نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

هلالي جذاب · #1 20/05/2006, 05:05 PM

بصراحة

بالعقل

بدون لف ودوران

من جد والله ترى مفقوع قلبي منكم

انتم حيالله مشجعين في المدرجات حدكم الكلمات الآتيه :

الله ياخذه وياخذ من لعبه

وش ذا لاعب ولا سباك ؟؟

ياخي الدرب هذا جاب المرض

لعنــ..... يا حكم يا ابن الــ ..

وهذا يا اغلب جماهير الهلال وكل الاندية تقريبا ..

صح ما ننكر ان فيه نسبة من العقلاء وهذا الشي مو مهم بالنسبه للكلام اللي ودي

اطرحه هنا بخصوص نواف التمياط وتجديد عقد التمياط او المحترف الاجنبي

كماتشو اي لاعب غيره ..

ياناس

يا عالم

يا بشر

يا زعماء

دام حدكم التشجيع والصجة واللجه والتنظير والتحليل ( المجاني )

ودام الواحد منكم حده يدعم الهلال بتذكرة دخول المباراة اللي مقسمة

على سبعين نفس قبل تدخل خزينة الهلال منـــها هللات ويمكن يتحول

الدخول للملعب مجانا وصارت بمناسبات كثير ..

:

الشي الثاني جوال الهلال ..

167 الف مشترك يعتبر رقم كبير قياسا بالفرق الثانية لكن انا اعتبره

قليل قياساً بجماهيرية الهلال اللي انا متوقع ان مشجعين الهلال ( المهتمين )

على الاقل على الاقل 2 مليون مشجع مهتم ومحب للهلال ..

واذا حسبناها 2.000.000 مشجع نقصنا منهم 276.000 = 1736000 مشجع هلال

بخل على ناديه بكم ريال اخر كل فاتورة لجواله ..

:

وعلى فكرة اشتراك الجميع مو حباً في الدعم ..

لا ..

اشتراك الجميع رغبة في متابعة اخبار الهلال ومبارياته ونتائجة كمشجع يستمتع

بفريق ايجابي في كل شي حتى في معلومات اوقات الصلاة وصالات الاسم واخبارها

ماعلينا ..

خلاصة الحكي اللي ملحه منه فيه ..

نواف ابن بندر التمياط اذا حدد مبلغ كبير او صغير فهذا من حقه كلاعب ابن التمياط

وليس ابن الهلال كما يدعي البعض والهلا استفاد من التمياط سنوات كثير وبطولات كثير

والتمياط استفاد من الهلال بالمثل حتى وصل سن الثلاثين ..

:

سؤال ..

لو طاح مستوى نواف مثل ما طاح مستوى تركي الصويلح !!

( اللي كان بيوم من الايام بيزيح الدوخي من مركزه )

من منكم بيفيد نواف ولا بيطالع فيه ؟؟

احلف انكم اول من يطالب بتنسيقه او بيعه للشعله او الرائد ..

(وبيتحول نواف الذهبي طيي النسيان )

:

اللاعب كويس ويتنافس عليه عدد من الاندية الكبيرة

واللاعب على وشك توديع الملاعب بعد سنتين او ثلاث

اذا ظفر به الهلال ( حب وكرامه ) واذا لا فالله يستر على من راح

:

على فكرة :

الى الان نواف ما قال شي ولا تكلم عن شي ..

:

ادارة الزعيم ..

طبعاً ارجع بكم شوي لسالفة حدكم تشجعون بالمدرج ودعم تذاكر وجوال الهلال

اللي ما تغني ولا تسمن ربع لاعب محترف عليه الكلام ..

:

اما ادارة الهلال واعضاء شرف النادي اللي تطالبونهم باشياء مو من حقكم تطالبونهم بها

مثل جددوا لفلان او اشتروا فلان او نسقوا فلان ..

من انتوا ؟ من جد بالله قولوا وين تتوقعون يصير مصير النادي اذا صارت ادارته مئات الالاف

من المشجعين تطالب باشياء توجع الراس ..

:

انا متاكد ان اللي يدفعون ( ملايين ) الريالات هم اكثر حرص ومعرفه بالمكان اللي تروح فيه

( دراهمهم ) واذا هم شايفين ان التجديد لنواف بـ 200 مليون بيجلب للنادي مكاسب اكبر

بيجددون واذا التجديد معاه حسب وجهة نظرهم بـ مليون ريال او عشرة هو الانسب فهم اعرف

وادرى وهم الاحق بالقرار واللي يشوف ان له الحق في بقاء نواف او غيره يجي حياااااااااااه

الله الباب مفتوح ويدفع ويوقع مع نواف ..

:

الامير محمد بن فيصل يتعب ويسهر ويدفع ويسافر ويدير النادي بمئة قلب ومئة عقل ..

وهو ادرى بناديه وظروفها ..

لاتحسبونه ما يقرا مواضيعكم اللي ادوختونا بها عن نواف وكماتشو وغيرهم ..

لا ..

هو يقراها ويتابع ويتأثر ببعضها والدليل واضح امام الكل ..

مره ابستقيل ومره بجلس سنه ومره يقول هذي اخر سنه لي بالنادي ومن هالكلام

ظنكم لو كان وراه جمهور هلالي واعي مدرك لمصلحة النادي وتارك ادارته تشوف

الصح وين وتضع الامور نصاب عينها بتتقلب نفسيته كذا !!

:

اجزم بان الرجل اللي يترك كرسيه جوار الاحتياط ويقوم يرفع يديه مع الجماهير

يشجع ويرفع معنويات الجمهور ويمتدحهم في كل مناسبه مع انه رئيس نادي

من فصيلة ( سمو امير ) انه رجل جماهيري ويعايش هالجمهور معاناته ويعايشهم

كل احوالهم ..

لذلك انا ارى والله اعلم ان يقتصر دورنا بالتشجيع والفرح عند الفوز والحزن

عند الخسارة وان نترك الادارة للادارة والتدريب للمدرب واللعب للنجوم ..

ونترك مواضيع البلوي اخذ نواف والادارة مطالبه بالتجديد ..

:

واعتقد ان ادارة ناجحة جدا كالادارة الحالية لها الحق كله في تسيير النادي

كما ينبغي وعلينا ان نقف داعمين بالتشجيع والوقوف معها معنوياً فقط ..

:

ودمتم بخير

جذاب