مهما قلنا وحكينا والفنا قصص و روايات .. والله ما بنعطي هالمبارة نص حقها !
كثرت الأسمـاء و الألقاب لهـ المبارة .. وكثرت معها المقارنات وكثير الي قلل منه واعتبر بعض المبـاريات افضل منه فنياً ولكن ومع كل هذا
يبقى الكلاسيكو أفضل مبـارة في الموسم ينتظرها كل العالم بكل حماس وشغف كيف عاد جماهير الفريقين !! .. وكيف عاد اذا كانت هالمبـارة
بالذات تحدد هوية بطل لـ الدوري !!
مهما حاولتوا .. كذابين !!
سمعنا تصريحات كثيرة في الأيام الي راحت .. يمكن أبرزها كان تصريح من المدير العام في ريال مدريد خورخي فالدانو والي قلل من المبارة معتبر انها ما بتكون الحاسمة في مشوار الفريق لـ لقب الدوري .. معليش يالفيلسوف 
.. المبارة هذي هي أهم مبارة لـ فريق بيريز هالموسم .. شي ما يبيله اي كلام اما اننا نحقق اللقب هالموسم .. وهالمبارة بالذات راح تكون طريقنا .. او اننا ننهزم ونريح خلاص ونبدا نحضر لـ الموسم القادم ونحط خيارتنا وندرس اخطائنا الي خلتنا نطلع هذا الموسم فاضين ! الشيء الأكيد .. انه مهما صار .. مشروع بيريز مستمر لـ 5 مواسم قدام .. موب مبارة وحدة تهدم هالمشروع الجبـار .. صحيح اني كـ مشجع اتمنى اني افوز
بهـ البطولة وعلى أكبر عدو لي والمبارة على ارضي وفيها رد دين لـ مبارة العام لكن برضوا ما اكسر كل الي وصلنا له من تطور في المستوى عشان موسم فشل
فيه فريق جديد عمره 8 او 9 شهور انه يطلع ببطولة .. واتذكر دايم ان بناء فريق ما يكون في موسم واحد وياما اندية وصلت لـ منصات التتويج بعد ما عانت سنين كثيرة
حتى وصلوا لـ الهدف الي هم يبغونه .. أقرب مثال .. الفريق الي بنقابله بكرة !!
النتيجة هنا !!
مع كامل احترامي لـ كل الي يقول المبارة بين ميسي و كريستيانو .. المبارة اكبر من كذا وهي بين هالراسين .. بيللغريني و بيب .. سبق لهم تقابلوا قبل
هالمبـارة 3 مرات .. مرتين لـ بيللي مع فياريال ومرة مع الريال النتيجة ان بيللي ما قد حقق اي فوز على بيب خلال هالثلاث مباريات .. تعادل في مبارة
وحدة وهزيمتين .. الأولى مع فياريال في المدريغال 2-1 في الدور الاول العام والثانية مع الريال هالموسم 1-0 في الكامب نو في أول كلاسيكو
لـ الشيبة مع الريـال
الشي الطيب هو سجل الشيبة مع برشلونة .. لما نستعرض مسيرته مع فياريال نشوف انه ما كان ابداً يهزم بسهوله .. من 2004 وحتى
2009 .. 5 مرات انهزم وفاز في 4 وتعادل في 4
مع فريق بـ امكانيات فياريال يعتبر سجل مميز جداً خصوصاً ان البرسا في هالفترة كان يمر بطفرة كروية اعطته بطولتين تشامبينز و 3 بطولات دوري وهي الفترة
الي يعتبرها الكثير الأفضل لـ برشلونة من تأسيسه بهالكمية من البطولات الي خلته يتفوق على عدد من الاندية بالبطولات الي حققها .
في المقابل .. بيب سبق له قابل الريال في 3 مباريات .. حقق الفوز فيها كلها .. الأكيد محد بينسى نتيجة مبارة البرنابيو العام الماضي وان بيب كان بطلها الأول
التشكيل الصحيح .. قرائة اسلوب الخصم والحد من خطورته .. تحديد نقاط القوة والضعف والأعتماد عليها .. هي الي بتعطي واحد فيهم النتيجة .. بيللي مطالب انه
يفوز ولا اي شيء ثاني غير الفوز .. بيب التعادل مكسب له لأنه راح ياخذ المركز الأول اوردي .. لكن توقعي انه ما بيدخل المتش وهو يدور عليه لأن هدفه الأول هو
الفوز و الفوز فقط .. الراحة بتكون اكبر والأسبقية بتكون لـ فريقه بـ 4 نقاط قدام مدريد .. 3 نقاط من المبارة والفارق بين الفريقين ونقطة التفوق الي تعطي الخصم
التفوق و الفوز بالبطولة .. الخبرة في صف بيللي و الخبث مع بيب .. فريقين بنفس الصبغة الهجومية البحته لكن بصفته نهائي راح يكون القلق والخوف اكبر !
الخطورة و الحسم .. ميسي و رونالدو .. متفق عليهم انهم اخطر لاعبين في الفريقين وانهم مفتـاح لـ انتصارات فرقهم .. ميسي مع مستواه المجنون في
اخر المباريات .. ورونالدو الي اثبت احقيته بالمبلغ الكبير الي دفع فيه بالصيف .. مبارة بتكون نارية بين هاللاعبين .. سبق وتواجهوا اكثر من مرة .. رونالدو فاز
مرة وحدة وميسي مبارتين .. افضل لاعبين في العالم خلال الموسمين الماضية أكيد بيعطوا الكلاسيكو نكهة وصبغة ثانية رغم الغيابات الكبيرة الي بتحصل فيه !
غياب ايبـرا من البرسا و غياب كاكا من الريال .. اللاعبين الي كانت لهم الكلمة في مبارة الذهاب .. ايبرا الي حسم المتش وكاكا الي عمل احلى متش له مع الريال بعد
ما صنع اكثر من كورة هدف لـ زملائه .. لكن في الفترة الأخيرة يعتبر غيابهم موب بحجم التأثير المرتبط مع اسمائهم .. ايبرا غاب كثير عن البرسا ومع ذلك ظهر ميسي
بأسلوب مجنون وشكل خطورة أكبر من الي يشكلها ايبرا في العمق ويكفي انه الهداف الاول لـ فريقه في الدوري و التشامب .. الكلام ينطبق على كاكا ولكن بدرجة اقل من
أيبرا .. صحيح انه ما قدم المستوى الخرافي الي يذكرنا بـ كاكاو 2008 والأبداع الي سحر العالم .. لكن كاكا دائماً ما تكون له بصمة في مباريات الريال ويكفي اختياره
أفضل لاعب وسط في الليغا قبل شهر بـ عدد اسيست 7 وزيهم اهداف .. مثل ما قلت واعيد ان الغياب ماهو بكبر الأسمـاء لأننا لسى ما شفنا المستويات الحقيقة
لهـ النجوم مع الفريقين بعكس مثلاً ميسي و رونالدو وتأثيرهم الكبير على نتائج فرقهم !!
هجومياً هيغوآين يشترك مع رونالدو وميسي في التهديف و الخطورة .. ولو ان الغالبية تفقد الثقة فيه في مثل هالمباريات الكبيرة .. لكن العزاء الوحيد ان هيغواين
سجل في مناسبتين في البرسا بعكس لما يلعب في التشامبينز ويختفي ويضيع .. من جانب البرسا هنري ما راح يكون له تأثير وتوقعي انه بيكون على الدكة بعد ما نـزل
مستواه في الفترة الاخيرة .
لاعبين يجمعون معنى كلمة وحدة .. ’ الأنـاقة ’ ممكن يختلف التركيب الجسماني بينهم .. لكن الخصائص في الملعب متشابه الى حد كبير بينهم .. التنظيم .. النظرة الثاقبة لكل زوايا الملعب .. التمرير الصحيح !! هم ملاٌك وسط الملعب في مبـارة بكرة .. من يفرض نفسه على الثاني بيساعد فريقه بنسبة كبيرة انه يطلع بنقـاط المتش .. تشافي يمكن يفقد في بداية المتش توأمـه الروحي انيستا .. التعويض ممكن يكون بـ بوسكيتس الجيد جداً و كيتا الي بيكون دوره الدفاعي اكبر من الجهة اليسرى والي بتكون اضعف بتواجد ماكسويل وبغياب ابيدال .. الونسو بيكون متواصل مع المبدع في اخر المباريات قـاقو .. ممكن الأثنين يحكمون السيطرة على منطقة المناورة بمسـاعدة من فارت و مارسيلو .. تبـادل الكرات وعدم فقدها في مناطق حساسة + الضغط على تشافي ولاعبي وسط برشلونة ممكن يكسبهم معركة الوسط ! الأمداد الهجومي .. الريال عنده لاعبين يمتازون بهـ الميزة .. الونسو وهذا ماعليها كلام ومعروف بـ الكرات الطويلة القطٌرية .. الثاني قـاقو والي يمتاز بالثرو المميـٌز
والصعب في نفس الوقت .. والي يكسبه طابع الفشل صعوبة التمريرة في بعض الاحيان وبعد تفكير قاقـو .. الخيار الأخير الي بيكون على الدكة هو جوتي المميـٌز
في الفترة الاخيرة .. والي يقدر يلعب بالطريقتين الي يتميز فيها جاجو و الونسو والكل شاف طريقة الأسيست لـ هيغوين في متش الراسينغ .
البرسا ممكن يعتمد بشكل أكبر على تشافي في الأمداد والتمرير .. لكن اسلوب لعب البرسا يعتمد أولاً على التمريرات القصيرة في وسط الملعب والي في اثنائها يصير فيه
حركة بدون كورة ولامركزية بين ثلاثي المقدمة مع ثلاثي الوسط .. متى ما قتلت الكورة وهي في هذا الطور اكثر من مرة الريال حيسكب المعركة وممكن يخلص القيم
لكن لأن اسلوبهم معروف عند كل الأندية الا ان الأغلبية فشلت في ايقافه وهو بالفعل امر صعب جداً على اي فريق مهما كانت قوته !
بتشوفون ملعب أبيض كامل مثل ذا الله يوفق رجالنا 