السلام عليكم ورحمة الله وبركاته..

اسال الله العلي العظيم ان يبلغنا واياكم رمضان ويرزقنا صيامه وقيامه والقبول ان شاء الله,,,,

كنت وعدت نفسي بعدم كتابة موضوع الا ان يكون مفيدا ويحمل اضافه للقارئ وهذا ما اتمناه في موضوعي هذا الذي اريد ان ابين فيه بعض معاناتنا نحن المغتربين في ديار كافره وخاصة خلال شهر رمضان الكريم....

المعاناة الدينيه:

اولا: طبعا مافيه شي اسمه انك تسمع اذان للصلاة او شي يعني اذا فيك تدخل بالنت وتشوف متى توقيت الاذان بالضبط طبعا عشان الفطور والسحور والا تاخذ تقويم من المسجد ومو اكيد بعد انه صحيح.

ثانيا: اقرب مسجد من عندي تقريبا ربع ساعه او عشرين دقيقه بالسياره يعني اذا تبي تصلي المغرب لازم تفطر هناك واذا تبي تصلي العشاء والتراويح لازم تطلع من بيتك بعد الفطور علطول ويالله يمديك.

ثالثا: روحانية الشهر الكريم اقصد روحانيته الدينيه مفقوده مره يعني مو زي بلادنا يالله لك الحمد كلن صايم وكلن مثلك يطلب ما عند الله لا يعني ما تحس انك صايم ابد هنا بس تحس فيها بينك وبين نفسك والا اللي حولك والمجتمع اللي انت فيه عادي ما تغير عليهم شي.

المعاناة الفرديه:

الصراحه هالمعاناه فيها طرافه شوي يعني اقصد العام برمضان كان عندي دوام يوميا من الساعه ثمان الصبح لين ثلاث تقريبا وطبعا دافور مثلي ما يغيب ابد عشان كذا كنت احضر كل يوم .... المهم فيه وحده تبيع نقانق (هوت دق) مشويه وريحتها تشق الخشم شق قبل رمضان ما كنت والله اراها شي وامر من عندها عااادي ما تهمني لكن يوم بديت اصوم وربي اني لا مريت من عندها اسمع مصارين بطني تقل حرب داحس والغبرا !!!! لكن ان شاء الله انه على اجر.

المعاناه الفرديه الثانيه هي قلت امكانياتنا بالشهر الكريم يعني مافيه لقيمات والا قمر دين (اللي يسمعني يقول مقطع قمر الدين بالسعوديه وانا ماعمري شربته ابد.... على فكره هو ينشرب والا ينوكل...هههههههههه)

ماودي اطول عليكم اتمنى ان اكون خفيف على قلوبكم .....واتمنى من اخواني المغتربين بعد يضيفون اضافات لبعض معاناتهم بالغربه وخاصة بالشهر الفضيل,,,

اخوكم ابو يعقوب

الله يكون بعونكم ياخوان وياشين الغربه ويازين الوطن والاهل

طيب متى تجيكم طاش ؟ <<< عليك سؤال

الله يعينك اخوي وانا حاس بالي انت حاس فيه لأني سبق وان مريت بهذا الشي

مطزاز شرفني مرورك يالغالي....

(ابويعقوب يسلمو يابعدهم تراني موصي ماكس يرسل لنا تمر سكري ومايقصر بس يبي عموله)
اقول اسمع اذا تبي سكري علمن ترا باقي عندي من العام شوي.....وخل عنك ماكس اللي ما يرسل الا بعموله. تحياتي لماكس الغالي ....

فيرون الرياض: تسلم اخوي على مرورك وابشرك طاش وسبع مسلسلات بدبي كلها موجوده ماصار رمضان الله يخلف علينا يارب.....

هلالي مو عالبال: شاكر مرورك اخوي تسلم والله وفعلا ما يحس بالنار الا واطيها,,,

إقتباس (ابويعقوب يسلمو يابعدهم تراني موصي ماكس يرسل لنا تمر سكري ومايقصر بس يبي عموله)

نصاب ماقلت ابي شي بس قلت عطن حق التمر
ماتفقنا تكب العشاء كذا

إقتباس (ابويعقوب يسلمو يابعدهم تراني موصي ماكس يرسل لنا تمر سكري ومايقصر بس يبي عموله) اقول اسمع اذا تبي سكري علمن ترا باقي عندي من العام شوي.....وخل عنك ماكس اللي ما يرسل الا بعموله. تحياتي لماكس الغالي ....

حلوة تحياتي لماكس الغالي زي قولتك خل ماكس يقلب وجهه

اذا انت بتكساس

علمتك باماكن

تصير كأن بالسعودية

خصوصا ان العرب فوق 200000

نسمة

واذا انت بالعاصمة ماراح تحس بالغربة


بعدين الشعب الامريكي يحترم المسلمين الذين يحترمون دينهم ويصمون شهرهم

واسل مجرب

والله ياخوي عيشتنا في غربتك والله يكون بعونك والله يصبر جميع المسلمين

قل يامريت من عند النقانق يصير في بطنك حرب داحس والغبراء ههههههههههه الله يعينك

دمت بود أيها الغالي

(الله يعينك و يوفقك يارب وان شاءالله ترجع لاهلك ولديرتك وانت رافع راسك )


كيفي كويتيه : الله يجزاك خير ويخليك يارب على هالدعوه الصادقه ..... شرفني مرورك.



(حلوة تحياتي لماكس الغالي زي قولتك خل ماكس يقلب وجهه)

ماكس : ينقطع لسان اللي يقولها لك ..... لكن مالها داعي عموله عشانه سكري افرض انه صقعي يصير ببلاش... ههههههه تدري ارسل اي شي ببلاش اذا صار السكري بعموله لا ترسله ابد نمشيها ونفطر بتوكس. . اسعدني مرورك..


(اذا انت بتكساس)

زعيم روما : ياليت بتكساس كان فيه سعوديين كثير على قولتك لكن المشكله ان ديرتي بالوسط كل السعوديين اللي اعرف تقريبا خمسه بس.
صدقت وانا اخوك فعلا الامريكان يحترمون اللي صايم وصارلي العام موقف بنفس الطريقه رحت اختبر امتحان متغيب عنه وكان وقت غداء عندهم المهم زميل المدرس قال خله يختبر بالغرفه الثانيه عشان الرجل هذا صايم الصراحه انبهرت من احترامهم مره اعجبني. شاكر مرورك


( والله ياخوي عيشتنا في غربتك والله يكون بعونك والله يصبر جميع المسلمين )

الشيفيلان : الله يخليك ويسلمك تسلم اخوي والله لا يعيشك بغربه الا وقت قليل بس . اسعدني مرورك.


(طيب أبو يعقوب المسجد الي تقوله هذا ما يمديكم تجونه من آخر العصر تفطرون وتجلسون وبعد التراويح ترجعون وتعشون )

لوحه مميزه : المشكله الوقت بعدين المسجد اللي عندنا ما فيه فطور جماعي فيه صلاة ومويه بس يعني تضطر بعد الجامعه ترجع ويالله يمديك تسوي شوربة ماجي والا اندومي ..هههههههههههه. اسعدني مرورك.

وان حصل ورحت لتكساس في مدينه هيوستن تروح لمنطقه المدكل سنتر وفي فندق الهولدي ان (الهارفي سويت سابقاً) في هذا الفندق بالذات تجد نسبه نزلائه لا ابالغ ان اقول لك تصل الى 80% من السعوديين والخليجيين
وايضاً مجمع بلازا دالورو في نفسه المنطقه ملئ بالخليجيين والسعوديين على وجه خاص وسكنت في
هذا المجمع سنه وشهرين ومااقول الا ياشين الغربه والله يساعدك اخوي