الموضوع: SMS
مشاهدة مشاركة بصفحة مستقلة
  #1  
قديم 29/08/2006, 04:32 AM
الصورة الرمزية الخاصة بـ صدى الامس
صدى الامس صدى الامس غير متواجد حالياً
عميد المجلس العام
وعضو سابق بلجنة تطوير المجلس العام
تاريخ التسجيل: 26/02/2001
مشاركات: 4,222
Wink SMS


مع التقدم التقني في الحياة وتواصل التقدم التقني << يرحم امك اسكت << يا شين اللي ما يعرف يكتب مقدمات قلت لكم مع التقدم التقني في الحياة وتواصل التقدم التقني وتطور التقدم التقني وازدهار التقدم التقني
<< يا شين اللي تورط

اي تقدم تقني عندنا !! والا فرحانين بالجيل الثالث !! والا فرحانين بالتقدم ان الـ dsl عندنا في عام 2009 اذا الله احيانا بيوصل سرعة 1 ميغا !! عام 2009 ويقولون تقدم !! والا فرحانين بالتقدم ان الاتصالات عندنا نار !! والا فرحانين بالتقدم وبعض المناطق وحنا في عام 2006 مافيها شبكة !! والا فرحانين بالتقدم ان التقرير للرسايل بـ 10 هللات !!
وش اقول ووش اخلي !! ما اقول الا مالت علينا وعلى تقدمنا !! والله يا حنا نسمع بالتقدم ولا ندري وينه فيه !!

المهم اقولكم الحين صارت الدعوة خرابيط وسواليف وقلة حيا :sad: كل من هب ودب فتح له قناة وحط رقم للرسايل ويالله يالعالم المخفات تدهر وترسل للقنوات سواليف ومسخرة وقلة حيا :sad: !! رأس مالها مليون وتحجز لك قناة وادهر من هالأغاني من طقة البرتقالة << والله يا انت قديم شكلك ما سمعت بـ الواوا !! وخل اول اسبوعين الترقيم مفتوح شوي يعني لا تدقق والاسبوعين الثانيات خفف شوي وبعدها رجعت المليون بمليونين ووش لك بالأسهم والخرابيط ونزل المؤشر وما نزل ارتفع السوق والا ماارتفع متعلق بكم شركة وخرابيط ثانية !! وحط لك بالكنترول واحد فاهم يرسل بـ أسامي بنات وشف بعض التماسيح المخفات يجونك ركض ولا يهون بعض امهات الركب السود !! اجل ارسل اسمك واسم حبيبتك عشان تشوفون التوافق بينكم طيب لو واحد عنده حبيب مهوب حبيبه ووحده عندها حبيبه مهوب حبيب وش يصلحووون !! << لا تقولون وش تبي ترى هالحركات كثيرة ;) وخصوصا في هالوقت التالي كثرت عند البنات بشكل كبير ;) ..

اجل بالله برنامج يحطون لك اكثر من موضوع والمشاهدين هم اللي يختارون الموضوع عن طريق التصويت بالرسايل (( وجه يقول احد قال اليوم السابع )) اجل وين راح المعد ووش يسوي اذا المشاهدين هم اللي يختارون !! اقول مالت عليكم بس من شفت محمود سعد هو المقدم وانا غاسل(ن) يدي !!

والا حط لك وحده حلوه ولابسه من غير هدوم وخلها تفتن هالمهابيل وابشر بالاتصالات والرسايل !! اجل هذاك اليوم في قناة مدري وش اسمها << علينا يا مناحي .. جايبين لبنانية حلوه وموت (( صورة واحد تقوطر سعابيله من حلاتها )) المهم هالبنت كل شوي اذا محد اتصل توخر شعرها شوي عشان يبان صدرها شوي وهذي شغلتها اذا قلت هالاتصالات تلعب بالشعر يمين ويسار عشان تفتن هالعالم << اشوى ان جوالي مافيه خدمة 700 والا تسان اتصلت
(( تبون الصدز ضيعت العيال وهم يلعبون بلوت اجل واحد يشتري صن وما معه الا ولد وثلاث سبعات وتسعه ))

المهم الحين القنوات صرنا ما نشوف منها شي كلها يا شريط إخباري والا اسعار الاسهم والا سواليف وتشات !! طيب وبعدين والى متى وحنا كذا ؟؟ << اسكت بس اشوى انك 24 ساعة مسنتر وتدهر بالرسايل


الحين بعد ما عرفنا عن التقدم التقني في الحياة وتواصله وتطوره وازدهاره ونموه واكتمال نموه كل هذا بإستخدامك نيدو

خلونا نمر على بعض الرسايل عند بعض الناس ..

واحد كل اخوياه طفرانين ..

×× كلها الرجاء الاتصال بي << طبعا بالانقلش وتعرفون ثقافتي فرنسية انا



واحد راعي اسهم ..

×× اشتر في تبوك للاسمنت واترك المواشي الزراعية
×× اقحش من سابك المصرفية وبعها بعد كم شهر
×× اترك الراجحي للاسمنت واشتر في سامبا للمعادن
×× انحش عن ساب للعقارات تراك تبي تتورط

< واضح اني افهم في الاسهم احمدوا ربكم ما اعطيكم توصيات والا تسان صرتوا هوامير بس مديونين



واحد توه صاير مغفل يعني توه متزوج

×× اول سنة كلها رسايل حب وغرام ..
×× ثاني سنة رسايل شوق ووله << كل واحد بدأ يمل من الثاني ويصرفها بالشوق يا مسكين يهالشوق ملعوب(ن) في حسبته
×× السنة الثالثة جب خبز معك وجب غداء ما طبخت !!
×× لا تنسى تجيب بامبرز للعيال !!
×× نبي سيريلاك ونيدو ما عندنا !!
×× نبي طماط وبصل عشان الغداء تسانك تبين اطبخ ولو تجيب من المطعم يكون احسن !!




واحد صايع ..

×× كل رسايله مشفره ;) !! << مالها داعي نتوقف على آخر عمرنا وش يقولون عني !! وش عندنا غير السمعة الحسنة والذكر الطيب << يحلفون ان هالشي مستحيل


بنت صايعه ..

×× كل رسايلها شحن رصيد !!



بنت ما عندها الا بنت عمها تعرفها << احد قايل الفيروسه والماسة او خل نقول مجموعة بنات في منتدى ..

×× فاتس صدى الامس نزل موضوع الحقي عليه لا يفوتس ضحك ووناسه وكل شئ !! << بتقولون وش تبي انت مصدق عمرك بقولكم هذا موضوعي وانا حر
×× لا يفوتس موضوع بالمجلس العام !!
×× فيه مضاربة في موضوع بالمجلس العام نبي الفزعة !!
×× وش صار على موضوعنا اللي بالتطوير قصدي اللي بالاستشاري << لا هذي واضح انها الفيروسه والماسة
×× تراني كاتبه موضوع ارفعيه نزل تحت ومحد رد !!
×× فاتس عرس نوير بنت جيراننا بتصل عليتس بعدين بقولتس كل السواليف الحين تعبانه وبنام !! << عاد ترد عليها وتقول تكفين لا تنسين شي ابي اعرف وش صار ووشلون لبسهم وعرسهم والطقاقة ومن رقص ومن ما رقص والعروس وشلون كان شكلها يعني بالتفصيل ابي برنت كامل عن كل شي !!



واحد يعرف له كم واحد بالمنتدى ..

×× فاتك صدى الامس منزل موضوع الحق لا يفوتك انواع التنسيم والضحك !! << راجع الصندوق الوارد اللي فوق وتعرف السبب ليش قلت هالكلام
×× تراي نزلت موضوع تكفى رد كثر الردود !!
×× فيه موضوع منزله الوصخ ****** خل نخربه عليه !!
×× فيه موضوع لخوينا ***** لاترد اليوم رد باتسر عشان يكون نزل شوي وانت ترفعه لان انا برد اليوم !!
×× لاتنسى تراي كلمت خوينا ونبي ننزل موضوع كبير ونبيه غصب يتثبت !!
×× شفت العضوة ****** شكلها خوية العضو ****** !! << يرد الثاني ويقول انا شاك من اول وقلت لك هالشئ !!
×× شكلي بشبك العضوة ****** وبجيبها للماسنجر غصب !!



واحد حاط الحد الأئتماني 300 ..

×× لقد اوشكت على بلوغ حدك الائتماني !!
×× لقد اوشكت على بلوغ حدك الائتماني !!
×× لقد اوشكت على بلوغ حدك الائتماني !!
×× لقد اوشكت على بلوغ حدك الائتماني !!
×× لقد اوشكت على بلوغ حدك الائتماني !!





قفطه قصدي قفله

لاتشرهون شوفوا متى منزل الموضوع وتعرفون << هذي تصريفتك ايم






لا جد اتركوا عنكم الرسايل حتى لو كانت لقناة الزعيم << مندس




اللي يبي يتصيد من الأخطاء بينبسط وبيفلها

,.,



اضافة رد مع اقتباس