السلام عليكم،،

طبعا وبصراحة ماقدرت أقرأ كل الردود ،، لأنه ماشالله تبارك الله يبيلها اكثر من ساعة علشان اقدر اقراها كلها ،،

المهم انا حاب اني أضيف شي على كلام اخوي صاحب الموضوع والاخوان اللي ردوا على الموضوع ،،

أنا أدرس بكندا حاليا ماجستير ،، ودكتوراه انشالله ،،

أول ماجيت كندا دخلت معهد اللغة الانجليزية ،، الزبدة ، انه فيه كلاس تطلب المدرسة من كل واحد انه يسوي برزنتيشن ( اللي هو عرض او تقديم لموضوع معين) المهم كان الموضوع حر يعني يمكن لأي واحد انه يحدد موضوعه بنفسه ،، أنا بما اني " خبل كورة " قلت ابسوي برزنتيشن عن كورة القدم من ناحية الاندية الشهيرة واللي لها تاريخ بالبطولات ،، طبعا استعرضت بعض الاندية من كل قارة وطبعا كان التركيز اكثر شي على اوروبا بحكم الاندية العريقة وفنيات الكورة واللاعبين المشاهير ،، كان معي بالكلاس عدة طلاب من عدة جنسيات ( الصين ، كوريا ، اليابان ، روسيا ، المكسيك ، فنزويلا ، النمسا ، واخوكم بالله ) ،، المهم جا دور آسيا وتكلمت طبعا بكل فخر عن زعيم آسيا الأوحد اللي هو " الزعيم " وحطيت شعار الهلال وكم بطولة حقق ومن هالكلام فأستعرضت بعض الصور عن الهلال وكان تركيزي على الجمهور وخصوصا بأستاد الملك فهد وكنت اقصد انه هالنادي له اكبر جماهيرية بالسعودية وان له جمهور كبير حتى خارج السعودية ،، المهم من ضمن الصور كنت حاط صورة " الذيب " << أهم شي بالبرزنتيشن ...... اول ماطلعت الصورة الا وينط واحد صيني ووحده بنت كورية قالوا نعرفه هذا <<< قطعوا أم الحماس وانا اتكلم .... قلت انا وش تعرفون عنه << طبعا اقولها بكل ثقه وثقل ،، بما انه شي طبيعي ان ابوعبدالله معروف وخصوصا من الاسيويين اللي ياما اكلوا من لدغاته ..... قالوا معروف هذا رقم "9" بالمنتخب والفريق هذا اللي تتكلم عنه يقصدون " الزعيم" وحتى هو الكابتن حق منتخبكم ،، قلت ايه صح ،، الحلو بالموضوع انهم وهم يتكلمون كذا تكلم النمساوي ،، قال ايه الحين عرفته هذا ،، طبعا ضحكت انا قلت وش تعرف عنه ؟؟ ،، قال بس اعرفه انه مشهور وهو اسمه "سام" ،، قلت تقريبا بس اسمه "سامي" قال زي كذا واعرف بعد "نواف" يقصد نواف التمياط ،، و"علي دائي " و ....... قلت اصبر اصبر على دائي مهب تبعنا هذا ،، قال ايه بس اقصد اللي عندكم بمنطقتكم ،، قلت انا طيب خلاص خل اكمل موضوعي .... ضحكت المدرسة بقوة ،، قلت وش فيه شكلي جبت العيد بشي والا شي ،، قالت لا اني اضحك لأنهم ماقالوا شي يوم حطيت صور "بيكهام" و "زيدان" و "رونالدو" و... و... و... ،، قلت انا ايه لانه هذا بآسيا يعتبرم ن مشاهير الكورة عندنا ،، طبعا بعد الكلاس استلموني الصيني والكورية بالاسألة عن "ابوعبدالله" وينه ووش يسوي ،، اعتزل او لا ،،، قلت لا مااعتزل وتبي تشوفونه بكأس العالم يبي يلعب <<< طبعا اصلا هالكلام كان قبل كأس العالم ..........

النهاية ،، ان ابوعبدالله كان ومازال نجم مشهور ليس على المستوى الاقليمي او الاسيوي ،، لا وصل للعالمية وله زمان طويل وهو مشهور بالعالم ودليل على ذلك مشاركته الاخيره ونزولة بديل لعملاق الكورة والفن " زين الدين زيدان " .....

سلامي للجميع وآسف جداااا على الأطالة ،،

محبكم ،، قصيمي كندا - اونتاريو .