[skroo]

السلام عليكم ورحمة الله وبركاته

اهلا بكم في موضوعي النقاشي البسيط والخفيف واللي اتمنى يكون خفيف على قلوبكم كل ابوكم

صراحة طفشت من المواضيع الاخبارية في منتدى الرياضة العالمية , وايمانا مني باهمية المواضيع النقاشية وانها لب الانترنت فقررت انزل مويضيع نقاشي على قدي




هالنقاش سبق وانطرح في رابطة جوفنتوس قبل اكثر من شهر لكن لامانع من اعادة طرحه للعامة وبشكل اوسع واوضح





موضوع النقاش هالمزيون حقنا



سيكو وما ادراك ماهو سيكو
اكيد اللي من برا الكالشيو مايعرفون سيكو علشان كذا ابكتب نبذة بسيطة عنه





سيكو واحد كان متكي جنب كابيللو يوم كان يدرب جوفنتوس , وبعد الهبوط صارت له اكبر ترقية في التاريخ وصار مكان الشريف موجي

يعني من مسؤول تبديلات اللاعبين الى مدير تعاقدات نادي كبير مثل يوفنتوس , شوفو صورته مع كابيللو



يعني سيكو استلم اليوفي هالمواسم :

موسم 2006-2007 في السيريا B
موسم 2007/2008
موسم 2008/2009

ينتهي عقده في يونيو 2009

واكيد ماعنده خبرة بهالمجال لانه كان مسؤول تغييرات اللاعبين بالمباراة


طيب وش ملة سيكو ؟


سيكو بيانكونيري ابا عن جد , قبل كم شهر صار له حادث وراح للمستشفى وشاف الموت وقلب رومانسي وترقد بالمستشفى وصرح وقال اشتقت للنادي ولا تلوموني لان ابوي كان يشتغل بالنادي وياخذني معه من يوم كان عمري 3 سنين
يعني هذا اللي مقطوع سره في النادي مهوب مثلنا


طيب انتهينا من سيكو



====

سيكو هو احد اضلاع مثلث ادارة النادي :



لا يهمكم رانييري تراه ماكان مستوعب انه بيتصور

كوبولي جيجي



رئيس اليوفي ومشجع قديم لليوفي وصديق رئيس فيورنتينا من 20 سنة ( المعلومة صحيحه على فكرة )
طبعا كرويا ما يدري وين الله حاطه وتصريحاته مدري وش تبي



بلانك



فرنسي خبير اقتصادي وتأثيره واضح على الفريق واكثر واحد يثقون فيه جماهير جوفنتوس لانه قليل الكلام كثير الافعال وغير كذا دفع عربون المحبة مع الجماهير بعد سواياه بالملعب الجديد
كنا نعتقد انه مجرد موظف عادي لكن اكتشفنا انه مشجع لليوفي بعد , وما استغربنا هالشيء لانه فرنسي




سيكو : توني مخلص منه




الاهداف اللي غثونا فيها ( الخطة مدتها 5 سنوات ) :

1- اعادة النادي لاقوى من السابق
2- خلق فريق يجمع بين الشباب والكبار
3- تحويل اليوفي الى نادي تجاري يغذي نفسه بنفسه مثل مانشستر وارسنال ولا يعتمد على شرهات احد
4- بناء ملعب للنادي
5- المدرب له كامل الصلاحيات وهو الامر الناهي بكل شي


وفيه اشياء ما اعلنو عنها بس دايم يطرونها اللاعبين بتصاريحهم ( اطلعتنا الادارة على مشروع النادي ومدري ويش )



===

||>> محور النقاش <<||


سيكو واجه حرب شعواء من جماهير النادي وانه غير كفو لنادي مثل يوفنتوس , ومع ذلك :
الادارة تدافع عنه
والملاك يدافعون عنه
ورانييري يدافع عنه
ويقولون عطوه فرصة

وصراحة انا كنت من الناس اللي شابين فيه بس قلبتها براسي مرة وناقشت الشباب في الرابطة وكان رأيي ان سيكو بطل وتطور عن السابق, بس طبعا بدون جدال بيزنطي لان النقاش فيه ارقام حقائق

وخلوني اسبح فيكم في محيط الارقام :


موسم 2006-2007 النادي تأهل للسيريا A
يعني الادارة نجحت باول اهدافها


موسم 2007-2008 الادارة نجحت بتحقيق الهدف الثاني وهو التأهل لدوري الابطال

2008-2009 ( محور النقاش )


وش سوا سيكو فيه ؟ انا راح اكتب كل اللي سواه سواء ايجابي او سلبي واترك لكم الحكم



راح اذكر الصفقات الناجحه والفاشلة والصفقات اللي ما طلعت نتائجها الى الان :



الصفقات الناجحه :


1



ياسر القحطاني حقنا ,
اماوري مرعب الحراس مسجل بالدوري 11 هدف لحد الان وهو وصيف الهداف دي فايو اللي عنده 12 هدف
اماوري طويل وعنده ارتقاء خيالي وراس غير طبيعي ومهارات برازيليه وعوض مكان تريزقيه بكل جدارة





2



اولوف ميلبرج او جد هايدي
هالصفقة مجانية يعني مو خسارة على النادي ولغاية الان مقدم اداء مق%4ع بمركز الظهير اليمين وقلب الدفاع




3



اليكسندر مانينجر مقدم اداء خيالي وخير بديل لبوفون
بوفون غايب من مباراة باليرمو باول الدوري والى الان مانينجر ماسك الطارة بكل امان , لعب ضد باتي ذهاب واياب وضد مدريد ذهاب واياب وضد زينيت اياب بس
يعني لعب 5 مباريات بالابطال وبوفون مباراة وحده بس ناهيك عن عدد المباريات اللي لعبها بالسيريا A




[ اعادة ثلاثي منتخب ايطاليا الاولمبي ]



4



ماركيزيو ( تارديللي الجديد ) الكل يشوف نجوميته وخصوصا قدام الفرق الكبيرة ومحور قادم وبقوة
كان معار العام الماضي لايمبولي ورجعوه الادارة




5



جيوفنكو الصغير المكير معشوق ليبي ودينو زوف وكابيلو وزولا وعلى الرغم انه لعب اوقات قليله الا ان تأثيره قوي ويكفي الفاول اللي ركبه على الترجي التونسي قصدي ليتشي
كان معار العام الماضي لايمبولي ورجعوه الادارة



6



دي شيلي ظهير او وسط يسار لغاية الان مقدم اداء مقبول والجماهير خاقة معه لانه مصلح هدفين بالراس لاماوري ضد ليشي وميلان وتسبب بطرد زامبروتا
كان معار العام الماضي لليوفي الصغير ( سيينا ) ورجعوه الادارة


7



السويدي البين اكيدال , يسمونه جوهرة السويد واليوفي متابعه من السيريا B وحجزوه واخيرا وقعو معه بالصيف اللي راح يوم خلص ثانوية
ظهر في مباريات قليله لكن امكانياته ظهرت للجميع بالرغم من صغر سنه وقلة الوقت اللي ظهر فيه



8



ياجو الاسباني , ولد برشلونه البزر اكيد ماشفتوه لانه يلعب مع البريميفيرا بس انا شفت ملخصات لهم ومستواه ممتاز ويلعب جناح يمين او يسار







الصفقات اللي ماظهرت نتائجها




1



كريستيان باولسن الدولي الدنماركي خوي توتي وقاتوزو لعب كذا مباراة قبل الاصابة لكن مستواه متفاوت
وعني انا اتوقعه نجم ان شاء الله لكن يبغاله توظيف صح من المدرب وميزته الخشونه والدفاشة والاستفزاز وهالمواصفات مطلوبة في الكالشيو



صورة زيادة على البيعه هدية للميلانية


ياقوي يا باولسون




يععع
يعجبني الشرس , باولسون ودي يرجع ايام مونتيرو بالتكسير ولعن الجدف



2



الكرواتي الدولي كنزفتش , اعارة رخيصة 200الف يورو من ليفورنو يعني لو مستواه مثل النزهان خير وبركة لانه رخيص



الصفقات الفاشلة



1




كيمني دابة سليمة عمره مليون سنة واكثر حارس نكبة في التاريخ بس مجاني لانه ملك للنادي اصلا
تقولون وش هوله النادي عنده مثل هالعاهه ؟ اقولكم تراه صديق موجي او دل بييرو يعني شغل محسوبيات





صفقات خلابه ( تخليص النادي من عاهات موسم 2007-2008 )




سيكو العام الماضي جاب نوتشيرينو بوصية من موجي , بس صراحة هاللاعب مدري وش يبي من الحياة , والحمدلله سيكو عقد صفقة ودبسه بظهر باليرمو وافتكينا منه
يعني بيعه نهائية لا هي مشتركة ولا اعارة



بالادينو عمره 24 ولا قدر يثبت نفسه وبالتالي قلعه سيكو لجنوى ملكية مشتركة كوده يتطور والا يبيعه ويفتك منه



الميمو كريشيكو عقليته ايطاليه خالصة بالدفاع لكن جسمه مهناش ولا اقنع رانييري العام فقلعه سيكو اعارة من يناير وجدد اعارته هالموسم واتوقع والله اعلم انه بيبيعه
هو ماهو عاهه بس جسمه ضعيف بالنسبة لدفاع الفريق الاول




الاسترالي بيلاردي , حارس مرمى نكبة من الدرجة الاولى
نكبنا العام الماضي بكذا مباراة والحمدلله طرده سيكو من النادي وافتكينا منه وجاب مكانه ماننجر يالبى قلبه
الله يعين اودنيزي عليه , المشكلة ان عمره 31 .




==========================

بعد هالتقرير العامي والمبسط عن سيكو
نستنتج ان صفقاته الموسم اللي راح هي كالتالي :


عدد 7
صفقات ناجحه
( طلعت ياجو لانه مالعب نهائيا للفريق الاول )


عدد 1
صفقات فاشلة

عدد 2
صفقة لم تثمر ثمارها


=========================


سيكو وبعد مرور سنتين ونص على تعيينه مدير رياضي للنادي كون لجوفنتوس فريقين كاملين
وسويتها لكم على ملعب وهمي بالتشكيلتين :



وزود على البيعه فيه : حسن صالحمدتش + تياجو


========================



يعني خلاصة الموضوع ووش سوى سيكو :


1- الصفقات اللي قدامكم
2- تجديد عقود كل من ( دل بييرو + تريزقيه + كامورانيزي + بوفون + ندفد + زيبينا + كليني + سيسوكو + ماركيزيو + جيوفنكو + ليوقرتالي )
3- تدرون كم كلفة خزينة النادي بالصيف اللي راح ؟ من 13-17 مليون لان النادي اعار وباع لاعبين كثار
يعني النادي مطفر من اثار الهبوط ومع ذلك سيكو خلق لنا فريقين متجانسين باليوفي

========================

وش هي مطالب الجماهير لسيكو بالسوق الشتوي والموسم القادم ؟

1- مدافع
2- على مستوى عالي
3- بديل لندفد وهو الاهم


========================


كل اللي راح وجهة نظر شخصية

وش رايكم هل سيكو مظلوم والا لا ؟

الموضوع نقاشي للجميع مهوب شرط اقعد ارد على كل واحد منكم , كل واحد يرد على الرد اللي مايعجبه او اللي يعجبه

يمكن هدفي من هالموضوع اني اشبها بين اعضاء جوفنتوس اللي منقسمين عليه الى الان

عموما الموضوع موضوعكم وكل واحد منكم يدير الموضوع



للي يبي الاستزادة وتفصيل اكثر عن الصفقات يراجع هالموضوع

..||.. تهديد للكالتشيو تهديد..اليوفي سيضرب بيد من حديد..||..

نشوفكم على خير

[زعلوهـ]

الله يعطيك العافيه يا سكرو
بعد كلامك كله
يمكن اقدر اسمي سيكو رجل خفي في اليوفي
وهو كذا والله

على فكره ترى ساعتي سيكو

[رونالدو-7]

سيكو

بطل


صراحه ماقصر


قدر يسوي فريقين

مظلوم من الجماهير



الله يـ ع ـطيك الـ ع ـافيه

ورده

[توتيCOM]

يسـلم بـؤكـ ..

نـرجـع لموضوعنـا الـزين و فتـى الاستراحـات ..
اول شـئ احـب اذكـر نقـطة انـت ساحـب عليهـا و مسـوي مطـلع عمـركـ من السـالفـة ..

يا شبـاب اسمعـوا و عـوا ..
ترى اول المـعارضين لـ سيكـو .. كاتب الموضوع ..

لأن ناصر من الفتيهـ اللي يحكمـون على الامور بسرعـهـ ..
احرجـهـ المزيون و ناصر حس بالذنب و قال اكتب فيهـ موضوع .. << كيف التحليل .. يا حبيبي و لا التوبيلي

و الله الرجال ( ان صح التعبير ) ..
ما قـصر .. بنى لكـم فريق شاب و صفقات مدروسهـ ..

الكـل اعتبرهـم مكسـب ..
إلا اثنـين ابي اعـرف الاحـساس اللي انتـاب سيكو وقتهـا يوم فكـر يجيبهـم ..

.: الاول :.
اللمـبي


ياخي حتى بوفون ساحـب عليهـ ..

.: الثاني :.
عازف البيـانو


ياخي حتى القلفز حقهـ اشكـ انهـ لكرة قدم ..

ع العمـوم ..
اهـم شئ تبتـعـدون عن شغـل ..
التهديد و احتجاز الرهاين إلين يوقع اللاعب ..
فلم ذا ما عاد هو توقيع عقد ..

ناصـر .. /
كـم انـت فـضـيع .. /

عـوااافي .. سـلآآآآآآم .. / ورده

[iker]

.

يعطيك العـآفية على النبذة الجمـيلة نآصر ..
وفقاً لما اطّلـعت عليه في موضـوعك .. أشوف ان الرجّال مسـوي شغـل كويّس ..
وسياسـته ممـتازة جدًّا !
" جلب لاعبين يفيدون الفريق بتكلفة ماليّة زهيدة " يعني استغـلال لوضع اليوفي المادّي ..
ووقّع مع لاعبين من فئة النجـوم .. مثل " أمـاوري " ..
غير انّه تخلّص من بعـض العـاهات ..
واللي ممكن نقول يحـتاجون وقت كلّهم يا إما إعارة أو ملكيّة مشـتركة !



فريق مثل اليوفي صـآعد قبل موسمين وهاذي تشكيلته .. أشـوف أنّ كل من له يد في هذا يستحق الثنـاء !
وليس سيـكو وحـده !

[تورام]

هلا و الله بـ ناصر

شوف يا حبيبي .. سيكو مشكلته انه جاء بعد موجي و الجماهير الى الان حاطه ببالها صفقات موجي الرهيبه اللي تباغتك .. خلال 24 سااعه يحسم الصفقه
البعض يعذر سيكو لان اليوفي عنده ازمه ماليه و البعض غير مقتنع بـ صفقات تمشيه حاال

لو تسألني يا ناصر عن الصفقات المرضيه اللي سواها سيكو من موسم 2006 الى الان اقولك 5 صفقات .. ( اماوري - سيسوكو - ياكوينتا - تياغو - بولسن )
طبعا 3 نجحوا و الباقي فشلوا مع الفريق .. بس اثناء اعلان الخبر و قبل ما يبداء الدوري كنت متوقع ان تياغو راح يكون من ابرز الللاعبين في اليوفي و نفس الحال لـ بولسن ... تياغو ما اخذ الفرصه الكامله و يوم اخذ الفرصه جته اصابه و بولسن الان عنده اصابه

لكن لما تنضر الى الصفقات الثانيه اعتبرها تمشيه حاال ابتداء من ميلبيرغ وصولا الى غريغيرا و نهايه بـ صالاحمديتش

بـ النسبه لـ رجعه المعاريين من الفريق
صحيح ان اللي رجعوا كانوا اضافات قويه لـ خطه رانييري و خصوصا ماركيزيو لكن اعتبر رجوع المعاريين امر سهل و ذلك لان اللاعبيين بـ الاصل هم من ملك الناادي .. انا ما اذكر ان فيه لاعب معار صارت عليه مشكله و مفوضات لـ الرجوع الى ناديه السابق الا كيليني يوم هو معار الى الفيولا فقط
الفريق وااضح وش ناقصه
خط الدفاع عندك يبيله شغل جاامد و سيكو طوال فتره الانتقالات يفاوض من هـ المحاور ...

[عاشق الميلانيتو]

من كلامك أشوف انه مميز جدا ،، من الصعوبة في أي نادي في العالم أن تضع لك فريقين بنفس المستوى لكن هذا حصل في اليوفي والدليل اصابة نجوم كبار ولم نشعر ( بوفون ، كامو ، تريزيجول ، نيدفيد ، زانيتي )

[أبوحمد _ Mi]

السلام عليكم ورده

يامال العافية ناصر على هالموضوع

أنا راح أضع ردي على طريقة النقاط ..

1- فكرة الفريقين بلاعبين نص توب هذي الصراحة فكرة خيالية ومجازفة نجحت بكل المقاييس في اليوفي وخصوصا في ظل كمية الاصابات اللي ابتلوا بها .. واللي ساعدهم على انشاء الفكرة هو حاجة النادي لفريق كامل جديد تقريبا .. لكن على حد علمي أن هالفكرة هي فكرة رانييري .. وهي تحسب لرانييري ..!!

2- باستثناء أماوري نوعية اللاعبين اللي جو لليوفي لا تحتاج لكثير من العناء لجلبهم للنادي .. فلاعب استون فيلا ولاعب اشبيلية مثلا لما تجيب لهم طاري اللعب بنادي مثل اليوفي اكيد بيخق تلقائيا << براا

اللي اقصده من هالنقطة ان نوعية اللاعبين اللي جابهم مب مقياس لنجاح مسؤول تعاقدات !!

وهالنوعية اللي عند اليوفي الان ماراح تتكرر او تستمر في المواسم القادمة .. إذ أن اليوفي في الصفقات القادمة ما راح يستبدل اي لاعب الا بلاعب اكبر منه فنيا .. لأن السبب اللي اجبر اليوفي على هالتعاقدات انتهى واصبح يملك فريق ينافس في الدوري .. (يعني منول محتاج اي لاعب اما من الان فصاعدا يحتاج الى لاعب يضيف للفريق) وهنا المحك !!

شاهدنا سيكو مع الونسو .. بالرغم من ان اللاعب صرح بانه يبي يطلع من الليفر لكن تصعبت الامور عليكم ..!!

أتمنى الفكرة وصلت


3- بالنسبة لإعادة المعارين .. أحس إنها ما تحتاج إلى شيخ يقرا !! هي فترة إعارة وانتهت ورجع اللاعب تلقائيا للفريق ولا اعلم كيف تحسب له


4- أختلف مع وجهة نظرك ناصر بخصوص بالادينو

الصراحة انا تابعت هاللاعب معكم في السيريا ب والصراحة يبي له وقت بس .. صدقني راح تتحسفون على بيع نصف العقد .. ولو ان لي من الامر شيء كان جبته للميلان << قريعان على غفلة

5- يحسب لسيكو جية اماوري لكم .. واللي ساعدكم اكثر سياسة زامباريني اللحجي مع لاعبيه - مسوي فنجر وهو من جنبها - وهي الاستفادة من اي لاعب مبدع وبيعه !! مثل ما شفنا توني و قروسو وثنائي الدفاع بارزالي و زاكاردو ..


بالنهاية وجهة نظري انه الى الان ما ينشد به الظهر ,ولا فيه ذاك الصفقة اللي تقول والله تستاهل الوقوف عندها , والله العالم انه فترة عقوبة موجي فقط همن يرجع لكم المحشش ويضبط وضعكم

إقتباس ( طلعت ياجو لانه مالعب نهائيا للفريق الاول )

تسان حطيته مع اللي ما ظهرت نتايجها

[V I E R I]

السلام عليكم ورحمة الله وبركاته :

اما بعد في اول مشاركة لي اتمنى التوفيق في عملية النقاش و احترام الرأي والرأي الاخر

الزبدة ..


اولا في بداية هولاء في اوروبا الشخص الطموح لا يقف في خانة واحدة على عكس هنا تموت ولا تصل ابدا اذ لم يكن واسطة عندك !!

لا تنسى مثلا مورينو بدأ مترجما ثم مساعد ثم واحد من ارقام الصعبة في عالم التدريب !!

اما بنسبة لــسيكو .... ما اعتقد اهل السيدة العجوز تغامر في بكيان من اجل ارضاء الاشخاص


و(سيكو ) استلم منصبه في اسوء الاوضاع اليوفي بتاريخه مع ذلك استطاع افلات بسرعة من سيريا بي

وعودة بمركز الثالث العام الماضي وهذا العام فاز على الريال مرتين و مركز الثاني بـ دوري وجود فريقين للمحافظة واستمرار في الفوز.


وكل ما ذكرته في التقريرك عن هذا الرجل يعمل بــ خفاة من اجل مصلحة الفريق

بصراحة انا اتفق معك تماما بسبب واحد هو انك ذكرت نجاحه بالارقام و اكيد هناك سلبيات

وصعبه ان تعدل خلال عامين قادمين

لانه اليوفي يحتاج اولا انهاء ازمة اصلاح الملعب و وصفقات الاعبين بدلاء للاعبين الكبار امثال : دل بيرو و نيدفيد

كلامي هذا ما يحتاجه ( سيكو) في المستقبل وقف زحف الاماراتي مان سيتي والحفاظ على النجوم


---

نهاية كلامي انا مشجع انتراوي لكن بكل صدق معجب جدا من سياسة اليوفي اعتبرها افضل سياسة ادراة في الكالشيو

في صناعة المواهب واستقطاب صفقات مربحة فنيااا

على عكس سياسة الميلان اعتماد على كبار السن ومربح المالي فقط

وسياسة موراتي اعتماد على اسماء و الاعبين الاجانب على حساب الطليان



شكرا

سكرو على طرح الموضوع اللي لفت انتباهي

[skroo]

السلام عليكم


زعلوهـ
رونالدو-7
iker
عاشق الميلانيتو


مشكورين على ردكم وعلى مساركم في نفس مساري
الله يعطيكم العافية




تورام & أبوحمد _ Mi

بلا شغل بنقالية تكفون
رجعة المعارين اللي ركزتو عليها مهي سواليف
شوفو المعارين وش كثرهم بالدوري الايطالي بعضهم اندفن وبعضهم طلع من الدوري بكبره
بس ترجيعة هالثلاثة من مخطط الادارة ,
والا ليه مارجعو كريشكيو والا زالايتا والا لانزامفي والا ميرانتي .... الخ
كل هذولا معارين لكن سيكو والادارة عرفو من يرجعون
اتمنى الفكرة وصلت لكم

* يا عبدالملك انت تقول اللاعب من يجي طاري اليوفي يطمر ويجي ؟ هالفكرة غلط لانك ماذقت الهبوط مثلنا

ليه طلعو كانافارو وابرا وهالشلة ؟ الا علشان دوري الابطال
وموسم السيريا B والعام الماضي اليوفي ماكان يلعب بدوري الابطال وهالشيء مخلي النجوم يغضون الطرف عن الانتقال لليوفي
شوفو رانييري قال قبل مباراة زينيت الافتتاحية ( ابلعب بدل بييرو وتريزقيه قدام لو ويش , صبرو سنتين لين رجعو لهالبطولة ومن واجبي العبهم غصبن عن الجميع )

وبخصوص الونسو فانت قلتها بنفسك , رانييري هو الكل بالكل باالانتقالات
ورانييري هو اللي رفض الونسو وفضل باولسن عليه لان الونسو ابطأ منه واقل دفاعية

ثانك يو اوول

[باندرو]

مشكلت سيكو ان اي نادي يدخل معه على لاعب يروح علينا
والدليل فلاميني اللي جت خيرة روحته للميلان
واللي يفقع الكبد فيه مسلسل التفاوض مثل مسلسل اماوري اللي ما بغا يخلص
لازم يجيب بيناير لاعب مكان نيدفد ويكون سوبر يا دييجو او الكرواتي اللي يلعب بتوتنهام نسيت اسمه
وبكذا راح يثبت للجمهور انه مو مظلوم....
مشكور اخوي على النقاش المميز.......

[سنآيدي]

أول شـي يعطيك آلعآفية صراحة موضوع منتاز ويستاهل المنآقشة

بصراحة سيكو آول موسم بآلسيريآ A كنـت حآقـد علية حتى بعض الآوقآت حسيت آنـة مندس خخخ

لكـن في موسـم 2008/09 آثبت سيكو آنة قد المسؤولية

خلونآ نشوف اللاعبين المصابين بآليوفي كلهم لآعبين كبآر ولهم ثقل بالفريق

لكن مع مرور الوقت نسينا اللاعبين المصآبين للآن يوجد بديل آفضل من آلمصآبين ومو كلهم بعضهم

عاد هالبدلاء كلهم جايين لليوفي السنة ذي اللي كان اعارة ورجعوة واللي تعاقدو معااة واللي واللي

كآن سيكو كان عارف من اللاعب اللي كان بيصيب عشآن كذآ جآب بدآلة خخخخ

بس بصراحة هالموسم اليوفي رغم الملعب الجديد والمشاكل لكنـة تعتبر سنة ذهبية من الدهاء والتكتيك

مشكلة سيكو أنة جاء بعد موجي ولا ننسى الادارة قبل ما تهبط للدرجة الثانية

كانت واحدة من اغنى نوادي آيطاليا كان عندها خير

عشآن كذآ موجي لو يطلب 40 مليون على لاعب كانت تتوفر لة بآرياحية

الميزة اللي تحسب لسيكو انة جاب لنآ كم لاعب ممتاز وبآسعار معقولة

وأتمنى من سيكو الاستمرار بالنادي للآنة آكتسب خبرة من الثلاث المواسم الماضية

بس اللي رفع ضغطي الموسم الماضي يوم كان تجديد عقد دل بيرو هبلو بدل بيرو تهبيل هههههه

لكن دل بيرو رمز من رموز اليوفي ولا كان قريب من ميلان

كل التوفيق لليوفي بآلمستقبل بآذن الله

ويعطيك العافية يا ناصر موضوع جاء في وقتة على فكرة انت ما ذكرت التعاقد مع سيسوكو

[روبين هود]

أتوقع انه ناد له مستقبل قووي وقوووي جدا

[hilalemooot]

.
.

السلام عليكم

هلا ومسهلا ناصر ياخي الموضوع هذا ببالي من زمان مو اني انزله لا بس معجب كثير بشغل اليوفي من بعد موجي والتطور الكبير اللي صار بعد فترة الهبوط الاظطراري للسيريا بي .. ابي نتخيل لو لحظة وحدة فريق عربي صار فيه اللي صار لليوفي ظنكم بيشتغلون ؟ .. لا والله ما ظنيت والامثلة كثيرة محلياً وعربياً

المهم .. اليوفي في السنتين الاخيرة تحديداً عاجبني بشكل كبير .. فيه لاعبين برزوا بشكل كبير .. شدني ماركيوني وماركيزيو وجيوفنكو وبديت اخق مع دي تشيلي بعد مباراة ميلن

بالنسبة لـ سيكو وحسب المعطيات اللي وضعتها الرجال ناجح بنسبة 100% .. حتى لو اختلفت وجهات النظر بس لما نتذكر ان الرجال كان دورة قبل ..يستقبل اللاعب لما يتبدل ويعطيه قارورة موية ويطبطب عليه ويعطيه الجاكيت .. ودورة الحالي اللي مطالب فيه انه يوفر لاعبين وحسب ميزانية محدودة .. بإختصار اشوف الرجال ناجح بنسبة 100%

الاختبار اللي راح يواجهه سيكو مطالب عشاق اليوفي بالعودة للاسكوديتو .. يعني ممكن جمهور اليوفي يرضى هالموسم بالمركز الثاني أو الثالث .. بس الموسم القادم ما راح يرضى بأقل من الاسكوديتو أو دوري الابطال .. كيف راح يكون تعامله مع هالمطالب بالاضافة إلى رانيري طبعاً

شكراً ناصر .. موضوع بيّن لي خفايا كثيرة كنت ادوّر عنها .. بس في ببالي سؤال .. اليوفي ما تحسون انه يعمل على طريقة ارسنال من ناحية منح فرصة اكبر للصغار والاعتماد على المواهب ؟ <---- سجل خروج

ناصر .. أنا أتعب .. بالحيل أتعب

.
.

[Carlitos 32]

روعة والله .. ونقاش جاء بـ وقته ..

سيكو .. شخصياً ما كنت أعرف عنه شيء قبل ما أدخل للموضوع

لكن من خلال ما قريت عنه هنا .. أرى إنه تطور كثير عن قبل ..!!

يمكن الوضع اللي هو فيه ما خدمه ووضعه في موضع صعب ..
خصوصاً إنه جاء بعد عصر حافل بالتعاقدات القوية لليوفي

إنك تساهم بـ جلب أماوري و ماننيجر وسيسوكو .. هذي تحسب لك بـ شكل كبير

وأعتقد لو كانت فيه أخطاء عليه تشفع له بعض تعاقداته بـ تلافيها ..!!

شخصياً كنت أستغرب من صفقات اليوفي قبل ..
خصوصاً إنها صفقات مالها صدى بالإعلام كبير ..!!

لكن رد علي أماوري وسيسوكو وماننيجر اللي أعجبوني كثير هالموسم ..

وأعتقد بولسن ماخدمته الفرصة عشان يثبت إماكانياته ولا الولد عنده إمكانيات كبيرة

أعتقد يحسب من الصفقات الناجحة لـ سيكو

مادري وش أقول بـ حقك يا سكرو .. لكن عوآآفي ع النقاش البطل .. ورده