14/06/2001, 04:13 AM
|
| زعيــم مميــز | | تاريخ التسجيل: 04/04/2001 المكان: الرياض
مشاركات: 1,692
| |
|
عفريت علاء الدين قال لي: معصي ؟؟!!!!!!
في يوم الاربعاء من كل اسبوع نروح انا واهلي للشاليه الخاص فينا
اول ما اشتريناه انبسطنا وفرحنا لاننا كنا صغار
والبحر والرمل والشمس شيء يوسع الصدر
بس كل مانكبر يوم عن يوم تقل فرحتنا اذا رحنا له الاسباب اكيد تعرفونها
الدباب البحري ممنوع للبنات في الصبح من الاهل لان الشباب ما يتركون فرصة
والليل ممنوع من الحكومة.
انزل البحر اسبح مالك امل لانه حتى لوانه فاضي الدرابيل موجودة عند كل شباك.
وصديقاتنا ما يجون لانه بعيد والطريق ينخاف منه..وان جوا مع اهلهم في السنه مرة كان ثالث عيد بالنسبة لنا
الحقيقة انا اصبر نفسي وقول..احمدي ربك الله يرحم ايام منول يوم كنا نفرح بروحتنا للكورنيش ونلعب في المراجيح الخشبية.
بس ولو مليت المهم اخر مرة بالطقاق والهوشة رحت وما امدى صلاة العشا تخلص الا انا في سابع نومة
<<<<-----اذا طفشت نامت مريحة اهلها
وتنبهت الساعة ثنتين بعد نص اللليل اتقلب اتقلب خلاص طار النوم
قمت ونزلت امغط رجيلاتي على الشط طبعا الهواء عليل وقمرة وصوت الموج ... تقل اني ركدت شوي وراح الملل وضيقة الصدر.
جلست على الشط وقعدت اهوجس والعب في الرمل
واحفر ............. شوي شوي مادريت الا يدي خابطة في شيء يا ربي وش ذا؟؟
اسحبه واموت من الضحك على شكله ...قمت ا ضحك طريقة ماهيب طبيعية و قمت اسمي على روحي
خفت لا اكون استخفيت
طلع زي مصباح علاء الدين ماادري هو مصباح هو بريق
ما ادري وشو!! المهم بعد ما مسحت دموعي (من الضحك)
قلت خلني امسحه زي علاء الدين يمكن يطلع شيء ومسحته وانا اضحك
ما طلع شيء ... قمت اقلبه ولقيت على جنب كتابة ما ادري وش هي ما ادري باي لغة شكلها
(MADe In)
ما قد شفتها احاول اقراها ما قدرت قمت مسحتها بقوة مادريت الا الدخاخين تطلع والوان(بنفسجي وازرق واخضر)
قمت هالمرة اضحك واصيح من الروعة وش ذا وصوتي اختفى ما اقدر انادي احد
ما دريت الا يطلع لي العفريت
شبيك لبيك يا سارة عبدك وبين اديك
ما رديت عليه من الخوف اظني بلعت لساني
شكله بقذلة واصلة نص ظهره ومشقرها بعد ووحاط زمام في خشمه ولسانه لاحكى لسانين ولونه رشادي(من الرشاد)
تخيلوا الشكل
قام قال مرة ثانية شبيك لبيك يا سارةعبدك بين اديك
بس هالمرة قالها وهو يرقص عضلاته وحواجبه ويلفح .
قمت تشجعت ورديت عليه:كلنا عبيد لله بس الله يسلمك ارجع لبريقك
قام يبتسم انا صراحة ابتسامته سحرتني اسنونه مرتبه وبيضة
<<<-----نقطة ضعفها
والحقيقة تاملت عيونه فيها حنان وسحر عجيب
اطمنت هاللحظة
قالي :اطلبي لا يردك الا لسانك انتي حررتيني تراني ما طلعت من هالابريق اللعين الا اليوم من بعد علاء الدين انت اسرتيني بهالجميل
قال:اطبي وتنقي بس طلب واحد ترى ايام الطفرة ولت
(هو كان مطمئن يقول ان علاء الدين وهو ولد في ذاك الزمن كان همه ياسمين وش تبي هالبنية وفي السعودية اكيد تبي يا عريس يا اسئلة اختبار يا سفرة يا حفلة تخرج )
قال :اامري يا سارة
قلت له:اي طلب اي طلب؟؟
قال :اي شي..... وبعدين لا تزودينها يالله اخلصي ترى لو اطلعت الشمس مانتيب شايفتني بروح اشوفها لي كم سنة محرووووووووووووووووووم
(طبعا هو بعد ما اخذ علي وصار يمون صار يحكي بالنجدي وترك الطريقة القديمة)
قلت له بعد فترة تفكير: يا عفريت ابيك توديني لمدينة
المجتمع فيها كله مسلمين ما فيها حروب ولا اذية والقلوب نقية ومتسامحين كل مين ماخذ حقة وكل مين حر ما فيها ظلم ولا نفاق.
قالي:صعبة يا سارة لازم تكافحين وتنشرين الدين
ولازم تشوفين الشر عشان تتمسكين بالخير
سكت
شوي وقلت:عفريت ودي اروح قرية فيها الرجل يحترم المرأة كانسان
قال:وش لون؟؟
قلت :ابي هالقرية الرجل يعرف انه زي المرأة
قال:عشتوا!!!!! وش هالخرابيط؟؟
تبين تغير سنة الحياة؟؟
قلت له:خلني اكمل ابي الرجل يعرف اني وهو كلنا من طين وكلنا من روح بعد
ابيه يعرف ان الله عادل اذا المرأة غلطت واذنبت ذنبها هو هو ذنب الرجل
واذا احسنت الحسنة اللي بتاخذها هي حسنة من نفس النوع اللي ياخذه الرجل واننا مسؤولين اما م الله عن عمارة الارض ونمائها
يعني امام الله واحد فمن اولى اننا نكون على الارض واحد.
قال:سارة صعبة هذي يبغالها سنين وسنين عشان نزرعها ونغرسها وننميها
انتي اماك مبسوطة عند اهلك وابوك فاهمك وش تبين بهالغثا؟؟
الطلب هذا سارة مرفوض.
قال: ورى ما تقولين ابي عريس؟؟؟
مهوب احسن؟؟
تستقرين ويصير عندك عيال تلهين فيهم وتشوفينهم يكبرون ويطامرون قدامك
قلت له طيب: تجيبلي؟؟
قال (وهو مبسوط بيفتك): من عيوني ابشري
وش المواصفات؟؟؟
قلت له :سلامتك بس ابيه يا من هذيك المدينة او من هذيك القرية.
مادريت الا لونه تحول الى لون الفصفص (افتح من اللون السابق بدرجتين) وشلون وليش ماادري!!
سكت
بعد شوي رجع للونه الاصلي وابتسم وجاء جلس جنبي قالي اطلبي طلب زين يا سارة
قلت له : ودي اسوق ...تخليني اسوق؟؟؟
قالي: سارة الحقيقة السيارات هالعصر مااعرفلها انا بساط السحري ويخب تبينه؟؟
قلت له: مشكوووووور لا
قال :ازين اصلا ماادري وينه
قلت له ودي :ادرس علوم البحر اوالفلك والنجوم
او الصحافة والنشر او القانون
قالي: وش جاب لجاب؟؟
قلت له: كلها حرية وانطلاق.
قال :سارة اقول اسكتي هذي اشغال ما تنفع الا للرجال وش تبين بها؟؟؟ مالك جلادة عليها
قلت :بس ودي
قال:لالالالا
سكت
قالي :بروح اغسل قذلتي بالبحر تكونين قررتي وش تبين اما اللي قلتيه كله مرفوض
اطلبي يا سوسو شيء معقول
قمت قلت :طيب
مر وقت ولقيت وش ابي ركضت عنده قلت له
عفروتي يا عفروتي(صرنا نمون على بعض)
قال:هلا
قلت ممكن تخليني رجل بس ليوم واحد؟؟
واسوي كل اللي ابي
كل ما اقولك شيء تقولي لا لا ..هالطلب ارجوك قل ايه الله يسلمك لا ترفض
قال:مانيب قايل لا هالمرة
بقول: معصي
وطير عيونه
سكت وعطيته ظهري وهو بعد عطاني ظهره ومر الوقت
وقربت الشمس تطلع
قالي:سارة
قلت له نعم وان زعلانة بالمصري(مكلضمة)
قالي : سارة قربت الشمس تطلع يالله اطلبي خليني انطلق اشوف حريتي وانبسط
اطلبي وخلصيني تراي مليت
قلت له: ما ابي شيء
سكت قال: لازم
قلت له( بعد ما طقيتها هواجيس)
اسمع عفروتي
قالي :هلا يا عيون عفروتي يا بعد قذلة عفروتي
قلت :ممكن ترجع من جديد في المصباح وامسح عليه وتطلع عشان اعيش الدور؟؟ لاني ودي اطلب اول ماتطلع الصراحة مستحية الحين منك وودي اعيش الوضع ارجوك و بعد ودي تنسى كل اللي صار والطلبات اللي طلبتها .
قال :سارة صعبة
قلت : الله يعافيك
قال :ما اقدر مااقدر الاسر صعب
قلت له :عشان سوسو
قال : طيب انا ماادري ليش ما اقدر اقولك لا او ارفض لك طلب .
ورجع وقفلت عليه
وكانت الشمس توها تبي تطلع
ورحت للسقالة
ورميته بعيييييييييييييييييييييد وسط البحر
وقلت له:
ما نفعت علا ء الدين الا بياسمين
وما طلعت لي الا انا ... من بعد هذيك الايام والسنين
عساك ما تطلع ولا يوم الدين
قل اميييييييييييييين
وشوي مادريت الا صوت يناديني
سارة وش منومك على الرمل؟؟؟
قلت:لا ابد يوما بس من ضيقة الصدر
قالت: قومي بس تعوذي من الشيطان وتعالي افطري
قلت لها اسبقيني هذاي جاية وراك
وراحت والتفت للبحر وضحكت
ومرمن قدامي دباب بحري
ونورس
والشمس
*******************************************************************
الموضوع بالكا مل نقلته لكم وذلك لروعته واعجا بي به..واهميته كذلك للحوار...وهو للكا تبه: المدغبجه. |
بس ترى ساره قهرتني 
ايييييييييييييييييييه 
الوضع المتطور
