نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - سالفتي مع الهيئة يوم الخميس الفجر في مخيمات الثمامة .!!

Mr.DL5 · #1 06/04/2007, 11:54 PM

بسم الله الرحمن الرحيم ..

مساكم الله بالخير ..

والله القسم نايم .. والمواضيع جد في جد < << < ما يصلح عم

المهم عقدت النية انا و 5 من الشباب نروح لم الثمامة يوم الخميس من العصر الى الفجر ..

المهم رحنا ولقينا مكان حلو وروعة .. وكان حولنا ثلاث مخيمات وكلها فاضية في النهار ..

المهم يوم جت الساعة 1 بالييل ... وحنا ماسكين خط مع السواليف ..

الا نسمع رقص وهبال في احد المخيمات الي جنبنا ..!!

المهم انا طقتني اللاقافه قلت باروح اشوف وش السالفة ... لان الاغاني كانت عاليه .. وفيه اصوات موب طبيعية داخل احد هـ المخيمات ..

ولان معنا واحد ملتزم فــ انزعج من الاغاني والرجال وده يرجع لم الرياض ..

المهم انا واثنين من الصملات عقدنا النية ان نروح ونشوف وش السالفة ..

المهم قرينا اية الكرسي والمعوذات .. << << توكم تذكرونها !!

وكل واحد كتب وصيته .. وقلنا توكلنا ع الله ..

المهم مشينا لم اقرب مخيم لنا .. ولقيناه فاضي ..

رحنا لم الثاني وكل ما قربنا منه الصوت يقوى .. المهم وحنا نشمي نسمع صوت واحد مكثر الله يصلحه ..

نسمع حرف و 10 حروف مشفره .. . قلت الولد موب طبيعي ..

المهم يوم وصلنا لم المخيم .. خذت لي طلة سريعة وخطافية ع داخل المخيم ..

المهم والقى ثلاثة منتهين الصلاحية .. ومعهم بنات !!!!

قالي واحد يمكن انهم عائلة .. قلت صاحي احد يجيب اهله لم الثمامة ويقول لهم ارقصوا ..!! سلامات ..

المهم واحد خويي (( ملتزم )) حب يستخف دمه وقال بادخل اشوف وش السالفة قالها وهو يضحك و كان قصده المزح ..

المهم ما دراء الا كوعي ناشب بــ خشمه .. الرجال زعل وراح وخلانا ..

المهم بقيت انا ومعي واحد ..

قلت وش السواة .. وش الحل ..

المهم بدر الى ذهني الهيئة ..

يوم جيت باتصل .. واتذكر ان ما عندي رقمهم .!!

ورقمهم مع خوي الي انا مكوع له وزعل ..

المهم ولعت براسي لمبة اني اروح واتمصلح معه ويعطيني رقم الهيئة ..

المهم رفعت ثوبي وقلت للي معي راقب الاوضاع بادز لمه اتمصلح معه عشان يعطيني رقم الهيئة ..

المهم رحت لم اخوياي ولقيته عندهم .. رحت لم الرجال وحبيت راسه << < < موب حبن فيه !!عشان يعطيني رقم الهيئة ..

المهم قالي شف يا يزيد << < ترا انا يزيد

.. تبي رقمهم باعطيك اياه .. قلت له كفو والله انك ذيب .. قال بشرط .. قلت امر ابشر بعزك يالغالي ..

المهم قال بارد لك الكوع ..!!

قلت يا رجال العن الشيطان وما تسوى الدنيا ..

قالي رح دور لك احد يعطيك رقمهم .!!

المهم خضعت للامر الواقع .. وقلت له هذي خشتي .. ورجع ابو الشباب خمسة متر وراء وجاني طير قلت الله يعوضني بخشمي .. المهم من زود حوالته جاء كوعه بجبهتي ..!!

قلت بنفسي .. اصبر يابن الذيين خلني اخذ منك رقمهم اقسم بالله اقلب خشتك حفريات ..!

المهم عطاني رقمهم وانا الي ارجع لخويي الي خليته خفت انه لعب عليه الشيطان وخش مع الي داخل المخيم ..

المهم جيت ولقيته بمكانه ومغمض عيونه ومسكر اذانه ..!!

قلت له سلامات يابو الشباب وراك مقفل اذانك وعيونك ..! قال الشيطان حي ما مات خفت اني انجر خلف الشيطان وما ادري الا وانا معهم ..!!

قلت له كفو والله يا شنب .. طلعت جوالي واذكر ان الرصيد يصارخ عندي من الطفره

والي جاي معي جواله مخليه بالسيارة .. وانا ما فيني حيل اروح وارجع ..

قلت ليي جنبي قم رح جب جوالك وان باقعد هنا عشان ما يلعب عليك والشيطان المرة الاول سلمت المرة الثانية ما يندرى عنك

المهم الرجال طق البور و دز لم السيارة .. مر من جنب اخوياي وهو طاير وما التفت لهم .. وهو كان متلطم ..

المهم ع بلاطة فتح باب السيارة ولقط الجوال وجاني طاير ..

واناظر وراه الا ثلاثة مطفين النور وجايين طايرين واشوف يديهم الا واحد عجره وواحد عفريته والثالث معه بلكه ذا الصعيدي ما يمزح ..

المهم طقيت الفلشر وقلت يا شباب اصبروا .. لاني عارفهم قمة الحواله بيجون وع عماهم بيفقعون راسي عاد انا ما يحتاج توني مستلم تكويعه

..

المهم بعد محاولات حثيثة وقفوا .. وقالوا ما مر من عندكم واحد يركض ..!! مسكت بارسي لكاعه وقلت الا مر وهو يركض ومتلطم ..

المهم قالوا وين راح قلت يسار .. المهم دزوا .. الا يسمعون خويي الي معي منسدح ع الارض من الضحك ..

المهم رجعوا له وفقعوا وجه .. وانا والله توطييت ببطنه ..

المهم كلمنا الهيئة .. ووصفنا لهم .. قلت حنا سوينا الي علينا ويالله خلونا نمشي لا يجون يضفونا يحسبونا تبع المخيم ..

المهم رحنا وضفينا عفشنا .. يوم جينا بنركب بالسيارة الا هــ الهيئة جايه ومعهم الدوريات ..

المهم يوم شفناهم وصلوا مشينا ..

هذي قصتي .. يوم الخميس بالليل .. واعتذر عن التاخر في طرح السالفة بسبب الطيران

انا والله ما رحت لم المخيم واطل فيه لقافة لكن والله من الاصوات الي سمعتها ..

الي ما اعجبه الموضوع ترا فيه اختراع اسمه الرجوع للخلف ..تقدر تضغطه وتروح بدون ما ترد ..

خلاصة الموضوع :

والله يصلح حال الامة الاسلامية ما دام مثل هــ الاشكال موجودة عندنا في بلد الحرمين ..

والله يحفظ بناتنا وشبابنا من الانصياع خلف الشهوات ..

وفعلا يوما عن يوما تكبر الهيئة في قلبي .. وتؤكد انها الجندي المجهول في حماية وططنا الغالي من هــ الاشكال الي لقيتهم بالمخيم ..

نصيحة لكل مسلم : لاتقرب انت واهلك لم الثمامة وخصوصا المخيمات يوم الاربعاء او الخميس او الجمعة .. لان فيه ناس اقل ما يقال عنهم انهم ما تربوا وما عندهم ذرة رجولة .. المخيمات تصلح للطلعات الشبابية .. اما للعائلات فـ احذر تسلم ..

انا ما طرحت الموضوع وقلت سالفتي ليس التشهير بخلق الله .. انما اوضح دور الهيئة في البلد بعد ان اصبح الكثير يستنكرون ما تفعله الهيئة .. واصبح البعض لا يبدي للهيئة اي اهتمام ..

لو لا وجود الهيئة .. فمن سـ ابلغ .. هل ابلغ المرور .. كان اقسم بالله يخطب الجمعة و الدورية ما جات لم الموقع ..

الله يحفظ لنا الهيئة ..
واستروا ما وجهتم يالغاليين ..

وتقبوا تحياتي .. اخوكم \ yazeed