.

إقتباس الرسالة الأصلية كتبت بواسطة الهنوووف - هلا والله بسفير الرياضة العالمية دائما الاشخاص الي التقي بهم ببداية دخولي لاي مكان يظلون بذاكرتي و هلالي موت من الاشخاص الي حصلت بينا مواقف وذكريات ببداية دخولي للشبكة فمانسيته (بداياتي تفشل استر ماواجهت :$) وللحين اذا ماحصلت مشرف بالمجلس اروح ازعجه ومايقصر والله يحرجك بطيبته ماشاء الله من الاشخاص الي يجبرونك على احترامهم يتميزبـ هدوء واخلاق وطيبه قلب نحسده عليها حتى بالاختلافات تجده عقلاني جدا و اتشرف اني اعتبره اخ لي عاد انا لو تخلوني اتكلم عن الضيف ماخلصت ماشاء الله دائما الضيوف لهم مكانه بقلبي ومهما تكلمت ماراح اوفيهم حقهم

هلا بـ فراشة المجلس
الله يخليك ويبارك فيك .. شهادة اعتز فيها واتمنى اكون استحق هالكلام الطيّب .. وبالنسبة للعمل كلنا يا هنوف في خدمة الشبكة واعضائها و زوارها .. وما سويت الا الواجب علي .. بالنسبة للبدايات باللهي من اللي بدا كويس هنا .. اسكتي بس لا ينكب العشا .. شكراً لك مرة ثانية .. والكلام الطيب اللي قلتيه بحقي تراه بعض مما عندك .. نروح للأسئلة :

إقتباس * لكل منا هوايه او موهبه يتميز بها ولملامحها وضوح بشخصيتنا ماذا عن هلالي موت؟

المواهب والهوايات كثيرة بس مدفونة او لم تجد الاهتمام
بصراحة مافي شي معين محدد شخصيتي .. احب اجرب و أحاول طبعا بحدود اكيد .. ولازم الواحد يعيش الحياة ويجرب اشياء جديدة ممكن يستفيد منها وهو ما يدري عنها اصلاً .. بشكل عام اغلب مواهبي رياضيّة .. فيه موهبة ثانية اكتشفتها متأخر بعد ما توظفت وهي الصياغة .. يعني اللي يبي خطاب والا شي يعلمني بس .. عندي موهبة ادبية بس للاسف مقصر لاني احب اعطيها وقت كافي علشان ابرزها بشكل جيد واستفيد منها استفادة مثلى بس انتظر وقت مناسب وان شاء الله يكون قريب .. نفس الشي بالنسبة للتصوير بادي اطقطق فيها و شويات ونصير راعين كاميرات
الهوايات كثيرة ابرزها القراءة والاطلاع - الرياضة - السفر

إقتباس * قصيده او بيت شعر تشعر باان كاتبه يحكي عنك ..؟

ابيات كثيرة قريتها وحسيتها تعنيني .. باحط كم بيت :

انا أكثر انسان تعلم من كثر ما أخطأ وصاب .. أنا آخـر لسان يتكلم في زمان الثرثرة
للشاعر حامد زيـد

لا تشتكي للناس جرحاً أنتَ صاحبهُ .. لا يؤلم الجرح إلا من به ألـمُ
* ما اعرف القائل اللي عنده خبر يفيدنا

فلتأتني الدنيا على ما تشتهي .. أنا لستُ ممن يستبيهِ المنظرُ
للـ الدكتور عبدالرحمن العشماوي

لاني بـ ندمان على كــل ما فات .. أخـذت من حلو الزمان و رديّـة
هذي حياتي عشتها كيف ما جات .. أخـذ من أيامي و أردّ العطيّة
للامير خالد الفيصل

إقتباس * من خلال عبورنا في هذه الحياة لابد من محطات او مواقف (تعليميه - عاطفية -اجتماعيه ) توقفنا وتغير الكثير بداخلنا نحو الافضل وقد تكون نحو الاسوأ ..؟

وين السؤال
المواقف كثيرة والحمدلله ما فيه شي غيرني للأسوأ .. كلها تجارب ان شاء الله انها فادتني وعلمتني اشياء كثيرة منها الصبر وعدم الملل والواحد لازم يكون طويل بال وما يستعجل النتائج وان اي تعثر هو مجرد مطبات بسيطة بالعمل و التصميم و الارادة نقدر نتجاوزها .. دايم العثرات اعتبرها دافع للتغيير نحو الافضل .. هذا المبدأ اللي معوّد نفسي عليه وان شاء الله ما راح يتغيّر لانه مريحني كثير

إقتباس *بما ان الجانب الرياضي بحياتنا يشكل هوايه او ميول ونكون صريحين اكثر جانب مانستفيد منه بكثر مانعطيه من وقفتنا وبما انك احد المشرفين على قسم رياضي ماتحس ان هالشي اخذ منك الكثير رغم قله الفائده التي تكتسبها من القسم طبعا غير الصداقات يعني ماتمنيت انك كنت مشرف بقسم غير رياضي حتى تستفيد منه .؟

ممكن اتفق معك ان الموضوع مجرد تسلية بس هالشي ولله الحمد ماهو كل حياتي .. اوكي يومي لابد يحتوي مباراة والا ثنتين بس هالشي ما يعني اني مهمل الاشياء الثانية .. زي ما قلت انا انسان مطلع بطبعي علشان كذا تشوفوني دايم عندكم بالمجلس .. على فكرة احس لو كنت مشرف بالمجلس مثلاً الفايدة اللي اكسبها مو مثل لما اكون مشرف على قسم آخر او عضو عادي بحكم ان المشاغل تبي تكثر وتمنعني اكون مطلع زي الاعضاء الاخرين .. والشي الابرز بعد شخصياً يهمني اشوف الاعضاء اللي يزورون القسم المسئول عنه مبسوطين و راضين عن الخدمة المقدمة لهم و الجو المريح اللي يلقونه يعني على قولتهم ركبت المركب لازم اوّصله للآخر .. مرتاح بالعالمية وهناك احس اني اقدر اعطي اكثر من الاشراف على مكان ثاني وهذي زبدة الجواب

إقتباس * أشخاص لهم وقع في حياتك ولن تمحاهم ذاكرتك حتى لو ابتعدوا سوا بحياتك العامه او مسيرتك الدراسيه مع ذكر السبب ؟

الوالدين الله يحفظهم ويطوّل باعمارهم .. جميع مدرسيني في المرحلة الثانوية كان لهم اثر كبير صراحة في تكوين شخصيتي .. صديقي احمد (مغرور)
وفيه اشخاص كثير مروا بحياتي وكان لهم اثر كبير ومواقف كثيرة في حياتي العامة ومستحيل انساهم

إقتباس *لو منحت جواز سفر واقامة دائمه لك ولعائلتك الحاليه او المستقبله - ان شاء الله- في احد الدول ماذا ستختار ولماذا .؟

مافي بلد معين والله يا هنوف .. بس اقامة دائمة ؟!
ما راح نلقى أحسن من هالبلد بكل مافيه
ما يمنع اقول اني حبيت هدوء تونس كثير مع ان البلد عايش على طابع اوروبي بحت .

إقتباس سؤال خفيف فوق البيعه ماهي كنيتك واحب الاسماء لك المذكره والمؤنثة ...؟

مافيه كنية معينة .. ابو نايف .. ابو حميد .. حمادة .. بس اكثر اسم ناداني فيه احد وعجبني حتحوت و كلن على مزاجه .. احب الاسماء بالنسبة للمذكرة مافيه شي معيّن بجد .. نواف يمكن .. المؤنثة يعجبني اسم لمار كثير .

إقتباس اتمنى مااكون طولت عليك والي مايعجبك احذفه سعيدين بـ هالاستضافه والشكر لك على ان منحتنا هذه الموافقه

انا اسعد هنوف .. شكراً لك على هالاسئلة خذت مني وقت شوي بس مو مشكلة نردها لك ..