|
قصيــدة .. أصابتني بنوبــة بكاء شديدة ..!!
ليسمـــح لي الجميــع
بمناسبــة تأهل منتخبنــا لذوي الاحتياجات الخاصــة للمباراة النهائيــة لكأس العالم
أن أطرح قصيده الاخ محمد عويضه التي سطرهــا في ذوي الاحتياجات الخاصــة ( الاعاقة الجسديــة ) كمشاركــة مختارة تشير الى حجم المعانــاة التي يعانيهــا أبنــاؤنا ذوي الاحتياجات الخــاصــة
والتي القاهــا ذات يوم طفل في حفل خاص بهــم أصابتني بنوبــة بكاء شديدة .. لمـــا ..لا أدري ..!! المهم أني بكيت وبحرقــه فاستمتعوا بهــا كمــا استمتعت بها ذات يوم !!
طفولة معاق
الطفوله ...
أحلى مافي هالحياة
مرحله من غير .. هم
كنا دايم نبتسم
كنا حتى لو بكينا ... وجارت الدنيا علينا
بعد لحظات وثواني ...
بسمه فينا ترتسم
كنا نركض خلف كوره ....
لا لا أنا ماكنت معهم ؟
وحدي بس بعيد عنهم ....
كنت أضحك من ضحكهم ....
جالس لحالي أهذري ! ....
جالس أحسب كم ( كوبري ) ....
صلحه (احمد) في (ماجد) ؟؟؟
والله واجد !!
وقبل ما يحل الظلام ....
للبيوت نروح نجري ....
لا لا انا ماكنت معهم !
أمشي وحدي بعيد عنهم ....
أمشي واعدد أثرهم !
وهم يبعدون ....
يبعدون ... يبعدون ...
إلا ( ماجد ) !
كان مثلي حيل ضايق ....
بس حزني كان حارق ....
كان يسألني ببراءه : ....
ليه تعرج ؟ .... قلت مادري ! - باستياء -
ليش تبكي ؟ قلت مابكي - بكبرياء -
ضاق مني .....
ثم سألني في غباء ....
قال ( وثرايك تثابق ) ؟
وراح عني ....!!
*******
كنت أسأل دوم نفسي ....
ليش ما اركض معاهم ؟؟
ليش دوم أمشي وراهم ؟؟
وش بلاي ؟؟ أو وش بلاهم ؟؟
ليه انا غير الانام ؟؟
زاحمتني الاسئله....
كل شي أجهله ؟
وإن تعبت من الإجابه .....
أحضن الحيره وأنام ....
*********
مرت سنين وكبرت ....
صار همي اليوم أكبر
حتى دمعي صار أكثر
للأسف توي قدرت .....
أفهم إني شخص (عاجز )
يعني بيني وبينكم
مليون حاجز !!!!
صدقوني ذي حقيقه .....
لاطلعت السوق ...... كل مامشي دقيقه
القى كل شوي أبله !!!!!
يمشي ويناظر صديقه ....
ويغمز له
يقول : ناظر ....!!
وش يناظر ؟؟؟
وتتفجر في خفوقي الف ضيقه
ووحده في وسط الزحام ....
طالعتني باهتمام ....
بنت في عمر الزهور ....أي رشاقه ... واي أناقه ....
وأي عطور !!!!
قلت في نفسي ياهووووووووووه
هي تناضرني بغرام ؟ أو هي نظره والسلام ؟
بس اكيد إنها تعرفني .... شايفتني ؟
شايفتني في جريده ؟
وأعجبتها لي قصيده ؟
إيييييييه أنا توي إفتكرت ....
لي قصيده ...
كنت ناشر معها صوره
بس صوره ياسلااااام
وفاجأتني....
لما صارت لي قريبه .....كانت تتمتم بطيبه
( يكسر الخاطر حراااام ) !!!!
وتركت دمعه غريبه ....
وضاعت بوسط الزحام
دمعه كانت تحكي وضعي ... زلزلتني
ارتطم قلبي بضلعي .... دمرتني
صدقوني ...
أصعب اللحظات وأقسى
لاغدا الرجل يكسر .... خاطر أنثى
كيف بنسى ....
جاوبوني !!!
*********
وزاد همي .....
يوم فكرت بوظيفه ....ثم زواج
أي وظيفه ... وأي زواج ؟؟؟
اللي مثلي ...
مهما طالب .... لو يلف ولو يدور
زين لو حطوه بند الاجور ......
ماهو رسمي !!!
صدقون لو تدرج ... وصار راتبه يتصاعد
وبتدا وضعه يزين
ما أضنه بيتزوج .... إلا من بعد التقاعد
من سنه الى سنتين !!
*********
وفي النهايه.....
يابلدنا .... مهما كانت تسميتنا
عاجزين ... معوقين
لك عهدنا .... وذا قسمنا :
أقسم بالله العظيم .... منزل الذكر الحكيم
أن أصونك يابلادي ..... من شرور العابثين
من مطامع كل حاسد ..... من نوايا كل فاسد
وإني لك حصن حصين
إنتي ناديني وشوفي ... لا نويتي بالجهاد
والله أقهر لك ظروفي ..... دامك إنتي لي بلاد
وباسم كل العاجزين ......
دام فينا أصبع يطول الزناد
لايهمك يابلادي ....
وازهليهـــــــــــا .
نـــادر
اخر تعديل كان بواسطة » naadeer في يوم » 15/09/2006 عند الساعة » 10:44 PM | 