ياجماعة الخير هالعنوان جالسن ثلاثة أيام بلياليهن عشان أزبرقه
حتى طلع بهالشكل
كيف معادلة صعبة
قبل كذا شهر كانت هالشاشة اللي قدامكم الحين
كلها من أولها إلى آخرها
ياسر أنتقل للهلال
ياسر اح للإتحاد
ياسر بيعتزل
ياسر بيروح للنصر
ياسر صرح
ياسر قال
ياسر فمصر ومايبي يكلم أحد
الريس يقول إن ياسر عندكم
البلوي يقول لبسوني عباة إذا ماجبتلكم ياسر
أبسألكم سؤال كم كان الواحد فيكم يقضي من وقته فاليوم عشان يتابع هالخبر فالشبكة
ولاقدام التلفزيون
كم جريدة شراها عشان يسمع خبر عن موضوع ياسر هو من قبل مايعرف إلا أصداف وسيدتي
جاك يامهنا ماتمنا
وياسر الحين عندنا وبين ظهرانينا
صدق مو كذب
ياسر لعب
ليه ياسر ماسجل
ليه ياسر مستواه هابط وموبمثل أول
رجعوا ياسر نبي العنبر وآآآآآآآآآآه ياصويلح
شر البلية مايضحك
أنا من الناس اللي بصراحه مستاء لأن ياسر موب بالفورمه
ومستواه هبط شوي
لكن إذا عرفنا الظروف اللي تحيط فياسر من كل جهة
ذاك الوقت بنقتنع ونسلم
يعني أنت يا ياسر وراك صحافة وإعلام يدور عليك غلطه هالكبر عشان يشرشحبك الأرض
وراك جماهير الأندية الثانية خصوصا حبايبنا اللي فالنصر و الإتحاد
يبونها من الله عليك عشان يتحمدون ربهم إن منصور ماجابك لهم ، ويدعون من قلوبهم إن مستواك ينزل
ووراك جماهير ناديك اللي امس كانوا يصيحون ويشاهقون لقال البلوي خلاص جبته
وطاروا من الفرحه يوم جيتهم
الحين يبون يشوفون فنك وإبداعك اللي من أول
كل هذولا ورا ياسر
طيب خلونا نشوف وضع ياسر
ياسر عمره 23 او 24
لاعب صغير وتو اشتهر
ولاهو من عمر سامي ولا الدعيع عشان ما يتأثر باللي يصير
لاعب صغير وسلطت الأضواء عليه من كل جهه
وإنه هو المنقذ للكرة السعودية
وإنه خليفة سامي وماحد بيصير بمستواه لو تحج البقرة على قرونها
الخلاصة
شوية رحمة
ياسر يوم فالمنتخب ويم عندكم كل يوم تشكيلة وماله شهرين عشان يتأقلم
ياسر ضحية
إعلام
وجمهور قليل الوعي
وشوية طماعين يحسبون الناس تنشرى بالفلوس
رحمة ياعالم شوية رحمة
وياسر بإذن واحد أحد يبي يرجع لمستواه
ويقدم كل اللي عنده وممكن يتسلف اللي عند بو يعقوب واللي عند سامي إذا لزم
فالنهاية ما أقول إلا الله يكون فعونك يا ياسر
ما قلت لكم إنها معادلة صعبة