بسم الله الرحمن الرحيم

السلام عليكم .. و كل عشر أواخر و صيامكم و قيامكم و دعواتكم مقبولة بإذن الله ..

طبعاً كثير منكم ما يعرفني ، و يمكن لهذا السبب كثير حتى ما يركز بكلامي لأني أعرف نظام المنتديات و كيف تجاهل صاحب المشاركات الأقل ..

عموماً ، أنا متابع أكثر من إني مشارك ، و السبب إن الموجودين فيهم الخير و البركة ، و السبب الأهم إني أتابع المواضيع و الاب توب على بطني و أنا منسدح قبل أنام علشان كذا أكون عجزان أكتب lol

السبب إني كتبت الكلام اللي فوق علشان يكون البعض بالصورة ليش سويت موضوع ، و يمكن هذي أول مره أسوي فيها موضوع ..

و موضوعي يا سادة هو عن الأمير عبد الله بن مساعد ، رئيس ملف الإستثمار بنادي الهلال ، و كيف إننا الآن أمام خياران لا ثالث لما:

الأول / نترك الرجال في حاله ، يدبر شؤون الإستثمار في النادي كما يرى .
الثاني / نذبحه ، لأننا بإختصار ما نقدر نعفيه من منصبه بعد ما صفقنا كثير بعد ما إستلمه ، يعني عيب ، نذبحه أهون من إننا نعفيه..
و لا من شاف و لا من دري .

لكن ..
عزيز العضو - أكيد الحين طايره عيونك - قبل ما تختار و تصوت على الخيار الأول أو الثاني ، يجب عليك المرور على النقاط التالية:

1) الأمير عبد الله بن مساعد كان رئيساً للهلال في يوم ما ، و حقق نتائج رائعة .
2) الأمير عبد الله بن مساعد رئيس مجلس إدارة شركة عملاقة بالإضافة إلى إستثماراته في عدة شركات .
3) الأمير عبد الله بن مساعد مع أخيه الأمير عبد الرحمن بن مساعد سبق له التكفل بحفل إعتزال النجمين يوسف الثنيان و سامي الجابر ، و كان الحفلان على أعلى مستوى .
4) الأمير عبد الله بن مساعد كان له مواقف مشهودة على الصعيد الشخصي و العملي ، لا أحبذ ذكرها و ذلك لأنها خيرية أكثر من أن تكون إستثمارية . لذلك فهي من العبد لربه .. عسى ربي أن يقبلها .


طيب ، الحين يا أخي القارئ ، و بعد أن اطلعت على هذه النقاط ، أتمنى منك الإجابه على الأسئلة التالية:

سـ1: هل ترى أن هناك شخص ما هو أجدر من الأمير عبد الله بن مساعد ليقود دفة الإستثمار ؟
سـ2: هل ترى أن الأعضاء ( أبو 3000 مشاركة كلها " تسلم على موضوعك " .. و " يا روحي يا سلاحف النينجا " ) له الأحقيه أن يوجه الأمير عبد الله بن مساعد كيف يدير دفة الإستثمار ؟
سـ3: هل أنت تقرأ هذا الموضوع بأحد الفترات التالية ( قبل السحور بقليل - بعد السحور بقليل - قبل الفطور بقليل - بعد الفطور بقليل ) ؟
إذا كانت إجابتك بنعم على السؤال الأخير ، سكر الموضوع من الحين ، و بعدين إرجع إقراه ..

الآن .. نرجع للخيارين اللي بديت بهم الموضوع ، نقتل الأمير ، و إلا نتركه يشوف شغله ؟
إذا كانت إجاباتك على الأسئلة بـ"نعم" ، كذا نقتل الأمير .
و إذا كانت إجاباتك بـ"لا" ، أحب أقول لك ليه أجل ما تتركون سوالف ( أنا أحرص واحد بالعالم على النادي ) و تتركون الأمير يشوف شغله ؟


خلاصه:

طقت كبودنا من كثر ما نشوف مواضيع فارغه من ناس ما عندهم ما عند جدتي تتكلم عن عقد الهلال و موبايلي !
يا إخوان ، محد منكم يعرف كيف يدير إستثمار النادي و دفة الحوار مع الشركات الإستثمارية ، لذلك و الله عيب ، و أكبر عيب نجي نقول مثل ذا العبارة اللي و الله لو أعرف صاحبها كان دعسته بالسيارة ( عبد الله بن مساعد ، إختار ، إما الفلوس و إما جماهير الهلال ) .. و الا اللي يقول أصلا موبايلي أحسن شي و إلا الإتصالات مدري وش فيها ..

مثل ما تبون الإدارة ما تتدخل في شغل المدرب ، إنتم لا تتدخلون في شغل الإدارة ! .. مو أنا و إلا إنت يجي يعلم عبد الله بن مساعد و إلا غيره وش شغله .. اللي قاهرني إني اللي مسوين ضجه هم أكثر الناس جهلاً و حتى تشوف مليون خطأ إملائي في مواضيعهم ، و بالنسبة لي أضحك من باب " شر البلية ما يضحك " .. و أتمنى من المشرفين إنهم يكونون أكثر حزم مع المواضيع اللي أحيانا تكون فيها تصغير لشخصيات هلالية بقصد أو بغير قصد .

كلمة أخيرة:
أنا ما عمري قابلت عبد الله بن مساعد ، بالنسبه لي هو رجل له معزه من معزة ال سعود أولاً ، و من معزة الهلال ثانياً .. و هذا مو دفاع عنه ، هذا أدب ، لا أكثر و لا أقل ..

و لكم مني أصدق الدعوات .