!!.. قراءة فنية رمضانيه ... لبداية الدوريات الاوروبيه ..!! - نادي الهلال السعودي - شبكة الزعيم

الهلالي 11 · #1 03/09/2008, 02:28 PM

السلام عليكم ورحمة الله وبركاته

السلام اللي فوق هذا للكل ...

وهلا وغلا للصايمين بس

هاه شباب صايمين هالسنة والا كالعاده

فيه كم واحد فيكم لعاب بس ما ودي افضحه يمكن تاب هالسنه

انا بالدوام والدعوه رمضان ... الامور هاديه ما احد له نفس يشتغل

دخلت المنتدى انصدمت من شكل ايقونة موضوع جديد

قلت يوه والله زمان ما كتبت موضوع بالمنتدى ... يوم ضغطت على موضوع جديد ويطلع غبار من الماوس

<== الدنيا رمضان

المهم المختصر قلت خلني انزل موضوع انشب فيه لحبايبي

اشتقت لكم

زي ما شفتو بالعنوان ... قراءه رمضانيه ... يعني الواحد وهو تعبان وجوعان ممكن يطلع منه اي شي اعذروني من الحين

كعادة مواضيعي طويله ويبغالها روقان

اللي ما فيه حيل يقرأ بكيفه

بسم الله نبدأ من الدوري الانجليزي

<== القلب لمانشستر

البريمر ليغ ... زي ما انتو عارفين بدأ قبل الكالتشيو والليغا

الانجليز نشيطين ما عندهم مزح وكسل

على طول شغل دوريهم حامي من اوله

مو زي الايطالي والاسباني يا الله لك الحمد

من جد ذكروني بالدوري السوداني ... اجل الاسبوع الجاي متوقفه الدوريات عشان تصفيات كاس العالم

يعني الموضوع صار لعبتو جولة وبعدين راحة لجميع الفرق

كان خليتو الجولة الاولى راحة لجميع الفرق ... وخليتوها مع اجازة التصفيات وبديتو الدوري بعد اسبوعين

نظرة سريعه لكل من الدوريات الثلاث الاوروبيه الكبيره

الدوري الانجليزي بدأ قبل الكل لذلك سابدأ به

مانشستر

ساتحدث بداية عن البطل وحامل اللقب يا حبي له افضل واغنى واغلى نادي بالعالم ولاعبيه ثاني اكوس لاعبين بعد فريق منتدى العالميه

مانشستر بدأ الدوري بدايه ضعيفه ... تعادل على ارضه مع نيوكاسيل يونايتد ...

ما هو ضعف من المان ابدا

لكن قوة واستقعاد من نيوكاسيل وخصوصا غيفن حارسهم

والدليل انهم اختاروه افضل حارس للجوله ... وحطوه بتشكيلة الجولة الاولى

كثير استانسو على هالتعادل وبدو يتشمتون فينا يا الله لك الحمد والشكر

لعب ثاني لقاءاته امام بورتسموث على ارض الاخير

<== دايم اقراها ونفسي اكتبها

وفازو عليهم بعقر دارهم ليرتفع رصيدهم لاربع نقاط من مباراتين واعتقد رصيد كويس

يوم حس الاتحاد الانجليزي بالخطر وان المان بدأ يقرب للصداره اجلو مباراتهم مع فولهام خايفين نتصدر ... لان لو مسكنا الصداره صعب نفكها

ملاحظه : يقهرني اللي كل شي يصير يخلي الموضوع ان كل الناس ضد فريقه

ترى مباراة فولهام تاجلت عشان السوبر الاوروبي

مانشستر بداياته ضعيفه عادي

الموسم اللي راح اول جولتين خساره وتعادل وانطرد روني وكريس واخذنا الدوري

يعني عادي متعودين على البدايات الضعيفه ...

مانشستر دعم صفوفه هالصيف بـ بيرباتوف فقط

وكل عشاق هالنادي ينتظرون مباراة الليفر القادمه بفارغ الصبر ليشاهدو هجوم المان الناري

تيفيز + روني + بيرباتوف

تشيلسي

يقلع بليسهم

لا يقلعهم هم نفسهم كلهم كفار عيال كلب

<== القلب لرابطة تشيلسي

نادي كاش بس يجدع فلوسه بالشارع ويجيب لاعبين ...

فريق قوي ومتكامل من الموسم الماضي ومو شبعانين ... جابو مدرب ولاعبين جدد

الدوري حقهم بدأ قوي ... ضيعو مستقبل بورتسموث برباعيه خطييييره

تصدرو الدوري بالجولة الاولى ... كل الاندية قالت بس الدوري لتشيلسي وخرو عنه

المهم لاعبينهم كبر راسهم ... دخلو الجولة الثانية راسهم كبر الستامفورد بريدج

قابلو ويغان العنيد ... بقيادة تركي رئيس الرابطه ... والمهاجم المصري القوي عمرو زكي

اللي شافهم بالجولة الاولى قال بس ويغان راحو ملح بياكلون 5 او 6

اول المباراة على طول ديكو

جاب قول رااايق ... الكل قال هذا اول المباراه اجل الظاهر بتوصل 8

انتظر انتظر ... المباراة خلصت وتشيلسي فازو بهالقول بصعوبه

كثير ناس غيرو رايهم ... وقالو لا تشيلسي فقاعة صابون صعبه ياخذ الدوري لسه بدري

المهم الادارة والمدرب بدو يحمسونهم نبي نتايج كبيره ... اذا فزتو المباراة الجايه لكم وجبة افطار صائم اللي على الاشارات يوزعونها لكل واحد

المهم دخلو الجولة الثالثه ... قابلو توتنهام وتعادلو

اللي ابغى اوصله لكم ان الخيل الاصيله تلحق تالي

اما تشيلسي وضعه هذا من جرف لدحديره ويا قلب افرح ولا تحزن

أرسنال

بدا الدوري بهدف مبكر ... واعتقد اول هدف بالدوري الانجليزي كان باسم لاعبهم سمير نصري

جايبنيه جديد ومتحمسين ... وهو ما قصر كبر راسه من اول مباراة ... زي موضوع تشيلسي جابو هالقول اول المباراة ونامو عليه وفازو 1/0 على ويست بروميش ...

ازعجونا فريقنا هالسنة غير ... وصفقات وش كثرها ... ولاعبين شباب ... اخر شي فازو بهدف يتيم ...

بعدها فينجر تحمس وطلع قال ارسنال اقوى فريق هالموسم ... احنا اقوى نوع

الجولة الثانية الله لا يبلانا انصكو 1/0 من فولهام

فينجر حجرهم بغرفة الملابس ... قالهم يا عيال الذين ... لي سنة امدحكم واكبر راسكم اخرتها تخسرون

قالهم خطتنا المباراة الجايه شدو حيلكم

والله شدو حيلهم الشباب ما قصرو ... وفازو بالجولة الثالثة على نيوكاسيل 3/0

نوعا ما نتائجهم جيده الى الحين ... خساره وحده مو مشكله

ليفربول

كل سنة يستقعدون للعالم بالتسامبيونز ... وبالدوري فاتحينها سبيل

هالسنة بدأو امام سندرلاند بهدف حلو من توريس ... وتشابي حاول يسوي حركه بس يا حرام ضاعت عليه

شات شوته جيده من نص الملعب

بس يله بسيطه خيرها بغيرها

جابو روبي كين ... وتوريس استانس صرح قبل فتره انه يحس انه بيفجر الدنيا وهو وكين

ليفربول كان يكفيهم الفوز ... يعني شي حلو تفوز ببداية الدوري

الجولة الثانيه خشو متحمسين ودهم يثبتون انهم ناوين يبعدون بعدد الالقاب عن القوي مانشستر

لعبو مع مدلزبره ... المصري جاب فيهم قول

عادلو النتيجه ... وطول المباراه يقاتلون حاولو يفوزون بس ماش ... ما ضبطت معهم الا بعدين

جيرارد

كالعاده انقذهم بتسديدة صاروخيه

وفازو 2/1 ...

الجولة الثالثه حاول يفوزون عشان يتصدرو الدوري خصوصا مع تعادل تشيلسي بس يا حرام

90 دقيقه ما قدرو يجيبون ولا قول

انتى لقائهم مع الفيلا 0/0 ... وجيرارد وتوريس مصابين يا عمري انا

من القراءه الفنية الداجة اللي فوق

تلاحظون ان مانشستر افضل الفرق ... لان نتائجه تصاعديه

تشيلسي والليفر بدأو بالانحدار ... والارسنال ماش متذبذب

عموما الجولتين القادمة المان بيقابل ليفربول وتشيلسي

عندها يبين من القوي من جد

عشان ما اطول عليكم

وهالحركه نفسي اسويها من زمان

يتبع

77777
777
7

قراءة الدوري الايطالي والاسباني ... بعد قليل

الهلالي 11 · #2 03/09/2008, 02:29 PM

باااااك

الدوري الاسباني

ونبدأ بحامل اللقب الريال

ريال مدريد

فريق قوي وكبير ما اختلفنا

بس عليهم رئيس يجيب المرض

يحسب بفلوسه يسوي كل شي

اخر نذالته ودى روبينهو لمانشستر سيتي

كالديرون طول الصيف وهو يركض ورى كريس لين ضاع منه

اخر شي جاب فارت

ويا حرام تورطو باصابة شنايدر

طول الموسم وهو يقول فريقنا كامل ... وفريقنا بطل ...

انا توقعت بداية الدوري بيكسرون الدنيا

بدأ الدوري مع مين مع النشبه والعقده الديبور

ريال مدريد للاسف يخسر بداية غير موفقة ... لكن يبقى الامل كبير

لسه باقي 37 جولة ... بعض الناس بدأ يفكر يشجع فريق ثاني

المهم يا مشجعين الملكي يا ليت تشجعون فريقكم هو محجتاجكم كثير هالفتره

وبصراحه اهنيكم على الطريقة اللي اخذتو فيها لقب الكاس

برشلونه

برشلونه توقعت يغيرون اسمه مع التغييرات اللي سووها

بعد نهاية الموسم الماضي يمكن 15 لاعب على قائمة الانتقال .. والمدرب والرئيس وكل شي

المهم اكثر اثنين اعتقد خسروهم ديكو ورونالدينهو

باعو وجابو لاعبين .. ابرزهم الفيس وكيتا ... هيليب ... وغيرهم ...

المهم توقعنا والله بدايه ناريه خصوصا مع المستويات بالمباريات الاستعداديه

لا والفوز مضمون بيلعبون مع فريق صاعد جديد للدرجة الاولى ...

ناموسه مدري وش اسمه

المهم الكارثه حصلت

برشلونه خسر

الله العالم الحين وش القرارات اللي بتطلع

ايتو اللي كانو بيبيعونه لعبوه كل المباراه

وهنري اللي على اساس بيعتمد عليه وبيكسر الدنيا طلعه

عموما برشلونه فعلا مرشحه هالسنه وبقوه ... لكن لازم تراجع حساباتها

فالنسيا & فياريال & اتلتيكو مدريد

هذولي جمعتهم سوا ... عشان ما اطول

والفريق الاخير حطيته بمناسبة افتتاح الرابطه مبروك

فيا ريال توقع الجميع منه انه يسوي شي ... احتل الوصافه السنة الماضيه من امام البرسا

لكن فاجأ الجميع بالتعادل ... وبدايه مخيبه زي الخايبين مدريد وبرشلونه

فالنسيا واتلتيكو

بدايه رائعه وقويه جدا رغم الامكانيات الضعيفه

فالنسيا قدرت تتمسك بنجومها

وثلاثية ولا اروع من اول جوله تصدرو بها الدوري مع اتلتيكو

اتلتيكو قدم لقاء حلو برضو وكسر الدنيا من اول جوله

البداية لسه باولها زي ما قلت لكم ما امداهم لعبو جولة وحده

لكن والله البدايات ما تبشر بخير كنا متوقعين نتايج احلى من كذا خصوصا من الريال وبرشلونه

الدوري الايطالي

نبدأ بحامل اللقب ...

انتر ميلان

فريق مليان نجوم ... كامل بجميع الصفوف ... ومورينهو كمان يا عيني

توقعت اول مباراة لهم يعني اذا مرة ما يبون يتعبون بيفوزون 4 او 5

زحمة نجوم .. وضجة اعلاميه واخرتها تعادل

بالله هذا اقوى شي طلع معكم

بالله ضبطو اموركم كويس كواريزما جا يله استغلوه

روما

نفس الموضوع ... معهم كم مليون طول الصيف يدورون لاعبين على قد فلوسهم

والله روما ذول مناضلين كل سنة ينافسون مع ان امكانياتهم اغسل يدك

المهم نفس القصه تعادلو اول مباراه مع نابولي

ولبقو بجنب الانتر بالجدول

طول الموسم مشجعينهم يتهاوشون مع بعض اخر شي تعادلو وصارو جنب بعض بالترتيب

ميلان

والله ذول اللي من جد زحمة وقلق

انواع التعاقدات ... زامبروتا و فلاميني ... وقدرو يحافظو على كاكا ... رونالدينهو جابوه ... وشفشنكو رجعوه

بصراحه الميلان هالسنة قوي ... وتوقعت منه شي

لكن افااااااااا ... اخرتها خسارة من بولونيا

ليتكم متعادلين ولبقتو بجنب روما وانتر

كل هالاسماء والتشكيله ... وخساره من اولها ...

عموما الميلان اعتقد اقوى المرشحين هالسنة للدوري

يوفنتوس وفيورنتينا

هذولي جمعتهم لانه لعبو سوا

فريقين كبار ومؤهلين للمنافسه ... الفيولا دعم صفوفه بجيلاردينو ... واليوفي قريب من حال روما

الهبوط اثر على ام ميزانيته ... عمل له ربكة ما بيخلص منها لموسمين قدام

عموما يضلو فريقين كبار ... تعادلو خليهم حبايب احلى

بالله اكيد كلكم تسالون ... اذا كل الفرق الكبيرة تعادلت من المتصدر

مدري يمكن جنوى

@@@@@@@@@@@@@@@@@@@@

اللي ابغى اوصله باختصار ...

حقيقة بداية الدوريات كانت صدمة كبيره لي

نتائج مخيبه جدا للامال

خصوصا الايطالي والاسباني

انا بحط سؤال للنقاش ... عشان حقين مشكووووووووووووووور على الموضوع بينزلون لاخر الموضوع دايركت خلهم يلقون شي يشاركون فيه

س/ هل توقعت النتائج اللي صارت !! وماذا تتوقع اهم اسباب هالنتائج الضعيفه رغم استعدادات جميع الفرق

؟!

شكرا لكم من القلب

رمضان كريم

اعذروني على الاطاله

هي فضفضة داخليه

كل ما قلته وكل كلمة ذبيتها هي عادتي لاضفاء جو على الموضوع لا يزعل احد

ما حبيت اتفلسف كثير بالايطالي والاسباني لان ما لهم الا جوله وحده ... ولاني كثرت كلام بالانجليزي

تحياتي لكم

اخوكم / عبدالرحمن

Lover Sami · #3 03/09/2008, 03:15 PM

،،

هــلا بــكـ يا عبدالرحمن

أجــل دوام والواحد ماله نفس يشتغــل

جعلك ما تجي عنــدنا

أنــواع ضغط العمل لكن على فترات

بــس الحمدلله

@@@

إقتباس


	انتر ميلان فريق مليان نجوم ... كامل بجميع الصفوف ... ومورينهو كمان يا عيني توقعت اول مباراة لهم يعني اذا مرة ما يبون يتعبون بيفوزون 4 او 5 زحمة نجوم .. وضجة اعلاميه واخرتها تعادل بالله هذا اقوى شي طلع معكم بالله ضبطو اموركم كويس كواريزما جا يله استغلوه

آيـــه هذا اقوى شي طلع معنــا

صراحة الفريق كان مقدم مستوى في الشوط الاول لكـن في الشوط الثاني تحول الضغط على مرمى الانتر و أن كان نسبي لكــن في النهاية بخطأ دفاعي مشتركـ سجل سمبـا هدف التعادل ،
و الانتــر لم تكن لــه فرص تهديفية كثيــرة حتى يستغلهــا المهاجمون ،
لكــن القادم احلــى بإذن الله

إقتباس


	س/ هل توقعت النتائج اللي صارت !! وماذا تتوقع اهم اسباب هالنتائج الضعيفه رغم استعدادات جميع الفرق ؟!

الجميع ما توقع هالنتـائج وبهذا الشــكل الجماعي ،
يعني نتيجة اليوفي على الاقل اعتبرهــا مقبولة بحكم انهم يلعبون على ارض الفيــولا وهو فريق جيد و عناصره روعة ،
الريال لو نأخذ الجانب التاريخي يمكن نمشيــها ،
لكــن الميلان و البارشــا نتائجهما غير منتظره ابداً ..!
،،

بوبو · #4 03/09/2008, 03:25 PM

هلا اخوي ما تكلمت عن هزيمة زينت و الا عشانك تشجع مانشستر

بالتأكيد النتائج ما كانت متوقعة بشكل جماعي بس الاكثر مفاجأة هي خسارة برشلونة و ميلان من فرق صاعدة خصوصا بعد التعزيزات الي سواها كلا الفريقين

بالنسبة لي مشجع للانتر نتيجتنا مع السامب ما أعتبرها نتيجة سيئة مع فريق ما هزم الموسم الماضي الا مرتين على ملعبه و طبعا بقدوم كواريسما بتكثر الحلول الهجومية للفريق

[ رحــال ] · #5 03/09/2008, 03:25 PM

.
.

هلا عبدالرحمن

..
موضوع رايق و فكرته حلوة

..
خخخخخ اجل الدوري السوداني

..

البريمير ليج بدأ بحماس من الارسنال و تشلسي و الليفر , بعكس المان اللي كانت جماهيره
متعقدة من الخسارة و إلى الآن ما اعتلوا الترتيب

.. تشلسي بداية قوية لهم و بطرنة زايدة

بالاك احتياط يقطع ام البطرنة

.. بدوا الدوري بداية قوية خصوصًا مع ديكو صفقة ناجحة بكل المقاييس
ليفربول لا خوف ليه مع جيرارد و توريس و كين .. خصوصًا جيرارد لا خفت من الخسارة خله يسدد من بعيد

الليجا مُمتعة كـ عادتها

.. الريال كان من المعتقد خسارته كـ عادته , ملعب ريازور دائمًا ما نخسر فيه
من 18 سنة ما فزنا عليهم ..

ايضًا كثرة الغيابات بالفريق , كانافارو

شنايدر

فانديرفات

و هبوط مستوى راؤول

.. برشلونة غريبة خسارته

.. نومانسيا فريق صاعد لكنه يمتاز
بالاسلوب الدفاعي الممتاز عندهم .. شكل خطتهم 9-0-1 << موب بعيد عنكم يا العالمية

فالنسيا بدأ بقوة , ثلاثية و امام مايوركا شي حلو .. مايوركا فقد من صفوفه ثلاثي كان ثلاثي الرعب عندهم
جوتيريز - ايباجازا - جويزا .. و طبيعي يتلقى ثلاثية

.. اتلتكو مدريد اتوقع هالموسم بيبّدع خصوصًا
مع تأهله لـ التشامبيونز الاوروبي و فتحوا لهم رابطة بيتشجعون كثير

و فياريال ايضًا بيبّدع هالموسم خصوصًا مع وصافته الموسم الماضي و مع تواجد كوكبة لا بأس بها
من اللاعبين , سينا ، بيريز ، نيهات ، توماسون .. اما الكالتشيو اتوقع إبداع من اليوفي
خصوصًا مع دل دل

و اماوري .. و عودة قوية لـ الميلان .. اجل كاكا احتياط

حظوظ الانتر في الكالتشيو و التشامبيونز قوية .. و اتوقع يحرزون التشامبيون .. روما
جيد مع صفقة بابتيستا و مينيز و ريزا

مع عودة الملك توتي

تقبّل مروري عبدالرحمن

.. موضوع رايق

.
.

iker · #6 03/09/2008, 05:13 PM

^

والله يا انت مسوي زحمة بالرد ..

يآخي تنفه شوي .. انزل سطرين ماعندك أي مشكلة ..

.
.

بالنسبة للموضوع .. فمعروف ان الفرق الكبيرة تبدأ بداية ضعيفة .. بعدين يتصاعد مستوى الفريق تدريجياً ..

بعكس الفرق الصغيرة .. مثل حال مانشستر الموسم اللي فات .. أسوأ بداية ومادري وشو .. وآخرتها دوري وتشامب ..

الدوري الانجليزي زينته يبدأ حامي على الصدارة من البداية .. نشوف ألحين تشيلسي والليفر ويبي يدخل مانشستر بعد جولتين والأرسنال يمكن ..

الدوري الإسباني يعجبك ان مفاجئاته كثير .. مثل ماصار مع برشلونة .. والريال بدرجة أقل ..

الإيطالي مادري وش يبي ؟! ..

.
.

س/ هل توقعت النتائج اللي صارت !! وماذا تتوقع اهم اسباب هالنتائج الضعيفه رغم استعدادات جميع الفرق ؟!

مافيه أي سبب .. قلت قبل الفريق يبدأ بداية ضعيفة وبعدين يبدأ يتصاعد مستواه ..

.
.

يعطيك العآفية .. ورده

عاشق الأمير الأسيوي · #7 03/09/2008, 05:29 PM

المانيو ..
لاتخاف عليه ناقصه رجعة المصابين وايضاً رجوع حماسهم الي فقدناهـ بالمبااريات السابقة ..
تحس ان الفريق بعد تحقيقة لثنائية الموسم الماضي تحس ان ماعندهم شي يبونه ..
لكن اعجبني تصريح فيرقي بعد السوبر الآوروبي ..
تصريح جميل وجاء في وقته ليحسس الاعبين بأن امامهم تاريخ كبير ولابد مواصلة تحقيق البطولات واضافة المجد ..
للفريق قبل ان يكون لهم شخصياً

.. وايضاً بعد قدوم بربا .. سوف يكون هناك هجوم ثلاثي آر بي جي ..

وخلفهم المهاري رونالدو وبجانبة قيقز وخلفهم كاريك وسكولز ..
سوف يرجع الفريق الى مستواهـ المعروف بـ الجولة القادمة والذي سوف تكون آمام الريدز ..

البلوز ..
لا لم يكون فقاعة صابون

واتوقع سوف ينافسنا منافسة شرسة وسيكون الدوري مثير بين منافسة من المان والبلوز ..
والبلوز في المبااريات الماضي تحس انه فاقد دروغبا بالهجوم .. الي تعودو بهجماتهم يخلصها بأحراز الهدف ..
وخسارتهم النقاط الثلاث امام السبيرز كانت بسبب ان انيلكا لم يكن بيومه وشاهدت المباارة وضيع اهداف محققه جوى الصندوق ..
لكن ع قولتك من جفره لدحديرهـ إن شاءالله ..

القنرز ..
فريق يعجبك بلعبه الجماعي البحت .. ماتلقى لاعب معين يلعب بـ مهارته ..
ولكن تعودنا من القنرز انه يبداء بمستويات ضعيفة وتصاعدياً الى ان يصل القوة .. او تجده قوي بالبداية وتدريجياً ..
تحصل مستواهـ ينخفض .. ولكن هالمره تفاجأنا بـ فوز وثم خساره وثم بفوز ..

ولكن بعودة المصابين في لقاء الماكبايس استاطعو ان يمتعو الجمهور وان يشتتو قوة الماكبايس ..
وآتمنى دخولهم بالمنافسة مع المان والبلوز هذا الموسم لكي نكسب مشاهده للبريمر بمنافسة الثلاثي ..

الريدز ..
ودهم والله بالبريمر لكن مدري وش نحاسة الحظ معهم ..

عموماً بدايتهم بالبريمر لم تكون مستغربه بالنسبة لي بعد الي شاهدته منهم بتصفيات الشامبيونز ..

وكيف تأهلو بصعوبة امام فريق مغمور .. وايضاً راح تزيد صعوباتهم بالجولة القادمة بالبريمر بسبب مواجتهم للمان ..
والي سيكتمل لاعبينه بعودة المصابين وبقدوم بربا .. وايضاً خسارتهم للقائد الرائع جيرارد بأصابته ..
والي ذكرت الآخبار انه لن يتواجد بالجولة القادمة امام المان ..
عموماً رجعت الريدز لمنافسة المان والبلوز والقنرز بالبريمر .. شي طيب .. واتمنى من بينيتيز يفاجأنا هذا الموسم ..
ومنافسته ع المركز الأول .. لأن ذالك سيجعل لنا مكسب ومتعه لن تشاهد مثلها بـ ليقا بالعالم ككل ..

الليقا الاسبانية ..

الميرنقي ..
لم يكن سيئ آمام الديبور ولكن آصرار لاعبين الديبور ع الفوز وعدم الأستبسال امام تصاريح لاعبين الريال ..
وانهم سيرجعون بالفوز وسيكسرون العناد الي من 18 عام لم يستطيعو الفوز بملعب الديبور ..
ورد لاعب الديبور عليهم بأرض الملعب وصرآحة تشاهد لاعب الديبور تقول ماعندهم شي ولكن ..
يدهشون الواحد بـ هجمتهم الي يكونونها جماعياً .. وآمام غلطات دفاع الريال ..
واتوقع بنشوف الريال هالسنه يعاني كثير بعد فقدان شنايد للأصابة .. وبعد غلطةكالديرون بخروج روبينيو ..
واستغربت كثير من جماهيرالريال وخاصة رآبطتهم مكابرهم وان خروج روبينيو لن يقف الفريق عليه ..
والموسم الماضي والي قبله لم يحسم لهم الليقا الا روبينيو .. وايضاً قوتهم بصناعة الهجمة بوجود روبينيو ..
ولكن استغرب مكابرهم وكأنه لم يضيف شي للفريق وايضاً عدم تعويض كالديرون بلاعب بعد خروج روبينيو ..
وهالموسم راح يثبت لهم ان خروج روبينيو غلطه كبيرهـ ..

البرسا ..
خسارته مفاجأ ولكن الحظ كان عثرة بوجه الفريق ..
وايضاً بعض الاعبين لم يكونو بالفورمة .. ولكن الفريق بس يلعب كم مباراهـ وراح يتصاعد مستواهـ ودخول الجميع ..
بـ الفورمة .. وستشاهد البرسا بالجولات القادمة من آقوى الفرق .. والقادمين بالميركاتو سوف يعوضون خروج ..
رونالدينيو وديكو ..

الخفافيش ..
سنشاهد عودتهم الى المنافسة هذا الموسم .. والفيريال .. مشاهدة المباراة ولا استطيع احكم ع الفريق ..
اما الأتلتي آووهـ ارسل انذار شديد اللهجه لجميع الفريق وبمن فيهم الفرق الثلاث الميرنقي والبلوغرانا والخفافيش ..
ولاتستغرب لنافس ع الصدارة خصوصاً .. بعد ميركاتو رائع من أدارتهم ..
ضبطو الدفاع الي كان نقطة ضعف الفريق الموسم الماضي ..
ورجعو مانيش وقدم مباراة رائعه امام الشكالة واثبت اقدامه بالتشكيلة الآساسية ..
ع العموم آتمنى رجوع مستوى الليقا الى مستواها في 2004 .. راح نستمتع كثير ..

الكالشيو ..

الآنتريستا ..
الفريق لم يكن سيئ آمام السامبـ .. ولكن تخيل لاعب آرتكاز يلعب بالستوبر ولاعب توه راجع من الآصابة يلعب آساسي ..
وبنقطة ضعفنا هي عدم وجود وسط بأمكانه ان يرسل الى الهجوم .. شاهدنا فيقو سيئ الى الغاية .. ولكن بعد قدوم كوارزما ..
سوف يكون آحتياطي وراح يبدع كـ بديل مثل ماكان الموسم الماضي مع مانشيني ..
وايضاً مانسيني صفقة فاشلة ومدري برآنكا ومورينيو وش يبون فيه وهو ماقدم شي كبير مع الجيلاروسي ..
لكن عوضنا الدكتور موراتي بعد ماعصر دم قلبه ودفع لبورتو وآخذ كوارزما ..

بس اخذو بيلية ..خسارة ...

الروسنيري ..
قدمو أداء رائع بالوسط ولكن نقطة ضعفه الدفاع وايضاً جموح الفريق الصاعد نابولي ..
وميلان اتضح من الموسم الماضي غياب نيستا شكل عبئ كبير ع لاعبينه الباقين واتضح انه هو الي كان شايل الدفاع ..
مالديني كبر السن ماينلام لو ماقدم شي ..
لكن كل التوفيق لروني معهم بس بمستوى دون تتويج بـ بطولات ..

اليوفي ..
غياب تريزي قول خساره كبيره عليهم وايضاً الملك لم يقدم شيئ بالمباراة امام الفيولا ..
وعموماً لسى الكالشيو بدايته وجميع الفرق الكبيرة تعثرة ولسى قادم الجولات تحكم لنا مدى المتنافسين ..

الجيلاروسي ..
ماعندك احد واتوقع راح يكونون خامس الكالشيو هذا الموسم ..
اذا ع ارضهم ونقص الفريق المقابل ولم يستطيعون الفوز وش ترجي ..

الفيولا ..
اتوقع افضل ميركاتو من بين الفرق هو ..
قدوم فارقاس وايضاً جيلا ..ألخ ..
راح يكون من ضمن المتنافسين ع التأهل للشامبيونز .. اما الكالشيو صعبه عليه بسبب انه لايجيد النفس الطويل .. مثل الريدز ..

" & "

عموماً بداية الدوريات معروفه ولكن العبرهـ بالختام وستشاهد مع لعب كم جولة رجوع الفرق الكبيرة الى مستوياتها ..
ولكن من أكبر غلط انا نحكم ع فريق معين من بداية مباراتين او مباراة والدوري من 38 جولة ..
عوآآفي دحوم .. ونقاش ممتع بسلسة آسلوبك ..
تقبل آرقى آشوآآقي ..

CRIS LOVE · #8 03/09/2008, 06:35 PM

هلآ دحمص

موضوع قمه بـ صرآحه ..

حنآ تعودنآ على هالبدآيآت الضعيفه و صعوود المستوى تدريجيآ من بدآية الموسم ..

مثل مآذكرت أنت المآنيو بدآيته الموسم المآضي زي قلتهآ ..

.. وبدآ تصآعد مستوآه لين حصد البريمر والتشآمبيونز .. وإن شآء الله يتكرر هالموآل ..

أمآ بدآية أندية الليقآ .. بصرآحه مآكنت متوقعهآ أبد .. الريآل معروف بـ حمآس لآعبينه .. قدم مستوى بآهت .. والبرسآ بعد كل هالصفقآت وبدآية مثل وجه لآبورتآ

والكآلشيو معرووف إن الدوري ككل يبدآ مستوآه تدريجي ..

نقوم إن شآء الله هالموسم يكوون حمآسي أكثر من اللي قبل ..

عوآفي عبدالرحمن ..

~

Xx AbO sAiiF xX · #9 03/09/2008, 06:37 PM

مشكووووووووووووووووووووووووووووووووووووووور

أنطونيو الرياض · #10 03/09/2008, 09:36 PM

إقتباس

الرسالة الأصلية كتبت بواسطة الهلالي 11


	السلام عليكم ورحمة الله وبركاته أرسنال بدا الدوري بهدف مبكر ... واعتقد اول هدف بالدوري الانجليزي كان باسم لاعبهم سمير نصري جايبنيه جديد ومتحمسين ... وهو ما قصر كبر راسه من اول مباراة ... زي موضوع تشيلسي جابو هالقول اول المباراة ونامو عليه وفازو 1/0 على ويست بروميش ... ازعجونا فريقنا هالسنة غير ... وصفقات وش كثرها ... ولاعبين شباب ... اخر شي فازو بهدف يتيم ... بعدها فينجر تحمس وطلع قال ارسنال اقوى فريق هالموسم ... احنا اقوى نوع الجولة الثانية الله لا يبلانا انصكو 1/0 من فولهام فينجر حجرهم بغرفة الملابس ... قالهم يا عيال الذين ... لي سنة امدحكم واكبر راسكم اخرتها تخسرون قالهم خطتنا المباراة الجايه شدو حيلكم والله شدو حيلهم الشباب ما قصرو ... وفازو بالجولة الثالثة على نيوكاسيل 3/0 نوعا ما نتائجهم جيده الى الحين ... خساره وحده مو مشكله قراءة الدوري الايطالي والاسباني ... بعد قليل

اقول يا عيال اني ارى سبه

ياخوي مالقيت تسب الى في سمير تراه اقشر

اهم اسباب هزيمتنا في مباراه فولهام هو ان فينجر افندي كان يصلح السحور لـ سمير و توريه

اقول اركد وانا اخوك ورح تابع باب الحاره واستمتع بـ فيريال خانو

بعدين حنا ما انهزمنا من فريق روسي

اركد بس لايجي المدير حق قسمك ويشوتك مخالفه وخصم راتب

عوافي و موضوع كذا ورده

برايفت

أقول دحيم ماودك تسير علينا في رابطه الارسنال عند موهبه التحليل على خمبقه الظهر وزحمه الدوام

SNEIJDER10 · #11 03/09/2008, 09:48 PM

هلا عبدالرحمن ..

بصراحه موضوع فكرته مجنونه ..

البريمر

بداية المان تبشر بخير حيث المستوى تصاعدي ومع صفقة بربا وعودة المصابين ودعمنا لرابطتكمـ

أتوقع الروح عند اللاعبين تمامـ التمامـ ..

تشيلسي / الليفر / الأرسنال ..

أول ثنين بدو بداية قوية ثمـ توقفوا ..

الأرسنال أتوقع بيبدع وآخر المشوار يتنازل عن المركز الأول ..

الليجا ..

هزيمة الريال متوقعة ..

ومثل ماقال رحال الفريق كله غيابات واللاعبين كبرت روسهمـ عقب ملحمة السانتياجو برنابيو مع فالنسيا ..

<<القلب لفريقنا مدريد ..

برشلونه توقعته يفوز بالأربعه والخمسة !

ولكن مع ذلكـ أتوقع يسون شغل بالدوري بحكمـ الإنتقالات ..

الكاليتشو..

بصراحه ماتوقعت تعادل الإنتر أبدًا ولاهزيمة الميلان ..

أتوقع التاشمبينز بتروح للإنتر والدوري للميلان ..

عبدالرحمن ..

لاتحرمنا من مثل هالمواضيع ..

أخوكـ/ فهد !

يوسف الثنيان 15 ... · #12 03/09/2008, 10:22 PM

موضوع حلو بهالرمضان

بس ياأخوي ما ذكرت ابدا مباراة زينيت الروسي و مان يونايتد

و ماتلاحظ أن حطيت مان يونايتد أحسن فريق بالعالم

و يوم تعادل مان يونايتد قدام نيوكاسل واسيت مشجعين المان

وماكنكم العام فزتوا مباراة الذهاب بشوط واحد ست اهداف و الدور الثاني سته بعد

ويوم فاز تشلسي اربع مامجده

و يوم فاز ليفربول 2-1 قلت لولا تسديده جيراد مافاز ليفربول لبجيرارد

أما الأرسنال فريقي بالدوري الانجليزي

مو قايل لك شي

الدوري الاسباني
ريال مدريد مو أول فريق كبير ينهزم أول جوله له حتى برشلونه

و اتليكتو مدريد مدحتهم علشان فازو أول مباراة مثل تشلسي

والدوري الايطالي إنتر ميلان يوم تعادل مع سامبدوريا سبيتهوم و قلت كل هالنجوم و تعادلتم
ماكن المان يونايتد بنجومه متعادل أول جوله مع النيوكاسيل

تحياتي و اسف على الأطاله