سبني يا موقرم .. سبني يا متوحش .. لأة .. لأة .. اااااااه .. !!
بســم اللــه الرحمــن الرحيــم
حيالله الجميع .. حيالله كل(ن) باسمه ..
صنت إنسان همجي من الطراز الرفيع . مدلّع من قبل أبوه دلع(ن) زايد . إنسان نصاب . واللي يقهرني فيه أنه معجب بنفسه إعجاب الله لا يوريكم . يشوف في نفسه انه هو أفضل شاب في الحارة . مع أنه ما فيه شي يفتح النفس . أكثر كلمة في لغتنا العربية تثير إشمئزازه هي كلمة (( نظام )) . إنسان متابع للأفلام المصرية بشكل أقدر أسميه (( إدمان )) . الصدز انه مبهذل بـ أميمته وأبيّه . لاهو اللي يشوف وش يبي ابوه عشان يعاونه ولا هو اللي بار(ن) بـ أميمته هالعجيّز الضعيّفة . وش أقولكم بس . هالادمي حتى حارته ما سلمت من شرّه . خلوني أقولكم سالفته ذاك اليوم . في ذيك العصرية طلع صنت من بيتهم متجه للملعب اللي ورا بيتهم طبعاً رايحن بالثوب واذا لعب يلعب حافي مستحيل يلبس جزم (( أعزكم الله )) لأن حضرته ما يرتاح بـ الترنق (( لبس الرياضة )) . وصل للملعب والشباب صار لهم نص ساعة يلعبون (( السلام عليكم .. يالله يا شبااااااااااب من يبيني أطب معه ؟ )) .. جا له منيف وهو الحكم وقتها (( وعليكم السلام .. يالله حيّه .. والله يا صنت العذر والسموحة ألحين لنا نص ساعة نلعب .. ولا نقدر نفرقك .. بكرة ان شاء الله نشوفك )) .. (( وشو .. وشو ؟؟ منتب ملعبني ؟؟ .. ألا بـ ألعب وغصب(ن) عنك )) .. (( طب وشف وش بيجيك ؟؟ )) .. المهم ويطب صنت الملعب ويجيه منيف (( يا صنت .. احترم نفسك واطلع احسن لك .. وخل هالعصرية تمر على خير )) .. (( خخخخخخخخ .. خفت يالذروق .. وين كلامك قبل شوي ؟؟ )) .. منيف ما تحمل كلامه . راح وخنقه . وكف من صنت . ورجفة من منيف . في النهاية الشباب فكوهم . على أن الاثنين عيال حارة وعيب انهم يتطاقون . وراحت ذيك العصرية نكد في نكد ويالله انهم تراضو هالاثنين . وصنت وسيع الوجه قبل لا يمشي التفت عليهم وقال (( لو ما جا من هالعصر .. ألا أني خربت عليكم يالزلايب ههههههههههههه )) . الشباب خلّوه لإنهم عارفين أنه إنسان ما ينعطى وجه وتبون الصدز مهوب رايقين له . مشى صنت وإعجابه بنفسه يزيد وخصوصاً بعد سالفة منيف والعيال . لانه خرّب اللعب عليهم ولا واحد تكلّم . وما أخفيكم أنه حس بـ أن له هيبة أكثر من قبل . وهذي هي حياة صنت . من جرف لـ دحديره . المشاكل عادة أقدر أصنفها عادة يومية . وابوه ما عمره تكلّم عليه بـ كلمة بـ زعمه أن الدنيا راح تعلّمه وبأكثر دقة مدلعه و أمه عجوز لا لها ولا عليها . ما غير هالرادو يرنع عندها والشيء الوحيد اللي ممكن تطلبه هو حجر الرادو . يا حبني لها إنسانة قنوعة بشكل غريب . المهم صنت وللأسف أنه ما يحترم أهله لإنهم معطينه وجه وهذي مشكلة الدلع الزايد .
(( سبني يا موقرم .. سبني يا متوحش .. لأة .. لأة .. اااااااه )) خخخخخخخخخخخخ 8 8 8 هذا صنت الله يخلف عليه قاعد يتابع فلم مصري 
صنت إنسان من كثر إعجابه بنفسه كل ما جلس عند واحد يسوي دعاية عن نفسه . ذاك اليوم قاعد(ن) مع صويلح ويقوله (( تصدق يا صويلح ان حارة شايع طالبيني ألعب معهم في فريقهم )) وهالنصاب أصلاًهو قليل يلعب واذا لعب يلعب عشان يخرب على الشباب وبرضوه اذا لعب يلعب بثوب وطبعاً صويلح يمشّي له نصباته لأنه عارفه ومعطيه جوّه . وذاك اليوم يقول لـ عايض (( تصدق يا عايض أني ماخذ شهادة شكر وتقدير من إدارة المدرسة )) وهالنصاب قاعد في الابتدائي عشر سنوات والمتوسطة ست سنوات والثانوية ست سنوات . يعني عشرات سنوات ساقط وطبعاً برضوه عايض معيّش صنت جوّه ومخليّه ينصّب على راحته . المراد . والأسوء من هذا كلّه ان صنت يعتقد أن الشباب اللي يسولف عليهم مصدقينه . وهذا اللي يدفعه للتوغل في عالم النصب . عموماً .. مثل ما قلت لكم . صنت مدمن أفلام مصرية وما أخفيكم أن هالأفلام لها تأثير عليه . ومن الاشياء اللي لاحظتها عليه أنه صار بخيل بقوة ولا فيه أمل يدفع ريال واحد وصار كل ما سمع عن واحد شرى له شي يردد جملته (( يا حبه للتبذير .. المفروض انه يحفظ قرشه الأبيض ليومه الأسود 
)) . وذاك اليوم شاف له فلم فيه واحد(ن) يصّيد طيور . وتمسك مع صنت أن يصّيد مع العلم أنه ما يعرف يمسك البندق . عموماً ويتسلل ذيك العصرية لـ غرفة أبوه ويسرق البندق (( نوعها .. شوزن )) ويطلع لمزرعة ابو سليمان . وصل للمزرعة وللمعلومية ابو سليمان شايب اربع وعشرين ساعة في هالمرزعة لا يروح ولا يجي . جا صنت ودخل المزرعة ولا أحم ولا دستور . وابو سليمان جالس في الدكّة ألا ويسمع صوت رمي . استغرب ابو سليمان من هالصوت وما توقع أن صنت جاي بالبندق لعلمه التام ان صنت ما يدري وشو الصيد . راح للنخل . والشيخ صنت يرمي على عماه ومرة طايح(ن) عسيب نخلة ومرة طايح(ن) عذق تمر يعني العربي ابو الشباب فسّد مرزعة هالشايب . ابو سليمان شايب ما هنا ذاك النشاط . قعد يصّوت (( صنت .. صنت )) بعد نص ساعة تقريباً .. طلع له صنت (( هلا ابو سليمان .. اخبارك ؟ )) .. (( بخير وانا عمك .. وبعدين ياصنت ليش ترمي بهالبندق في نخلي ؟ ما تدري أن هالبندق تدمر النخل الله يهديك )) .. (( وش دعوة .. يابو سليمان .. وانا جاي ادمر نخلك .. انا جاي أصيد طيور )) .. مع العلم ان صنت كان يشوف الفساد اللي سواه لكن رده لـ ابو سليمان كان تهرب . المهم .. انتهى الحوار بجملة من ابو سليمان اللي هي (( الله يهديك بس .. وسلمني على ابوك )) . وصنت بدون مبالاة مشى من المزرعة و لا كأنه مسوي شي . في صلاة العشاء جا ابو سليمان وكلم ابو صنت وعلمه عن اللي سواه صنت في المزرعة . وكالعادة راح ابو صنت للبيت ولا قال لـ صنت شي وصنت اصلاً مهوب يم ابوه ابو الشباب لاهي مع روتانا سينما كالعادة . وتمر الايام . ومهازل صنت تزود وكل يوم يفاجأ الحارة بمشكلة جديدة . مرة أحرق عداد كهرب الحارة و مرة طاق(ن) له واحد .. إلخ . والجيران تبون الصدز ملّو منه وطبايعه . وفي قرارة أنفسهم أنهم سكتوا بما فيه الكفاية . العيال اللي يلعبون في الملعب يشتكون منه لإن يجي ويخرب و ابو سليمان متوذي منه بسبب هواية الصيد اللي طلعت فجأة . وكثير من الجيران يعانون منه واعذروني ما اقدر اسرد سوالفهم لاني لو بأقولكم كل السوالف سواها صنت ان كان طالبت ادارة المنتدى يحطون لي منتدى لحالي من كثر سواياه . لكن هذا ما يهم . واللي يهمني هو ليش استمر صنت في سوالفه هذي ؟؟ الجواب ببساطة لانه ما لقى أحد يردعه . المهم الحارة قرروا بالاجماع انهم يروحون لـ ابو صنت ويقدمون شكوى جماعية . قلطوا عند ابو صنت . علموه بـ سوالف ولده . و أصلاً ابو صنت يعرف كل اللي قالوه ضيوفه لكن زيارة شياب الحارة صار لها وقع بقلبه . طلعوا الجماعة من عندهم وبعدها حس أنه كان مدلّع ولده فعلاً . وبالفعل تغيرت معاملة ابو صنت لولده وأول إجراء سواه .. شال التلفزيون من غرفة ولده ومسح قناة روتانا من تلفزيون الصالة . ما ودي اكذب عليكم وأقولكم أن صنت عقل مرة وحدة . لكن اللي أقدر أقوله انه تحسن . وصار يحس ان وراه أبو لما يغلط راح يعاقبه . أبشركم ألحين صنت أفضل من قبل وان شاء الله أن راح يتحسن .. دعواتكم يا شباب ..
@@ بالمنقــاش @@
** في السابق ..نقلت مباراة للهلال لـ أجل كلمة خرجت من (( فئة بسيطة )) من عشاق الزعيم وهي بالفعل خطأ ولا أنكر ذلك ولكن الغريب في الامر أن التصرفات المحسوسة لا يتبعها عقاب والتصرفات (( الصوتية )) أصبحت جريمة لابد من تسليط الضوء عليها .
** أحداث هوليوودية عشناها في المواسم السابقة . فـ قبيل فترة الكل شاهد ذاك المشجع البريء وهو يعكّر صفوة الهواء الطلق بـ دخان (( المعسّل )) الذي أحظره معه لمدرجات الملعب . وهذه مشكلة كبيرة و المؤسف في الموضوع أن عشاق العالمي يحاولون تعتيم ما جرا . والعقوبة ما هي ؟ هي الصمت
** تتكرر المهازل .. مروراً بالعروض الليزية من قبل الجماهير العالمية . فعلاً أمر يثير الإستغراب . شعاع ليزري يسلط على أعين نجومنا ولجنة الإنضباط لا تحرك ساكناً . مالذي حدث بعد أول مساندة ليزرية بدون وجود عقوبة ؟ تتكرر العمليات الليزرية بشراهة والمعنين بالامر يرفعون راية الصمت .
** (( احفظ طرطعانك الأبيض ليومك الأسود )) جملة رددها عشاق العالمي وفعلاً طبقوها في مباراة الإتفاق الماضية وحتى هذه اللحظة لم نسمع ري اكشن . هل سنسمع القرار الرادع ؟؟ لا تلوموني يا سادة فكثرة المساس تفقد الإحساس . وكثرة مساسي بـ تجاهل اللجنة المعنية لما يحدث من تصرفات همجية .. أفقدني إستشعار عظمة الخطأ المرتكب .
** صنت .. إنسان همجي بشكل غريب واستمراره في تصرفاته الهمجية يعود لعدم وجود الرادع . الجمهور الشمسي وضعه مشابه لـ صنت فـ عدم وجود الرادع لهم أصبحوا يتفنون في تطبيق المخالفات ..
** أبا صنت .. كان في غفلة .. عندما كان يتجاهل (( ضرورة )) عقاب أبنه . و اللجنة المعنية وضعها مشابه أيضاً لوضع أبا صنت . فقد كانت في سبات عميق (( قد يكون .. نوم مقصود )) . عندما تجاهلت ما مضى . ولكن .. هل سيستمر الصمت المثير ؟؟ أم سنسمع ما يسمى مجازاً عقوبة أم ستكون هناك عقوبة فعلية ؟ وما أصعب الإختيار الاخير .
** أبا صنت .. راجع حساباته .. بعد زيارة أعيان الحارة له . هو كان يعلم ما كان يفعله أبنه . ولكن تلك الزيارة لها تأثيرها . الجمهور السعودي وضعه مثل أعيان الحارة . و وحدوا أصواتهم من أجل المطالبة بالمساواة . ولكن هل اللجنة المعنية ستفعل مثل ما فعل أبا صنت ؟؟ أتمنى ذلك .
** أبا صنت صادر التلفاز من غرفة ابنه و حذف قناة روتانا سينما من تلفاز الصالة . وهذا كان أقوى إجراء فعله أبا صنت . السؤال هل لجنة الإنضباط ستعزل العالمي عن شمسه بوجه الحق ؟ لست انا من يطالب بذلك .. بل الحياد نفسه هو من يتحدث عني .
.
.
.
يالجنة الإنضباط
يسلم عليكم صنت ويقول (( نعنبوا بليسكم .. أبوي هالشايب وعاقبني وانتم إلى ألحين ما عاقبتم الجمهور الشمسي َ!! ))
.
.
.
إنتهــى
.
.
نيوتن
