الله يحفظ لنا مملكتناا من كل مكرووه

والله يطول بعمر ملكنـا ويعطيه الصحه والعافيه

قولوا أمين


بالبداية انا ما ادري كيف اشكرر الجمهور الهلالي بكل انحاء المملكه ووالجمهور الهلالي الي ساندوا الهلال بقـطر والي وقفوا مع الهلال بالفتره الاخيرة الصعبه القاسيه والي الحمدلله عدت على خير

ومارح اشكـرر ادارة النادي والجهازالفني والاداري والاعبين لأن الجمهور هو الي بيقدم الشكر لهم بالحضور والمساندة بالملعب والمساندة خارج الملعب برفع الروح المعنوية لدى الادارة والمدرب والاعبين


حبايبي الهلال بالفترة الحالية يمر بأهم مراحل الموسم يعني خلونا نحاول قد ما نقدر نوقف معاهم ونشجعهم لين ينتهي الموسم وبعدها لكل حادث حديث


صدقوني زي مافيه ايجابيات فيه سلييات كثيره وقالها سامي ولكن برضوا قال خلو الموسم ينتهي وبعدها كل واحد يقدر يصحح الاخطاء ويبدأ من نفسه

لكن الي يخليني افكر اطرح الموضوع هو اننا نملك سلاح فتااك لو نقدر نستعمله لصالحنا بيخدمنا وبيخدم نفسه بالفتره الجاايه كثير ويمكن يكون هوو الحااسم وهو المنقذ

السلاح الفتاك الي للاسف متعطل بأرادته هو ياسر القحطاني

افضل لاعب اسيوي والمهاجم العصري الي كثير يحاولون يقلدونه والي كثير حاقدين عليه للاسف الفتره الماضيه فاقدين موهبته .. للاسف جالسين نشوف شخص يتمشى بالملعب وتايه وكأنه بعالم ثاني وماله دخل بالمباراة

انا ماجيت ابحث عن اسباب تدهور مستوى ياسر لكن ابغى الموضوع هذا يكون رسالة من جمهور الهلال لياسر دون تطبيل أو تجريح خلونا نعطي ياسر حقه فقط

لو تشوفون اغلب ردودي يمكن انا اكثر شخص مدح ياسر واكثر شخص انتقد ياسر

ياسر هو لاعبي المفضل طبيعي بكون ابحث عن عودته لمستواه وأتمنى من جمهور ياسر يساعدونه بالعودة لمستواه لأن لنا الحين سنتين نردد اسمه بالمدرجات (( ااه يا ياسر )) ونعامله معاملة خاصة وهو يستاهل اكيد لكن هل الشي هذا ساعده ورجعه لمستواه ولا العكس زاد الطين بله ؟؟

خلونا نكون واقعيين ومانبغى نجامل أو ننتقص من الرجال

كلنا تابعنا الديربي أمس بصراحة ديربي باهت بغياب رادوي ونور وبحضور ياسر

الي تابع الهلال امس يبصم ان الخلل هو بالهجوم وبياسر نفسه صدقوني حتى لو الجيزاني المهاجم كان على الاقل شفنا فرص خطره والكل لاحظ احمد علي لما نزل بعشر دقايق فرصتين خطره وحده منهم كانت 90% هدف لولا الله ثم براعه مبروك زايد

ياسر قبل موسمين طلع بتصريح بكل الرياضة داايم احاول اتناساه وما اتذكره (( الي بالمدرج يتفرج )) للاسف ياسر حاليا (( بالملعب ويتفرج ))

أتمنى من الكابتن والقائد أنه يفكر بتطوير مستواه الفتره الحالية ويستعيد سرعته ولياقته .. اخر ست مباريات لياسر جيبولي لقطه فيها انطلاقه أو سرعة بالجري من ياسر بالملعب .. صدقوني مارح تحصلون

الرجال صااير يهرول هروله بسيطه حتى لاحظوا بالهجمات المرتدة نامي والزوري أو شافي يسبقونه لمرمى الخصم


العودة ماهي بتسجيل هدف او هدفين أو حتى هاتريك

فهد الجهني لو يعطونه فرصه يقدر يسجل هاتريك حنا نبي موهبة ياسر ترجع ..

موهبة ياسر = سرعة + مهارة من الدرجة الأولى + فكر كروي عالمي + الحاسة التهديفية


ياسر أنت تقدر تستعيد موهبتك والهلال والمنتخب محتاجينك

اذا النادي يجبرك انك تلعب وانت مصاب ياخي لا تلعب وتشوه صورتك لدى الجماهير
أجلس بالعيادة لين تستعيد كامل عافيتك وبعدها أهلا وسهلا الملاعب كلها تنتظرك
لكن سالفة أنك تفكر تلعب وانت مو جاهز مية بالمية هذي صعبه جدا
ممكن اول كنا نقول ان ياسر حتى وهو ماهو كامل جاهزيته يعتبر افضل مهاجم سعودي
وكنا نقول ياسر حتى وهو ماهو بكامل مستواه الفني يعتبر افضل مهاجم سعودي

لكن للاسف حاليا ما نشوف هالشي الملعب

أتمنى أني ما اكون طبلت أو جرحت او اسأت ليااسرر
أتمنى أني ما اشوف ردود تطيل أو تجرح أو تسيء لياسرر

التطبيل مارح ينفع ياسر
التجريح بيضر ياسر
الاساءه جمهور الهلال اكبر من الاساءات

اسف على الاطالة والوعد بعد نهائي كأس ولي العهد ونحتفل وإن شاء الله ياسر بتكون له كلمه وبيحسم المباراه اذا كان جاهز ومستعد بأذن الله