|
<><> يوميات الأعضاء في رمضان مع ابو طــلال<><>
- فكرة : سندريلا الهلال
- متابعة : الماسه الزرقاء - الكلاسيكي
- تصميم : عاشق بو يعقوب
- إعداد : الفيروسه الزرقاء
مرحباً بكم احبتي مع ضيفنا الرابع في يوميات الأعضاء في رمضان
وهو عضو المجلس العام المميز ابوطــــــــلال 
بسم الله الرحمن الرحيم
السلام عليكم ورحمة الله وبركاته
تحيه طيبه لاعضاء منتدى الزعيم الكرام ... وخصوصا اعضاء المجلس
طلب مني وهو تشريف لي سرد الشريط اليوم الرابع من ايام شهر رمضان المبارك
وطالما طلب اني اقول وش صار من نومي الا وقت نومي ليله اليوم الخامس .. كل واحد يقول برب بالماسينجر .. واذا هو على الجوال يقفل جواله ويحطه على الصامت
واذا هو على المنتدى يوقف الردود والتعليقات ..
واذا متابع مسلسل يطفي التلفزيون .. ويتابع يومياتي .. لأنه ميه بالميه بتنعاد هالمسلسل اربع مرات .. وان فاتتك بتلقاها بعد رمضان على كل قنوات العرب سات والنايل سات ... يعني المسلسلات تقولك ( حترووح مني فين )
توكلنا على الله :
اول ماصحيت من النوم قلت ( اااااااااااااايييي ) تثاوبت  << يبي يحط ادق التفاصيل ( راعي طويله )
اولا انا كنت مستأذن من دوامي قبلها بيوم يعني اليوم الرابع ماداومت فيه .. كان عندي شغل وبدال مااستاذن شويه من الدوام قلت ( مير منيب جاي خير شر )
بس الاستئذان مانفع وراح على الفشوش .. لاخلصت شغلي ولاوديت اهلي للموعد ( الموعد في المستشفى ملغي ) وطلعت من المستشفى ومعي العائله الكريمه الساعه 2 الظهر .. وماشالله الاجواء ربيع  قلت دامني انسلخت في هالحر وطلال يهاوشني ( وش مطلعك ياهالشايب في هالشموس ؟؟) قلت خير تقل ادبك على ابوك ... والله لااوديك للمستوصف ( يبطونك ابره ) طبعا الابره هي لحملة الحصباء .. واتمنى من الجميع اخذ اللقاح من المستوصفات الحكوميه اللى بالحاره ( دعوه للجميع ) لأنها الله يكفينا الشر منتشره هاليومين ..
وصلنا المستوصف وولدي يستغيث اني اهون .. وانا طالعة انيابي ودي يبطونه ابره ( اجل بهالشموس يشرب عصير وانا براطمي متشققه من العطش ولايقول سم يبه دوك اشرب  )
وصلنا المستوصف لقينا للاسف المستوصف مقفل .. راح ثلاث مشاوير على الفاضي واليوم باين عليه مهبب من اوله ...
نزلت اهلي للبيت وبعد صلاة العصر قلت بروح انا وطلال لحديقة الحيوان .. خله يشوف الغزلان عمومته وصلنا للحديقه ( مهوب عاقل هالشامي ) لقيت الحديقه مقفله ومسوين تحسينات .. ومغيرين سور الحديقه وحركات والله
اعتذرت من ولدي . . والله مدري وين اوديه هالحين .. ماودي ارجعه للبيت لانه بيوذي امه خصوصا وقت الفطور والاهل تعبانين شوي وحبيت اعمل بااصلي وااخذه معي وابعده عن البيت واريحهم ( والا مهو ماخذه غصبن عنك )  ؟؟
الموهم ... رحت للسدحان خابر فيه صالة العاب .. يلعب ومنها اتقضى للبيت
لقيت مكتوب على باب السدحان ( عفوا الشبكة معطلة والحساب بالكاش ) 
لا بئه !!! مستقصديني
حسيت ان طلال عصب ... احس انه وده يقولي ( ياخوي هات المفتاح ومسكني الطاره وانا اوريك وين نروح )
ركبنا وبديت اقوله ( اللى يسمع كلمة بابا شو بنئلووه :: وهو يقول شاتر شاتر وانا اقول: واللى يسمع كلمة ماما شو بنئلووه ::وهو يردد شاتر شاتر )
من طلعنا من السدحان لين ماوصلت لشارع الاحساء ( حلويات سعد الدين ) وهو معلق على شاتر شاتر وانا شو بنئلووه عاد دخلت شوي من الكلمات مثل : اللى بيتفل بخشة بابا شو بنئلووه ..ويقول شاتر شاتر .. اقول لا مو شاتر )عيب .. لأنه قد سواها الزلابه
المهم .. دخلنا على سعد الدين وكالعاده اتفرج الا هالمره قلت عيب اكتب بكرا تقرير عن يومي ولااكتب اني اشتريت شي .. قلت للمعلم . .لو سمحت عطنا ثمن كيلو ........... امزح عاد .. اخذت لي ربع كنافه بالقشطه .. وربع شي شكله زين بس مدري وش اسمه
رجعنا للبيت ... افطرنا ... صلينا المغرب .. كملنا على السفره بعد المغرب مع مسلسل طاش ماطاش .. وتراني من اكثر المعجبين بناصر القصبي .. وادري فيه ناس مايبون هالمسلسل بس مو بيدي هالناصر مصيبه
تابعت مسلسل باب الحاره .. وكان اليوم هو يوم مباراة فريقنا عيال ابو متعب مع مصاصي الدماء .. استعدينا ... سوينا خطط ( مالت على هالخطط )
اثناء المباراة .. وبعد المباراة .. اشتغلت انا بالماسينجر وبالجوال وبالمنتدى ( استقبل .. ودع .. هنئا) تذكرت اخبار القناة السعوديه الأولي 
انهزمنا طبعا ... وتذكرت اول قومتي كان يوم اسود مطين .. ومنيل بستين نيله
الموعد تكنسل اللى انا اخذت علشانه عذر عن الدوام .. ولدي رحت للمستوصف لقيته مقفل ..؟ حديقة الحيوانات لقيتها مقفله ... السدحان مايبي الا كاش .. وانهزمنا في المباراة .. بس برضه ضحكت على بعض المواقف في المباريات .. منها اني مغشش واحد غلط طلعت صح ... وغششت فريق الاحلام صح وانا نيتي والله صح وطلعت غلط .. بس ماقصروا ارسلولي يقولون مشكور ولو ان اجابتك غلط بس اهم شي النيه <<<<<<< ( ياليتك تسكت بس )
طلعت بعد المباراة وقابلت واحد كنت مواعده وخلص لقائنا بعد ساعه ورجعت للسوق تقضيت بعد ماصار معي الكاش ...
رجعت للبيت واجريت بعض المكالمات وتابعت بعض المباريات في المنتدى .. تصافقت انا وطلال شوي .. يطرحني مره وانا اطرحه .. لين ماجاء وقت السحور .. تسحرنا صلينا الفجر .... وخخخخخخخ خخخخخخخ نمنا
وتووتا توتا خلصت الحتووته .. واتمنى يومي ماكانت ثقيل عليكم وربي يحفظ الجميع والله يتقبل منا ومنكم صالح الاعمال ..
كل الشكر للمبدع ابوطــلال وانتظرونا غداَ مع ضيف آخر 
لكم أرق التحايا وأطيبها
من مشرفي واستشاري
المجلس العام | 