لــــــــــــــــــــــــــــــــــــيــــــــــــــــــــــــــه
.
..
...
(لـــيـــه) 
تحياتي للجميع ولكل من تشرفت بأنه يدخل ويشوف الموضوع  
أقولكم من أولها بكتب موضوعي بالعامية وماني متفلسف عليكم 
مع أني أدري أن بعض الأخوة بيقولون وش ذا الشعبي  
بس أسمحولي عشان قريحتي للكتابة ماتطلع إلا كذا (ملعوبة قريحتي  )
الحقيقة أني كنت قاعد أسأل نفسي كمن ليه كذا وقلت في نفسي خلني أشوف أخواني وأخواتي الزعماء وش رايهم 
بأطرح (تطرح ولا تجمع ههههه  ) عليكم هالمجموعة من الأسئلة يمكن ألقى عندكم الأجابة 
ليه حنا مانحترم بعض؟  
أكيد بتقولون "بالعكس فيه أحترام متبادل وهذا الشي يتجلا لنا من خلال المواضيع المطروحة في المنتدى والردود والمشاركات مع بعضنا البعض ..... ألخ ألخ ألخ"
أوكي الزعماء في المنتدى يحترمون بعض وكل شي ما أختلفنا 
وكلهم كذا 
بس أنا أقصد برا في الأماكن العامة وفي الشارع وفي الأسواق
يعني ليه وأنت واقف في مطعم ماما نوره مثلا يجي واحد ويخطم عليك في الطابور؟ (على فكرة المشكلة هذي ما أنحلت في البنوك إلا بعد تدخل قوات الأمن السكيوريتية  )
ولا كأنك موجود في المطعم أساساً ولو قلت له شي بيقولك : أوه أسف ما دريت أنك في الطابور  (يعني واقف أتشمس أنا )
أو بيقولك لا أنا من أول هنا بس رحت أجيب محفظتي من السيارة  ( وش دعوة عنده محفظة )
ليه وأنت ماشي في الشارع في أمان الله ومندبله تسبدك من الأف أم وتسمعها غصب عنك  عشان مسجلك خربان والشاب اللطيف إللي قدامك قازله ليموزين فيه أشياء سودا ورا (ماتدري هم بنات هم عجز هي كراتين ملفوفة بأكياس زبالة ـ مع أحترامي لأمهاتنا وخواتنا ـ الله وأعلم وشي )
وماجاب خبرك.. مره يسرع ومره يوقف قدامك ومره يرجع عليك؟ (عادي تحمل أي شي من قالك تمشي وراه  )
لا ـ مو بس تسذا لو تدق له بوري (تدق بوري = تنطب) نفخ عليك 
ليه لو أنت جاي بتلف يمين وقدامك مرسدس ساد الطريق توقف وراه زي الألف  (من خاف سلم  ) لين تفتح الأشارة ولو أنه أبوهنود  دفيته بسيارتك؟ 
ليه لو رحت تراجع في وزارة والموظف إللي عنده شغلتك موب فيه بكل برود يقولونلك أخوياه بكل برود وهم يقرون الجريده  وحتى مايرفعون روسهم : تعاله بكره 
ووقتك وتعبك ومشوارك في القوايل ماله قيمة لأنهم يشوفون أنه أنت بكبرك مالك قيمة 
ليه لو رحت لمحل تبي ترجع شي أنت شاريه محد يعطيك وجه ويجرجرونك على وجهك في المحل وتصير كنك دفاع الأتهاد قدام سامي ولا تقدر تسوي شي ومطير عويناتك؟
تاريخ الترجيع أنتها ... ماعاد فيه مقاسات ... المدير موب فيه عشان يرجعها لك ..... 
ليه لما تواعد واحد تبرمجك نفسك نص ساعة بعد الموعد المحدد ؟ يمكن لأنك تدري أنه هو بيتأخر عليك !!!!!!!!!!!!!!! 
ليه لما يجي بزر (بزر = طفل) لماكدونالدز بيشتري والشباب مسكرين الكاونتر محد يعطيه وجه ويخليه يطلب قبله؟ (ولو هو بنت في القاهرة  كان شرالها على حسابه  )
ليه لما تطلع المطار رايح لجدة ومظبط وضعك هناك والزجرت يحترونك (زجرت = كووووول  ) وحجز الفندق أوكي ومعاك تذكرتك... تنصدم يقولك الموظف في الخطوط مالك حجز أصلا؟
ليه لما توقف في حراج الكمبيوتر بتشتري شي ترجع تلقا واحد ساد عليك ومقفل السيارة ورايح جوا المحلات (حلني عاد متى يطلع  )؟ وإذا حظك زين ورجع بسرعة قالك معليش أخرناك يالشيخ  (وين أصرفها أخرناك هاذي  )
عاد إللي يسمعني يقول عندي شي مهم
ليه إذا واحد دقوا عليه  أهله ولا أمه ولا أخته رد من غير نفس؟
هلا .. نعم .. خير ... بسرعة تراني مشغول (وهو يسربت في الشوارع  )
وبعدها بدقيقة تدق عليه وحده من الشارع ..... 
هلا والله ... هلا وغلا ... وينكم من زمان؟ لالالا حتى لو مشغول أفضالك بس أنا كنت رايح المكتب أوقعلي كمن شيك واقفات  ( وهو ملحط وجواله سوح )
قلتلكم في البداية أني مالقيت سبب 
بس وأنا أكتب أقتنعت أن السبب قلة أحترام لبعضنا البعض 
أنا ما أحط اللوم على الوزارة أو المحل أو الخطوط أو ماكدونالدز 
أحط اللوم علينا حنا 
الجهات هذي كلها تتصرف من واقع ثقافتنا وأسلوب تعاملنا مع بعض (قلبت على اللغة الفصحى  )
وما جابت شي من راسها
وحنا إللي نشتغل فيها ونشغلها وتمثلنا ونمثلها 
وإذا ماغيرنا إللي في أنفسنا ماراح يتغير شي
عشان ما أطول عليكم (ألا طولت وخلصت..خلص علينا بس )
أختلاف الرأي لا يفسد للود قضية 
أحــــــــــــــــــــــــتــــــــــــــــــــرامــــــــــــــــــي لـــــــــــكـــــــــــــــــم
 | 