رضيتوا والا انرضّيتوا.. عالم ثالث يعني عالم ثالث

وافلقوني مع الجبهة اذا تطورنا وصرنا عالم ثاني

واحتمال كبير على وحده ونص واللي مايشتري يتفرج

وترى مافيه فرق بين اللي ساكن بقصر واللي ساكن بـ(خنتوب)

كلنا نفس النمونه

خخخخخخخخخخخخخ

والله شر البليّة مايضحك

سألتكم بالله..

فيكم احد ذاك اليوم نوى يقص اظافره ولقى مقص الاظافر بسهولة ؟؟

ليش كل البيوت السعودية يصير فيها انقلاب اذا احد يبي يقص اظافره ؟؟

ياخي وين يروح المقص ؟؟

ليش لازم كل شهر نشتري مقصّين او ثلاثة ؟؟

وين يختفي المقص ياعالم وين يروووح ؟؟؟

سألتكم بالله..

فيكم احد ذاك اليوم يكلم تليفون ويبي يكتب رقم.. ولقى القلم ؟؟

نفس المشهد مايتغير

يلتفت على اقرب واحد جنبه ويقول :

قلم قلم.. قلم بسرعة.. ياخي قلم اخلص

واستنفار كامل من الكل.. صغار وكبار

وبالنهاية مافيه اثر للقلم

ياخي وين يروووح ؟؟

سألتكم بالله..

فيكم احد ذاك اليوم يبي يشحن جواله ولقى الشاحن بسرعة ؟؟

ليش يتبهذل الواحد كل مابغى يشحن جواله ؟؟

ياخي وين يروووح الشاحن ؟؟

سألتكم بالله..

فيكم احد ذاك اليوم يبي يودّي اهله لعزيمة او عرس

وما شاف خواته يتهاوشن وكل وحدة تقول للثانية : وين الساعة حقتي ؟؟

واذا خلصنا من سالفة الساعة.. بدينا بهوشة الاستشوار

واذا ركبوا بالسيارة.. تبدأ سالفة : معك علك ؟؟

سألتكم بالله..

ليش البنغالي اللي يغسل السيارة كل شهر لازم تقبس بينه وبين ابوي ؟؟

هو يحلف انه ما اخذ شي من ثلاث شهور ويبي 150 ريال

وابوي يحلف انه توّهـ معطيه الشهر الماضي

ليش مانسوي له كشف رواتب ( زي حق الشغالات )

ونخلّيه يوقّع عليه شهريا ونفتك من وجع الراس ؟؟

سألتكم بالله..

ليش ننشب في حلق المسكين اللي يبيع المساويك ؟؟

هو يقول ريالين وحنا نقول مافيه الا ريال ( باستماته )

واذا رحنا نتعشى مشاوي ومقبلات عند يامال الشام وابوكمال

وجانا ابوشكيم معه ذيك الفاتوره بميتين وخمسين او ثلاثميّه

دفعناها وحنا نضحك والكشرة من فوق الى تحت و ( تؤبر ئلبي )

سألتكم بالله..

ليش نستانس ونتشقق من الفرحه اذا جابوا لنا وجبة في الطيارة

مع ان قيمتها ماتتعدى 7 ريال

وحنا بالمقابل دافعين تذكرة قيمتها 500 او 600 ريال

سألتكم بالله..


والا خلاص يكفي