[alhawey]

السلام عليكم,,


صبحكم/مساكم الله بالخير،،


الألف أجمّع من الحطب والقراطيس ، واشب ناري وانبسط والعن بليس.. ـــــــــــ>> هذا مدخل الموضوع. وراح يكون ثابت لجميع سواليفي القادمة..


يوم الخميس الفائت صحيت من النوم الساعه 2 الظهر ، غسلت وجهي وفرّشت أسناني وشربت حليب السعوديه قليل الدسم عشان الحموضه ( عندي ثلاجه بغرفتي مليانه حليب السعوديه وتفاح وفراوله وبرتقال وقرنبيط )..


المهم ما علينا من الكلام الفاضي ، بعد صلاة العصر جلست اتقهوى واسولف مع الوالده، ومن ضمن السواليف جبنا طاري واحد من خوالي ، وانه تغيّر وتعبت نفسيّته بعد ما تقاعد عن العمل:sad:


قالت لي الوالده: ما ودك نروح نسلم عليه مبطيه ما شفته؟؟ ، طبعا انا قلت لأ ., امزح عليكم أصلاً ما أقدر أقول لأ... ..


طلعنا لبيت خالي ، عاد الوالده تخاف من السياره خوف عظيم ، عشان كذا من تركب السيارة تبدا تقرا وتورد وواتسبديه

الحمد لله وصلنا بالسلامة لبيت الخال


فتح لنا الباب ولد خالي، دخلت الوالده عند الحريم ، ووقفت انا وولد خالي عند الباب ، عاد بدا يسولف علي من السواليف اللي تحوم التسبد وكل شوي يقول ورى ما تدخل نتقهوى..

مليت منه بسرعه وقلت له: انا عَجل ، رح شف خالي ودي اسلم عليه وامشي..

قال ابوي منسدح بحوش الرجال؟؟

استغربت!! منسدح بالحوش بهالحر والشموس!!! ..

دخلت البيت واتجهت لحوش الرجال ويوم وصلت شف منظر غرييييييييب

خالي ممد على الثيّل(الزرع) ولابس شووورت فقط وجسمه يلمع ويبلص

التفت على ولد خالي لقيته يضحك

اقتربت بهدوء الى خالي الممد والقيت عليه تحية السلام، احس بي وقال: هلا يالله حيوه.. وبدا يتبسم، ثم قال لولده رح جب لنا قهوه وشاهي..

وانا الى الآن مطيّر عيوني ولا ادري اضحك أو لأ..

كتمت الضحك واكتفيت بابتسامه وسألته: سلامات ياخال عسى منتب طايح من الجدار؟! وراك منسدح هنا؟؟

قال: جالس اتشمس !!!

وضحك وضحكت وضحك بصوت عالي وتشققت من الضحك ..

(واقول بيني وبين نفسي آآآبو التقاعد وما يسوي:sad: )

سألته: طيب وشّو له ؟ ووش اللي انت داهن نفسك فيه؟؟

قال هاليومين انا تعبان و يقولون الواحد اذا تشمس ينشط!!! ــــــــــــــــــــــ>> الله لايجزاه خير اللي لعب خالي أجل ينشط!!..

سألته مره ثانيه : وش اللي انت داهن نفسك فيه؟؟
.
.
.

....... ........

اخواني ، أخواتي ،، اعضاء منتدى المجلس العام، أيها الحشد الكريم ، ماراح تصدقون وش الاجابه ، ولا راح اقولها لكم لانها شينه بحق خالي وشينه بحق شمّر كلهم وتعتبر فضيحة للعائله ، ولو قلتها ماراح احد يزوجني مادام هذي فعايل خالي

واتحدى اي واحد منكم يجيب الجواب


الذنب الذي اقترفه خالي انه تقاعد عن العمل:sad: ..

ابوي ، خالي ، وكل المتقاعدين عن العمل يعيشون فراغ وروتين ممل ، عشان كذا نقلى أحدهم عصبي وحار وما غير يراقب الرايح والجاي وينتقد ويهوش والثاني محبط وماله خلق :sad: لا يسولف ولا يروح ولا يجي

والله ما الومهم..

مع من يسولفون ؟؟، مع البزارين اللي كل سواليفهم عن الجوال والبلوتوث واللاب توب!!

ولاّ مع اللي يقالهم رجال وكل سواليفهم عن الاسهم واسعار النفط!!

وين يروحون؟؟؟ للملاهي!! أو حديقة الحيوانات!!:sad: أو يتمشون بالمملكه والفيصليه اللي أشغلونا بهن

قبل فتره رحت للكويت وشفت في أحد مناطقهم مكان أعجبني جدااا ، المكان عبارة عن بيت من دور واحد سقفه عالي وشكله ملفت للنظر وابوابه مفتوحه، سألت الي معي( وهو من أهل الديره) ، وش هالبيت؟؟

قال هذي ديوانيه يجتمعون فيه كبار السن.. ، ودك ندخلها ونسلم عليهم ونتقهوى؟ قلت له مهيب شينه

دخلنا ، والله العظيم ياجماعه المكان يفتح النفس ، مجلس كبير ، وصالة طعام ، وتكرمون دورات مياه ، وفيه خدم على كيف كيفيك لو تبي يحكّون راسك ...

قال لي واحد من العيال انه فيه بأحد احياء شرق الرياض مكان مثل هذا يجتمع فيه الجيران..

ياليت أشوف مثل هالمجالس منتشره عندنا كان أقل شي ما ألقى خالي يتشمس




،،تــــــــحــــــيـــــــــــاتــــيـــــــ ،،


كثّروا لي من نوعية ع ع ق تراي أحبهن

[abu_riman]

شكراً لك ،،،

أعتقد أن هناك دراسة في وزارة الشئون الاجتماعية بخصوص تخصيص أماكن في الأحياء بحيث تكون فرصة للالتقاء بين المواطنين و هناك بدائل أيضاً تدرس كالاستفادة من المساجد ، أعتقد أيضاً أنه قد تم عرض الدراسة على وزارة الداخلية لأخذ مرئياتها و قد تحفظت خوفاً من استخدام مثل هذه الأماكن لأغراض أخرى و ضرورة المتابعة الدائمة لها .

نتمنى الانتهاء من الدراسة و الوصول إلى التوصيات الأفضل في أسرع وقت ممكن .

فيما يخص المتقاعدين نعم هناك مشكلة كبيرة و قد تصل لحد الظاهرة قريباً ما لم يتم تداركها و هي الآن غير محسوسة لأن هناك من الجيل الأول فئة ما زالت على رأس العمل فلم يمر الجميع بهذه المرحلة .

يجب أن تكون هناك توعية من الجهات المختصة و يمكن رعايتها من قبل المؤسسة العامة لمعاشات التقاعد و المؤسسة العامة للتأمينات الاجتماعية .

على المتقاعد أن يبدأ في التخطيط لمرحلة ما بعد التقاعد قبل تركه للعمل بمدة لا تقل عن سنتين بحال من الأحوال .

[كان هنا]

والله في بعض المتقاعدين عندهم مخ <<<لاتزعل يا صاحب الموضوع ...

يعني الواحد لما يتقاعد على الاقل يفتح له دكيكين صغير يقضي فيه وقته ...احسن من الجلسة وضيقة الخلق

[الهارف]

تحية طيبة ..

سيدي الفاضل تلك ما نسميه بالديوانيات أو ( المجالس ) و هي موجودة في كل حي و حارة و كل بيت و ليست حكراً على الكبار بل حتى الصغار فمجالس الرجال ما هي إلا مدراس و ليست فقط مكان لتمضية وقت فراغ ...

وهي للتواصل الاجتماعي و تعزز من التماسك فيما بين الجيران و خلق روح المحبة و الاحترام المتبادل ليست فقط للأقارب ومكان جيد لتكوين العلاقات و هي صفة ستجدها لدى مجتمعات متفتحة و ليست مغلقة على نفسها تجد لديها دائما ذلك ( الوصي ) ..متى تحرر المجتمع من القيود و تلك الدراسات ستجدها قد برزت إلى السطح .

فيما يتعلق بالمتقاعدين أنا أتفق مع أخي أبو ( ريمان ) فتلك مشكلة أزلية و كأنه كتاب وضع على الرف بعد الاستفادة منه و لا يوجد علاج بحسب ما أرى سو إيجاد عمل آخر ولو بسيط حتى يعود النهر لمجراه و التدفق بلا توقف ..

تحياتي لك

الهارف

[هلالي الظهران]

هلا فيك اخوي الاولاني ..


هدي اعصابك يا الهاوي مدري وشوله دايم اقرا يوزرك الاولاني .. من جد ما ادري ليه .. بس والله والنعم فيك والنعم بشمر ,,


هذا ثاني موضوع لك ارد عليه والمشكله يا انك تتكلم عن الاطفال ولا الشيبان .. ياخي ماعندكم وسط انتوا .. انا مثل ماقلتلك اول البكر بين اخواني ومابيني وبين الوالد الله يطول بعمره فرق كبير وعاده يتمشى في الاربعينات يعني هالحاله ما اشوفهاواجد ,,


فكرة الديوانيات قمة في الروعه .. وبالمناسبه عندنا هنا بالظهران ديوانيتين اشوفها من بره .. وحده بحي الدوحه والثانيه بحي الدانه .. وحسب ما اسمع انها ملتقى لكبار السن وغيرهم يوميا وسمعتها جدا ممتازه ..
لكن انك تعممها في الرياض صعبه شوي .. هنا الظهران كلها حي الدوحه وحي الدانه وارامكو والجامعه بس ,,


الله يطول باعمار ابوانا واميماتنا والله يعينكم على استقعادهم وتدقيقهم ,,


سلام يا الهاوي ,,

[سوسوالهلاليه]

والله اني خايفه على ابوي من التقاعد!!
من ذحين نفكر شانسوي له لا تقاعد

[الهنوووف]

الله يعين خالك وامثاله

حالتهم صعبة

ماجربت انااا هالحالة ابووي توه كبر ابو الظهراني او اصغر شووي

ماحطوو لنا شي يحطون للشيبااااااااااااان

ياليل ماطولك


يسلموووو خيووو على طرحك الذي يناقش قضايا الامة

[سندريلا الهلال]

كــبار الســن!!!!!!!!!

بصراحه كلمة مقصرين في حقهم قليله ان حنا نقولها !!!

بجد كبير السن وين يروح !!!!

كبار السن من المعروف ان نظام حياتهم مايختلف خصوصا في مواعيد النوم ينامون بدري ويقومون بدري يعني اوقاتهم طويله وتكون ممله وروتين مايتغير!!!

احنا ليش نشوف لانفسنا احنا من الممكن يتغير نظام نومنا كل يوم ونقدر نغير في برامجنا مره نطلع مشوار ومره نزور اصدقاء ومره يكون عندنا اجتماع في اي مكان واحيانا نسافر ونستمتع في اشياء كثيره حتى لو كنا في البيت حتى اغلب برامج التلفزيون موجه لنا من رياضه ومسابقات ومسلسلات وبرامج ترفيهيه !!

بس كبار السن ولاشي!!!

محدوده هي برامجهم وقليله هي فرص زياراتهم مع انه كبار الا انهم لايملكون قراراهم!!

المفروض بصراحه في كل حي ديوانيه كبيره يجتمع فيها كبار السن ويدمجون معهم بعض الشباب حتى كبار السن ينبسطون وهم يشوفون اهتمام الشباب فيهم ويحسون بالتفافهم حولهم ويقدرون ياخذون ويعطون معهم والشباب اذا تفاعلم مع كبار السن راح يحسون كبار السن بقيمتهم وان فيه احد قاعد يقدّرهم ويشعر فيهم

المفروض يكون هناك اماكن ترفيهيه لكبار السن احنا نعرف ان كبار السن اغلبهم يحب الشعر والالغاز وسواليف أول القديمه ويحبون اي شي من التراث يذكرهم بماضيهم اللي يعز عليهم ويحبونه المفروض هناك بما يسمى بالجنادريه المصغره مفتوحه طوال السنه يزورها كبار السن ويستمتعون فيها ويجددون فيها كل ذكرياتهم مع اصدقاء لهم

يعني لما نتكلم من اليوم الى اخر يوم راح نظل مقصرين في حق أروع فئة من فئات مجتمعنا فئة غاليه مافيه احد زي غلاوتهم لانهم فعلا رمز لاي شي حلو فيهم طيبه وحب للخير وتواضع وايثار وكرم وصبر فيهم معاني كلنا نحبها ونتمناها

ان شاء الله ربي يسخّر لهم من يتولى الاهتمام فيهم والتفكير لهم وان شاء الله اي شخص منا عنده كبير في السن في البيت يبداء فيه ويحاول يكون هو بحد ذاته وسيلة ترفيه من خلال جلوسه واستماعه االانصات له والاعجاب بكل مايعمل ويتفوه به

الله لايحرمنا منهم ويطول في اعمارهم ويرزقنا البّر فيهم ويحنن قلوبنا عليهم والله يقدرنا على رد لو ربع الجميل اللي قدموه في حياة اصعب من حياتنا الان

الله يعطيك العافيه

[alhawey]

هلا،،

ّّّّّّّّّّّّّّّ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
abu_riman...

العفو ،،

إقتباس أعتقد أن هناك دراسة في وزارة الشئون الاجتماعية بخصوص تخصيص أماكن في الأحياء بحيث تكون فرصة للالتقاء بين المواطنين و هناك بدائل أيضاً تدرس كالاستفادة من المساجد

اعتقد ان مجرد التفكير في وضع دراسه لها سيجعل الموضوع يكبر ويتشعب وتتداخل فيه الجهات الحكوميه مثل البلديات ووزارة الاوقاف والشؤون الاسلامية ، ومثل ماذكرت انت وزارة الداخليه ، هذا غير ان الدراسة سوف تستغرق على الاقل 5 سنوات للانتهاء ، بعدها 5 سنوات اخرى تتنقل فوق الرفوف الى ان تصل للارشيف..
وبحكم اني عملت بمجال الدراسات والتصاميم في أحد الوزارات، أقدر اقول لك ان واقع الدراسات عندنا(في الوزارت) هو قتل للمشروع ، فاذا اردت قتل اي فكره او مشروع فما عليك سوى ان تذهب لأحد الوزارات وتقول لهم اعملوا لنا دراسه..
مشاريع زي هذي محتاجه شخص يكون على قناعة بها وبنفس الوقت قادر على تبسيط وتسهيل خروج الامر السامي;)

إقتباس يجب أن تكون هناك توعية من الجهات المختصة و يمكن رعايتها من قبل المؤسسة العامة لمعاشات التقاعد و المؤسسة العامة للتأمينات الاجتماعية .

صدقت ، دائما أتسائل : ما الذي قدمته مصلحة المعاشات والتقاعد للمتقاعدين؟؟ الجواب نقلاً عن الوالد: زي قلتهم..


شكرا لمشاركتك واضافتك

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

عبود البطل

إقتباس والله في بعض المتقاعدين عندهم مخ

لا ياعبود الله يهديك ، على العموم لازم نحترمهم ونقدرهم ، والله انهم هم الخير والبركه ، تستفيد من خبرتهم وتجربتهم بهالدنيا وتتعلم منهم الصبر وعلوم الرجال، واذا كان فيهم عصبيه أو أطباع شينه فلابد اننا نلقى لهم عذر..


شكرا لك

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

الهارف

ياهلا فيك،،

إقتباس سيدي الفاضل تلك ما نسميه بالديوانيات أو ( المجالس ) و هي موجودة في كل حي و حارة و كل بيت و ليست حكراً على الكبار بل حتى الصغار فمجالس الرجال ما هي إلا مدراس و ليست فقط مكان لتمضية وقت فراغ

اخوي انا اتكلم عن الديوانيات اللي تكون بالحاره ومتاحه لجميع كبار السن وخاصة بهم في المقام الاول..
نعم لا أريد ان يشاركهم بها الصغار، فقد يكون من اسباب الضيقه والكدر التي يعانون منها هو مشاهدتهم واحتكاكهم مع الصغار ، وصدقني ان هذا واقع..
لا تطالبهم بالمزيد فقد أدوا ما عليهم وجاء الوقت الذي يستحقون فيه راحتهم ويمضون وقت فراغهم بعيدا عن المثاليات وتربية الابناء..

إقتباس وهي للتواصل الاجتماعي و تعزز من التماسك فيما بين الجيران و خلق روح المحبة و الاحترام المتبادل ليست فقط للأقارب ومكان جيد لتكوين العلاقات و هي صفة ستجدها لدى مجتمعات متفتحة و ليست مغلقة على نفسها

صدقت، والفوائد التي تعود عليهم من هذه المجالس كثيرة ولكني أركز على التسليه والترفيه عن النفس..
وفعلا مثل ما ذكرت، مشكلة مجتمعنا في الوقت الحاضر الانغلاق في الجانب الاجتماعي..


ولك تحياتي،،

شكرا لمشاركتك واضافتك

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
هلالي الظهران

ياهلا والله ومرحبا..

إقتباس هلا فيك اخوي الاولاني ..

جرررح تااااااااني هوّا ألبي لسّا طاب من الاولاني...

إقتباس هدي اعصابك يا الهاوي مدري وشوله دايم اقرا يوزرك الاولاني

ولا يهمك خلاص انت تمون ولو تبي تقرا اليوزر حقي.. حمود.. عاااااادي خذ راحتك يابعدي

إقتباس هذا ثاني موضوع لك ارد عليه والمشكله يا انك تتكلم عن الاطفال ولا الشيبان .. ياخي ماعندكم وسط انتوا

ماشاء الله عليك يافتى رحيمه قصدي ياولد الظهران ملاحظتك في محلها ، الوسط هذولا موجودين لكن أمورهم الحمد لله ماشيه وما يحتاج نسولف عنهم، وبعدين انت وش اللي حارق رزك

إقتباس انا مثل ماقلتلك اول البكر بين اخواني ومابيني وبين الوالد الله يطول بعمره فرق كبير وعاده يتمشى في الاربعينات

ماشاء الله ابوك توّه شباب مثل ابوي الله يطول اعمارهم على طاعته ، وبعدين من قدك أنت البكر ابوك منوّل يعطيك 5 ريال فسحه واخوانك على ريالين..

إقتباس وبالمناسبه عندنا هنا بالظهران ديوانيتين اشوفها من بره .. وحده بحي الدوحه والثانيه بحي الدانه .. وحسب ما اسمع انها ملتقى لكبار السن وغيرهم يوميا وسمعتها جدا ممتازه

والله ياخي هذي شي يفرّح ومادام انها وصلت الظهران، اجل انشاء الله بتجينا للرياض بس بالقطار:sad:

إقتباس لكن انك تعممها في الرياض صعبه شوي .. هنا الظهران كلها حي الدوحه وحي الدانه وارامكو والجامعه بس

اللي خلى الرياض فيه 100 ألف مسجد يقدر يخلي فيه 100 ديوانيه، مع فارق المكانه بين المسجد والديوانيه ولكن كلاهما يعتبر مشروع، وتكلفت الديوانيه راح تكون أقل من المسجد، ولاّ انا غلطان

إقتباس سلام يا الهاوي

لالالا ما اصدق شي حلو حقيقه الـ هـ ا و ي ... واضح انك متدرب عليه واااجد

تشكرااتي لك


~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ابرجع لباقي الردود باذن الله،،


،،تحياتي للجميع،،

[الفيروسه الزرقاء]

هلا بـ alhawey 11 .

أوهايو غوزايماس .

إقتباس الألف أجمّع من الحطب والقراطيس ، واشب ناري وانبسط والعن بليس.. ـــــــــــ>> هذا مدخل الموضوع. وراح يكون ثابت لجميع سواليفي القادمة..

أحلىىىى موب هين بيخليه مدخل لكل مواضيعه
طب أفرض أحنا ملينا من هـ المدخل ونبغاك تغيره ! بـ تغيره وإلا بـ تجلس عليه

إقتباس ( عندي ثلاجه بغرفتي مليانه حليب السعوديه وتفاح وفراوله وبرتقال وقرنبيط )..

لأ الرجال موب هين مسوي فيها صحي ويشرب حليب وعصير
ليه مـ تحط فيها شوكلاتات وبيبسي تراها احلى من هـ العصيرات

ع فكره يـ معلم ، قرنبيط شنو ؟!

إقتباس المهم ما علينا من الكلام الفاضي ،

فيه أحد يسب نفسه ويقول ع كلامه فاضي
دامه فاضي خله مليان ----->> مرووقه هـ البنت

إقتباس طلعنا لبيت خالي ، عاد الوالده تخاف من السياره خوف عظيم ، عشان كذا من تركب السيارة تبدا تقرا وتورد وواتسبديه

لووووووووووووووو ووووووووووووووووول
يـ حليلها أمك تذكرني بـ جدتي الله يطول بـ عمرها ويخليها لنا ويخلي امك لك

جدتي إذا ركبت معها بـ السيارة أكره نفسي .. طول مـ أحنا بـ السيارة حاطه يدها ع وتقبصني
أقولها يمه تعوريني :sad: ، ولاتعبرني تصارخ ع هـ السواق وتدعي لـ هالشباب بالهدايه والله يحفظه لاهله .

إقتباس اقتربت بهدوء الى خالي الممد والقيت عليه تحية السلام، احس بي وقال: هلا يالله حيوه.. وبدا يتبسم، ثم قال لولده رح جب لنا قهوه وشاهي..

لأ لأ لأ لأ أنا قايله أنك مـ أنت هين
أجل أقتربت والقيت عليه وأحس بي ولاتهون وبدأ يبتسم

إقتباس قال: جالس اتشمس !!!

موووووووب هين يتشمس .

إقتباس اخواني ، أخواتي ،، اعضاء منتدى المجلس العام، أيها الحشد الكريم ، ماراح تصدقون وش الاجابه ، ولا راح اقولها لكم لانها شينه بحق خالي وشينه بحق شمّر كلهم وتعتبر فضيحة للعائله ، ولو قلتها ماراح احد يزوجني مادام هذي فعايل خالي

لأ لأ لأ طلبتك قلها ، دهن بـ وش

إقتباس واتحدى اي واحد منكم يجيب الجواب

أمممممممممممممممم
طب سهل علينا وقلنا له مواصفاته
هو كريم وإلا زيت وإلا وش موقعه من الإعراب .

إقتباس ابوي ، خالي ، وكل المتقاعدين عن العمل يعيشون فراغ وروتين ممل ، عشان كذا نقلى أحدهم عصبي وحار وما غير يراقب الرايح والجاي وينتقد ويهوش والثاني محبط وماله خلق لا يسولف ولا يروح ولا يجي

الله يكون بـ عونهم ويعظم أجرهم ، من جد رحمتهم .
تعااااااال وش معنى كلمة نقلى ، ليه هم بطاطس علشان تقلونهم

إقتباس ياليت أشوف مثل هالمجالس منتشره عندنا كان أقل شي ما ألقى خالي يتشمس

إن شاء الله تشوفها .

إقتباس كثّروا لي من نوعية ع ع ق تراي أحبهن

لووووووووووو ووووووووووووووووووول
يـ حليلك ، إلا ذكرتني بـ البارق :sad:
يـ حليله هو اللي مألف ع ع ق
عاد أتحداك تجيب كلمات هـ الإختصار





صن كيو .









الفيروسه الزرقاء

[alhawey]

مرحبا،،

`~~~~~~~~~~~~~~~~~~~~~~~~~~~~~~~~~~~~~~~~~~

سوسوالهلاليه..

إقتباس والله اني خايفه على ابوي من التقاعد!! من ذحين نفكر شانسوي له لا تقاعد

الله يطوّل بعمره على طاعته ويخليه لكم..

استفيدوا من تجارب غيركم ، ومن وجهة نظري أفضل طريقة للتعامل مع المتقاعد هي بكل بساطة:
اتركوه على كيفه

استغرب بعض الناس يسوي نفسه وصي على ابوه، كل شوي يقوله ليش ما تشتغل وليش ماتروح وليش ما تسافر؟!!!
ياجماعة صدقوني الطريقة هذا لايمكن تنفع مع غالبية كبار السن ، فهو لا يتقبل ان يوجهه أحد ابنائه..


شكرا لك،،

`~~~~~~~~~~~~~~~~~~~~~~~~~~~~~~~~~~~~~~~~~~

الهنوووف...

إقتباس ماجربت انااا هالحالة ابووي توه كبر ابو الظهراني او اصغر شووي

ماشاء الله ، الله يخليه لك ، بس أهم شي لا يصير منوّل يعطيك 5 ريال للفسحة زي ابو الظهراني

إقتباس ماحطوو لنا شي يحطون للشيبااااااااااااان

صدقتِ ، بس حنا نقدر نوسع صدورنا بطريقتنا ، لكن هم لا حول لهم ولا قوه..


الله يسلمك وااله يخلف على هالامة وقضاياها


`~~~~~~~~~~~~~~~~~~~~~~~~~~~~~~~~~~~~~~~~~~

سندريلا الهلال

إقتباس بصراحه كلمة مقصرين في حقهم قليله ان حنا نقولها !!!

صدقتِ، واكبر جوانب التقصير عندنا هو عدم احترامهم واعطائهم منزلتهم وقدرهم اللي يستحقونه بعد عناء السنوات اللي عاشوها..

إقتباس المفروض يكون هناك اماكن ترفيهيه لكبار السن احنا نعرف ان كبار السن اغلبهم يحب الشعر والالغاز وسواليف أول القديمه ويحبون اي شي من التراث يذكرهم بماضيهم اللي يعز عليهم ويحبونه المفروض هناك بما يسمى بالجنادريه المصغره مفتوحه طوال السنه يزورها كبار السن ويستمتعون فيها ويجددون فيها كل ذكرياتهم مع اصدقاء لهم

كلامك جميل اختي، وياليت نشوف جنادريه مصغره مثل ما قلتِ ، واذكر ان الوالد اذا راح للجنادريه ينبسط ويقعد له يومين يسولف عن الاشياء القديمه اللي شافها..

إقتباس ان شاء الله ربي يسخّر لهم من يتولى الاهتمام فيهم والتفكير لهم وان شاء الله اي شخص منا عنده كبير في السن في البيت يبداء فيه ويحاول يكون هو بحد ذاته وسيلة ترفيه من خلال جلوسه واستماعه االانصات له والاعجاب بكل مايعمل ويتفوه به

آآمين، وفعلاً لازم نكون أول ناس نهتم فيهم عن طريق احترامنا لهم ولمجلسهم ولا يكون اهتمامنا بهم مجرد وصاية عليهم.


الله يعافيك وشكرا لاضافتك،،

`~~~~~~~~~~~~~~~~~~~~~~~~~~~~~~~~~~~~~~~~~~

،،تحياتي للجميع،،

[alhawey]

ياهلا والله بالفيروسه الزرقاء

أول شي آآآسف كنت جالس اكتب الرد بفس وقت ردك ولا شفته .....مي خالف آسف

إقتباس أوهايو غوزايماس

لاحول ولا قوة الا بالله العظيم قضينا من اريجاتو طلعت لنا ذي؟!!
بس على العموم اقرب ما لها انها اسم مدرب اسبانيا بس وش دخله بسواليفي؟؟ الا كان هو تقاعد..

إقتباس طب أفرض أحنا ملينا من هـ المدخل ونبغاك تغيره ! بـ تغيره وإلا بـ تجلس عليه

والله يا انتِ مشكله بعد الحين يوم ما حطيت مدخل أشغلتينا ، ويوم اجتهدت وبحثت وسألت الوالده عن أفضل المداخل وجبت هالمدخل قلتي متى تغيّره؟!!
الفيروسه الله يرحم والديك وش المطلوب مني بالضبط:sad:

إقتباس ليه مـ تحط فيها شوكلاتات وبيبسي تراها احلى من هـ العصيرات

ابوي يعيّي على الببسي ، ودايم يقول لي : لا يا ابني الصغير المملوح لاتأكل من الشكولاته فانها تدمر اسنانك

إقتباس ع فكره يـ معلم ، قرنبيط شنو

فضيحتك بجلاجل يالفيروسه ما تعرفين القرنبيط!! ، لا وتتكلمين بعد عن الطبخ شكلك ما تدرين وين مطبخ بيتكم ، روحي اسألي الوالده ، بس سوي لها مقدمات عشان ما تنصدم وتغسل ايدها منك

إقتباس جدتي إذا ركبت معها بـ السيارة أكره نفسي .. طول مـ أحنا بـ السيارة حاطه يدها ع وتقبصني أقولها يمه تعوريني

راكبين قطار الموت

إقتباس لأ لأ لأ طلبتك قلها ، دهن بـ وش

والله يالفيروسه عزيزه و غاليه، لكن انا رجال مقبل على زواج ، ولا عندي استعداد اهدم عش الزوجية بكلمه

إقتباس طب سهل علينا وقلنا له مواصفاته هو كريم وإلا زيت وإلا وش موقعه من الإعراب .

اللي رافع ضغطي وجارح مشاعري انه لا هوب كريم ولا زيت وانما شي يوضع مع...... الله لايعاقبنا..

إقتباس تعااااااال وش معنى كلمة نقلى ، ليه هم بطاطس علشان تقلونهم

هههههه
اعن ابو دارك عشره ردوا قبلك وكلهم زحلقوا هالكلمه الا انتِ!!!، ماشاء الله عليك داخله للموضوع ومعك منقاش

إقتباس إلا ذكرتني بـ البارق يـ حليله هو اللي مألف ع ع ق

الله يعظم أجره ويكون بعونه انشاء الله، والصراحه استحيت اسأله عن معناها لكن ابعرفه بالقريب العاجل السريع..

الفيروسه عندي لك عرض:

اذا قلتي لي وش معنى ع ع ق ، ومعنى أوهايو غوزايماس ، وتعّهدتِ أمام الله انك تعلميني جميع معاني الكلمات الجديده اللي ما ادري منين تجيبينها..
فانني انا الهاوي ورقم بطاقتي 11 سوف اخبرك بماذا تدهن خالي

هـــــــــــــــــاه وش قلتي؟؟ فكري بالعرض واستخيري الله..



ول كوم اني تايم

ولك تحياتي وعَرضي القائم حتى يقضي الله امرا

[نـــــــ15ــــــمر]

بس خالك هذا تحفه
اشوى ان ابوي ما وصل مواصيله
ابوي الله يهديه بعد ما تقاعد صار انواع الاستقعاد وين رايح وين جاي وش عندك وش ما عندك اسقعاااااااااااااااااد
بس صار حبيب ينرحم
اخوي انا ودي يكون مثل ما قلت ادوارتخصص للمتقاعدين والله حتى الشباب بيروحون ويتكون فيها
والله ان جيت للحق يا زين تكيه الشيبان والله انها فله واحلى شيء اذا جو يتكلمون عن شبابهم
والله تحس انهم كانو دشير يا حليلهم بس

تشــــــــــــــــــــــــــــــــــــــــــــــــــــــــــــــــاو

[مانشستراوي-10]

مشكور

[الكناري الأزرق]

الـحـين كـل هـالتعـاطف مـع كـبار الـسن و الشـباب كـل مكان يـلقونـه للعوايـل ,,, !! ,,,

على العموم فكرة البيت اللي فيه الكبارة حلوة ,,, !! ,,,

اتمنى تطبيقها بالسعودية ,,, !! ,,,

<== هـذا المستخدم ذهـب الى الصلاة ,,, !! ,,,