ffice
ffice" /> { الشــايب والعـجوز } هذي الفقره بالذات – ركزوا عليها. أحياناً يقودك الملل – للفرفره بالسياره مع الشباب ( مره بالاسبوع مو دايماً زي بعض ناس ) .. فلا أماكن زي البشر ، ولا إهتمام بأوضاع الشباب اللذين يقال عنهم بأنهم ( العمود الفقري لأية أمة ) .. هل تصدقون ذلك .؟ 
فمن شارع لشارع ومن مقهى لمطعم وعلى هالحال .. ترد احياناً لجوالات البعض منا اتصالات غير متوقعه على الإطلاق .. فإن كان المُتصل صديقاً فتجد البشاشه والإبتسامه العريضه ترتسم على وجه – مُستقبل المكالمه ، بينما إن جاء الإتصال من والده أو والدته فتجد التذمر والإنزعاج وضيقه الخلق .. وماهو وقته ابد ..!! والله يجزاه خير مستقبل المكالمه .. يبادر بأسلوب لطيف جداً : معليش ياشباب رجعوني البيت ( العجوز ) تبي السوق مدري شعندها ..! يردون عاد الشباب راعين الواجب / يوووه الله يعينك على قلق السوق والزحمه عاد اليوم خميس! هذا ماحصل مؤخراً أمام ناظري .. وأجزم تماماً بأنه يحدث بشكل يومي معكم.
عاد نرجع لذاك الشخص الله يجزاه خير . . يطلب الرجوع للبيت لكي يوصل أمه .. لكنه يخرّبها بترديد ( مصطلح العجوز ) وكأنها زوجه جاره او إمرأه من إحدى دور العجزه وليست ( والدته التي رعته منذ كان طفلاً حتى اصبح شاباً عرض بطول ) .. !
هو صحيح يروح يوصلها لمشاويرها على – مضض .. ويخدمها يمكن .. لكنه يذكرني ببعض مايجري ( في بعض الدول العربيه ) .. تشوف الشخص يحضر لصلاة الجمعه من الساعه التـاسعه صباحاً كأول الحاضرين ، ويقرأ قرآن بسكينه ووقار .. ويدعوا الله عز وجل ويستغفر ربه لحين الصلاه .. وما أن تنقضي الجمعه حتى يذهب يتعبّد حول القبور ويطوف عليها ..!! ويخرّب أجر جمعته كاملاً.
كمّل جميلك .. ونادها ( بأمي او الوالده على الأقل ) مو العجوز .. ألهذه الدرجه – هانت عليك من قال عنها رسول الله عليه الصلاه والسلام بأن الجنه تحت اقدامها .. !؟؟ وبأن رضاها ورضى والدك من رضى الله عز وجل .؟
ليتها وقفت على الأم مصطلح ( العجوز ) .. حتى بعض آبائنا صرنا نطلق عليهم وصف ( الشايب ) ، أنا اشوفها والله قمه – الإستحقار والدناءه بحق آبائنا وأمهاتنا .. ويصل الأمر حتى بحفظ أسمائهم بجوالاتنا / الشايب والعجوز .. !
الشايب ............. يتصل بك.!
العجوز ............. تتصل بك.!
لاتصرحون بأسماء امهاتكم .. وبدل من القول / معليش ياشباب أمي جواهر بنت فلان الفلاني إتصلت وتبيني اوصلها السوق ..! مانطلب هالشيء .. لكن على الاقل احترمها وقول ( الوالده او أمي ) ولاحظوا إني ما أردفت اوصاف كالغـاليـه او تـاج راسي او خلافه.
صحيح كثير من كبار السن .. يسألون ويدققون وفي اوقات قد لاتكون مناسبه لنا نحن الشباب .. لكن والله ليس هناك أجمل من الكلمه الطيبه وسعه البال ، فأبوك او أمك من بلغوا الخمسينيات من العمر او اكبر ، هل تتوقع ان يكون مستوى ذكائهم واستيعابهم بمثل مستواك يالفاهم؟؟. أكيد لا
الإنسان كل مايكبر كل ماصار ينسى أكثر .. مايستوعب بسرعه .. يتحوّل كما الاطفال ، بالسياسه والتفاهم وعدم رفع الصوت .. والوضوح في الكلمات والعبارات ، كلها طرق تجعل علاقتنا مع آبائنا وامهاتنا لحظات – عســــــــــــــل.
قولوا آمين / الله يطوّل بأعمارهم يارب .. ويرحم الموتى منهم.
يتبع.
