خليـــــــــــــــــــــــك بالجو  الا على طاري خليك بالجو .. وش رايك في القفل اللي يسوي الاعلان هذا .. مطيع .. ردي عليك يتكون من جزءين .. احترت صراحة وش اقدم منهم .. فقمت بعمل قرعة بينهم .. واستقرت على الترتيب هذا .. طبعا القرعة كانت عبارة عن اني اختار اللي ابي ثم احطه الاول .. لا من جد بعد القرعة الصدق .. كان الترتيب كالتالي : .. الجزء الاول .. لماااااااااااااااااااااااذا يا اخي القابع خلف هذا الجهاز الذي يحدد رقم " الاي بي " الخاص به انه يعود الى صاحب معرّف " مطيع الهميمي " <<< طيب قل اخي مطيع وخلصنا .. اقول .. لماذا سمحت لنفسك ان تكون كمن قيّد يدّي بالسلاسل .. ثم احكم القيود بقفل كبير .. ثم وضع بجانبي انبوبة " الاوكسيجين " ولسان حاله يقول : ابن امك فك نفسك .. <<< ياخوك حرام عليك .. حسستني بمعاناة الشياب لما يقربون الكتب من وجيههم ويعفطون وجيههم مية عفطة عشان يقرون .. وللأمانة بعضهم يقفل عين ويفتح الثانية عشان لا يشوش .. ما علينا .. انتهى الجزء الاول .. الجزء الثاني .. لحظة ضعف:- والله قد مرّت بي الله لا يعيدها من لحظة .. مستقبلي بغى يضيع بسببها .. اتذكر اول ما تخرجت من الثانوية .. ما كنت حاط في بالي الدراسة في السعودية ابد وعلى قولة واحد من الشباب 12 سنة دراسة هذا لو ما حسبنا الفوائد .. بس اما هو والله الفوائد كانت عنده تقريبا 30 % .. المهم يا صاح .. قدمت على كم جهة .. وكلهم قالوا لي تيسر الله يصلحك .. المشكلة انهم ما يردوني الا من آخر اجراء .. درست بعدها في جامعة عزوز .. وكنت بايع الترم الاول بكيس رز <<< لا تحسبوني استهبل .. الرز غالي الحين بس وقتها كانت الدنيا بخير وكان الرز حب .. بعد مرور مدة في الترم .. وبعد كم اختبار كانت تعطي مؤشرات ان حرف الـ F .. كان بيزيد من جمال " الترانس كربت " تبعي .. وكنت وقتها مع واحد من الشباب بالسيارة .. وهو يعرف وضعي .. قام هو الله يسعد امه رمى كلمة حسيت بعدها اني صحيت من النوم .. قال " اوكي .. السفر برى وغسلت يدك منه .. الان انت طالب جامعة الملك عبد العزيز .. يا تنتبه لنفسك . والا ترى بتعيش نفس الحالة هذي بعد التخرج " .. <<< طبعا هذي الصياغة المحترمة مني .. والا هو قال كلام ما ينقال .. المهم ان كلمته هذي ولله الشكر ثم له .. كانت سبب في اني انتبه لنفسي او على الاقل قبل ما اجيب الطعة في المعدل ثم اندم لأني ضيعت كل شيء .. طفــــــــولة:- يا رجال .. مهوب انت لحالك اللي كنت مجنون بالكابتن ماجد .. ما احد رفع نسبة عمليات الفتاق بالسعودية الا هو .. يجونك يقلدونه وهو يرفع رجله الين تستوي الرجلين بالطول .. ثم يقعد معلق الين حلقة بكرة .. طبعا الوراعين ما يقدرون يسوونها .. وعشان كذا يجون بقية الوراعين ويرفعون الرجل فوق .. واللي ما يلحق يرفع يروح يثبت الرجل اللي على الارض .. يعني غصب يسوي زي كابتن ماجد .. واذا سواها .. معناها انه انفتق .. وعلى طوووول .. اللي بعدوووو .. اما المباريات .. فوالله ان واحد من اخواني كان يكره الساعة اللي يشوف فيها المباراة وانا جنبه .. بين كل سؤال وسؤال عشرة اسئلة .. مع انه كان يصفني واجد .. لكن يغفر له اني ما عرفت الهلال الا عن طريقه .. ختاما .. اخوي صاحب المعرّف " مطيع الهميمي " .. يعطيك العافية على هالبانوراما .. واعذرني على هالرد القصير بس حبيت اسجل اعجابي .. ولا يكون الاخير  تكفى .. .
اخر تعديل كان بواسطة » المـشـاكـس في يوم » 14/11/2007 عند الساعة » 01:58 AM | 