مشاهدة مشاركة بصفحة مستقلة
  #1  
قديم 06/03/2008, 06:43 PM
مغاط مغاط غير متواجد حالياً
الكاتب الساخر
تاريخ التسجيل: 19/06/2006
المكان: Najd
مشاركات: 1,022
Cool مواقفي مع نهائيات الهلال .. ( عطسة في وجه التاريخ)

تلبية لطلبات بعض الاعضاء العزيزين على قلبي .. ومن باب تغيير جو التوتر العام ..
وبإذن الله تصير ضكتنا ضحكتين بانتصار الزعيم بكرة .. وتحقيق البطولة الغالية ..



نهائي السوبر الاسيوي ( نص رمضان 1421) .. قدام شيميزو الياباني :

ما كنت في الرياض بذاك الوقت .. وكان فيه واحد من العيال توه طاق هايلوكس غمارة ..وفيه فرحة في هالموتر .. لدرجة انه يدور بلحاله الظهر في رمضان .. وفاتح خشته .. أول ما شفته حسبته ماسك الدركسون بأثمه من كبر الابتسامة !!
وقفّ جنبي وانا توني طالعن من المسجد .. ومتلطم ولا لي خلق .. حتى أول ما فتح الدريشة .. عطس .. و أنا ما تسحرت ومتخدر .. وأشرّت له بيدي على وزن (رحمك الله) .. حتى هو فهمها وقال (يهدينا ويهديكم الله ) .. قال المهم ترا سعود يحترينا .. بنروح نحضر المباراة .. هاه وش قلت ..
والله يا جماعة أول مرة احس بفايدة لغة الاشارة .. وأنا اشّر له بأصابعي قلت لا يخوك .. وأمشي وهو يلحقني في الهايلوكس .. اللي يشوفنا يقول شكله يبيعه شروخه .. وهو ما يبي !!
المهم ألحّ علي وأنا مالي خلق ..
المهم مرينا سعود وركبناه في النص .. خلينا يفحج على القير .. وكان خوينا مشغل (نشيد) ينقاله يبي يخششنا جو في رمضان .. قلت أقول !! طف مسجلك والا حولنا .. رايحين نحضر مباراة حنا؟ والا رايحين نعتمر؟
المهم كل الخط يسولفون وأنا مغطي وجهي في الشماغ .. وقايلن لهم اقصروا حسكم أبنام .. !! ومع ذلك يسولفون كن واحد راكب في الصندوق والثاني في الغمارة !! ازعاج اللي يشوفني يقول رايحن مع صقهان للملعب !!
وصلنا الرياض وووجهي داخلن بدرج الاستمارة من الدوخة .. وتافل العافية .. ولا لي خلق ..ولا نطقت ولا كلمة .. لدرجة يوم وصلنا صلبوخ بغيت اقول للعيال رجعوني !!
المهم قالوا العيال ان فيه واحدن اسمه ابو سلطان عازمهم على الفطور .. اتجهنا لبيت الرجال .. واثره مجهزن كلش ما شاء الله عليه .. قلت له يا أبو سلطان كان عندك (طشت) لا هنت يا ليت تجيبه .. قال ليه ؟؟ قلت امله توت تكفى إذا أذنّ .. أبذب وجهي في الطشت من العطش ..
المهم ضحك وعطيتهم ذيك الابتسامة اللي العن من ابتسامة خويي الظهر !!
وجلسنا نسولف عن المباراة .. واكتشفت ان ابو سلطان (هو الاداري حق المباراة) وانه يبي يدخلنا الدرجة الممتازة .. وفيه احتمالية نخش الملعب عقب المباراة !!
المشكلة أنا ما دريت اننا نبي نفطر عن الرجال .. واننا بنحضر المباراة في الممتازة .. فشماغي اللي يشوفه يقول شكله معطيه بزارين يلعبون فيه (مسابقة شد الحبل) متعرفط !! قسم بالله العظيم اللي يشوف شماغي يقول لابس ستارة ملحق .. !! تعرفون خط ونوم !! ولا توقعت اننا بنفطر والا بنمر أحد !!
ولا كان فيه وقت نمرّ نكوي شماغي !!
المهم ركبنا مع ابو سلطان واتجهنا للملعب ..
نزلنا وخشينا واخذنا أماكنّا .. وكان سعود بجنبي .. فكنت اقول له .. تدري يا سعود عاد لولا الله ثم معارفي كان الحين أنت ووجهك معك كيكة بالجبن وحب مصري وجالسن هناك <<-- وقمت اشّر على الجهه الاولى ..
قال لي تكفى أنت ووجهك اللي يشوفك يقول اربع وعشرين ساعة مع سلمان النمشان ..
قلت طيب : أنا ما جرحتك ليه تجرحني ..!!
قال : أنا ادري عنك .. !!
المهم سكتنا .. وبدت المباراة .. بس ماش كني قاعدن أناظر المبااراة بنظارات طبية !! ماش ما تعودت على الدرجة الممتازة .. يا حليلهم جماهير الدرجة الممتازة .. لا تلعين ولا مزاعق .. لدرجة الفصفص كل واحدن يجمع قشامه .. !!
بصراحة ذيك المبااراة كانت (أعصابي متوترة) ورمضان .. وتوت يالله اتحرك .. وزد على ذلك ان شيميزو جاب (الهدف الاول) .. يوم حسيت ان (التوت) وصل لرقبتي من الروعة !!
و متوتر أنا وشماغي .. لدرجة أحس لو يجيب شيميزو الهدف الثاني .. يمكن يجيني (شلل نصفي بالمدرجات) .. واللي يا رجليني ما اقدر احركهن !! و( شفتـي) اللي تحت قامت (تنتفض) من الضغط النفسي !! .. التفت على سعود وقلت له .. أنا من شفتك حاضر بالممتازة وأنا داري أن الهلال موب فايز !!
قال لي : أنا من شفت شماغك هاللي كنه مغسول مع زوالي وأنا داري اننا محنا بفايزين !!
قلت له : ليه تجرحني يا اخي !!
قال : أنا ادري عنك !!
المهم جت كورة توه راكبه على رجل عمر الغامدي يا لبى قلبه !! ويشبكها .. توني ما بعد شفت الهدف .. ويلقطني سعود مع شماغي ويخمني .. ونقعد نصفق سوا .. يع ما توقعت وجه سعود يبي يصير بريء عقب الهدف ..
المهم حققوا الزعماء ذيك البطولة !!
وندوّر خوينا راعي الهايلوكس .. ونلقاه لازق في الشبك .. ويزاعق لابو سلطان !!
يخاف ينسى ولا يدخلنا
شوي يوم بدوا يفحون البيبان ورقوا اللاعبين يستلمون الكاس .. وكان بندر بن محمد هو وعبدالله سليمان في الممتازة معنا ..
يوم خشوا خشينا .. ولو تشوفون كتوف سعود من بعيد اللي يشوفه يقول من أخويا بندر بن محمد .. وهو لازق وراه المهم يوم خش وأنا أخش .. وأدور خويي راعي الهايلوكس واثره منطلق يحيي الجمهور مع الجهه الثانية !! اللي يشوفه يقول هو اللي جايب التعادل ..
خلصوا اللاعبين دايرين على الملعب .. وبدوا يخشون غرفة تغيير الملابس ..
وأنا اتجه للغرفة .. قال لي السيكيورتي .. وين يالحبيب !!
قلت : عضو شرف الله يحييك .. كنه صدقّ وكنه ماش !! لأن شماغي شبهه !! والله العظيم ما يخلوني عضو شرف ولا لنادي حطيّن ..
المهم الضعيّف خاف .. ولا قال لي شي ..
خشيت الغرفة .. واثرك ما تشوفها من المذيعين والمصورين .. وكل ما جاء احد يصور لاعب و إلا شي قربت لمه وصورّت معه !!
المشكلة ما معي كمرا !! ولا معي شي أبد !! لا تسألوني ليه أصور !! والله من الفرحة ما عاد أميزّ !!

--------------------------------------------

الموقف بعد تأهل الهلال للمباارة النهائية بالبطولة العربية بعد فوزه على النصر "مستضيف البطولة" :
هالكلام عام 1416 .. من مواسم العز الهلالي :

كنت حاضر المباراة واخذن معي عيال اخوي الصغار .. المهم يوم خلصت المباراة .. قلت لهم : إذا مرينّا عند أحد معه شال وإلا علم نصرواي .. (اضحكوا بقوة) وقولوا (هاردلك) ..
مر بجنبنا نصراوي .. مخنفر !! و تقدر تشوف خلايا الدماغ مع فتحة خشمه !! ومعصب !!
يوم مر جنبنا .. وأنا ماسك يدينهم !!
قالوا له (( خردة خردة )) !! صاروا سامعيني غلط يومني اقول لهم : (هاردلك) !!

وكنا مارين عن نخلة !! قلت الحين لو يتفلت علينا ذا هو وخشمه .. ويقطع له عسيب ويموسرنا !!
يبي ينفعوني هالمبزرة !!
بس اشوى عدت

---------------------------


نهائي ولي العهد بين الهلال والرياض 1415 هـ :

يالله كنها أمس


صاف سرا عشان اقص تذكرة .. ومدافع ومزاحم اللي يشوفني يقول يبي يحب الحجز الاسود .. المهم كنا اربعة .. وأنا مرّسم بذيك المباراة اللي يشوفني يقول يبي يحضر حفلة لأبو نورة ..
ومن قو البرستيج .. العيال شارين كولا وموية وكيك .. وأنا اقول لا ما أبي .. اخاف تخرب الترسيمة ..
المهم خشينا الملعب !! توني واطي العتبة الثانية في الدرج !!
إلا يوم جت ذيك الكندرة السوداء اللي تمشي سبع الاف !! والله يا جماعة أني اشوفها وهي تطير في الهواء !! وكل مالها تكبر !! وأنا اللي انزّل راسي باخر سرعتي وتنطبع الكندرة بوجه واحد من العيال ويزعل علي طول المباراة .. قلت يخوك وأنا اللي ذابها ؟!
وبعدين أنا ثوبي توني مفصلة .. انت ثوبك شايفه عليك أولة العام ..
المهم توني ما بعد ركدت من روعة الكندرة !! وأدورّ شماغي وطاقيتي !! والقاهن تحت الكراسي .. وكل ما جيت ابجيب شي .. قالوا لي (محجوز .. محجوز) !! قلت له يخوك داري أنت واياه عقالي تحتكم وخروا !! وبدت المباراة وانا القّط عفشي !!
قدرت احافظ على هيبتي الى الدقيقة 70 الشوط الثاني ..
والله يا جماعة تحسون انها (حوبة) خويي !! اللي صمخته الكندرة ..
وكان الجمهور يسوي حركة الموج إلا أنا منيب اسويها معهم أخاف يخرب الثوب ..
شوي إلا والله وكوب (كوكا كولا) يمشي 700 .. وأشوف اللي بجنبي كل واحد ماسك راسه واللي يحاول ينحاش .. أنا ما بعد استوعبت الموضوع !! توني قايم ابشوف وش فيهم العالم !! إلا يوم (نشب) الكوب في جبهتي !!
و الله يا جماعة من قوة الوجع.. باغي اصيح !! بس شينه دقن .. وشماغ وقاعد يصيح !!
والتفت على العيال .. مسوي بضيع السالفة !! قلت لهم : كم النتيجة ؟!


------------------------------------

والله القصص في النهائيات واجد .. واسمحوا لي على هالمصالة وهالاطالة .. لكن تلبية لطلبات البعض ..
اضافة رد مع اقتباس