من الغباء تحميل شخص واحد مسؤولية الخروج , لكن بيلّيغريني يتحمّل جزء كبير منه !!
من مُباراة الذهاب أضاع التأهّل , بدايةً بإشراك مارسيلو كظهير أيسر بعد ما كان الفريق قبلها ماشي صح بأربيلوا !! وخاطر بإشراكه بسبيل ان راموس يصير قلب .. أيضًا خلاّ ألونسو يذوق الإيقاف بدل لاس , وأشرك غرانيرو "السيّء" مؤخّرًا ..
كل هالمُعطيات تخلّينا نتخيّل عمل هجومي ومُباغته لليون , لكن النتيجة ؟! طول المُباراة الفرنسيين خاشرين الريال بملعبه .. الفريق كان يلعب وكأنّه يبي يخرج بأقل الخسائر , وإذا جينا للبيرنابيو نشوف شغلنا ..

بمُباراة الأربعاء , دخل بغرانيرو باعتباره "أفضل السيّئين" , مُساندته الدفاعيّة مُمكن خلّت مانويل يفضله على فان دير فار , ولو انّ لاس مُمكن يقوم بأدوار أفضل بحال دخول مامادو ..
تبديل مامادو بأربيلوا إلى ألحين عجزت أفهم وشّو له ؟! لو فرضنا انّك تبي تمسك النتيجة , تدخله بعد هدف تعادل ليون ؟! دامها خربانة , ليش ما دخّل لاعب يدعم الهجوم - راؤول مثلاً - , وأبقى على - السيّء - كاكا ..



هذا وش وضعه ؟! ما أقول انّي مؤيّد لدخول راؤول بداله , لكن قمّة التواضع في المُستوى أن تكون اللاعب المُختار لدخول راؤول - الأكيد - !!
ودّي ألعب على نفسي وأقول ان توظيفك خاظئ , لكن هو كان صانع اللعب - الحر - اللي الكل كان يطالب فيه .. ومع كذا , نشوف الزلابة ريفيلير يكتمه كتم ذهاب وإياب !! فوق كذا آخر لاعب يحاول يسترد الكورة بعد ما تنقطع منّه الكورة - أخبار جوتي ؟! - ..

واللي يقهرك زود , بعد مُباراة الذهاب , الفريق منهزم ويطلع يقول "حزنت لخسارة ميلان" !! وقبل هالمُباراة قاعد يتغزّل بميلان !!
على هالحواق اللي قاعد يقدمه , يطلع لنا ويقول هالكلام !!



مُباريات دوري الأبطال , تعتمد على دقائق صغييييييرة مُمكن تجيب لك البطولة , فما بالك بطعس يضيع ثلاث إنفرادات - ذهاب وإياب - لو جاب وحدة تسهّل التأهّل ..
لاعب أناني , وعلى قولة فهد "مهزوز وغير واثق من نفسه" , فرديّته مُمكن تمشّيك بالليغا , لكن بالأبطال ما توكّل عيش ..
هدفين ضد زيوريخ برابع موسم له مع الريال , أبو ريكوردك الخايس يا شييييخ !!

/
/

الريال ما زال "هش" , ما يقدر يفرض سيطرته على المُباراة كاملة , الرتم مهو ثابت , وأيضًا ما يقدر "يمتص" أي ارتفاع بمُستوى الفريق المُقابل مهما كان اسمه !!
الفريق كلّه يرتبك , كل لاعب يحاول يتخلّص من الكورة .. هالشي يتكرّر للموسم السادس على التوالي ..
الفريق كل موسم خطّه , مدرّب , لاعبين جدد .. الإستقرار هو الحل - بكل بساطة - لهالمُشكلة .. بيلّيغريني رغم انّه أخطأ , لكن أنا مع بقاءه حتّى للموسم الجاي !! مع انّه شايب , الا ان راسه مهو يابس , مُمكن يتخلّى عن قناعاته , يلحّط بالدكّة من يستاهلها ..