بسم الله الرحمن الرحيم


يامساء الخير ومساء الحب والإشراق ومساء الورد والجوري ومساء الزعيم الملون بالازرق والابيض ومساء اي شي زين



نبدأ يومي من الساعه 12 والله كنت قاعد اتصفح النت حوالي نص ساعه تقريبا وزي مانتو عارفين اذا كانت المدام معزومه الواحد يطفش يقعد لحاله ً وعقب ماخلصت طفشت مادري وين اروح والا والله ادق على اخوي العزوبي زياد عمره 19 سنه اسأله وينك فيه قالي الحين عندي مباراة ونقصنا ظهير ايسر واقوله تبيني العب معكم قال تعال عاد ماصدقت على الله واخوي زياد هو يعرف اني ماعرف العب ظهير اصلاً مركزي وسط ايمن بس تعرفون والله اشتقت للكوره واللعب في رمضان مايتفوت واول ماصكيت التلفون منه واغير ملابسي والبس طقم ميلان القديم اللي عليه كلمة ((اوبل)) ووصلت لملاعب بن دايل اول من وصل انا الساعه 12.45 تقريباً المباراة تبدا وحده وادق على اخوي واقوله وينك قالي انا في الطريق وطبعاً قعدت اسخن والله من زمان ماسخنت وعاد الشباب جو وجلست اسخن معهم زياده تعرفون من زمان مالعبت واول ماصفر الحكم والدقه معهم كان العب هادي من بدايته واول كوره توصلني حسيت بشعور غريب من جد;) ومشى اللعب وحسيت الوضوع عندي مو اوكي بديت ابوش والله بعد اللعب بنص ساعه خلاص حسيت اني ماعاد اقدر اكمل واطلع من اللعب ورحل الاسطوره عن الملعب واول ماطلعت اروح للشقه اتسبح وازين نفسي تعرفون يستنى المدام تدق وعقب ماتسبحت لقيت مكالمه من الوالد وادق عليه وش عندك يايبه قالي ابد تعال افطر عندي اليوم واقوله تم



ويوم جت الساعه ثنتين وتجيني مكالمه من الاماره تعال خذني خلصت وطبعاً كالعاده اروح اجيبها واول ماوصلت احط راسي ورقدت الى قبل آذن الفجر بخمس دقايق واروح آخذلي لبن ومويه وصليت الفجر واوعود ارقد الى الساعه 9 الصباح قبل الدوامات بساعه عقب ماقمت لقيت ليان بنتي عمرها شهرين قايمه واقعد العبها والله قمت اوسوس هي فيها حراره ولا لا مارتحت الى ماقومت امها تتأكد ابي ارتاح وطلعت اردى مني قامت المره توسوس (( ابيها عون صارت فرعون )) ماله دخل المثل



ورحت الدوام وواول ماخلصنا من الدوام الساعه 1 واروح لمدير القسم علشان استاذن ماجي الفتره الثانيه الحمد لله وافق

وارجع الشقه واعود انام الى آذان العصر ورحت اصلي ورجعت وقعدت اقرأ قرآن لأن هذا وقتي في قراءة القرآن وخلصت من القراءه اروح لبيت الوالد وافطرت عندهم وقعدنا نشوف طاش واول ماخلص طاش نروح انا والوالد ناخذ لنا لفه على الحاره نهضم الاكل اللي كليناه وانا نتمشى آذن العشا وندخل المسجد ونصلي العشا والتراويح عقب ماخلصت من التراويح قعدت في الملحق وباريت اخوي في البلاي ستيشن زياد ورقعته 1/0 انا ماخذ ميلان وهو ماخذ الانتر وتحداني في مبارة ثانيه وخذ تشيلسي وآخذ انا مانشستر ورقعني 5/2



واول ماخلص القيم جلست على النت وجلست اكتب لكم يومي


وبصراحه اشكر الأخت سندريلا الهلال على دعوتها لي وبصراحه اهنيكم على المنتدى الاستشاري واشكر القائمين على هذا المنتدى والى الامام


تذكير
قال رسول الله صلى عليه وسلم (( العهد الذي بيننا وبينكم الصلاة فمن تركها فقد كفر ))


تحياتي للجميع / ابو ليان



ـــــــــــــــــــــــــــــــــــــــــــــــــــــــــ

الله يعطيك العافية مقـدر الهـلال استمتعنا بيومك الرائع وشيء رائع أن يبحث الأنسان عن مواهبة .!!

وتتواصل باءذن الله يوميات الأعضاء وغداً ان شاء الله يوميات العضو المتألق عزوز الأزرق

هـــلا وغــلا . . . مــســاك الـلـه بـالخـير والـعـافـيـه ..

إقتباس ورحل الاسطوره عن الملعب

خـوش أسـطورهـ من أول الـلـعـب تـعـب ..

إقتباس ((اوبل))

قـديـم

إقتباس لقيت ليان بنتي عمرها شهرين قايمه واقعد العبها والله قمت اوسوس هي فيها حراره ولا لا مارتحت

الـلـه يــخليـه لـك ..;)

إقتباس وتحداني في مبارة ثانيه وخذ تشيلسي وآخذ انا مانشستر ورقعني 5/2

كـفـو .. ترى الـتـشـلسـاوييـن .. مـايـلـعـبـون ..


.. أهـنـيـك مـقدر الـهلال ع هيـك يوميـات والـلـه يـعطيك الـعـآفـيـه .. وكل عام وانت بخير ..

مـشـكورين ..

لي رجعه ( بإذن الله ) .. يـــا صديقي الصــدوق ..

-----------------------------------------

بعــــــد العـــــوده .. بحمدلله :

إقتباس يامساء الخير ومساء الحب والإشراق ومساء الورد والجوري ومساء الزعيم الملون بالازرق والابيض ومساء اي شي زين

مســـــــاء الفــُـــل يالغــــالي ..

إقتباس وزي مانتو عارفين اذا كانت المدام معزومه الواحد يطفش يقعد لحاله

فـــاهم وضعك ..

إقتباس ماعرف العب ظهير اصلاً مركزي وسط ايمن

وليـــش ما تكلمت من زمــان عشــان نضمك لنــــادي الهلال بدال كمــاتشو أيــام زمــان .. !

إقتباس والبس طقم ميلان القديم اللي عليه كلمة ((اوبل))

غبــــــــــــــــــار ..

إقتباس واول كوره توصلني حسيت بشعور غريب من جد

شعـــور رائع بكـُـل تــأكيد ..

إقتباس وحسيت الوضوع عندي مو اوكي بديت ابوش

يــا حبي لك بس ..

إقتباس والله بعد اللعب بنص ساعه خلاص حسيت اني ماعاد اقدر اكمل

خذها نصيحه من أخ .. تدرب في أي نادي لكمـال الإجســام ..

وبعــد إسبوعين بس .. بتشوف كل شيء صــار كذا

إقتباس ورحل الاسطوره عن الملعب

ومتى مهــرجان الإعتــزال ..

إقتباس عقب ماقمت لقيت ليان بنتي عمرها شهرين قايمه واقعد العبها

الله يحفظهــا لك ..

إقتباس ورقعته 1/0

كثيــره .. !

إقتباس وتحداني في مبارة ثانيه وخذ تشيلسي وآخذ انا مانشستر ورقعني 5/2

آآآآه يالمـــــان ..

إقتباس قال رسول الله صلى عليه وسلم (( العهد الذي بيننا وبينكم الصلاة فمن تركها فقد كفر ))

وإن شـــاء الله نحـــافظ عليها .. فهي عهد ..

يوم بسيط .. ولكنه مُمتـــع ..

شـُـكراً لك يالغــــــالي ..

وشـــُــكرا للســــندريــــــــلا ..

وننتظر يوميات .. عزوز الأزرق

خخخخخخخخخخخخخخخخ عاش الأسطوووووووووره

الا صدق ماقلت وش صااار على بنتك لايكوون صار فيها شي

يالله مع السلاااامه

يومييييآت رآئعه لـ عضو مُبدع .. الله يعطيك العآفييه ابو ليان ع هييك يومييآت
وآضح علييك انك بيتوتي خالص :p الله يخلي لك ليآن وام ليان
ذكرتني بـ سآمي .. يمكن عشان كلكم أسأطير
شكر خآص للمنتدى الاستشآري وسندريلا ع مجهودهم اليومي المميز
وننتظر يوم (عزوز الازرق ) ع احر من الجمر ,

/

نآيف

إقتباس الرسالة الأصلية كتبت بواسطة ســــ 9 ـــــام يعطيك العافيه مقدر الهلال .. يوميات جميله أمتعتها لنا .. وغداً يوم أنتظره مع عزوز الازرق .. ويعطيكم العافيه يالمنتدى الاستشاري وخاصه سندريلا .. تحياتي

الله يعافيك ويخليك لاهلك

إقتباس الرسالة الأصلية كتبت بواسطة أنا..هلالي.. كـفـو .. ترى الـتـشـلسـاوييـن .. مـايـلـعـبـون .. .. أهـنـيـك مـقدر الـهلال ع هيـك يوميـات والـلـه يـعطيك الـعـآفـيـه .. وكل عام وانت بخير .. مـشـكورين ..

وانت بالف خير حبيبي والله لو اني ماخذ ميلان كان أدبته

إقتباس الرسالة الأصلية كتبت بواسطة الهلال موتي لي رجعه ( بإذن الله ) .. يـــا صديقي الصــدوق .. ----------------------------------------- بعــــــد العـــــوده .. بحمدلله : مســـــــاء الفــُـــل يالغــــالي .. فـــاهم وضعك .. وليـــش ما تكلمت من زمــان عشــان نضمك لنــــادي الهلال بدال كمــاتشو أيــام زمــان .. ! غبــــــــــــــــــار .. شعـــور رائع بكـُـل تــأكيد .. يــا حبي لك بس .. خذها نصيحه من أخ .. تدرب في أي نادي لكمـال الإجســام .. وبعــد إسبوعين بس .. بتشوف كل شيء صــار كذا ومتى مهــرجان الإعتــزال .. الله يحفظهــا لك .. كثيــره .. ! آآآآه يالمـــــان .. وإن شـــاء الله نحـــافظ عليها .. فهي عهد .. يوم بسيط .. ولكنه مُمتـــع .. شـُـكراً لك يالغــــــالي .. وشـــُــكرا للســــندريــــــــلا .. وننتظر يوميات .. عزوز الأزرق

هلا اخوي احمد شرفت على يومياتي بصراحه مشتاقلك بالحيل والف مبروووك على العوده

واعذرني احمد خذيت مانشستر وانرقعت

إقتباس الرسالة الأصلية كتبت بواسطة ندوووش خخخخخخخخخخخخخخخخ عاش الأسطوووووووووره الا صدق ماقلت وش صااار على بنتك لايكوون صار فيها شي يالله مع السلاااامه

هلا ندووووش ماصر فيها شي وسوسه بس

إقتباس الرسالة الأصلية كتبت بواسطة @@@نايف@@@ يومييييآت رآئعه لـ عضو مُبدع .. الله يعطيك العآفييه ابو ليان ع هييك يومييآت وآضح علييك انك بيتوتي خالص :p الله يخلي لك ليآن وام ليان ذكرتني بـ سآمي .. يمكن عشان كلكم أسأطير شكر خآص للمنتدى الاستشآري وسندريلا ع مجهودهم اليومي المميز وننتظر يوم (عزوز الازرق ) ع احر من الجمر , / نآيف

هلا بنايف اي والله انك صادق انا بيتوتي بقوه زي مانت عارف زوجه وبنت مافيه سربته

إقتباس المره توسوس (( ابيها عون صارت فرعون )) ماله دخل المثل

ينطبق عليه المثل : ((( جبتك يالمعيــن تعين طلعت يالمعين تعان ))) ... افهمه

... اما أبو ليان ... ,, يلعب بكل مكان ظهير وسط هجوم دفاع حارس ... ولكن بكل الحالات ينكبك ..

يوووم رائع ,,

ــــــــــــــــــــــــــــــــــــــــــــــــــــــــــــــــ
وننتظر عزووووز اللي يعطي اليوميات حلاوتها ..

أنا أشهد انك اسطورة والله قصتك اسطورة مب أنت

ومشكور الله يعطيك العافية على قصتك الرائعة

موضوع جميل
واعداد افضل من جيد من ابو ليان {اسطورة الـ5 دقائق}
وتشكر ادارة المجلس العام على هذا التطور الملحوظ
وبالتوفيق للجميع

إقتباس الرسالة الأصلية كتبت بواسطة المنتدى الاستشاري والدقه معهم

كله كوم والكلمه هذي كوم من جد واضح انك من زماااااان ما لعبت

ههههههههههههههههههههههههه

هلا وغلا يابو ليان...

أول حاقة ... الله يحفظك لليان .. ويحفظها وامها لك ..

ثاني حاقة .. ماني داري شو ائتبس " كيف تنكتب !!"وشو اخلي ...

مير أنت أعطن فرصة وتحملن ...

إقتباس وزي مانتو عارفين اذا كانت المدام معزومه الواحد يطفش يقعد لحاله

من قالك انا نعرف ؟؟! أصلا مداماتنا طوووووووووول السنة معزومات عن أبوهم .. <<<<< يالله عساه يعتقها لي ....

إقتباس اسخن والله من زمان ماسخنت وعاد الشباب جو وجلست اسخن معهم زياده تعرفون من زمان مالعبت واول ماصفر الحكم والدقه معهم كان العب هادي من بدايته واول كوره توصلني حسيت بشعور غريب من جد

ههههههههههههه ....سؤؤؤؤؤؤؤؤؤال...أختر الاجابة الصحيحة..
* من أول من سخن أكثر من الوقت اللي لعبه ؟؟!
1/مقدر الهلال 2/أبو ليان 3/أخو زياد

إقتباس عقب ماقمت لقيت ليان بنتي عمرها شهرين قايمه واقعد العبها والله قمت اوسوس هي فيها حراره ولا لا مارتحت الى ماقومت امها تتأكد ابي ارتاح

أمديها مو حرارة ..ممكن الضغط ارتفع .. تلقاها تصحيك للدوام وانت ماتدري..

إقتباس واول ماخلص القيم جلست على النت وجلست اكتب لكم يومي

الف شكر يابو ليااااااااااااااااااان ...عساك ع القوة...

إقتباس وتتواصل باءذن الله يوميات الأعضاء وغداً ان شاء الله يوميات العضو المتألق عزوز الأزرق

ممكن تخفضون الاناره شوية ... وياليت لو تطفون هالكاميرا مشتته افكاري

تحياتي,,,