رحلة سياحية في عالم الناس
[ALIGN=CENTER]
السلام عليكم ورحمة الله وبركاته
موضوعي هو عن الناس في مجتمعنا
من الذي تغير بهم
هم ام الدنيا
خل نبحر في عالم الناس ونشوف من الي تغير
وأسمحو لي بأن اكتب باسلوب العامية فهو محبب الي
8888888888888888
يقول الشاعر
تقولون دنيانا علينا تغيرة $$$$ تغيرتوا انتم ماعرفتوا غيورها
الأيام هي الأيام مازاد عدها $$$$ هذه لياليها وهذه أشهورها
القصيده هذه له فوق 100 سنة
ولكن لاباس نبحر مع الناس ونشوف مين الي تغير
سأروي بعض القصص التي حدثة لي
يقول المثل
لولا المربي ما عرفت أربي
اذآ الوالدين لهم دور في شخصية الأبناء
نبداء بالقصص
رحت يوم من الأيام الى الحلاق ،،،، وأذكر ليلة عيد رمضان
لقيت المكان مليان من اللي يبون يحلقون!!!
جلست وخذيت لي مجلة تاريخه منتهي له 5 سنوات
الوكاد قمت أقلب بالمجلة والا أسمع واحد يحاكي الحلاق الهندي
يقوله قص لي فرنسي !!!!!!!
عمره حوالي 11 او 12 وخويه على الكرسي الثاني يقوله
ياقديم كبوريا أحسن !!!!!!!
الوكاد مادري وش سوى الحلاق بس الي شفته هامة الواحد كومة شعر
واللي حول الأذان مابه أبد أبد !!!!!!
قلت بخاطري هذولا صغار الحين يخانقونهم أهلهم ويرجعون يحلقون الكومه
شوي ويقول واحد معه بنيته قل حلقه ولادي فرنسي !!!!
حسبنا الله ونعم الوكيل
وشوي يقوم واحد هو وولده
قال الولد : شل من هنا وخل الي هنا وقص هنا وابي زلف
قلت أكيد أبوه أصقه
اثاري الحلاق عارف للدب الي اسمه ابو !!!!
يوم مغط شعر الأبو لين طلع شيب راسه !!!
قلت لا والله الا ماله رقعه !!!!!!
بس قلت هذولاء صنف من البشر
به غيرهم ،،، لاتحكم بسرعة
*********************
قلت نروح للشباب الفتوه خل نعوم وسط اوكارهم وافكارهم
أذكر أيام الدراسة بالجامعة بحايل كلمونا شباب من الرياض
قالوا المغرب رحلتنا تاصل حايل,,,
أنقسمنا ناس يرحون يجهزون الخيمة والقهوه والعشاء
وناس يحترونهم بالمطار ,,,
الوكاد رحت انا وواحد الله يذكره بالخير للبر نجهز المخيم
قالوا معك فلان يابوسليمان !!!!
قلت بخاطري انالله وش ابيبه هذا ؟؟ أخض له رضاعه !!
يدرس بالمتوسط !! وش تتوقعون منه
المهم رحنا لمحل جنوب حايل يقاله أضلضل
وصلنا بعد المغرب
قال وين تبينا نصير !! قلت أبعد عن الشعيب لأنا وقت مطر
وبالمربعانية ،،، خلك بالرفاع هذا00
نزلنا بالظلمة العفش !!
فرشنا الخيمة 5 × 7 عامودين
وانا بصراحة الي معي كسر مجاديفي !!
بس يوم سمعة ضربه للوتد والتفت عليه
لا والله عاصب شماغه على راسه وبيده هاك الصفاة
الي لو يتجمعون بعضهم ماشالوه
يوم والله طاب خاطري ,,, رفعنا خيمتنا وفرشناه
قال / عزوتي أبي أروح أروي ماء
والله وزينت الوجار وشبيت النار على أقبالته ,, ويجلس هاك
اللية ملازم الوجاربريق رايح ودلة جاية000
قلت بعدي ,, هذا والله الي يبيض الوجه
بالمقابل
أذكر أني لقيت ناس تالي الليل يأشرون لي على الطريق
وقفت لاهم شابين من شباب المستقبل !!!!
سلام ,, عليكم السلام
نزلت سلامات
قالوا لا والله التاير
قلت وش به؟
قلوا نسم !!
قلت بخاطري لا والله الا انتم المنسمين
قلت افتح الشنطه
ويفتحه بقرف
قلت يامل الموليه هذه الستبنه وراكم ماتغيرون المنسم !!!!
قال الراكب ناقصين وسخ
قلت وغيره !! وش المطلوب
قالوا وصلنا معاك لأقرب بنشري يجي يغيره !!!!
قلت انشاءالله
انا عندي بنشري ابي ارسله لكم بس لا تتحركون من مكانكم
لين يجيكم!!
ورحت بين ضاحك وباكي !!!!
والثانية الي أقشر منه
صار لي قصة من شباب من أهل حدى الديار!!!!!
وأنا بالشرقية ,, رايح للهاف مون
ومريت الخبر ابي لي حاجة
يوم جانن واحد من الأجواد
قال لي ظرفه هو والي معه
وسويت مثل مايسوي الناس
وروحو لأهلهم
وبعد فتره رجعو لي مسيرين
والله أستضفتهم بالمزرعة وأستانسنا
يوم جاء المسراء ,, ودعونا ومشو
وكان معي خوي لي دوسري الله يذكره بالخير
وجلسنا عند نويرتنا نــتعلل ونقصد لبعض
والله يوم راح نصف ساعة من ممشاهم
الا صوت البواري ططططططططططاط طاط طااااط
طلعت من الخيمة وأشوف صوب الصوت الا به نور سيارة يشر
الفلشر
الوكاد قلت لخوي بروح أشوف من هذا
رحت ولا ربعي الي عندي مشوين
غاطسين لهم بصبخا
سلامات يالربع
ويوق السواق من الدريشه
قال شوفت عينك
قلت الحين أجيكم
رحت جبت الحبال والمرابيع وسيارتي جيب نص
والدوسري معه جمس دفرنشين
جينا وربطنا حبالنا وهم بسارتهم جالسين
وانا مستحي توي مضيفهم
حاولنا كم مره،،،، بس ماطلعت السيارة
قلت للدوسري كود نرفعه بالعفريته ونحط المرابيع حدر التواير
قال بصرك ،،، وهم بالسيارة!!!!!!!!
برد وشلتا وحنا وسط مستنقع ماء وطين
قلت أفتح الشنطه نبي العفريته
قال لا تكفى ابوسليمان تتوسخ !!!!
أنا ولد أبوي00
الحين حنا بوسط الطين ولاهمك
وحديده خايف عليه تتوسخ
وأنتم ليه ماتنزلون
قال الكبير منهم
أخاف تتوسخ الجزمه (( الله يكرمكم ))
ويوم قفلت معي
وأنا أخذ ملي يديني من الطين
وأفتح البيبان عليهم
وأمسح الطين بوجيههم
قوموا يامل الموليه لهشوارب
الحين انا والدوسري فطيس عندكم
الوكاد نزلوا وياليتهم مانزلوا
رفعنا السيارة وحطينا المرابيع
والله والله يالربع
ان بعضهم ماخلص من لبس اكياس البلاستك برجلينه
قالي الدوسري شف وش يسون
صراحه موقف يضحك ويزعل
كلن معه كيس بلاستك يلبسه
عشان ماتتوسخ الجزمه (( أكرمك الله ))
طلع موترهم وراحو بسلامتهم
وتقولن دنيانا علينا تغيرة *** تغيرتوا انتم ماعرفتوا غيورها
وللموضع تكمله بأذن الله[/ALIGN]  | 