هلابك زيـاد ، مونديال 2010 غريب فعلا ، ويمكن فيه احد يشاطرني الرأي في ان هالمونديال ماحس ان فيه اجواء المونديال الحقيقيه .. مو مثل مونديال 2006 تحس فيه حماس وتحس الجو العام جو كاس عالم حقيقي وملاعب فخمه ومنتخبات تقدم افضل من اللي قدمته في كاس العالم الحالي ، حــتى الكوره  في 2006 كانت احلى .  المنتخب الايطالي انا بوجهة نظري كل اللي صار له يتحمله ليبي فقط ، وش سوا ليبي عشان يهيأ الفريق لبطوله مثل كأس العالم ؟ ، وش سوا عشان يحافظ على لقبه ؟ .. احس ليبي جاي يتونس مو عشان ينافس ويحافظ على لقبه !! .. فريق ضايع ومشتت على مستوى كل الاصعده والحسنه الوحيده هي ان ايطاليا كسبت نجم واللي هو مونتليفو .. نتكلم عن الاساس وهو ضم اللاعبين وين كاسانو ؟ وين توتي اللي كان مقدم مستوى حلو مع رومــا ، ليه العناد !! ليه الا المجموعه اللي لعبت في 2006 وماترضى في غيرها !! .. كرة القدم لعبه جماعيه ولعبه متجدده وكل جيل يقدم اللي عنده وبعد كذا ينتهي ولكن !! ،، نفس الامر مع دومينيك .. اصرار عجيب على بعض اللاعبين والنتيجه !! خروج مبكر وجلب العار وتلطيخ اسم المنتخب الفرنسي والسبب قناعات غبيه وعقيمه ،، وين نصري ووين بن عرفه ووين بنزيمه ؟؟ صحيح بنزيمه لاعب فشل حتى الآن مع ريال مدريد وربما ينسجم بنزيمه اكثر ويسطع نجمه في المواسم القادمه مع الريال لكن يبقى لاعب جيد ولديه الحلول في الاوقات الحرجه .. بلاشك دومينيك في 2006 كان جيد ويمكن البعض ينسب وصول فرنسا للمباراه النهائيه لزيدان وحده وزيدان اسطوره ويشيل منتخب ولكن اعتقد ان حتى دومينيك له يد في ذلك الوصول وماننسى اللاعبين الجيدين اللي شاركوا في 2006 . اسبانيا وانجلترا يتشابهون في شيء ببداية المونديال ، وعلى العكس تماما في النهايه في بداية المونديال كلهم بدأو بدايه سيئه ، ولكن الفرق هو ان ديل بوسكي انقذ المنتخب الاسباني وصحح مايمكن تصحيحه وهاهي اسبانيا الآن تصل النهائي ، وعلى العكس تماما كابيلو ورغم محبتي لهذا الشخص الا انه لم يقم بدوره كمدرب ،، اللاعبين يتحملون بعض الشيء لأن اغلبهم ماظهروا بالمستوى المعروف عنهم ولكن ماشفت اي تدخل من المدرب لتعديل الوضع والنتائج الغريبه للمنتخب الانجليزي .. ماشفنا تغيير في التشكيله الا ديفو مكان هيسكي فقط ،، مدري وين منتخب انجلترا حق التصفيات اللي كان له شأنه في أوروبا . الارجنتين كنت عارف ومتيقن تماما خروجها على يد المانيا ،، منتخب مارادونا ماقابل منتخب قــوي تحكم عليه منه .. الى أن قابل المانيا وشفنا اللي صار .. رباعيه قاتله واختفت ارجنتين بداية المونديال رغم انهم قدموا مستوى جيد في البدايه لكن مثل ماقلت ماقابلت فريق قوي وممتاز عشان نحكم على الارجنتين مع مارادونا ،، البرازيل غريبه فعلا .. يتقدم على هولندا بهدف و بدقائق ينقلب كل شي عليها .. هولندا وبقيادة مدربهم مارفيك عرفت كيف يهيأ اللاعبين نفسيا ويشحن الحاله النفسيه بشكل ممتاز واصرار غير طبيعي على الفوز ، اعتقد ان المنتخب البرازيلي تهاون بعض الشيء في المباراه ولكن كرة القدم ماتعرف لاصغير ولا كبير ،، من يلعب افضل يتفوق .. وشفت مقطع يبكي سيزار فيه بحرقه وواضح انهم ماتوقعوا هالخروج . الف شكر زياد ، مبدع يالغالي كعادتك ودائما تتحفنا بكتاباتك في منتدى الجمهور او هنا وياليت نشوفك بعد في العالميه . موفق ... 
اخر تعديل كان بواسطة » 20 الكاسر ياسر 20 في يوم » 10/07/2010 عند الساعة » 06:17 PM | 