السلام عليكم ورحمة الله وبركاته

كيف حالكم أعزائي الزعماء


من البارح وانا بحشوتي كلمتين ناقره بحلقي تبي تطلع تطلع وفيه شيء ناشبلها تقل نقطة تفتيش مايخليها تعدي كل ماتبغا تعدي يقولها الرخصة والإستماره تطلع الرخصه والإستماره ويطالع فيها بالمقلوب يقول على جنب على جنب .

تبون الصراحه لازم تنتقد بموضوعيه ولانكتفي بأن نقول حوربنا وحسب وكأن الحرب التي وجدها الهلال هي الوحيده التي تسببت بضياع بطولتين ..

نعم هاجمونا وقصفونا قصف غير عادي أولئك الاشخاص الذين لايحملون ذرة من الحياديه وإن قالو انهم حياديون ولكن ليس كذلك وكلنا نعرف ذلك سواء من مكافئة الإتحاد الأخيره التي أسماها كوزمين : مزحه وهي كذلك .

خلوكم من مسلسل ظلم الهلال فنحن تابعناه وكلنا نعرفه وشاهدنا ه بدون فواصل اعلانيه ونشكر على هالمسلسل فيصل عبدالهادي اللي ماقصر في اخراج الحلقات بشكل جيد .

ودي اشوف حاجه كويسه بهالفيصل زي مايشوفونها بعض الناس في الإتحاد السعودي ماني قادر ... >>>>> لاتكذب انت حاقد يابو عبدالله على فيصل


والله ان عندي احساس غريب انه بيجي يوم بتجي فضيحه على مستوى وموثقه توثيق مايخرش المويه لفيصل عبدالهادي وجلساته مع الشيخ معصور << ماقصد احد


طيب طيب خلوكم من هالكلام الهلال نعم ظلم ظلم ومن يقول غير ذلك هذا يبيلك تشيله وتودي جنب تلفزيون وتشغل قناة العربية وتخليه يتفرج ابرك له اما يطب علينا بالرياضه مايمديها بالمره .

اذا ماناسبته العربيه سبايس تون يمدحونها فيها هاليومين : كابتن ماجد اش زينه زيناه يومين لين يوصل هالكابتن للباب وبعد اليومين يصفقبها بالعارضه .


تعالو معاي اخواني الكرام لنناقش بواقعيه وبعيدا عن الفلسفه وبعيدا عن الاقنعه ونتسائل :

هل كان الهلال مقنعا هذا الموسم بشكل عام بنتائجه ومستواه وليس بطولاته ؟

طبعا بالبطولات لاحد يقولي ماهو مقتنع ثنتين في ظل هالظلم اعتقد كفايه .

موضوع الرئيس لاتشيلو همه كثير في الهلال اي رئيس بيجي بيقود الهلال زين وبيحقق بطولات ولو انا جيت ورأست الهلال بحقق خمس بطولات في سنتين حتى لو مابراسي فكر إداري مابالكم اذا كان المرشحين بعقلية وفكر بندر بن محمد وعبدالرحمن بن مساعد .


تعالو معاي لكوزمين بس ياليت المتهورين حقون البارح ينتحون جانبا واقصد الناس اللي حنا فايزين يمدحون حنا خسرانين يسبون .

ليه ياجماعه صرنا كذا لازم نتعلم انه اذا بننتقد لازم نبي الانتقاد على اساس والنقد له اسس معينه وضوابط معينه مو بس نقد ويالله السلام اهم شيء فرغت عن اللي بداخلي


كوزمين وبناء على مقاييس عامه نستطيع القول انه مطلب من مطالبنا لقيادة الزعيم الموسم القادم ولكن هذه المطالبه والتي اراها انا وليس بالضروره ان تروها عاد كل واحد له رأيه .

لكن هذا لايمنع من ان نعترف ان كوزمين يعاني من عيوب واخطاء فادحه ولو ذكرت لكم منها القديم قد لاتتذكروا بالشكل المطلوب ولكن تعالو معي لمباراتي الإتحاد الاخيره
التي لا ادري هل كوزمين كان جاد في قيادة الأزرق فنيا فيها ام انه يحسبها مزحه ودخل على انها مزحه دون ان يراعي اسم الهلال .

لاتقولو اللي راح راح والله لو بنفكر كذا ماظنيت ان الهلال بيحقق بطوله لازم نناقش اخطاء المدرب واللاعبين والاداره تناقش اخطائها واللي يحب النادي وشعار الهلال فيه جد مو مجرد كلام انا هلالي بيعرف ان النقد البناء ضرورة ملحه واللي يبي يقعد يضحك على نفسه ويدعي المثاليه الزائده بيظل كذا طول عمره .

كوزمين وانا ذكرت اكثر من مره انه اكتشاف اكثر من لاعب شيء طيب بس له اثر سلبي بيهدم كل الإيجابيات والدليل هذا هو عبدالعزيز الكلثم كيف كان اول ماجا والحين كيف صار نفسيا تعب الولد ذا وقسم بالله لو كوزمين عطاه الثقه وماقعد يجرب كل شوي لاعب كان عبدالعزيز صار شكل ثاني .

هذا مجرد مثال نفس الشيء يحسب ضده انه كاد يقتل موهبه عبدالعزيز الدوسري عندما اقحمه بمباراه اكبر من عبدالعزيز وانا على المستوى الشخصي ارى ان عبدالعزيز لو بعدنا عن المدح الزائد له بيصير افضل من الشلهوب بكثير وقد يعيد لنا بعض من لمحات ابو يعقوب وان كانت قناعتي الخاصه أن ابو يعقوب لو نقعد ندور ندور احنا وكل الأنديه خمسين سنه قدام نبي نجيب واحد بإمكانياته ماظنيت بنحصل لأنه لاعب نادر وعملاق ذهبت به السنين ولن يعود .

عموما هذا ليس شيء من الممكن بجلسه نوضح هالأخطاء لكوزمين بس الأخطاء الفادحه زي البارح انا من وجهة نظري الخاصه اول مره اشوف مستوى بهذا الشكل من فتره طويله بصراحه كان لاعب قتالي وروح عاليه ونشاط لا ادري كيف ولماذ رماه كوزمين ليله البارح على الطرف اليمين ثم لماذ شاف ان نواف مانفع بالطرف اليمين قام وطلعه .

ماهي الإضافه التي قدمها فهد المبارك واين الكلثم ياسيد كوزمين ؟

ليليو امبيلي انت جايبه مهاجم ولا لاعب نص أول خمس او عشر دقائق اللي يشوفه ليليو يقول هذا لاعب نص بس الظاهر ان ياسر سنعه ودجر على غلطة كوزمين بعد كذا .

محمد الشلهوب الذي احبه واقدره وتقديري لهذا الشخص لايعني بأي حال ان اجامله كان من المفترض ليله البارح ان يكون أول خيارات التبديلات الكوزمنيه فمحمد بعيد تماما عن مستواه الحقيقي .


طيب ابي اعرف الزوري البارح بعد ماخرج المفرج وش صار دوره

اعتقد عرفتوه .. طيب وش سويت تكتيكيا ياكوزمين .. وش التغييرات اللي سويتها .


عبدالعزيز الخثران لاعب حركي درجه أولى ونشيط وفعال وماشاء الله عليه وش حاطه بالدكه والله مدري ....

طيب انت خسران بواحد ولا اربعه عشان تلعب بمهاجم واحد ليه مالعبت بمهاجمين اثنين ولا بتنتظر لين الشوط الثاني اظن كوزمين نسي ان الشوط الثاني كله خمس واربعين دقيقه .


عموما هناك الكثير من الملاحظات على كوزمين لكني ذكرت منها الأمور البسيطه فقط ولكي تكون الصوره واضحه امامكم .


طيب وش رايك نطرده

ماقلت كذا ولكن من أول الموسم واحنا نقول ناقشوه ناقشوه ماحد يسمع الكلام ...


على صعيد اللاعبين للأمانه هناك لاعبين للأمانه هم مجتهدين ونحن نقدر الاجتهاد بس لامكان للمجتهدين بالتشكيل الأساسي للهلال .

تدرون وش اللي يضحك اننا ننتقد لاعبين بدون اسس فنيه واذا لعبو كان لهم رد قاسي علينا ولا هذا فهد المفرج ياكثر مانتقدوه بعض الناس حتى يوم جددو له في ناس قامت ثورتها تقل مجددين مع السواق حقنا .

صدقوني قناعتي بفهد المفرج ستبقى انه افضل من ماجد المرشدي بكثير وان كان كل لاعب له مميزات وله عيوب تختلف بين هذا وذاك . والإثنين كلهم عينان في رأس واحده واحنا معاهم قلبا وقالبا .

طيب الحين من تقصد بالمجتهد

على بلاطه انا حاط نقرتي من نقرة خالد العنقري ولا ادري وش الشي اللي عاجب كوزمين فيه ياناس انا هاللاعب ماني مقتنع فيه لأسباب معينه وليس هو الوحيد فيه معاه كم واحد .

عدم اقتناعي فيهم لايعني عدم تقديري لهم كلهم رجال ونعم فيهم وكلهم على رأسي وعلى عيني بس في الكوره ماعندي يمه ارحميني الشيء اللي مقتنع فيه بقوله ولاعلي من احد ...

طيب العنقري يمرر سليم .. ( لا )

يستلم صح ( لا )

يغطي صح ( لا )

يعرض صح ( لا )

طيب وش الله حادنا ياجماعه هالأمور لو بنكرز فيها زين بنشيل سلطان البرقان ونصفه معاه وغيرهم من اللاعبين اللي محتاجين نتخلى عن مجاملتهم على حساب الهلال .


على صعيد المحترفين هذا عندكم ليليو لا شوف رقعته السنه الجايه الله يستر علينا وعليه ومابينا وبينه الا الدعوات الصالحه والله يوفقه وين ماحل .

تبون لاعبين مهاجمين ؟

ايو والله محتاجين مهاجم

طيب لاسمع واحد يقول يبي سعد الحارثي هذا مأذينا بالمنتخب ورافعلي ضغط بالمنتخب تبون اطالع فيه مرتين لا واللي يرحم والديكم مره وحده مع انجوس اللي نهايته كنها قربت ويارب تقرب تكفي .

دوروا كان قدرتم بأمين الشرميطي وان كان ناديه ماظنيت بيفرط فيه وغيره من اللاعبين المميزين .


ولاتنسون تعوضونا واحد بدال تفاريس اللي ماظنيت اننا بنقدر نعوضه بسهوله وإن عوضناه روحو قلبو الدفاتر وشوفو كم خسرنا من الأموال عشان نعوضه


عموما ابنهي احس اني غثيتكم وطولت عليكم بكره ولا عقبه بكمل اللي بقي في موضوع جديد بس في النهايه بقول والله والله والله والله والله اني من حبي للأزرق كتبت ماكتبت وحب الازرق يفرض علي ان اكتب ماكتبت فدموعي تسقط كالصبيان عندما ارى الهلال بحال ليس بأحسن حال ...



تصبحون على حب الهلال وتمسون على حب الهلال