واحد بالاسبوع والرياض فيها 5 مليون.. انت شايف هاليوم يكفي ؟؟

مايمدينا نكلمك ولا نقابلك بسبب الزحمة.. من حقنا عليك طال عمرك انك تخصص يوم ثاني

وسلامتك الله يحفظك

وش تتوقع ردّة فعل الامير ؟؟ تتوقع يجيك أذى بسبب كلامك ؟؟ او راح يتقبل ملاحظتك ؟؟

اللي انا متأكد منه انه راح يبتسم

في الموقف الاول ( حماقة ) منبوذة ومقرفة .. وفي الموقف الثاني ( جرأة ) محمودة ومحببة

اتمنى رسالتي تكون وصلت لكل عبيط مدمن ( تزبيد ) وفاهم الحريّة غلط

.

.

.

اقليم الباسك.. والهوى شرقي

كلكم تعرفون اقليم الباسك شمال اسبانيا.. على الحدود الفرنسية

اللي فيه أندية ( أتليتيك بلباو ) و ( أوساسونا ) الاسبانية

الباسك اقليم له حكم ذاتي.. ومايعترف بالحكومة الاسبانية

مشاكل وحروب طاحنة واغتيالات وتفجيرات.. كلها كانت حاضرة بين الطرفين

المعلومة الغائبة عن الكثير منّا ان الشعب الباسكي في اسبانيا قليل.. والأكثرية في جنوب فرنسا

واللي عايشين في اسبانيا منهم يستمدون قوتهم واسلحتهم والدعم من خوياهم اللي بفرنسا

وانا هنا ماني في مجال الخوض في متاهات تاريخية عن نشأة الباسك وأحقيتهم بالاستقلال من عدمه

لكن الشي الأكيد انهم رغم كل بلاويهم على الحكومة ومشاكلهم ( ما وراهم الا الدجّة )

اقليم الباسك ماعنده اي شي ينفع فيه الدولة الاسبانية.. والشعب الباسكي سلبي جداً

وهذا اللي يخلي الواحد مستغرب .. وش مصلحة الحكومة الاسبانية بالتمسك في هالأقلية الداجة ؟؟

عايشين معك بالإكراه.. مالك عندهم ولاء او قبول.. مايعترفون بك كحاكم.. كل ولائهم لجنوب فرنسا

وش له توجع راسك راسك فيهم ؟؟ وش مصلحتك منهم ؟؟ لا فودهم ولا كفاية شرهم

اكرشهم وريّح راسك ونظف بلدك وانعم بالولاء والمحبة من شعبك الوفي فقط فقط فقط

سلام عليكم

إقتباس الرسالة الأصلية كتبت بواسطة marsal هناك شعرة بسيطة بين الجرأة و بين و الحماقة او بالاصل قلة الحياء

والشعرة اكثر بساطة بين ( خفة الدم ) و ( البثارة )

ياما اعضاء جدد الواحد منهم يدخل ويستلم الاعضاء ذب واستهبال ومسوّي فيها ( الرجل الذي زاحف )

مثل هالشخص على باله انه الحين يبي يطيّح الميانة بدري ويفرض وجوده كواحد نكته وخفيف دم

لكنه للاسف يضيع بين بثارته وسماجته ومايدري ان القبول مايجي بيوم وليلة ومايجي بتصنع خفة الدم

خفة الدم هبه ربانية يهبها الله من يشاء من عبادة.. وليست ثوب تلبسه متى ما بغيت وتفصخه متى مابغيت

إقتباس الرسالة الأصلية كتبت بواسطة marsal مثل شوف جراتي تنم عن ذكاء و فكر و حكمة و دائما ما تاتي على نور واضح ... وشوف جراة أبوطلال ماهي قلة حياء و لا اسلوب حماقة لكن دائما ما تكون فاضية لا نفع يرجى منها ....

مايمدينا على جرأتك يا خريج تورا بورا هههههههههههههههههههههههههههه

انت ياعبدالله واحد من القله الذين كسبوا احترام الكثير بقوة طرحك وحجتك.. حتى اللي يختلف معك يحترمك واولهم المشاغب

وابو طلال اكبر من اتهامات المرتزقة امثالك
ابو طلال خفة الدم عنده ربانية وله قيمة عند الجميع

جااااااااااااااااري

لي رجععععه يا عسل

ياهلا بالصخرة منور


ياكثر اللي مسوي أني بطل وقديّح للبشرية وهو (سبيكة) أو أحمق على قولتك
وأكبر (وأمثل) مثال للشخصية هذي هو رئيس فريق الجار





وبالنسبة للتعامل مع الأقلية مع احترامي الشديد لرأيك لكن أعتقد فيه أكثر من رأي أفضل وطريقة أسلم



لأن ارتباطهم بالأرض قوي وهو إقليم الباسك ولذلك ماتقدر تطلعهم من أرضهم مع أنهم يدينون ولائهم للغير




مع أني أفهم من كلامك أن الكلام لتس واسمعي ياجارة



لكن ربعنا شوية فيهم الكرشة لأن الدعوة أكثر ولاء ويدخل فيها أمور واعتقادات كثيرة



والحمدلله على السلامة ياقدع

الضغط كبير على الموقع وكل شوي تطلع صفحة يوجد ضغط على المزود الحالي

تعبت وانا احدث الصفحة ياكثركم يا اعضاء شبكة الزعيم

إقتباس الرسالة الأصلية كتبت بواسطة ™MŘ.βάđя ياكثر اللي مسوي أني بطل وقديّح للبشرية وهو (سبيكة) أو أحمق على قولتك وأكبر (وأمثل) مثال للشخصية هذي هو رئيس فريق الجار

رئيس الجار حبيب وقلبه ابيض عساها تبطي سناوينه

إقتباس الرسالة الأصلية كتبت بواسطة ™MŘ.βάđя لكن ربعنا شوية فيهم الكرشة

خلاص اذا الكرشة ماتكفي مو لا زم يكون العشاء كمونية لحالها.. نحط كبدة ومقلقل وشوي زبادي وبيض مسلوق ويحمدون ربهم

إقتباس الرسالة الأصلية كتبت بواسطة * سارة * كلام سليم وخارج من رجل ناضج

صينية بطاطس مو آدمي ناضج

إقتباس الرسالة الأصلية كتبت بواسطة * سارة * أما بالنسبة لـ كلامك الاخير .... خطير جداً لمن يستطيع القراءة بين السطور

حسيت محمد بن نايف عند الباب وكل دبابيس الروابي معه

منوره اختي سويره

إقتباس الرسالة الأصلية كتبت بواسطة الزعيم سام6 ياهلا والله اخوي الصخرة والحمدلله ع سلامتك يالغالي

الله يسلمك من كل شر ومكروه.. حياك اخوي

لي باك

.............

الحمدلله ع السلامه وعودا حميداً

للأسف احيانا البعض يدس السم في العسل ويستغل امور لتحقيق حاجه في نفسه

كلمات جميله وفي وقتها


بالحب والإشراق

إقتباس الرسالة الأصلية كتبت بواسطة رائدة الزعيم بالحب والإشراق

ياجعلها تشرق ايامك اختي رائدة.. وين الغيبات يا مره ؟؟

وش بلى يوزرك صار فوشي