الأخ/الهلالي-أبو سارة
طبعاً أحترم رأيك ولكن أخالفك في الكثير من الطرح خاصة فيما يتعلق بالمدرب باكيتا واللاعب كماتشو , فالمدرب باكيتا حقق حتى الآن خمس بطولات والقادم إن شاء الله أحلى , أقول حقق هالبطولات وهو على قولتك ما يغير كماتشو اللي حسب رأيك ما يقدم المطلوب منه , يا خوي خل باكيتا يمشي على طريقته وخل كماتشو في الملعب طالما من شفنا باكيتا وكماتشو شفنا كل البطولات

ثم تقول :
أما محمد الشلهوب فهو حكاية أخرى وقضيه ما يتحملها ملف ..

حتى وهو في أسوأ حالاته لا تُعدم منه تمريرة هدف أو لمحة عالمية .. مبدع وننتظر المزيد

منتهى التناقض , تحلل لمحمد الشلهوب اللي ما قدم ولا شيء خلال المباريات الثلاث قبل مباراة الأنصار وتحرم على كماتشو اللي قدم مستوى كبير في معظم المباريات , يا أخي الهدف مرحباً به , فاول بلنتي المهم هدف والكرة أهداف وكماتشو قاعد يجيب لك أهداف فما أدري وش تبي بصراح أنت ومجموعة كبيرة من الجمهور الهلالي!!!!

ترى ما نسينا الخمسات والأربعات توها قبل العام , 180درجة تحول مستوى نفس فريق الخمسات والأربعات بتوفيق الله وبوجود المدرب باكيتا اللي ما هي عاجبتك خططه والعملاق تافريس واللي مانتب هاضمه كماتشو , أبي أسألك , وش تبي بالضبط ؟؟؟ وأقول أكثر وش تبون أكثر من خمس بطولات وأربع انتصارات والقادم أحلى بس بلاش نثير ونحوس ترابط الفريق بانتقاداتنا الغير منطقية.

فيكم شدة أملوا الملاعب وشجعوا الفريق واتركوا الانتقادات الغير مبررة فالفريق في أيد أمينة , مدرب عالمي متمكن يقرءا الفرق المنافسة ويوجه الفريق للفوز وهو المطلوب , ولاعبين أجانب مقدمين المطلوب وأزيد.

طبعاً الاختلاف في الرأي لا يفسد للود قضية وكلنا نحب الهلال وأنت من الكتاب اللي أتابعهم ولكن في هذا المقال أعتقد بأنك لم تصب ربما بسبب الصيام.