الخسارة واردة في عالم كرة القدم
الهلال أيام جيرتس الاغلب كان يقول الهلال مستحيل فريق من اسيا يقدر يوقفه
ومع ذلك خسر الهلال ذهاب و اياب وطلع من البطولة
لكن في فرق كبير لما تطلع من البطولة بهدف واحد نتيجة غلطة دفاعية
وبين لما تطلع بشكل مخزي تشوة فيه تاريخ الهلال
الهلال كان غير مهيأ فعلا والسبب الرئيسي من الإدارة ( بصراحة )
أولا بسبب المعسكر الاعدادي للفريق وتذكرون كيف جابوا المدرب في اخر اللحظات
وثاني شي انهم ما جابوا لاعب مناسب يعوض مكان هوساوي في الدفاع
بصراحه الي اسمه مانجان مصاب من 8 شهور ليش يشترونه شي غريب بصراحة !!!
انت تجيب لاعب اجنبي علشان يفيدك مو علشان تفيدة انت وترجعة لمستواه بعد الاصابة
ثالثا التعاقدات مع الاجانب بشكل عام هرماش - ويسلي - بيونغ - مانجان
لو سوينا تقييم للاعبين الاجانب بنلقى الوحيد الي يستحق يبقى في الهلال هو ويسلي فقط
والباقي تكملة عدد علشان نقول عندنا لاعب اجنبي
والتعاقد مع مدرب ما عنده اي انجازات وتاريخه ما يأهله يدرب فريق مثل الهلال
بصراحة أنا أتمنى المدرب يكون أول ضحايا هذي الهزيمة لأنه أثبت فشلة
يكفي انه قضى على مفاتيح اللعب في الهلال وين راح الشلهوب والفريدي والعابد
هذا هو المدرب الوحيد الي استغنى عن خدمات الشهلوب و الفريدي
وعلشان يعاقب العابد ابعده عن الفريق الاول وش الغباء هذا طيب اخصم من راتبه ليش تضر الفريق الاول
غير كذا في اشياء ثانية مثل الحالة النفسية للاعبين أنا قلتها وبأظل اقولها
لاعبين الهلال في السنوات الاخيرة خصوصا بعد رحيل الجيل الذهبي ما يعرفون يلعبون تحت الضغط الجماهيري
والهلال ما صار يمتلك اللاعب القائد القتالي في الملعب الي يحرك الفريق مثل ما يسوي محمد نور في الاتحاد على سبيل المثال ومثل ما كان يسوي يوسف الثنيان من قبل
في أشياء كثيرة لكن الأهم ان الجماهير الهلالية ما قصرت حضرت وساندت الزعيم
حتى بعد الهدفين استمرت في التشجيع لعل وعسى تشوف شي من روح الهلال
لكن للأسف ( لا حياة لمن تنادي )
.
.
. | 