نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - انـــا والـــصـــخـــرة والــبـــنـــات !!

حمـ(الهلالي)ــد · #1 23/02/2011, 03:35 PM

يعني عشان انّا غلابا ومساكين ,, والا عشان احنا نخاف القطاعة

انا والصخرة وباقي البنات .. كيف يعني ماني فاهم , افرح والا لا

يعني وش فايدتي من الاخضر اللي اشيله بكل مكان !! من سنين وانا والصخرة والبنات مالنا بالطيب نصيب , طيب ليش والى متى وهل فيه بوادر امل او بوادر مشاعل او بوادر خزنة ,
يعني مكتوب علينا نشوف الخير يمين ويسار وحنا ماغير نصفق والا نقول لهم مبروك.. طيب نبي احد يقولنا مبروك ياحمد او مبروك ياصخ صخ او مبروك يابنات جاتكم زيادة جاتكم مكافأة .

القصة ومافيها اني انا واخوي الصخرة واخواتي البنات مواطنين لكن في ناس يشوفونا مواطنين وفي ناس لا مايشوفونا مواطنين ولاشي , اقولكم كيف !! انا والصخرة موظفين قطاع طرق قصدي قطاع خاص ومسحوب على ام امنا في هالبلد لازيادات ولا مكافآت << يحلم الأخ ,, لاوالله مابي مكافآت ابي حقوقي ابي نظام يحميني ابي بابا عبدالله يقول مساء الخير ياموظف قطاع خاص , يعني الى متى وانا مسحوب على خشتي بالشركة لازيادات ولاحقوق ولا اجازات مثل العالم واللي يصير لموظف الدولة مايصير لي , ليش مولود بقوطي والا عشان طول اكمام بشتي قصيرة !! ياخي ملينا والله ملينا والا الاسعار عالية على موظفين الدولة بس والا الإيجارات يعاني منها موظفين الدولة بس , طيب حسو فينا , يعني مافي ذمة ولاضمير مستتر ولا متوزي ولا هنا والا هنا , المشكلة في كل دول العالم حتى الداج القذافي يمكن عنده حد أدني للأجور الا هنا في بلد التطور والنهضة والمدري وشو لايوجد نظام للحد الأدنى من الأجور واللي هو معمول في كل الدول اللي ماعندها قناة أولى ,
يعني الموظف مهما كان يشتغل في شركة في مصنع في مزبلة التاريخ يبقى له حد معين من الراتب ماينزل عنه , مثل خمسة الاف ريال , مهما كان العمل او الشغل اللي يشتغله بحيث يكون له الحد الأدنى من الكفاف والعيش , لكن هنا داجين هاجين لا حد ادني للأجور ولا غيره , يعني انا والصخرة متزوجين وعندنا عيال ( انا ماعندي والله كريم

) ليش مالنا 15% بدل غلاء معيشة !! وش السبب وش المانع وش دواس ووش فتون !! ليش ماعندنا جواز اخضر والا مانسكن بالسعودية والا عشان حنا حبيبة ونعشق بصدق << وش دخلها

والا الينات ياهو عندهن حظ طايح في هالبلد , قوانين وقوانين ومن ثم قوانين ويتلوها قوانين عشان ماتحتفل بالفلنتاين !! ياعمي البنت تبي تتوظف تبي تعيش مثل العالم والناس الى متى والنظرة للبنت انها بتدج وتطلع على كيفها , ابي اعرف من حط هالفكرة في بالنا , نرجع لمحور حديثنا واللي هو دجة البنات , طيب ليش مايصير مكافأة للبنت بمناسبة شفاء الملك بمناسبة رجوع ولي العهد بمناسبة 100 سنة بمناسبة طلاق وضحى من مطلق اي مناسبة المهم حسسوهم بالمواطنة , لاوظايف ويشيلن اعلام بالشوارع لاحقوق ومع هذا يحتفلن باليوم الوطني ومحجرين لام امهن ومع هذا صامدات مثل القذافي سيء الذكر

,,

ياخي البنت تبي توظيف بالتعليم بمكان يسترها ويستر زوجها واذا ماهي متزوجة تحول لي ربع الراتب عشاني اطالب بحقوقهن

, البنت تبي تخصصات تناسب سوق العمل النسائي البنت بي حلول تبي ترتقي بفكرها ودها تخدم البلد .. البنت الشابة تبي يصير تقاعد لكبار الموظفات اللي عمر الوحدة منهن 60 سنة ومع هذا باقي مديرة والا مشرفة وتشوفها متشددة ولاتقبل انظمة جديدة وتعقيد , طيب هالمومياء احيلوها للتقاعد وحطو بنت توها متخرجة مكانها وخلوها تطور من العمل والنظام , البنت اذا لقت شغل مناسب بتنثبر بالبيت بعد الدوام << معليش بنقسو عليكم لزوم المطالبة

عاد اقولكم انا موظف قطاع خاص من سنة جدي ماعمري عيدت بيوم وطني لاني بشركة والشركة ماتسمح لنا نعطل ولا بيوم مئوي او يوم فالنتاين او او او حتى اجازة السبت مافي امل نكمل النومة الى 11 الصباح لا انت موظف قطاع خاص , اصلاً اذا طولت بالنومة بتجيك ساعة الخراشة بتمشي مليون وتصقع في جبهتك وتقول يانايم وحد الدايم اومو ياللي مابتدومو انتو بالقطاع الخاص مايصير تنومو انتو مسحوب على ام امكم قومو ,

طيب اقول لكم شي انا متنازل عن الإجازات ومتنازل عن العطل الوطنية وموافق ماروح اشوف البنات بالتحلية يوم العيد الوطني لاني مداوم لكن ابي زيادة مثل العالم والناس , غلاء معيشة وارتفاع ايجارت وحتى الكفرات ارتفع السعر , حتى السكر ارتفع يعني اني سلعة غذائية

ولا للحين ماجاني بزر يبي طوط ويبي حليب ويبي ملابس .. الله يرحم ايام اول من يوم عمري يومين وانا اطلع برا البيت واهلي مايشيلون همي وهمي معيشتي , شايفين كيف اطفال الوقت مدلعين مثل ماقال القذافي : البيك فوس خرب الشباب

وعلى فكرة انا عندي مكرمة لي وللصخرة وللبنات وهي كالتالي ,, خمسين ريال مكفأة لي مني وانا اقوم واعطيها اخوي الصخرة والصخرة يعطيها للبنت والبنت ترجعها لي وبكذا كلنا نحصل على مكرمة مني واشكرني على مكرمتي ويشكرني الصخرة وباقي البنات ,, على الأقل جاكم خمسين ببلاش وش تبون

شكلي شكلي طولت ,, نشوفكم على خير ,,