اول شي اللهم لك الحمد حتى ترضى ولك الحمد اذا رضيت ولك الحمد بعد الرضى

آآآآه يالمباراة

انا قصتي قصه وراح اقول لكم وش اللي صار بالضبط

اول شي احنا مسافرين لاندونيسيا وجالسين بمنطقة بونتشاك (الجبل)

ومزهبين وضعنا بالفله ومطلعين الجلسة والتلفزيون بحديقه الفله بس المشكلة كل اللي معي مب يم الكورة ابد بس معطيني جوي

وقبل تبدا المباراة والعيال يتريقون علي ويقولون هاه يالمحلل وش نظرتك للمباراة قلت لهم خل تجي التشكيلة واقول لك نظرتي>>>اقعد يالشنيف


جت التشكيلة الغبيه من جريتس وقلت لهم اكبر غلط يحط محور واحد لان الغرافه مستميت وماعنده اللي يخسره والمشكلة ان الدفاع عليهم اخطاء بالتمرير وما جا اللي يستفيد منها

وهذا اللي صار باول دقيقتين

ولما جا الثاني قلت لهم اذا ما تدخل المدرب وطلع الفريدي ودخل البرقان بتروح على الهلال
والمشكلة انه طلع الفريدي ودخل العابد وبصراحه مدري وش يبي المدرب من التغيير هذا

وحنا ننتظر الهلال يفز ويجيب هدف جا الهدف الثالث وقتها قلت لهم مافيه معمول والقهوه خلصت بروح اجيبها من البقاله قالوا العيال يامنلحس القهوه مليانه بالعزبة ومانبي معمول نكمل على باقي التمر

جا الشوط الثاني وضيع ياسر كم هدف ومع كل هجمة تضيع يختفي فنجال والا بياله من الصينية

جت الاشواط الاضافيه وكني شفت ولي متحرك والمحياني لبى قليبه داخل قلت لهم يا جماعه الهلال بيتاهل ان شاء الله واذا ما تأهل باقي رحلتكم على حسابي

جا هدف الغرافه الرابع وقلت ياعيال انا مازلت عند كلمتي وطلعت بطاقة الفيزا وظلعت باقي السيولة اللي عندي قلت لهم هذه قدامكم والهلال بيفوز

جا هدف الهلال الاول والله اني فرحت بس ما قمت اناقز واصارخ والعيال مستغربين قالوا ما شفناك انبسطت قلت الهدف ذا ماله طعم الا اذا جا الثاني

وما امداني اخلص كلمتي الا عيسى جاب الثاني وقتها طمرت من مكاني وقعدت ادور على الفله وطلعت برا الفله وواحد من العيال يلاحقني يحسبني انهبلت ومسكني قال تعال لا تفشلنا ورجعنا لجلستنا الا كل شي متكسر البيالات والفناجيل والطاولة اثر العيال بعد متحمسين وكسروها من المناقز

طبعا يوم رجعنا لقيت نفسي بدون البلوفر والتي شيرت اللي كانوا علي وكنت مرطرط من المويه قال خويي يا مهبول وانت تقامز فصخت كل شي وطبيت بالمسبح


عاد الحين قاعد ادفع ضريبة الفرحة.... درجة الحرارة 39 والحلق ملتهب والفكس شغال


يارب ياكريم تفرحنا بآسيا