بسم الله الرحمن الرحيم ..
طبعًا وقبل كل شي .. يقولون :
لولا اختلاف الأذواق لبارت السلع! .. يعني اختلافي معك من وجهة نظري ما يعني أبدًا إني أحاول اقنعك باختياري وأخليك نسخة مني وتختار معي .. لا أبدًا .. إنما اختياري من منطلق نظرتي وثقافتي ومنطقي وتصوراتي الخاصة فيني .. واختيارك برضو من منطلق هالأشياء الخاصة فيك .. ما يمنع إننا كلنا نكون صح .. ويمكن واحد فينا أصح .. لاحظ إني قلت "
يمكن" !
الإخوان عشاق الدوري الإنجليزي .. يرتكزون على حجج يشوفون إنها قوية .. من أهمها مثلاً .. إنهم يعتقدون إن دوريهم
"مؤخـرًا " ما فيه توم وجيري .. المنافسة فيه شديدة .. وكل الفرق قوية .. والحقيقة تقول إنه في آخر عشـر سنوات ..
نصف بطولات الدوري .. لاحظ إني أقول نص يعني خمس بطولات من عشر راحت لفريق واحد بس .. اللي هو
سلفر 
عفوًا أقصد مانشستر .. وثلاث لتشلسي .. وثنتين لأرسنال .. وما فيه خلال هالعشر سنوات إلا سنتين تقريبًا كان فيه الفريق ثالث الترتيب قريب بنقاطه من الأول والثاني .. أما باقي السنوات فكان الفارق أحيانا كثيرة عشـر نقاط أو أكثر بين الأول .. والثاني .. لاحظ .. بين الأول والثاني .. والأرقـام ممكن تدلنـا على إن هالحجة غير صحيحة إطلاقًا .. ففريق مثلا يفوز لحاله بـ 50% من عدد البطولات هذا شي ما يوحي إطلاقًا إنه ما فيه في الساحة توم وجيري ما فيه إلا توم أساسًا وجيري ما له حس بس أوقات يطلع ويتقمص شخصيات مختلفة ..
وبعدين إذا قسنا بهالمقيـاس .. راح نشـوف إن الدوري الألماني هو أقوى وأفضل دوري وأكثرها إثارة
في الحقيقة مو في الإعلام والتسويق خلال السنوات العشر الأخيرة .. ففيه خمس فرق أبطال للدوري : بايرن ميونيخ وفولسبورغ وفيردر بريمن وبروسيا وشتوتقارت .. وفي أحيان كثيرة كان التنافس شديد جدًا .. مثلا 2009-2008 فولفسبورغ كسب الدوري بـ 69 نقطة والخامس لاحظ
الخـامس هامبورغ بـ 61 نقطة بل
السادس بروسيا دورتموند بـ 59 نقطة .. ! ركز معي
الخامس والسادس موب الثاني ! ودوري 2001-2001 بروسيا حصل على البطولة بـ 70 نقطة بفارق تسع نقاط فقط عن صاحب المركز الخامس شالكه ـ 61 نقطة !
لاحظ إني أتكلم لك عن الفرق بين الأول والخامس في الأمثلة اللي جبتها ما تكلمت عن الثاني ولا الثالث ولا الرابع! بل إننا إذا قسنا بهالمقياس راح نشوف إن الدوري الأسباني أفضل نوعًا ما من الدوري الإنجليزي .. أو على الأقل مثله تمامًا .. وبنلقى أربع فرق فازت بالدوري هي البرسا والريال والفالنس والديبور! البرسا أربع والريال أربع والفالنس 2 والديبور 1 .. بل إن الدوري الإيطالي ما راح يكون أقل من الإنجليزي لأنه في السنوات الأخيرة فاز فيه خمس فرق هي اليوفي ولاتسيو وروما والميلان قبل أن يسيطر عليه الإنتر لظروف معلومة من الجميع تقريبًا ..!
بالنسبة للحجة الثانية اللي يعتبرونها الإخوان ركيزة قوية لهم في الاستشهاد بقوة الدوري الإنجليزي والفرق الإنجليزية .. وهي سيطرة الإنجليز على الدوري الأوربي في السنوات الأخيرة
فمقولة عارية من الصحة تمامًا ..! لأنهم بكل اختصار ما حققوا إلا بطولتين من العشر .. وحدة مان يو ووحدة ليفر .. بينما حقق الأسبان أربع بطولات والطليان ثلاث .. بل إنه فيه سنتين من هالسنوات العشر حصل فيها انتكاسة أوربية للفرق الإنجليزية .. أولها 2006- 2007 يوم وصل الميلان لنصف النهائي مع ثلاث فرق إنجليز وأقصاها كلها كأول مرة في تاريخ البطولة يحدث فيها تأهل ثلاث فرق من بلد واحد لنصف النهائي وخسارتها كلها للبطولة! والفرق هذي ماكانت بلاكبيرن وويست هام ونوتنقهام لا بل كانت من فرق المقدمة في البريمير .. تشلسي ومان يو والليفر .. وكرر برشلونة في 2008 -2009 الشيء نفسه ..وأخرج الآرسنال والتشلسي والمان وفاز بالبطولة .. يعني في ثلاث سنوات المأساة الكروية نفسها تتكرر للإنجليز .. ويمكن يجي واحد مطفي النور ويقول لي وصول ثلاث فرق لنصف النهائي هذا بحد ذاته دليل .. طيب بأقول له الدليل الأكبر خروجها كلها على يد فريق واحد! وبلغة النسبة والتناسب 25% تتفوق بقوة على 75% .. والمفروض وكان الطبيعي إنه الـ 75% هي اللي تفترس الـ 25% ..
ومثلما قلت سابقًا في حكاية سلفر ورفاقه .. الدوري الإنجليزي كان خامد إعلاميًا لفترة طويلة حتى منتصف التسعينات .. بسبب الإصرار على أسلوب اللعب الممل .. ومعروفة المكابرة والفوقية الإنجليزية أعتقد .. إلى أن بدأ الإنجليز في التفكير جديًا بانتهاج طرق لعب أخرى .. والاستعانة بخبراء أجانب .. غير إنجليز يعني .. ولعلك تلاحظ إن كل فرق المقدمة مدربينها وأغلب وأبرز لاعبينها غير إنجليز .. بعكس الفرق الأسبانية والإيطالية .. بل إن المنتخب الإنجليزي نفسه من فترة يستعين بفنيين من خارج البلاد .. وهذا يدلك على اقتناع الإنجليز أنفسهم بأن فلسفتهم الكروي لك عليها .. وعلى إن خامة اللاعب الإنجليزي يبي لها شوي شغل وتعديل .. وما كان عندهم أدنى شك إنهم ما يقدرون ينافسون الدوري الإيطالي أو الأسباني حتى في ذاك الوقت .. لقوة وجبروت الدوري الإيطالي وبعده الأسباني في ذلك الحين .. بعد كذا خدمتهم بعض الظروف اللي حصلت للدوري الإيطالي .. وقبل الكالشيو بولي .. أولها الظروف المادية والضرائب الباهظة .. وكملتها الكالشيو بولي .. فخفت وهج الإيطالي هذي حقيقة للأسف .. وبرز اسم الإنجليزي خصوصا مع تسليط الضوء والتسهيلات لرؤوس الأموال .. لكن بقي الليقا ينافس بقوة والسبب معروف طبعًا .. سحر البرشا والريال في كل العالم منتشر .. لأسباب كثيرة .. ومن أهمها القوة المادية للفريقين والدوري ككل .. وعلى فكرة أنا والله لا برساوي ولا مدريدي ولا حتى عاشق أسباني .. ولكن المتعة تفرض نفسها مثلما المنطق يفرض نفسه !
اعتذاري للإطالة .. ويمكن أرجع .. مع كامل احترامي والاختلاف لا يفسد للود قضية .. المسألة أذواق فقط .. وشكرًا لك أخوي رشود على استثارة أقلامي وأفكاري ..
أخوكم علي
