| هذي ة لأم تشكي حالها بعد ان أودعها إبنها العاق (الله يهديه) للمصحه (دار العجزه) وهي قصيدة
مؤثره جداُ يرق لها كل قلب مسلم .
اترككم مع القصيده ..
وين انت يا حمدان امـك تناديـك .. وراك مـا تسمـع شكايـا وندايـا
يا مسندي قلبي على الدوم يطريـك .. ما غبت عن عيني وطيفك سمايـا
هذي ثلاث سنين والعيـن تبكيـك .. ما شفت زولك زايـر يـا ضنايـا
تذكر حياتي يـوم اشيلـك واداريك . . والاعبـك دايـم وتمشـي ورايـا
ترقد على صوتي وحضني يدفيـك .. ما غيرك احدٍ ساكن فـي حشايـا
واليا مرضت اسهر بقربك واداريك .. ما ذوق طعم النوم صبـح ومسايـا
ياما عطيتك من حنانـي وبعطيـك .. تكبـر وتكبـر بالأمـل يـا منايـا
لكن خساره بعتني اليـوم وشفيـك .. واخلصت للزوجه وانا لي شقايـا
انا ادري انها قاسيـه مـا تخليـك .. قالت عجـوزك مـا ابيهـا معايـا
خليتني وسط المصحه وانا ارجيك .. هذا جزا المعروف وهـذا جزايـا
يـا ليتنـي خدامـة بيـن اياديـك .. من شان اشوفك كل يوم برضايـا
مشكور يا ولدي وتشكر مساعيـك .. وادعـي لـك الله دايـم بالهدايـا
حمدان يا حمـدان امـك توصيـك .. اخاف من تلحق تشـوف الوصايـا
اوصيت دكتور المصحه بيعطيـك .. رسالتـي واحروفهـا مـن بكايـا
وان مت لا تبخل علـي بدعاويـك .. واطلب لي الغفران وهـذا رجايـا
وامطر تراب القبر بدموع عينيـك .. ما عـاد ينفعـك النـدم والنعايـا
(حسبي الله ونعم الوكيــــــــــــــل)
@ الجديد في الموضوع أحبتي هو عمل قصيده تجاري هذه القصيدة من خمسه او ستة أبيات على القافية والطاروق وليس هناك مانع من تغيير الموضوع المهم التقيد بالقافية وبحر القصيدة كالتالي ...
...................... يـك ×××..........................ايـا
..................... يـك ×××...........................ايـا
..................... يـك ××× .........................ايـا
.....................يك ××× ..........................ايـا
....................يـك ××× ..........................ايـا
....................يـك ××× .........................ايـا
ولكم أرق التحايا .. وشكرا على التفاعل ..
والشكر موصول للاستاذ حبي تيماوي على المجهود الطيب والملموس ..
عوااااااااااااافي
دمتم بخير ..
اخر تعديل كان بواسطة » تيماوي في يوم » 21/11/2006 عند الساعة » 03:33 PM | 