موقف لا بد من ذكره :D - نادي الهلال السعودي - شبكة الزعيم

أبو ميار · #1 02/05/2009, 03:53 PM

بسم الله الرحمن الرحيم ..

تذكرت قبل فترة موقف صار لأحد الشباب ومن سمعته ضحكت وجاء في بالي إني أقوله لكم ..

يمكن أحد يستفيد

ولا يكون متهوّر ولا يحط نفسه بمواقف بايخه

الموقف سلّمكم الله :

كان فيه شباب مخيّمين بالبر بأيام الشتاء وكان مخيمهم قريب من الديرة ..

وكلّم واحد من أخوياهم من اللي ما طلع معهم للمخيم ( نسميّه إبراهيم ) على واحد من اللي في المخيّم ( نسمّيه محمد ) يقوله مرّ علي أبسيّر عليكم وموتري ما يدخل البر ..

المهم قبل ما يروح محمد إتفق مع واحد من اللي في المخيّم ( نسمّيه خالد ) على إنهم يصلحون مقلب بخويّهم إبراهيم .. وإتفقوا على المقلب اللي هو إن خالد قبل ما تنتهي السهرة يستاذن من الشباب على إنه بيروح للديرة ويروح لمكان إتفق مع محمد عليه بوسط البر تحت رمثه ويتغبا ومجرد ما يمر محمد ومعه إبراهيم يطلّع عليهم خالد ويهبّل فيهم وإتفقوا على الأمر هذا ..

راح محمد ومرّ إبراهيم ووصلوا للمخيم طبعاً سيارة محمد هايلوكس وجلسوا وسهروا إلى قبل الفجر ..
قام خالد وإستاذن من الشباب علشان ينفذون المقلب ..

وبعد ما راح بنص ساعة قال محمد لإبراهيم عندي كلام أبغى أقوله لك قال تفضل قال وش رايك أقوله لك وحنا نتمشى بالبر وأتفقوا على الشيء هذا وقال إبراهيم مناسب حتى إذا إنتهيت من موضوعك توديني للبيت ..

وركبوا السيارة وراحو ..

خوينا خالد راح للمكان المتفق عليه وجاب الفروة وقلبها علشان يكون وحش

وكان لابس نظارات فسخها وقال وشلون تجي وحش ولابس نظّارات

المهم وهو جالس ينتظر جت ساعة الصفر .. وتمر السيارة من عنده إلا خالد ينقز على باب الراكب ويبدأ بالصراخ وكان وجهه وشكله يخوف اللي ما يخاف .

المهم راعي السيارة ما يوقف وأستغرب خالد لإن الإتفاق إنه كان يوقف ويضحكون على إبراهيم .
لبس خالد نظاراته والمفاجأة إنه شاف السيارة اللي راحت مكتوب من ورى نيسان مو تايوتا ..

عرف إنه غلطان ويرجع لمكانه وهو يضحك على غبائه ..
إلاّ وترجع السيارة النيسان مرة ثانية ويقول خالد إنه كان يسمع اللي في السيارة يقولون:
أنا شفته هنا والله العظيم وهم قريبين من خالد والراكب مطلّع سلاح كان معه ويقول وينه ما أشوفه ..

ويشغلون الكبس ويدورون عليه ..

وخالد على أعصابه لأنهم لو لمحوه أطلقوا عليه وراح خالد في خبر كان ..

المهم راحوا راعي النيسان بعد ما فقدوا الأمل وتنّفس خالد الصعداء

وجلّس يلّعن

المهم مرّ خالد وإبراهيم من عنده على الاتفاق ..

وما طلع لهم خالد ..

مرّوا مرة ثانية ..

ولا طلع لهم خالد ..

والثالثة والرابعة لين طفش محمد وقال هالمرة أبمشي من عند المكان صفر يمكن أشوفه ..

وإبراهيم ما يدري وش السالفة ..

ويمّر من عنده بأقل سرعة ويجي خالد وينقز ويركب بصندوق الهايلوكس من دون ما أحد يدري ..

المهم محمد طفش وقال لإبراهيم أبروح أوديك للبيت وقال إبراهيم وش الموضوع وعلّمه بالسالفة ..

قال إبراهيم يمكن راح لبيتهم أو إنه رجع للمخيم ورجعوا اامخبم ولا حصّلوا سيارات ..

قالوا مالنا الا بيتهم أو نروح نبّلغ الشرطة يمكن ضاع ..

وهم على أعصابهم وأول أول ما دخلو الديرة إلا ويطلع عليهم خالد من فوق السيارة من عند القزازة الأمامية ..

وإنهبلوا إثنينهم ..

وبرواية يقولون محمد تبوّل على ملابسه

طبعاً شرح لهم الموقف وضحكوا جميع ..

السؤال لو إنك بموقف خالد والناس تدوّر بتطلق وش بيكون موقفك ..

إن طلعت وقلت أستهبل رموك قبل ما تنطق حرف السين ..

وإن أسكت راح يلقونك ويطلقون عليك ..

أنت وش تسوي

عقد الياسمين · #2 02/05/2009, 04:14 PM

يا الله .. وش ذا

كنت أسمع من قبل أن الشباب عليهم حركات مدري وش تبي

بس هالمرة تأكدت

المثل يقول " من حفر حفرة لأخليه وقع فيها " وخالد ومحمد كلهم كلوا المقلب بحالهم

اللي توهق بـ سيارة النيسان

واللي ضيع خويه

, ولو كنت محل خالد .. أكيد أني بنام الين يطلع الصبح وأرجع مخيمنا

<< برود

الصدق أني مدري .. الله لا يحطني بهالموقف ..

شكراً لك أخوي ,

هامور البورصه · #3 02/05/2009, 04:16 PM

يأكثر هالمواقف والي تصير مثل كذا

انا اذكر مره مرني ولد عمي ومعه واحد من اخوياه وكنا نبي نطلع البر
وطول ابو الطريق تعرف فلان راح للمكان الفلاني ودخل فيه جني
ويسولفون عنه وهم يسولفون يضحكون انا بيني وبينك بديت اشك بالموضوع
مع قليل من الخوف ولا اخفيك اني اقترحت عليهم نغير الوجهه من البر للاستراحه
بس هم عيو ورحنا البر وكان فيه واحد مثل طريقتك كان ينتظرنا ويوم مرينا
ركب بالصندوق ومادريت الا الي يطل علي من القزازه القداميه بس ولد عمي
رحمني قال لا تخاف لا تخاف هذا سعود

بيني وبينك انا كنت بنزل وبحط
رجلي بس يوم قال لا تخاف سويت نفسي ماخفت ومشيت الموضوع طبيعي

المقالب حلوه بس بعض الاحيان تخاف تروع خويك ثم يموت عليك ولا يجيه
شي وتنشبه

الله يعطيك العافيه على هيك موضوع

هلالي من ارض اليمن · #4 02/05/2009, 05:12 PM

خخخخخخخخخخخخخخخخخخخخخخ

اسعد الله ايامك يا ابو ميار

اين نضعك من الاعراب بين ابراهيم ومحمد وخالد ؟

صراحة لا احب هذا النوع من المزاح .. لأنه خطر بالفعل ولدينا حوادث عدة على شاكلة قصتك يا ابو ميار تكون نهايتها مقتل شخص مثل ( خالد ) في قصتك او ( سعود ) في قصة طارق العزيز

( تحياتي يالسمي .. وين الغيبة ؟ )

لدينا باليمن فعلين قد يحدثان بحسن نية وتنتهي نهاية مأساوية .. ان تفاجئ احدهما وهو آمن أو تفتح الامآن عن سلاحك في مكان عام ،،،

صديقك ( خالد ) لطف الله عليه من سبع سموات مع السيارة الأولى

ولنا في هذه القصة عبرة وان لطف الله وسلم ،،،

شكرا ابو ميار

والله يعطيك العافية ،،،

abo.a7mad · #5 02/05/2009, 05:28 PM

صراحة الموقف اللي كان فيه خالد لا يوصف

بس المشكلة في راعين النسيان

ما يتفاهمون الا بالنار ,

طيب لو كان لا قدرالله واحد من الجن

وطلقوا عليه تتوقعون بيخلونهم الجن ؟

أكيد بيبهذلونهم ذا الجن

بس في الأول وفي الأخير الغلط على اللي فكر في عمل المقلب

وأي شي يصير السبهـ عليه

الله يعين ويستر علينا من مشاكل ذا الدنيا ,

مشكور أخوي أبو ميار

ĄβŪ.Ą7мάĐ · #6 02/05/2009, 05:56 PM

هههههههههههههههههههههههههههههههههههههههههههههههههههههه
ههههههههههههههههههههههههههههههههههههههههههههههههههههه

موضوع ما شاء الله رووووووووووووووووووووووووووووعه

آمآ خآلد هذآ يضحك هههههههههههه

,, وبالنسبة لسؤآلك لو آنآ مكآن خآلد يوم جت النيسان

اكيد ابخاف خوف مووب طبيعي !!

واتردد اطلع ولالا

بس يمكن ابقى مكاني حدهم يروحوون

ثآنكس ع آلموضوع الرووووووووعه

htlr 20 · #7 02/05/2009, 06:22 PM

يا شين الواحد لا صار قوي ويبي يخوف خوياه ..!!

الحل عندي ونا ابو هندي

يطلع لهم ويقول امزح .. واذا اطلقوا عليه رصاصة

يسوي مثل الافلام او نقول مثل طاش ..!! ينحنى لورى زي كذا عرفتوا

وتروح الرصاصة وما يموت وهم يدروا انه يستهبل ..!!

وبس وخلصت الخطة الجوهنمية ..!!

لا تحاول تجربها لانها تحت الاختبار ما بعد انجحت

سلمت اناملك على الطرح

وليه متعب نفسك وجاي من منتدى المنتخب بددسنك المغبر .. اكتب الموضوع هناك وما لك الى النقل

{}

عريب عبدالله · #8 02/05/2009, 07:19 PM

إقتباس

الرسالة الأصلية كتبت بواسطة هامور البورصه


	يأكثر هالمواقف والي تصير مثل كذا انا اذكر مره مرني ولد عمي ومعه واحد من اخوياه وكنا نبي نطلع البر وطول ابو الطريق تعرف فلان راح للمكان الفلاني ودخل فيه جني ويسولفون عنه وهم يسولفون يضحكون انا بيني وبينك بديت اشك بالموضوع مع قليل من الخوف ولا اخفيك اني اقترحت عليهم نغير الوجهه من البر للاستراحه بس هم عيو ورحنا البر وكان فيه واحد مثل طريقتك كان ينتظرنا ويوم مرينا ركب بالصندوق ومادريت الا الي يطل علي من القزازه القداميه بس ولد عمي رحمني قال لا تخاف لا تخاف هذا سعود بيني وبينك انا كنت بنزل وبحط رجلي بس يوم قال لا تخاف سويت نفسي ماخفت ومشيت الموضوع طبيعي المقالب حلوه بس بعض الاحيان تخاف تروع خويك ثم يموت عليك ولا يجيه شي وتنشبه الله يعطيك العافيه على هيك موضوع

أخيراً شفت فيك يوم يا طويرق

بصراحة أنا ضد السخيفين اللي مزحهم سخيف ومؤذي

عندي عم من هالنوعيه يستمتع بهالمقالب السخيفة

ولا يفرق فيها بين رجال أو حريم أو أطفال

وياما هبل في جدتي الله يرحمها بمقالبه وما فيه أحد في العائلة سلم منه

مرة حط لأبوي ضب في البانيو

وهو يعرف أن أبوي يموت ولا يشوف ضب

ما ودي أكمل التفاصيل عيب المقلب في أبوي

ومرة أطلق على أخوي كلب سلوقي ووقف الكلب رجوله على رجول أخوي ويدينه على كتوف اخوي ووجهه مقابل وجهه

ما راح أكمل التفاصيل عيب هذا أخوي

وما ودي أتكلم عن بقية مقالبه

آخرها مقلب الحية اللي دخل فيها علينا لونها أسود وطولها حول المتر يقول لقيتها عند بابكم

طبعا هو يكذب هي أصلاً حقته بس يبي يخوفني انا شفتها وماشافوا الا غباري

قفلت علي الباب وسديته من تحت لأنه ممكن يدخلها علي مثل ماسواها مع عمتي ثم من ينقذني

بصراحة امثال عمي سخيفين ومقالبهم سخيفه وفاقدين مصداقيتهم عند الناس

لو مات أحد بسكته قلبيه ماراح ينفعه سخافته

المصيبه ما قد أحد أدبه بمقلب عشان يتوب

عقبال مايصير فيه مقلب هو مع اللي في بالي

بالحب والإشراق

الـمـشـاغـب · #9 02/05/2009, 07:37 PM

ـههههههههههههههههههههههـ

هلا وغلا متعب

لك وحشة يا وحش

ياخي توقعت الموقف عادي ما راح أضحك عليه كثير .. لكن والله ما قدرت أمسك
نفسي يوم طلع خويك غلطان بالسيارة وانهبل خخخخخخخخخ

قسم بالله موقف شي

بعدين بالله من هالخبلان اللي يبون يرمون جني بالسلاح؟ يسمعون بالشجاعة

الله يوسع صدرك بالعافية .. وسعت صدري

رائدة .. من اللي في بالك؟

مشكلتك يا عريب ما عندك روح رياضية

المقالب أحلى شي في الحياة .. تبقى ذكرى جميلة بعدين

sowaid · #10 02/05/2009, 07:44 PM

الحمد لله انهم مااطلقلو عليه الا كان في خبر كان

خخخخخخخخخخخ

Fahad Al Sudais · #11 02/05/2009, 07:46 PM

هلا ابو ميار

لاهنت يالغالي على الموضوع المهضوم والجميل

الله يوسع صدرك بالعافيه

R D H · #12 02/05/2009, 08:02 PM

السلام عليكم ورحمة الله وبركاته

تحيه طيبه لك يامتعب .. كيف حالك ؟

أكتب هالرد وانا ( على أعصابي ) قبل الكلاسيكو

لكن هي قصة أبذكرها لكم .. وهي حصلت لشخص ورواها لي شخص أعرفه وكان متواجد وقتها ..

وهالشخص كان طالع للبر مع مجموعه من أصدقائه وكلهم ( مطاوعه ) ويجتمعون على فعل الخير وتوزيع الأشرطه والكتيبات الدينيه ومثل هذه من الأعمال ..

المهم وهم بالبر .. قررو يسووا مقلب بواحد معهم .. فراح واحد ( نسميه فيصل

) إلى منطقه بعيده حبتين .. وراح حفر حفره ودفن جسمه فيها وبمساعدة واحد ثاني طمروا الحفره بالتراب .. ومابقى إلا راس فيصل هو اللي ظاهر .. أما جسمه كله تحت التراب .. وراح حط قدر ضغط على راسه واخفاه تماما ..

المهم لما جوا يطبخون .. واحد من الشباب اللي يعرف المقلب قال للي بيسوون فيه مقلب ( نسميه عبدالله ) روح جيب قدر الضغط من هناكـ ..

وعبدالله راح يجيب القدر .. ومن اول ما رفع القدر إلا وفيصل يصااااارخ بوجهه ..

عاد تخيلوا المنظر تجي تشيل شي تلقى تحته راس طالعه من الأرض ..

وماتلقون إلا عبدالله يرررررررررركض بالبر من الخووووف .. راحوا الشباب كلهم قاموا وراه يمسكونه ويهدووونه ..

لين مامسكوه وشافوه فقد الوعي .. راحوا اخذوه وودوه المستشفى ..

ومر الوقت وهم بالمستشفى .. وطلع المسكين جا له انهيار عصبي حاااد ..

لحظه .. مانسيتوا شي ؟

فيييييييييييييييييييصل وينه ؟

تذكروا الشباب أنهم سحبوا على فيصل بنص البر وهو مدفون .. ومايقدر يطلع نفسه ..

راحوا ركبوا سياراتهم وعلطول على مكانهم هذاك .. لقوا فيصل فارق الحياه

لاتستغرب .. تخيل انت تكون مدفون بالصحراء وراسك بس طالع .. وتقعد تحتري بلحالك ماتدري وش مصيرك ؟

تخاف يجيك ذيب ينهش راسك وانت ماتقدر تسوي شي ..

الزبده انه مات من الخوف ..

وهالقصه جابوها على ما أذكر بإحدى برامج قناة المجد ..

وتوته توته خلصت الحدوته ..

//

كثير من الشباب يكون هدفهم من المقالب انه بعد انتهاءها يذبون على اللي صار فيه المقلب ويقولوا ..: ( وااااااااااك يازلابه مشت عليك )

مايدرون انه ممكن تكون عواقبها فظيعه ..

الله يهدينا بس ..

يعطيك العافيه يامتعب ..

دمت بأجمل حال

marsal · #13 02/05/2009, 08:15 PM

ذكراتني بموقف يقال انه حصل بروسيا و منعت برامج الكامير الخفيه بسببه
فكرة برنامج الكاميرا الخفيه ان يدخل رجل الى صندوق البريد ويجلس بداخله وعندما يحاول احدهم ان يضعه رسالته بالصندوق بقوم الرجل باخراجها ورميها للخارج..
طبعا الفكره حلوه لان الكل يستغرب ليه تخرج الرساله..
لكن جاك رجل لا يعرف المزح وقام الرجل بادخال رسالته للصندوق وقام الرجل المتخفي كالعاده برمي الرساله للخارج فما كان من هذا الرجل الا ان اخرج مسدسه واطلق النار على الصندوق ومات الرجل المتخفي من برنامج الكامير الخفيه

انا لا احبذ هذا النوع من المزح لان لا تدري ماهي عاقبته ولا ندري انخرج من الموقف مبسوطين ام يصير حالنا الى حال رجل الكامير الخفيه..

تحياتي

R D H · #14 02/05/2009, 08:33 PM

إقتباس

الرسالة الأصلية كتبت بواسطة marsal


	ذكراتني بموقف يقال انه حصل بروسيا و منعت برامج الكامير الخفيه بسببه فكرة برنامج الكاميرا الخفيه ان يدخل رجل الى صندوق البريد ويجلس بداخله وعندما يحاول احدهم ان يضعه رسالته بالصندوق بقوم الرجل باخراجها ورميها للخارج.. طبعا الفكره حلوه لان الكل يستغرب ليه تخرج الرساله.. لكن جاك رجل لا يعرف المزح وقام الرجل بادخال رسالته للصندوق وقام الرجل المتخفي كالعاده برمي الرساله للخارج فما كان من هذا الرجل الا ان اخرج مسدسه واطلق النار على الصندوق ومات الرجل المتخفي من برنامج الكامير الخفيه انا لا احبذ هذا النوع من المزح لان لا تدري ماهي عاقبته ولا ندري انخرج من الموقف مبسوطين ام يصير حالنا الى حال رجل الكامير الخفيه.. تحياتي

مرحبا أخوي الغالي مرسال

هذا هو المقطع في اليوتيوب

سبب منع الكاميرا الخفيه في روسيا

كان هنا · #15 02/05/2009, 11:15 PM

متعب .. أنا أعاني من صعوبات تعلم خصوصاً بعد السداسية العالمية

..
وان شاء الله تتكرر الخميس الجاي .. سامع يا RDH

..